ಪಿಶೆಪಣಾಂ, ಶಾಣೆಪಣ್ ಲೆಕ್ಚೆ ಬರೆ ಮನೀಸಯ್ ಆಸಾತ್: ಮೆಲ್ವಿನ್ ರೊಡ್ರಿಗಸ್
(ಡೊ. ಟಿ. ಎಮ್. ಎ. ಪೈ ಫೌಂಡೇಶನ್ ಮಣಿಪಾಲ್ ಹಾಂಚೆ ಥಾವ್ನ್ ಮಾರ್ಚ್ 26, 2011 ತಾರಿಕೆರ್ ವ್ಯಾಲಿವೀವ್ ಹೊಟೆಲಾಂತ್ `ಅತ್ಯುತ್ತಮ್ ಕೊಂಕಣಿ ಪುಸ್ತಕ್ ಪುರಸ್ಕಾರ್' ಜೊಡಲ್ಲ್ಯಾ ಸಂದರ್ಭಾರ್ ಮೆಲ್ವಿನ್ ರೊಡ್ರಿಗಸಾನ್ ಕೆಲ್ಲೆಂ ಉಲೊವ್ಪ್)
ಥೊಡ್ಯಾಂನಿ ಸುಖ್ ಮ್ಹಳ್ಳೆಂ ತೆಂ ನಶೆಂತ್ ಸೊಧ್ಚೆಂ ಆಸ್ತಾ. ಥೊಡ್ಯಾಂನಿ ಸುಖಾ ಖಾತೀರ್ ದೆವಾಲಾಗಿಂ ಮಾಗ್ಚೆಂ ಆಸ್ತಾ. ದುಡ್ವಾಚೆ ರಾಶಿಕ್ ಉಜೊ ಲಾವ್ನ್, ಕೊಣ್ ಸುಖಾಚಿ ಊಬ್ ಜೊಡುಂಕ್ ಪುರೊ. ಕೊಣ್ ಸುಖಾಚಿಂ ಸಪ್ಣಾಂ ಪಡ್ತಲಿಂ ಮ್ಹಣೊನ್ ಮಡ್ಯಾಂಚೆ ರಾಶಿರ್ ನಿದೊಂಕ್ ಪುರೊ. ಹಾಂವೆಂ ಮಾತ್ರ್ ಮ್ಹಜೆಂ ಸುಖ್ ಕವಿತೆಂತ್ ಆಸಾ ಮ್ಹಣೊನ್ ಕಳಿತ್ ಜಾಲ್ಲ್ಯಾ ದಿಸಾ ಥಾವ್ನ್ ದೆವಾಲಾಗಿಂ ಮಾಗ್ಚೆಂ ಸೊಡ್ಲಾಂ ಆನಿ ಆಮಾಲಾಚೆಂ ಮಾಲ್ತುಲ್ ಜಾಯ್ತೆ ಪಾವ್ಟಿಂ ಫೊಡ್ಲಾಂ. ಕಿತ್ಯಾಕ್ ಮ್ಹಜೊ ದೇವ್ ಕವಿತೆಚೆ ವೊಳಿ ವೊಳಿಂನಿ ಘುಂಗ್ರಾ ಬಾಂದುನ್ ನಾಚ್ಚೆಂ ಹಾಂವ್ ದೆಖ್ತಾಂ ಆನಿ ಜಾಯ್ತೆ ಪಾವ್ಟಿಂ ಉತ್ರಾಂಚೆ ನಶೆಂತ್ ಮತ್ ಥಿರಾರ್ ದವ್ರುಂಕ್ ಸಕನಾಸ್ತಾಂ ಸುಶೆಗಾತ್ ಲೊಳ್ತಾಂ.
ಅಸಲಿ ಏಕ್ ಸಕತ್ ಕವಿತೆಕ್ ಜರ್ ನಾತಲ್ಲಿ, ಗ್ರೀಕ್ ಫಿಸಿಶಿಯನ್ ಸೊರೇನಸ್ ದುಸ್ರ್ಯಾ ಶತಮಾನಾಂತ್ ಆಪ್ಲ್ಯಾ ಪಿಡೆಸ್ತಾಂಕ್ ಕವಿತಾ prescribe ಕರ್ತೊನಾ. ಆಯ್ಚ್ಯಾ ಕಾಳಾರ್ counselling ಯಾ psychotherapy ಕ್ ಏಕ್ substitute ಜಾವ್ನ್ poetry therapy ಜರ್ ತರ್ ವಾಪರ್ತಾತ್, ತರ್ ಕವಿತೆಂತ್ ಪಿಡಾ ಗೂಣ್ ಕರ್ಚಿ ಅದ್ಭುತ್ ಸಕತ್ ಆಸಾ ಮ್ಹಣೊನ್ ಜಾಲೆಂ.
ಬರೆ ಕವಿತೆಂತ್ ಉತ್ರಾಂಚೆ ಅರ್ಥ್ ವಿಸ್ತಾರಾಯೆಕ್ ಕಸಲೀಯ್ ಗಡ್ ಆಸನಾ. ತ್ಯಾಚ್ ದೆಕುನ್ ಧರ್ಮಾಚೆ ವೊಂಯೆಂ ಭಿತರ್ ಘಡೊಂಕ್ ಅಸಾಧ್ಯ್ ಜಾಲ್ಲೆಂ ಕವಿತೆಂತ್ ಘಡ್ತಾ. ಮ್ಹಜೆಚ್ ಎಕೆ ಕವಿತೆಂತ್ ಸೀತಾ ದೇವಿಚ್ಯಾ ಭುರ್ಗ್ಯಾಂಕ್ ಜೀಜಸಾಚಿ ಆವಯ್ ಮೇರಿ ಪಾನೊ ಖಾವಯ್ತಾ ಆನಿ ಪೈಗಂಬರ್ ಪಾಂಯಾಂಕ್ ಪಾಂಯ್ಜಣಾಂ ಬಾಂದುನ್ ನಾಚ್ತಾ ಆನಿ ರಡ್ಚ್ಯಾ ಭುರ್ಗ್ಯಾಂಕ್ ಭುಜಯ್ತಾ. ಅಸಲಿ ಏಕ್ ಸಾಧ್ಯತಾ ವಯ್ಜಕೀಯಾಂತ್ ಜಾಂವ್, ರಾಜಕೀಯಾಂತ್ ಜಾಂವ್ ಘಡನಾ. ಅಸಲೆಂ ಏಕ್ ಚಿಂತಪ್ ಧರ್ಮಾಚ್ಯಾ ಪುಸ್ತಕಾಂನಿ ಜಾಂವ್, ಧರ್ಮಾಧಿಕಾರಿಚ್ಯಾ ತೊಂಡಾಂನಿ ಜಾಂವ್ ವ್ಹಾಳೊನ್ ಯೇನಾ. ಸಾಹಿತ್ಯಾಂತ್, ತಾಂತ್ಲ್ಯಾ ತಾಂತುಂ ಕವಿತೆಂತ್ ಖೊಡೆ ಸಾಂಕ್ಳಿಂನಿ ಬಾಂದುನ್ ಪಡಲ್ಲೆಂ ಚಿಂತಪ್ ಆಸೊಂಕ್ ಸಾಧ್ಯ್ ನಾ. ತೆಂ ಸುಟ್ಕೆಚೆ ಪಾಕ್ಟೆ ಖೊವವ್ನ್ ಉಬೊನ್ ಆಸ್ತಾ.
ತ್ಯಾಚ್ ದೆಕುನ್ ಗ್ವಾಂಟಾನಾಮೊ ಕಡ್ಶಾರ್ ಚಾರ್ ವರ್ಸಾಂ ಕೈದಿ ಜಾಲ್ಲೊ ನಿರಾಪ್ರಾಧಿ ಅಬ್ದುಲ್ ರಹೀಮ್ ಮುಸ್ಲಿಮ್ ದೋಸ್ತ್, ಕೈದಿ ಜಾವ್ನ್ ಪಂಚ್ವೀಸ್ ಹಜಾರಾಂಕ್ ಮಿಕ್ವೊನ್ ಕವಿತೆಚ್ಯೊ ವೊಳಿ ಬರಯ್ತೊನಾ. `ಕೈದಿ ಆಸೊನಯ್ ಆಪುಣ್ ಸ್ವತಂತ್ರ್' ಮ್ಹಣೊನ್ ಗೊವಾಯ್ ಪಾಚಾರುಂಕ್ ಪಾವ್ತೊನಾ. ತ್ಯಾಚ್ ದೆಕುನ್, ರುಶಿಯನ್ ಕವಯಿತ್ರಿ ಐರಿನಾ ರತುಶಿನ್ಸ್ಕಾಯಾ ದೋನ್ ವರ್ಸಾಂ ಕೈದಿ ಜಾಲ್ಲ್ಯಾ ವೆಳಾರ್, ಕಾಗದ್ ಆನಿ ಪೆನ್ನ್ ನಾಸ್ತಾನಾ ದೊನ್ಶಾಂ ವಯ್ರ್ ಕವಿತಾ ಬರಯ್ತಿನಾ. ತ್ಯಾಚ್ ದೆಕುನ್, ದುಬಾಯ್ ಶೆರಾಂತ್ ಹಾಂವೆಂ ಕವಿಗೋಷ್ಠಿ ಚಲಯಿಲ್ಲ್ಯಾ ಸಂದರ್ಭಾರ್, ಕವಿತಾ ಆಯ್ಕೊನ್ ಆಪ್ಣಾಚಿ ತಕ್ಲೆ ಫೊಡಾಫೊಡ್ ಪಳೊನ್ ಧಾಂವ್ಲಿ ಮ್ಹಣೊನ್ ಕಾರ್ಯಾಚಿ ಮುಕೆಲ್ ಸೈರಿಣ್ testimony ದಿತಿನಾ.
ಅಸಲಿ ಏಕ್ ಕವಿತೆಚಿ ಅದ್ಭುತ್ ಸಕತ್ ಹಾಂವೆಂ ಪಾರ್ಕಿಲ್ಯಾ. ಥೊಡ್ಯಾಂಕ್ ಹಿಂ ಪಿಶೆಪಣಾಂ ದಿಸೊಂಕ್ ಪುರೊ. ಪುಣ್ ಅಸಲ್ಯಾ ಪಿಶೆಪಣಾಂಕ್ ಪ್ರಶಸ್ತಿ ಮೆಳ್ತಾನಾ, ಪಿಶೆಪಣಾಂ ಪಾಂಗ್ರುನ್ ಸದಾಂಕಾಳ್ ರಾವ್ಯಾಂ ಮ್ಹಣೊನ್ ಜಾತಾ. ಅಸಲಿಂ ಪಿಶೆಪಣಾಂಯ್, ಶಾಣೆಪಣ್ ಲೆಕ್ಚೆ ಮನೀಸ್, ಸಂಸ್ಥೆ ಆಸಾತ್ ಮ್ಹಣ್ ಚಿಂತುನ್ ಮನ್ ಖುಶಿ ಖುಶಿ ಖುಶಿ ಜಾತಾ.
ಮ್ಹಜ್ಯಾ ಕವಿತೆಚ್ಯಾ ಪಯ್ಲ್ಯಾ ಪುಸ್ತಕಾಕ್ ಅಡೆಶಿಂ ರುಪಯ್ ಆನಿ ಏಕ್ ಪಿತುಳೆಚೆಂ ಪಾತಳ್ ಫಳೆಂ ಕಾಂಯ್ ಬಾವೀಸ್ ವರ್ಸಾಂ ಆದಿಂ ಗೊಂಯ್ ಭಾಶಾ ಮಂಡಳಾನ್ ದಿಲ್ಲೆಂ. ತಿತ್ಲೆಂ ಹಾಡುಂಕ್ ಎಕ್ಶೆಂ ರುಪಯ್ ಖರ್ಚುನ್ ಹಾಂವ್ ಮಡ್ಗಾಂವ್ ಗೆಲ್ಲೊಂ ಆನಿ ಉಪ್ರಾಂತ್ ಭುಕೆಚ್ಯಾ ಲಾಸಾಂ ಮುಕಾರ್ ಪಿತುಳೆಚೆಂ ಫಳೇಂಯ್ ಉರ್ಲೆಂನಾ. ತ್ಯಾ ಉಪ್ರಾಂತಯ್ ಮ್ಹಜ್ಯಾ ವಾವ್ರಾ ಖಾತೀರ್ ಪುರಸ್ಕಾರ್ ಮ್ಹಾಕಾ ಮೆಳ್ಳ್ಯಾತ್. ಪುಣ್ ಪಯ್ಲೆ ಪಾವ್ಟಿಂ ಮ್ಹಜ್ಯಾ ಎಕಾ ಪುಸ್ತಕಾಕ್, ಮ್ಹಜ್ಯಾ ಗಾಂವ್ಚಿ ಮ್ಹಾಕಾ ಪ್ರಶಸ್ತಿ ಲಾಭ್ಲ್ಯಾ. ಹೆಂ ಬರೆಂ ಮನ್ ದಾಕಯಿಲ್ಲ್ಯಾ ಟಿ ಎಮ್ ಎ ಪೈ ಪೌಂಡೇಶನಾಕ್, ಆನಿ ತಾಚ್ಯಾ ಕಾರ್ಭಾರಿ ಮಾನೆಸ್ತಾಂಕ್ ಹಾಂವ್ ರಿಣ್ಕಾರಿ ಉರ್ತಲೊಂ.
-ಮೆಲ್ವಿನ್ ರೊಡ್ರಿಗಸ್