ಆಂಡ್ರ್ಯೂಚ್ಯಾ ’ಆಂಜುರಾಚೆಂ ಪಾನ್’ ಪುಸ್ತಕಾಕ್ ಪುರಸ್ಕಾರಾಚೊ ಚವ್ತೊ ಕುರೊವ್
ಕವಿತಾ ಟ್ರಸ್ಟಾಚೊ ಖಜಾನಿ, ನಾಮ್ಣೆಚೊ ಕೊಂಕಣಿ ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾಕ್ 2015ವ್ಯಾ ವರ್ಸಾಚೊ ಪ್ರತಿಷ್ಟೆಚೊ ಡೊ. ಟಿ. ಎಮ್. ಎ. ಪೈ ಫೌಂಡೇಶನ್ ಅತ್ಯುತ್ತಮ್ ಕೊಂಕಣಿ ಪುಸ್ತಕ್ ಪುರಸ್ಕಾರ್ ಲಾಭ್ಲಾ. ಹೊ ಪುರಸ್ಕಾರ್ ಕವಿತಾ ಪಬ್ಲಿಕೇಶನ್ಸಾನ್ ಪರ್ಗಟ್ ಕೆಲ್ಲ್ಯಾ ತಾಚ್ಯಾ ’ಆಂಜುರಾಚೆಂ ಪಾನ್’ ಪುಸ್ತಕಾಕ್ ಫಾವೊ ಜಾಲಾ. ಹ್ಯಾ ಪುಸ್ತಕಾಕ್ ಹ್ಯಾ ಆದಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುಸ್ತಕ್ ಪುರಸ್ಕಾರ್, ಅಖಿಲ್ ಭಾರತ್ ಕೊಂಕಣಿ ಲೇಖಕಾಂಚೊ ಸಂಘ್ (AIKWO) ತಶೆಂಚ್ ವಿಮಲ ವಿ. ಪೈ ವಿಶ್ವ ಕೊಂಕಣಿ ಕವಿತಾ ಪುರಸ್ಕಾರ್ ಲಾಭ್ಲಾ. ಹ್ಯಾ ಪುಸ್ತಕಾಕ್ ಲಾಭ್ಚೊ ಹೊ ಚವ್ತೊ ಪುರಸ್ಕಾರ್.
ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣೆ ಹ್ಯಾ ಪುಸ್ತಕಾಕ್ ಪ್ರಸ್ತಾವನ್ ಬರಯಿಲ್ಲೆಂ ಆಸುನ್ 184 ಪಾನಾಂಚ್ಯಾ ಹ್ಯಾ ಪುಸ್ತಕಾಂತ್ 43 ಕವಿತಾ ತಶೆಂಚ್ 19 ಚುಟ್ಕುಲಾಂ ಆಟಾಪ್ಲ್ಯಾಂತ್.
ಡೊ. ಟಿ. ಎಮ್. ಎ. ಪೈ ಪುರಸ್ಕಾರ್ ರುಪಯ್ 25,000, ಮಾನ್ಪತ್ರ್ ತಶೆಂಚ್ ಯಾದಸ್ತಿಕಾ ಆಟಾಪ್ತಾ.
ಆಂಡ್ರ್ಯೂ ಎಲ್. ಡಿಕುನ್ಹಾ ಜಲ್ಮಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ. ಆತಾಂ ಇಜಯಾಂತ್ ವಸ್ತಿ ಕರ್ತಾ. ಪಾಟ್ಲ್ಯಾ ಪಾಂತ್ತೀಸ್ ವರ್ಸಾಂ ಥಾವ್ನ್ ಕೊಂಕಣಿಂತ್ ವೆವೆಗ್ಳ್ಯಾ ಮಾಧ್ಯಮಾಂನಿ ತಾಣೆ ಲಿಖಾನ್ ಕೆಲಾಂ ಆನಿ ಪಾಂಯ್ಶಾಂಕ್ ಮಿಕ್ವೊನ್ ಕವಿತಾ ಬರಯ್ಲ್ಯಾತ್. ತಾಚೆಂ ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ ಕವಿತಾ ಪುಸ್ತಕ್ ಆಶಾವಾದಿ ಪ್ರಕಾಶನಾನ್ ಪರ್ಗಟಲ್ಲೆಂ ತರ್, ’ಆಯೆರಾಚೊ ಬೂಕ್’ ಕವಿತಾ ಪುಸ್ತಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಪರ್ಗಟ್ ಕೆಲಾಂ.
ಮಂಗ್ಳುರ್ಚ್ಯಾ WINWIN FIN ADVISORY LTD. ಸಂಸ್ಥ್ಯಾಚೊ ತೊ ಮ್ಹಾಲಕ್.
ತಾಚ್ಯಾ ಪುಸ್ತಕಾವಿಶಿಂ ’ಕಿಟಾಳ್’ ಜಾಳಿಜಾಗ್ಯಾಚೊ ಸಂಪಾದಕ್ ಎಚ್ಚೆಮ್ ಪೆರ್ನಾಳ್ ಅಶೆಂ ಬರಯ್ತಾ: "ಕೊಂಕಣಿಂತ್ ಬರೊಂವ್ಚ್ಯಾ ಕವಿಂ ಪಯ್ಕಿ ಆಂಡ್ರ್ಯೂ ಎಲ್. ಡಿಕುನ್ಹಾ ಸಂವೇದನ್ಶೀಳ್ ಕವಿ. ತಾಚ್ಯಾ ಕಾವ್ಯಾಂತ್ ಸಾಮಾಜಿಕ್ ಗಜಾಲಿಂಕ್ response - instant ಆನಿ intense. ತಾಚ್ಯಾ ಚಡ್ಶ್ಯಾ ಕವಿತೆಂನಿ ಸರ್ಲ್ಲೊ ಕಾಳ್, ವರ್ತಮಾನ್ ಕಾಳ್ ಆನಿ ಫುಡಾರಾಚೊ ಕಾಳ್; ಅಶೆಂ ತಿನೀ ಕಾಳ್ - ಆಬ್, ಪೂತ್ ಆನಿ ನಾತು, ಹಿಂ ರುಪಾಂ ಘೆವ್ನ್ ಸರಾಗ್ ಯೆತಾತ್. ಸರ್ಲಲ್ಯಾ ಕಾಳಾಚೊ ವೈಭವ್, ಫುಡಾರಾಚೊ ಆಕಾಂತ್ ಘೆವ್ನ್ ಹರ್ ಕವಿತೆಂತ್ ಪೂತ್ ತಳ್ಮಳ್ಚೆಂ ದಿಸ್ತಾ. ದೆಕುನ್ ತಾಚ್ಯಾ ಹರ್ ಕವಿತೆಂತ್, ನಾಯಕ್ - ಪೂತ್, ಮ್ಹಳ್ಯಾರ್ ವರ್ತಮಾನ್ ಕಾಳ್. ಚಡ್ ಕರುನ್ ತಾಚ್ಯೊ ಹರ್ ಕವಿತಾ ನಾತ್ವಾಚೆರ್ (ಫುಡಾರಾಚೆರ್) ಭರ್ವಸೊ ದವರ್ನ್ ಸೊಂಪ್ತಾತ್. ಮ್ಹಾಕಾ ದಿಸ್ತಾ ಹೊ ಕಾವ್ಯಾಗೂಣ್ ಆಂಡ್ರ್ಯೂಚಿ ತಾಂಕ್".
’ರಾಕ್ಣೊ’ ಪತ್ರಾಚೊ ಆದ್ಲೊ ಸಂಪಾದಕ್ ಬಾ. ಫ್ರಾನ್ಸಿಸ್ ರೊಡ್ರಿಗಸ್ ಅಶೆಂ ಬರಯ್ತಾ: "ಆಂಡ್ರ್ಯೂಚ್ಯಾ ಕವಿತೆಂನಿ ಮಾತ್ಯೆಚೊ ವಾಸ್ ಆಸಾ. ಬೆಣ್ಶಿ ಝಾಡಾಂಚೆಂ ಪಾಚ್ವೆಪಣ್, ನಾಡಾಂತ್ಲ್ಯಾ ರೋಸ್ ಘಾಲ್ಲ್ಯೆ ಕಡಿಯೆಚೊ ಸುವಾಸ್ ಆಸಾ. ಮ್ಹಳ್ಯಾರ್ ಪ್ರಕೃತಿ - ಮನ್ಶಾಕುಳಾಚೊ ಮೋಗ್ ಆಸಾ. ಹ್ಯಾ ಕವಿತೆಂನಿ ಗಾಂಯ್ದೊಳಾಚಿ ಮ್ಹಿನತ್ ಆಸಾ. ಪೊಸ್ವಲ್ಲೆ ಕಣ್ಶೆಂತ್ಲಿ ಸೊಭಾಯ್ ಆಸಾ, ಭಿಂ ವೊಂಪಲ್ಲೊ ಬಾಬ್ ಆನಿ ಸನ್ನಾಂ ಕೆಲ್ಲಿ ಮಾಂಯ್ ಆಸಾ. ಮ್ಹಳ್ಯಾರ್ ಜೀವ್-ಜಿವ್ಸಾಣ್ ಭರುನ್ ವೊಮ್ತತಾ. ಹರ್ ಕವಿತಾ ವಾಚುನ್ ಪಾನ್ ಧಾಂಪ್ಲ್ಯಾರೀ ಕವಿತಾ ಧಾಂಪನಾ. ತಿ ಮತಿ ಪಡ್ದ್ಯಾರ್ ಆನಿ ಕಾಳ್ಜಾ ಕಡ್ಶಾರ್ ಕಾಜುಲ್ಯಾಬರಿ ಉಬತ್ತ್ ವೆತಾ. ಥಂಯ್ಸರ್ ದಿವೆ ಆನಿ ಚುಡೆತ್ಯೊ ಪೆಟಯ್ತ್ ರಾವ್ತಾ".
ಕವಿತಾ ಟ್ರಸ್ಟಾಚ್ಯಾ ಜಾಯ್ತ್ಯಾ ಪುಸ್ತಕಾಂಕ್ ಪುರಸ್ಕಾರ್ ಲಾಭ್ಲ್ಯಾತ್. ತಾಂತ್ಲ್ಯಾ ತಾಂತುಂ ಆಂಡ್ರ್ಯೂಚ್ಯಾ ಎಕಾ ಪುಸ್ತಕಾಕ್ ಚ್ಯಾರ್ ಪುರಸ್ಕಾರ್ ಲಾಬ್ಲ್ಯಾತ್. ಹೆಂ ಕೊಂಕಣಿ ಕಾವ್ಯಾಕ್ ಲಾಭಲ್ಲೆಂ ಇನಾಮ್. ದಾಕ್ಲೊ ಮ್ಹಣ್ತಾತ್ ತರ್ ಮ್ಹಣಾ!
आंडऱ्यूच्या ’आंजुराचें पान’ पुस्तकाक पुस्काराचो चवतो कुरोव
कविता ट्स्टाचो खजानी, नामणेचो कोंकणी कवी आंडऱ्यू एल. डिकुन्हाक २०१५व्या वर्साचो प्रतष्टेचो डो. टी. एम. ए. पै फौंडेशन अत्युत्तम कोंकणी पुस्तक पुरस्कार लाभला. हो पुरस्कार कविता पब्लिकेशन्सान पर्गट केल्ल्या ताच्या ’आंजुराचें पान’ पुस्तकाक फावो जाला. ह्या पुस्तकाक ह्या आदीं कर्नाटक कोंकणी साहित्य अकाडेमी पुस्तक पुरस्कार, अखिल भारत कोंकणी लेखकांचो संघ (AIKWO) तशेंच विमल वी. पै विश्व कोंकणी कविता पुरस्कार लाभला. ह्या पुस्तकाक लाभचो हो चवतो पुरस्कार.
साहित्य अकाडेमी प्रशस्ती विजेत कवी मेल्विन रोड्रीगस हाणे ह्या पुस्तकाक प्रस्तावन बरयिल्लें आसून १८४ पानांच्या ह्या पुस्तकांत ४३ कविता तशेंच १९ चुटकुलां आटापल्यांत.
डो. टी. एम. ए. पै पुरस्कार रुपय २५,०००, मानपत्र तशेंच यादस्तिका आटापता.
आंडऱ्यू एल. डिकुन्हा जल्मान गुर्पूर किन्निकंबळाचो. आतां इजयांत वस्ती करता. पाटल्या पांत्तीस वर्सां थावन कोंकणींत वेवेगळ्या माध्यमांनी ताणे लिखान केलां आनी पांयशांक मिकवोन कविता बरयल्यात. ताचें ’व्हळू व्हळू व्हाळ व्हाळ्या’ कविता पुस्तक आशावादी प्रकाशनान पर्गटल्लें तर, ’आयेराचो बूक’ कविता पुस्तक कर्नाटक कोंकणी साहित्य अकाडेमीन पर्गट केलां.
मंगळूरच्या WINWIN FIN ADVISORY LTD. संस्थ्याचो तो म्हालक.
ताच्या पुस्तकाविशीं ’किटाळ’ जाळिजाग्याचो संपादक एच्चेम पेर्नाळ अशें बरयता: "कोंकणींत बरोंवच्या कवीं पयकी आंडऱ्यू एल. डिकुन्हा संवेदनशीळ कवी. ताच्या काव्यांत सामाजीक गजालींक response - instant आनी intense. ताच्या चडश्या कवितेंनी सरल्लो काळ, वर्तमान काळ आनी फुडाराचो काळ; अशें तिनी काळ - आब, पूत आनी नातू, हीं रुपां घेवन सराग येतात. सरलल्या काळाचो वैभव, फुडाराचो आकांत घेवन हर कवितेंत पूत तळमळचें दिसता. देकून ताच्या हर कवितेंत, नायक - पूत, म्हळ्यार वर्तमान काळ. चड करून ताच्यो हर कविता नात्वाचेर (फुडाराचेर) भर्वसो दवरन सोंपतात. म्हाका दिसता हो काव्यागूण आंडऱ्यूची तांक".
’राकणो’ पत्राचो आदलो संपादक बा. फ्रान्सीस रोड्रिगस अशें बरयता: "आंडऱ्यूच्या कवितेंनी मात्येचो वास आसा. बेणशी झाडांचें पाचवेपण, नाडांतल्या रोस घाल्ल्ये कडियेचो सुवास आसा. म्हळ्यार प्रकृती - मनशाकुळाचो मोग आसा. ह्या कवितेंनी गांयदोळाची म्हिनत आसा. पोस्वल्ले कणशेंतली सोभाय आसा, भीं वोंपल्लो बाब आनी सन्नां केल्ली मांय आसा. म्हळ्यार जीव-जिवसाण भरून वोमतता. हर कविता वाचून पान धांपल्यारी कविता धांपना. ती मती पडद्यार आनी काळजा कडशार काजुल्याबरी उबत्त वेता. थंयसर दिवे आनी चुडेत्यो पेटयत रावता".
कविता ट्रस्टाच्या जायत्या पुस्तकांक पुरस्कार लाभल्यात. तांतल्या तांतूं आंडऱ्यूच्या एका पुस्तकाक च्यार पुरस्कार लाबल्यात. हें कोंकणी काव्याक लाभल्लें इनाम. दाकलो म्हणतात तर म्हणा!