ಬಾಕಿಬಾಬಾಂಚಿ ಕವಿತಾ: ಏಕ್ ಭಾಶಿಕ್ ಅಭ್ಯಾಸ್
- ಭೂಷಣ್ ಭಾವೆ
ಉತ್ರಾಂಚೆಂ ಪಿಶೆಂ ಬಾಕಿಬಾಬಾಂಕ್ ಭುರ್ಗೆಪಣಾ ಸಾವ್ನೂಚ್. ಆಯ್ಕುವ್ಪಾಂತ್ ಆಯಿಲ್ಲ್ಯಾ ದರೆಕಾ ಉತ್ರಾಚೊ ಮಂತ್ರ್ ಕಸೊ ಜಪ್ ಕರಪ್ ಹೊ ತಾಂಚೊ ಸಭಾವ್. ಲ್ಹವೂ ಲ್ಹವೂ ಫಕತ್ ಉತ್ರಾಚೊ ಸುಕೊ ಮಂತ್ರ್ ಕರಿನಾಸ್ತಾನಾ ತಾಚೆರ್ ವಿಚಾರ್ ಕರಪ್, ತಾಚಿ ವ್ಯುತ್ಪತ್ತಿ ಸೊದಪ್, ಉದ್ಗಮ್/ಉಗಮ್ ಕಾಡಪ್, ನಿರುಕ್ತ್ ಚಿಂತಪ್ ಹಿ ತಾಂಚಿ ವೃತ್ತಿ ಜಾಯ್ತ್ ಗೆಲಿ.
ತಾಂಚ್ಯಾ ಭುರ್ಗೆಪಣಾಂತ್ಲೊ ಏಕ್ ಅನ್ಭವ್ ತಾಂಣಿ ಆಪ್ಣಾಲ್ಯಾಚ್ ಎಕಾ ಲಲೀತ್-ಲೇಖಾಂತ್ ಶಬ್ದ್ ಬದ್ದ್ ಕರುನ್ ದವರ್ಲಾ. ಕುಡ್ಚಡ್ಯಾಂ ಸಾವ್ನ್ ತಾಂಚೊ ಮಾಮಾ ಕಾಯ್ ಆಜೊ ತಾಂಗೆರ್ ಆಯಿಲ್ಲೊ. ಭುರ್ಗ್ಯಾ ಬಾಳ್ಕೃಷ್ಣಾನ್ ಸಬಾವಿಕ್ಪಣಾನ್ ಆಜೊಳಾ ವಚ್ಪಾಚೊ ಹಟ್ಟ್ ಧರ್ಲೊ. ತಾಚೆ ಆಜ್ಯೆನ್ ತಾಕಾ ವಚ್ಪಾಕ್ ಮನಾ ಕರ್ತಾನಾ "ಥಂಯ್ ಆನಿ ಕಿತೆಂ ನಾಂವ್ರೂಪ್ ಕರ್ಪಾಕ್ ವೆತಾ?" ಅಶೆಂ ಮ್ಹಳ್ಳೆಂ. ಜಾಲೆಂ. ಬಾಕಿಕ್ ಏಕ್ ಉತರ್ ಮೆಳ್ಳೆಂ. "ನಾಂವ್ರೂಪ್ ಕರಪ್". ಉಪ್ರಾಂತ್ ದೀಸ್ಭರ್ ತೊ ತೆಂ ಉತರ್ ಗುಣ್ಗುಣಾತ್ ರಾವ್ಲೊ.
ಅಶೆಚ್ ತರೆನ್, "ಅಪರ್ಸೂರ್ಯ್" (ಮಾಥ್ಯಾರ್ ಆಯಿಲ್ಲೊ ಸೂರ್ಯ್), "ಚತುರ್ ಸಾಬಾಜಿ" (ಆದ್ಲೆ ಮುಸ್ತಿಂತ್ಲೊ ಏಕ್ ಚತುರ್ ಗೊಂಯ್ಕಾರ್), "ಪಾಂಚಾಳ್" (ಚಡ್ ಉಲೊಂವ್ಚಿ ಬಾಯ್ಲ್ - ಬ್ರಹ್ಮವರ್ತಾಚೆ ಲಾಗಿಂ ಆಶಿಲ್ಲ್ಯಾ ಪಾಂಚಾಳ್ ದೆಸಾಂತ್ಲೆ ಬಾಯ್ಲೆಕ್ ಉದ್ದೇಸುನ್ ಬ್ರಹ್ಮಾವರ್ತಾಂತ್ಲ್ಯಾ ಲೊಕಾಂನಿ ಲಾಯಿಲ್ಲೆಂ ವಿಶೇಶಣ್-ಪಾಂಚಾಳ್- ಪಾಂಚಾಳಿ- ಪಾಂಡ್ವಾಂಚಿ ಬಾಯ್ಲ್ ದ್ರೌಪದಿ), "ಬಾಸ್ಕಳ್" ) ಋಗ್ವೇದಾಚ್ಯಾ ಅಶ್ವಲಾಯ್ನ್ ಶಾಖೆಚ್ಯಾ ಅನುಯಾಯಿಂನಿ ಬಾಷ್ಕಲ್ ಶಾಖೆಚ್ಯಾ ಅನುಯಾಯಾಂಕ್ ಉದ್ದೇಸುನ್ ದಿಲ್ಲೆಂ ಉಣೆಪಣಾಚೆಂ ವಿಶೇಶಣ್; ಆಯ್ಜ್ "ಉಣ್ಯಾ ದರ್ಜಾಚೆಂ" ಹ್ಯಾ ಅರ್ಥಾನ್ ವಾಪರ್ತಾತ್). ಅಶಿಂ ಜಾಯ್ತಿಂ ಉತ್ರಾಂ ಬಾಕಿಬಾಬಾಂಕ್ ಹೊಲ್ಮತ್ ಗೆಲಿಂ. ನಿರುಕ್ತಾಚೆಂ ಪಿಶೆಂ ಜಡ್ಲೆಂ. ಸಬಾವ್ ಕವಿಚೊ ಆಶಿಲ್ಲೊಚ್. ಎಕೊಲ್ಯೊ - ಭಾವುಕ್ - ರಸೀಕ್ - ಸೌಂದರ್ಯ್ಸಕ್ತ್. ತಾಕಾ ಉತ್ರಾಂಚೊ ಸಾಂಗಾತ್ ಮೆಳ್ಟಕೀಚ್ ಅದ್ಭುತ್ ರಸಾಯನ್ ತಯಾರ್ ಜಾಲೆಂ.
ಹೆಂ ಉತರ್ಧನ್ ಬಾಕಿಬಾಬಾಂಚೆ ಕವಿತೆಚೆಂ ಖಾಶೆಲೆಪಣ್. ಭಾಶೆಚೆರ್ ಪ್ರಭುತ್ವ್ ಆಸಪ್ ಹೆಂ ಖಂಯ್ಚ್ಯಾಯ್ ಸಾಹಿತ್ಯಿಕಾಚೆಂ, ಖಾಸಾ ಕರುನ್ ಕವಿಚೆಂ, ಅನಿವಾರ್ಯ್ ಕಸಬ್, ಅನಿ ಉತ್ರಾಂ ಮ್ಹಳ್ಯಾರ್ ಭಾಶೆಚೊ ಪ್ರಾಣ್. ದೆಖುನ್ ಉತ್ರಾಂಚೆರ್ ಪ್ರಭುತ್ವ್ ಜೊಡಿಲ್ಲ್ಯಾ ಬಾಕಿಬಾಬಾನ್ "ಆಮ್ಹಾ ಘರಿಂ ಧನ್ ಶಬ್ದಾಂಚೀಚ್ ರತ್ನೆ ಶಬ್ದಾಂಚೀಚ್ ಶಸ್ತ್ರೆ ಯತ್ನೆ ಕರುಂ" ಮ್ಹಣತ್ ವೀರ್, ಶೃಂಗಾರ್, ಕರುಣ್, ಭಕ್ತಿ ಅಶೆ ಸಬಾರ್ ರಸ್ ಆಪ್ಲೆ ಕವಿತೆಂತ್ಲ್ಯಾನ್ ಸಮರ್ಥಪಣಾನ್ ಖೆಳಯ್ಲೆ. ಬಾಕಿಬಾಬ್ ಸದಾಂಚ್ ಮ್ಹಣ್ತಾಲೆ, "ಉರ್ತಾ ಮ್ಹಣ್ ತೆಂ ಉತರ್". ಅಶೆಚ್ ತರೆನ್ ಬಾಕಿಬಾಬಾಂಚ್ಯೊ ಕವಿತಾ ಸದಾಂ ಖಾತೀರ್ ಉರ್ಲ್ಯಾತ್ - ಅಮರ್ ಜಾಲ್ಯಾತ್.
ಬಾಕಿಬಾಬಾಂಚೊ ಮಾಮಾ "ಗಾವ್ಪಿ" ಅಶಿಲ್ಲೊ ಜಾಲ್ಯಾರ್ ಬಾಪುಯ್ "ಚಿತ್ರಕಾರ್". ಬಾಕಿಬಾಬಾ ಭಿತರ್ ಹ್ಯಾ ದೋನಯ್ ಗುಣಾಂಚೊ ಸಂಗಮ್ ಜಾಲ್ಲೊ ದಿಷ್ಟಿ ಪಡ್ತಾ. ತಾಂಚೆ ಕವಿತೆಂತ್ ಸೂರ್ ಆನಿ ನಾದ್ ಆಸಾತ್. (ಬಾಕಿಬಾಬ್ ಮ್ಹಣ್ತಾಲೆ, ಆಪ್ಲೆ ಕವಿತೆಂತ್ "ನಾದ್" ನ್ಹಯ್ ತರ್ "ನಿನಾದ್" ಆಸಾ.) ತಾಂಚಿ ಕವಿತಾ "ಗೇಯ್" ಆಸಾ. ತಿ "ವಾಚನೀಯ್" ಉಣಿ ಅನಿ "ಶ್ರವಣೀಯ್" ಚಡ್ ಆಸಾ. ಉತ್ರಾಂಚ್ ಘುಂಗ್ರಾಂ ಬಾಂದುನ್ ಆಯಿಲ್ಲೆ ಭಶೆನ್ ತಾಂಚೆ ಕವಿತೆಂತ್ ಅವ್ತರ್ತಾತ್. ತೆಚ್ ತರೆನ್, ತಾಂಚೆ ಕವಿತೆಂತ್ ಗೊಂಯ್ಚಿಂ ತರೆಕ್ವಾರ್ ಚಿತ್ರಾಂ ಆಸಾತ್. "ಪಾಂಯ್ಜಣ್" ಹೆ ಗಾಜಿಲ್ಲೆ ಕವಿತೆಚ್ಯಾ ಜಲ್ಮಾ ವಿಶಿಂ ಸಾಂಗ್ತಾನಾ ತಾಂಣಿ ಮ್ಹಳ್ಳಾಂ: "... ಮೆಳಿಲ್ಲ್ಯಾ ನಿರೋಪಾನ್ ಮ್ಹಾಕಾ ಎಕಾಎಕಿಂ ವಸ್ತುಸ್ಥಿತಿಚಿ ಜಾಣ್ ಆಯ್ಲಿ. ಘರ್ಕಾರ್ನಿಚಿ ತೀವೃತಾಯೆನ್ ಯಾದ್ ಜಾಲಿ. ದಾಮುನ್ ದವರಿಲ್ಲೆ ಖಾಸ್ಗಿ ಭಾವ್ ಸುಮಾರಾ ಭಾಯ್ರ್ ಕೊಂವ್ಳಿಕೆನ್ ವಯ್ರ್ ಉಪ್ರಾಸುನ್ ಆಯ್ಲೆ. ಘರ್ಚಿಂ ಆನಿ ಗೊಂಯ್ಚಿಂ ಸೈಮ್ಚಿತ್ರಾಂ ದೊಳ್ಯಾಂರ್ ನಿಯಾಳುಂಕ್ ಲಾಗ್ಲಿಂ."
ಬಾಕಿಬಾಬಾಂಕ್ ಜಾಯ್ ತೆನ್ನಾ ಜಾಯ್ ತಸಲಿಂ ಉತ್ರಾಂ ಆಪ್ಸೂಕ್ ಸುಚ್ತಾಲಿಂ - ಯೆತಾಲಿಂ. ತಾಚೆ ಖಾತೀರ್ ತಾಂಕಾಂ ವಾಟ್ ಪಳೊವ್ಚಿ ಲಾಗನಾಶಿಲ್ಲಿ, ವಾ ಕಸ್ರತ್ ಕರ್ಚಿ ಪಡನಾಶಿಲ್ಲಿ. ದೆಖುನ್ ಬಾಕಿಬಾಬಾಂಚ್ಯೊ ಚಡ್ಶ್ಯೊ ಕವಿತಾ "ಉಸ್ಫೂರ್ತ್" ಆಸಾತ್. ಖಾಸಾ ಬಾಕಿಬಾಬ್ ಆಪ್ಣಾಲಿ ಏಕ್ ಬರಿ ಕವಿತಾ "ಬರೊವ್ನ್ ಜಾಲಿ" ಅಶೆಂ ಮ್ಹಣ್ತಾಲೆ. ಆಪ್ಣೆಂ ತಿ "ಬರಯ್ಲಿ" ಅಶೆಂ ಮ್ಹಣನಾಶಿಲ್ಲೆ. ಬಾಕಿಬಾಬ್ ಉತ್ರಾಂ ಕಡೆನ್ ಖೆಳ್ತಾಲೆ ಪುಣ್ ಮ್ಹಣುನ್ ತಾಂಚೆ ಕವಿತೆಕ್ "ಉತ್ರಾಂಚೊ ಖೆಳ್ - ಶಬ್ದಖೆಳ್" ಅಶೆಂ ಮ್ಹಣುಂಕ್ ಜಾಯ್ನಾ. ಹಾಚೆಂ ಕಾರಣ್, ತಾಂಣಿ "ಪಾಂಯ್ಜಣಾಂ"ಚೆ ಪ್ರಸ್ತಾವನೆಂತ್ ಬರಯ್ಲಾಂ ತೆ ಪ್ರಮಾಣ್ "ಭಾವ್ ಅನಾವರ್ ಜಾವ್ನ್ ಪ್ರಾಣಾಕ್ ಕಂಪ್ ಭರ್ತಾ ತೆನ್ನಾಂ ಉತ್ರಾಂಚ್ ಘುಂಗ್ರಾಂ ಜಾತಾತ್. ಆನಿ ತಾಂಚಿಂಚ್ ಪಾಂಯ್ಜಣಾಂ ಕರುನ್ ಕವಿತಾರತಿ ಪಾವ್ಲಿ ಮಾರುಂಕ್ ಲಾಗ್ಲಿ ಮ್ಹಣ್ತಕೂಚ್ ಶೃಂಗಾರ್, ವೀರ್, ವತ್ಸಲ್, ಭಕ್ತಿ, ಹಾಸ್ಯ್ ಬಿ ರಸ್ ಘುಮುಂಕ್ ಲಾಗುನ್ ಕಾಳಾಚಿ ರೇಂವ್, ಥೊಡೊ ವೇಳ್ ಜಾಯ್ನ್, ಅಮೃತಾನ್ ವೊಲಿ ಕರ್ತಾತ್. ಮ್ಹಜ್ಯಾ ವಾಂಟ್ಯಾಕ್ ಆಯಿಲ್ಲೆ ಅಸಲೆ ಕಾಂಯ್ ಭಾಗ್ಯಾಚೆ ಖಿಣ್ ಆಜ್ ರಸಿಕಾಂಚೆ ಸೆವೆಕ್ ವೊಂಪ್ತಾನಾ ಮ್ಹಾಕಾ ವಿಶೇಸ್ ಸಂತೋಸ್ ಭೊಗ್ತಾ.."
ಬಾಕಿಬಾಬಾಬ್ ಆಪ್ಲ್ಯಾ ಕವಿತಾಂನಿ ಜಾಯ್ತ್ಯಾ ತರಾಂಚಿಂ ಉತ್ರಾಂ ವಾಪರ್ಲಿ. ವಾ ತಾಂಕಾಂ ತಿಂ "ಆಯ್ಲಿಂ". ಸಂಸ್ಕೃತ್, ಕೊಂಕಣಿ, ಮರಾಠಿ, ಹಿಂದಿ ಹಾಂಚೆ ವಾಂಗ್ಡಾಚ್ ಸಾಧೀತ್, ದಿಸ್ಪಟ್ಟೆ ಬೊಲಿಯೆಂತ್ಲಿಂ, ಮಿಶ್ರ್, ಲುಪ್ತ್, ಆನಿ ಕಾಂಯ್ ಪೊರ್ತುಗೆಜ್ ಉತ್ರಾಂ ಲೆಗೀತ್ ಬಾಕಿಬಾಬಾನ್ ವಾಪರ್ಲ್ಯಾಂತ್.
ದೆಕೀಕ್, ತಿನ್ಸಾಂಜೆ-ತಿನ್ಸನಾಂ, ಪಯ್ಸ್-ಪೈಸ್, ಆಯ್ಲೀಂ-ಅಯ್ಲಿಂ, ದುರ್ಲಭ್-ದುಲ್ಲಭ್, ವಯ್ರ್-ವೈರ್, ವಾಜ್ಲೀ-ವಾಜ್ಲಿ, ಅದೃಢ್-ಅದೃಡ್, ಪಡ್ಟಿ-ಪಟ್ಟಿ, ಆಮೀ-ಆಮಿ, ವಿಪದಾ-ಇಪದಾ, ಘಡ್ಟಿ-ಘಟ್ಟಿ, ಘಾಲೂನ್-ಘಾಲುನ್, ಬಂದ್ಖಣ್-ಬಣ್ಖಣ್.
ಅಶೆ ತರೆನ್, ಏಕ್ ತರ್ ಉತ್ರಾಂ ಭಿತರ್ ಹೃಸ್ವ್-ದೀರ್ಘಾಚಿ ಕಾವ್ಯಕ್ಷಮ್ಯ್ ಮೋಡ್ತೋಡ್ ಜಾತಾ ವಾ ತೆಂ ಉತರ್ ಲಿಖೀತ್ ರುಪಾ ಕಡ್ಲ್ಯಾನ್ "ಬೋಲಿ" ರುಪಾ ಕಡೆನ್ ಲಾಗಿಂ ವೆತಾ.
ಬಾಕಿಬಾಬಾಂಚಿಂ ಲಾಡ್ಕಿಂ ಪ್ರತಿಕಾಂ ಆನಿ ಪ್ರತಿಮಾ ಮ್ಹಳ್ಯಾರ್, ದೈತ್ಯ್, ಸಾಂವ್ಳ್ಯಾಂನಿ, ಚಂದ್ರಲೋಕ್, ಶಕುನ್, ವೇಣು, ಘುಂಗ್ರಾಂ, ಅಮೃತ್, ಅಕ್ಷದಾ ಆದಿ.
ಜಾಯ್ತೆ ಕಾವ್ಯಪ್ರಕಾರ್, ಛಂದ್ಪ್ರಕಾರ್ ಆಪ್ಣಾವ್ಪಾಚೊ/ಕೆಳೊವ್ಪಾಚೊ ಕೊಂಕಣಿಚೊ ಸಬಾವ್, ತಿಚಿ ಲವ್ಚೀಕ್ಸಾಣ್ ಬಾಕಿಬಾಬಾನ್ ವಳ್ಖಲ್ಲಿ. ಕೊಂಕಣಿ ಉತ್ರಾಂ ಜಾಯ್ ತಶಿಂ ಬಾಗೊಂವ್ ಯೆತಾತ್, ಮೊಡುಂ ಯೆತಾತ್ ಹಾಚೊ ದಿಷ್ಟಾವೊ ತಾಂಕಾಂ ಜಾಲ್ಲೊ. ದೆಖುನ್ ಠುಮ್ರಿ, ಗಜಲ್, ಭೂಪಾಳಿ, ಅಭಂಗ್, ಭಜನ್, ಪೊವಾಡೊ ಅಶೆ ಜಾಯ್ತೆ ಕಾವ್ಯಪ್ರಕಾರ್ ತಾಂಣಿ ರಚ್ಲೆ. ತೆ ಅಡೆಚೆ ದಿಸನಾತ್.
ಯಮಕಾಚೆರ್ ಯಮಕಾಂ ಜೊಡೀತ್ ವಾ ಅನುಪ್ರಾಸಾಚಿ ಸುಂದರ್ ಆವೃತಿ ಕರೀತ್ ಬಾಕಿಬಾಬ್ ಘೊಗ್ಯಾ ಭಶೆನ್ ಕವಿತಾ ರಚೀತ್ ವತಾತ್. ತಾಂಚೊ ಪಯ್ಲೊ ಕಾವ್ಯಗುರು ಪಾತ್ರೀಸ್ ರೆಂದೆರಾ ಭಶೆನ್. ದೆಖೀಕ್, "ಝಂಜಾಳಾಲೊ ಮ್ಹಾಳ್" ಹಿಂ ತಾಂಚಿ ಕವಿತಾ ಘೆಂವ್ ಯೆತಾ.
ಬಾಕಿಬಾಬಾಚೆ ಕವಿತೆಂತ್ ಮೆಳ್ಪಿ ಕಾಂಯ್ ವೈಶಿಷ್ಟ್ಯ್ ಪುರಾಯ್ ಉತ್ರಾಂ ಆತಾಂ ಪಳೊವ್ಯಾಂ. ರಂಗ್, ರೂಪ್, ಗಂಧ್, ಸ್ಪರ್ಶ್, ಆನಿ ನಾದ್ ಹಾಂಚಿ ಜಾಯ್ತಿಂ ರುಪಾಂ ತೆ ಕವಿತೆಂತ್ಲ್ಯಾನ್ ಕೆಳಯ್ತಾತ್. ತಾಂಚೆ ಕವಿತೆಂತ್ಲಿಂ ಕಾಂಯ್ ಉತ್ರಾಂ ದುರ್ಬೋಧ್ ಪಾಂವ್ಡ್ಯಾರ್ ವೆತಾತ್. ದೆಖೀ:
"ತರ್ಪಣ್" ಕವಿತೆಂತ್ "ಹುಟ್ಕೆ ತುಜೆ ಜಾವ್ನ್ ಝೆಲಿ - ಚಲ್ಲೆ ಹುಪತ್ ದೊಂಗರ್ಘಳಿ" (ಝೆಲಿ). ಹೆಚ್ ಕವಿತೆಂತ್, "ಅಮೃತಾಚಿಂ ಜಾವ್ನ್ ತಾಡಾಂ" (ತಾಡಾಂ). "ದುಖ್ ಕೊಣಾಕ್ ಚುಕನಾ" ಕವಿತೆಂತ್ "ಸಾಹ್ಯ್ ಆಸುನ್ ಸಂಸಾರ್ಸಾರಥಿ - ಪಡ್ಲೆಂ ಸಾಮ್ಕೆಂ ಉದಣಾ" (ಉದಣಾ ಪಡಪ್).
"ವಿನವ್ಣಿ" ಕವಿತೆಂತ್ "ಪಾಂಯ್ ನ್ಹಯ್ ಹ್ಯೊ ಸಾಕರ್ಬಡ್ಯೊ ಜಳಿಂ ಬುಡೊಂವ್ ನಾಕಾ" (ಸಾಕರ್ಬಡ್ಯೊ - ಅಥ್ವೆಂಚ್ ಉತರ್).
"ವನ್ವಾಶಿ" ಕವಿತೆಂತ್ "ಝಿರ್ಕಮಳಾಂ ಝಾರಿನಾಂನಿ ಫುಲ್ತಿ" (ದೆವ್ಳಾಂತ್ಲ್ಯಾ ಪಾಟ್ಯೆ ವಯ್ಲಿಂ, ಕೊಂತ್ರಾಯಿಲ್ಲಿಂ, ಝಿರ್ಕಮಳಾಂ, ಝಾರಿನಾಂ), ತೆಚ್ ಕವಿತೆಂತ್ "ಅಸುನ್ ಸಗ್ಳಿಂ ಭಾಂಗ್ರಾ ಶಿಂಗ್ರಾಂ ತುಂ ನಾಸುನ್ ಉಕಾಶಿಂ" (ಉಕಾಶಿ/ಉಪಾಶಿ?).
"ಮೊಲಾದೀಕ್ ಬೋಲ್" ಹೆ ಕವಿತೆಂತ್ "ಚಾರ್ ದಿಸಾಂನಿ ನಂಡೆಪರಸ್ ಸುಚ್ತಿ ತರೆ ಹ್ಯಾಚ್ ಘೊವಾ" (ತರೆ-ದುಸ್ವಾಸ್?), ಘರಾಚಿ "ರಸ್ಣಾಯ್" ಕವಿತೆಂತ್ "ತುಜ್ಯಾ ಪರ್ಸನೆನ್ ಜಾಯ್ ಚಂವರ್ತಾ" (ಪರ್ಸಣಿ: ಸ್ಪರ್ಶ್, ಪೊಶೆವ್ಪ್?).
"ನಸ್ತೆಂ ಬಾಯೆ ಮ್ಹಾಕಾ ಸೊಂಸನಾ!" ಕವಿತೆಂತ್ "ಬಾಜೆರ್ ಪಡ್ಲ್ಯಾರ್ ಚಾಬ್ತಿ ಗಾಶೆ" (ಗಾಶೆ). "ಮ್ಹಜೆಂ ಗೊರುಂ" ಹೆ ಕವಿತೆಂತ್ ಗೊರುಂ ಚರುಂ, ಮ್ಹಜೆಂ ಗೊರುಂ ನರುಂ (ನರುಂ?).
"ಜಗ್ ಹೆಂ ಜಂಗಮ್" ಕವಿತೆಂತ್ "ಯೆವ್ಜಿತಾ ಮನಿಂ ಪರಾ ಯೆತಾ ಘರಾ ನುಲೈತ್ ತೆಂ" -"ಅಶಿ ತುಜಿ ಕೃಪಾ" ಕವಿತೆಂತ್ "ಖಾತಾಂ ಮಖಾಂ ಧುವ್ನ್ ಗೆಲಿಂ".
"ಉತ್ರಾಂ" ವೆಂಚುನ್ ಕಾಡ್ಪಾಚಿ/ಸುಚ್ಪಾಚಿ ಬಾಕಿಬಾಬಾಚಿ ಕಳಾಶಿ ಅತುಲನೀಯ್.
ದೆಖೀಕ್: ಪಾಯಾಂತ್ಲೆಂ ಚಾಳ್/ನುಪೂರ್: ವಿಂಗಡ್-ವಿಂಗಡ್ ಉತ್ರಾಂ/ರುಪಾಂ
1. ಪಾಂಯ್ಜಣಾಂ:
ತ್ಯಾ ದಿಸಾ ವಡಾಕಡೆನ್ ಗಡದ್ ತಿನ್ಸನಾಂ
ಮಂದ್ ಮಂದ್ ವಾಜತ್ ಆಯ್ಲಿಂ ತುಜಿಂ ಗೊ ಪಾಂಯ್ಜಣಾಂ
2. ನಿಳೆಂ ಸವ್ಣೆಂ:
ನಿಳೆಂ ನಿಳೆಂ ಸವ್ಣೆಂ ಏಕ್ ಸಕಾಳ್ಚ್ಯಾ ಗೊ ಪಾರಾ
ಬಾಂಗ್ರಾಚಿಂ ಘುಂಗ್ರಾಂ ಬಾಂದುನ್ ಆಯ್ಲೆಂ ಮ್ಹಜ್ಯಾ ಘರಾ
3. ಸಪನ್ ವಾಸವ್ದತ್ತಾ:
ಘಾಗ್ರಿ ಘುಮ್ತಾಂ ಘುಮ್ತಾಂ ಮಂದೆ ನ್ಹಿದೆ-ಧುಂದ್ ಪಾಕ್ತಾ
4. ಭಾವೂಬೀಜ್:
ಬಿಂದಿತಿಳೆ ಝಿಗ್ಝಿಗ್ತಿ, ಘಾಗ್ರ್ಯೊ ತಾಳಾಚೆರ್ ವಾಜ್ತಿ
5. ಮ್ಹಜೆಂ ಗೊರುಂ:
ವೇದ್ ತಾಜ್ಯಾಚ್ ಗೆತಾಚೆಂ ಘುಂಗ್ರುಂ
ತೀಚ್ ಗಜಾಲ್ ಬಾಸ್ರಿ/ಪಾವ್ರಿ/ವೇಣು, ಹಾಂಚಿ:
6. ಗೊಂಯ್ಚ್ಯಾ ವನಿ:
ಘುಮ್ಲೊ ದೇಹ್ ಪಾಂವ್ರೆವರಿ
7. ವೇಣು:
ಹಾಚೊ ವೇಣು ಕೊಣಯ್ ಪುಣ್ ಘೆಯಾ ಕಾಡುನ್
ಕೊಂಕಣಿ ಕವಿತೆಂತ್ ನಾದ್, ರೂಪ್, ರಂಗ್, ಗಂಧ್ ಹಾಂಚಿಂ ರುಪಾಂ ಕೆಳೊವ್ಪಿ ಗೊಂಯಾಂತ್ಲೊ ಪಯ್ಲೊ ಕವಿ ಮ್ಹಳ್ಯಾರ್ ಬಾಕಿಬಾಬ್ ಆನಿ ದುಸ್ರೊ ರಮೇಶ್ ವೆಳುಸ್ಕಾರ್. ಮಂಗ್ಳುರಾಂತ್ ಹಿ ಪರಂಪರಾ ಚಲೊವ್ಪಿ ಕವಿ ಮ್ಹಳ್ಯಾರ್ ಚಾ.ಫ್ರಾ. ಗೊಂಯಾಂತ್ ಬಾಕಿಬಾಬಾನ್ ಭಾ. ರಾ. ತಾಂಬೆ ಹಾಂಚಿ, ಪಾತ್ರೀಸ್ ರೆಂದೆರಾಚಿ ಪರಂಪರಾ ಚಲಯಿಲ್ಲಿ. ಜಾಲ್ಯಾರ್ ಕರ್ನಾಟಕಾಂತ್ ಚಾಫ್ರಾನ್ ಬಾಕಿಬಾಬಾ ಭಶೆನ್ ಪರಂಪರಾ ಚಲಯ್ಲಿ. ಉತ್ರಾಂ ನಕ್ಸೂದ್ಪಣಾನ್ ವೆಂಚ್ಪಾಚಿ ಬಾಕಿಬಾಬ್ ಆನಿ ಚಾಫ್ರಾ ಹಾಂಚಿ ಕಳಾಶಿ ಎಕಾ ಸಾರ್ಕಿಚ್. "ಹಾಡ್ ಚೆಡ್ವಾ ಬುಡ್ಕುಲೊ ಲಕಯ್ ತಳ್ಯಾಂತ್" ಹೆ ಕವಿತೆಂತ್ "ರಕಯ್" ಆನಿ "ಲಕಯ್" ಹ್ಯಾ ಉತ್ರಾಂ ಮದಿಂ ಅಚ್ಳಯ್ ಕೆಲ್ಲೊ ಭೆದ್ ಬಾಕಿಬಾಬಾಂಚ್ಯಾ ಉತ್ರಾಂ-ಸೊದ್ ಸಬಾವಾ ಕಡೆನ್ ಮೆಳ್ಪಿ-ಜುಳ್ಪಿ. ಮಾಂಡವಿ-ನೇತ್ರಾವತಿಚೊ ಸುಮೇಳ್ ಆಪ್ಲೆ ಕವಿತೆಂತ್ ಸಾದ್ಪಿ ಚಾ ಫ್ರಾ ಆನಿ ಭಾರತಾಚ್ಯಾ ಧ್ವಜಾಕ್ ಜಾಗ್ವಣ್ ಕರ್ಪಿ ಬಾಕಿಬಾಬ್ ಹಾಂಚ್ಯಾ ಮನಾಂತ್ಲೊ ಭಾವ್ ಏಕಚ್.
ಬಾಕಿಬಾಬಾಂಚೆ ಕವಿತೆಂತ್ ಪರ್ತುನ್ ಪರ್ತುನ್ ಯೆವ್ಪಿ "ಉಖ್ಲಾಸುನ್" ಹ್ಯಾ ಉತ್ರಾ ಭಶೆನ್ ತಾಂಣಿ ಆಪ್ಲಿ ಪ್ರತಿಭಾ ಕವಿತಾದೇವಿ ಖಾತೀರ್ ಉಖ್ಲಾಸುನ್ ದವರಿಲ್ಲಿ.
ಹುಟ್ಕೆ (ಹುಡ್ಕೊ), ಕಂವದರಪ್ (ರಾಗಾರ್ ಜಾವಪ್), ರಾಶಿರ್ ಯೇವ್ನ್ ಕಾಮ್ ಕರಪ್ ( ಎಕ್ವಟೀತ್ ಜಾವಪ್), ಪಾಟೊ (ಪೂಲ್), ಭವ್ಜಾಳ್ (ಸಂವ್ಸಾರಾಚೆಂ ದುಖ್), ವಿಡ್ವಿಡಪ್ (ಉಡೂನ್ ವಚಪ್/ಧಾಂವುನ್ ವಚಪ್), ಭಯೊ ಜಾವಪ್ (ತಾಪತ್ರಯ್/ಛಳ್ ಜಾವಪ್), ಗೊಲಾಂಟ್ ಮಾರಪ್ (ಕೊಲಾಂಟಿ ಮಾರಪ್), ಅರ್ಥೀನ್ (ಗೋಡಿನ್), ಸರ್ಪ್ ರಾಜ್ಯಾರ್ ಬಸಪ್ (ವಾಪರೂಂಕ್ ಮೆಳನಾಶಿಲ್ಲ್ಯಾ ಧನಾಚೊ ಧನಿ ಜಾವಪ್), ಪುಸ್ತಿವಂತ್ (ಸಮರ್ಥ್, ಬಳಿಷ್ಟ್), ತರ್ಪಾಶೋರ್ (ನಾವಡ್ಗೊ), ಸಯ್ (ಕೋರ್, ವರ್ಣ್), ಜಲ್ಮ್ ಜುಗ್ (ಜಲ್ಮಾ ಸಾವ್ನ್ ಎಕ್ವಟ್), ತರೆ (ಮತ್ಸರ್), ವೋಪ್ (ಲೇಪ್/ವರ್ಖ್, ಚಕ್ಚಕ್), ರಸ್ಣಾಯ್ (ಸೊಭಾಯ್, ಲಾವಣ್ಯ್), ಕಿರಾಂಟ್ಯೊ (ಲ್ಹಾನ್ ಕೀರ್), ಚಕ್ರವಾಕಾಂ (ರಾತ್ಚೆಂ ಗಾವ್ಪಿ ಸುಕ್ಣೆಂ), ಖುಮೊ (ಚಿನ್ನ್/ನಿಶಾಣಿ) ಅಶಿಂ ಜಾಯ್ತಿಂ ವಿಲಕ್ಷಣ್ ಉತ್ರಾಂ ತಾಂಚೆ ಕವಿತೆಂತ್ ಯೆತಾತ್.
ಬಾಕಿಬಾಬ್ ಉತ್ರಾಂ ಆಪ್ಣಾಕ್ ಜಾಯ್ ತಶಿಂ ಮೊಡುನ್ ಘೆತಾತ್. ದೆಖೀಕ್, ಕೃಪಾಂಜಲಿ-ಕೃಪಾಂಜುಳಿ. ಬಾಕಿಬಾಬ್ ಮ್ಹಳ್ಯಾರ್ ಉತ್ರಾಂಚೊ ಧನಿ. ಹೆಂ ತಾಂಚೆಂ ಉತ್ರಾಂಚೆಂ ಪಿಶೆಂ ಗೊಂಯಾಂ ವಯ್ಲ್ಯಾ ನಿಸ್ಸೀಮ್ ಮೊಗಾಂತ್ಲ್ಯಾನ್ ಆಯ್ಲಾಂ. ಎಕೆ ಮರಾಠಿ ಕವಿತೆಂತ್ ತಾಂಣಿ ಮ್ಹಳ್ಳಾಂ ತಶೆಂ -
"ಮಾಝ್ಯಾ ಗೊವ್ಯಾಚ್ಯಾ ಭುಮೀತ್
ಸಾರಾ ಮಾಝಾ ಜೀವ್ ಜಡೆ
ಪುರಾ ಮಾಝ್ಯಾ ಕವನಾಂಚಾ
ಗಂಧ್ ತೆಥೆ ಉಲಗಡೆ"
ಆಯ್ಜ್ ಬಾಕಿಬಾಬ್ ಶಾರೀರಿಕ್ ನದ್ರೆನ್ ಜರೀ ಆಮ್ಚೆ ಭಿತರ್ ನಾಸ್ಲೆ ತರೀ ತಾಂಚೆ ಕವಿತೆಚ್ಯಾ ಅಕ್ಷರ್ ರುಪಾಂತ್ಲ್ಯಾನ್ ತೆ ಅಮರ್ ಜಾಲ್ಯಾತ್, ಅಶೆಂ ಮ್ಹಣ್ಚೆಂ ಪಡ್ತಾ. ಪರ್ತುನ್ ತಾಂಚ್ಯಾಚ್ ಉತ್ರಾಂನಿ -
"ಸಗ್ಳೆಂ ಕ್ಷರ್ ಮ್ಹಣುನ್
ಮ್ಹಜೆಂ ಅಕ್ಷರಾಂತ್ ಕವಿತ್"
-ಸಮಾಪ್ತ್
ಬಾಕಿಬಾಬಾಚ್ಯೊ ಕವಿತಾ: