ಸಂಪಾದಕೀಯ್:
ಜೊನ್ಸನ್ ಮಾರ್ಕೆಟಿಚ್ಯಾ ಕ್ಯಾನ್ವಸಾವಯ್ಲಿಂ ಪಿಂತುರಾಂ
ಜೊನ್ಸನ್ ಮಾರ್ಕೆಟ್ ಏಕ್ ನಿಮಿತ್ತ್ ಮಾತ್ರ್. ಜೊನ್ಸನ್ ಮಾರ್ಕೆಟ್ ಏಕ್ ಕ್ಯಾನ್ವಸ್ ಮಾತ್ರ್. ಹ್ಯಾ ಕ್ಯಾನ್ವಸಾಚೆರ್ ಕವಿ ಕ್ಲೆರೆನ್ಸ್ ಕೈಕಂಬಾನ್ ತೀನ್ ವೆವೆಗ್ಳಿಂ ಪಿಂತುರಾಂ ಸೊಡಯ್ಲ್ಯಾಂತ್ - ಜಿವಾಂಚ್ಯಾ ಮೊಲಾಚಿಂ. ಏಕ್ ಆನ್ಯೇಕಾ ಪ್ರಾಸ್ ಥರ್ಥರಾಂವ್ಚೆಂ. ಕಾಳ್ಜಾಕ್ ಸುರಿ ತೊಪ್ಚೆಂ. ಮನಾಕ್ ಪೊಕೊರ್‍ನ್ ಸೊಡ್ಚೆಂ.
ಎಕ್ಯೆಕಡೆ ಪೊಟಾಂಚ್ಯೆ ಭುಕೆಖಾತೀರ್ ಜಿವಿತ್ ಶಿಜೊಂವ್ಚಿಂ ಮನ್ಶಾಂ, ಆನ್ಯೇಕಾಕಡೆ ಕಸಾಯಿಖಾನ್ಯಾಚ್ಯಾ ದಾರಾರ್ ಜಿಣಿಯೆಚಿಂ ನಿಮಾಣಿಂ ವೊರಾಂ ಪಾಶಾರ್ ಕರುನ್ ಆಸ್ಚೆ ನಿಶ್ಪಾಪಿ ಬಕ್ರೆ ಆನಿ ತಿಸ್ರೆಂ - ಕಸಾಪ್ಪ್ಯಾಚೆಂ ಕಾಳೀಜ್ ಸಯ್ತ್ ಕಡೊಂವ್ಚೆಂ ದೆವಾಚೆಂ ಪುನ್ಯ್ ಜೊಡ್ಚ್ಯಾಕ್ ಮನ್ಶಾನ್ ಮನ್ಶಾಕ್ ಬಲಿ ದಿಂವ್ಚೆಂ ಪಿಂತುರ್.
ಕ್ಲೆರೆನ್ಸ್ ಎಕ್ಲೊ ಕಾಣಿಯಾಂಗಾರ್. ಪುಣ್ ಕವಿತಾ ತಾಕಾ ನಸಾಯ್ ನ್ಹಯ್. ತಿ ತಾಣೆ ಉಮಳ್ಶಿಕೇನ್ ವೆಂಗೊವ್ನ್ ಘೆತ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜೊನ್ಸನ್ ಮಾರ‍್ಕೆಟಿಕ್ ಏಕ್ ಭೆಟ್ ....
ಮಂಗ್ಳುರಿ ನಳ್ಯಾಂಚ್ಯಾ ಪಾಕ್ಯಾ ಪೊಂದಾ
ಸಾಳಿಯಾಂಚ್ಯಾ ದಾಟ್ ಜಾಳಾಂ ಸಂಗಿಂ
ರಾಜ್ವಟ್ ಚಲೊಂವ್ಚೊ
ಹರ‍್ಯೆಕಾ ದಿಸಾಚೊ ಪಾತಳ್ ಕಾಳೊಕ್
ಆಜ್ಯ್ ತಸೊಚ್ ಆಸ್‌ಲ್ಲೊ
ಉಗ್ತ್ಯಾ ಆಂಗ್ಣಾ ಥಾವ್ನ್
ಉದ್ಕಾ ತೊಡಾಂತ್ಲೆಂ
ಉಗ್ತ್ಯಾ ಬಾಗ್ಲಾಂ ತೊಂಡಾಂತ್ಲ್ಯಾನ್
ಭುಕೆಚ್ಯಾ ಉಜ್ಯಾಕ್ ಮಾತ್ರ್ ಪಾಲ್ವೊಂಕ್ ಸಕನಾತ್ಲೆಂ
ವ್ಹಾಳ್ಚೆಂ ಘಾಣೆಡ್ಡೆಂ ಜಿವೆಂ ವಾರೆಂ
ಆಜ್ಯ್ ವ್ಹಾಳ್ತಾಲೆಂ
ತಾಂತುಂಚ್
ಸದಾಂಚೊ ದಂದೊ ಕರುನ್
ಜಿಯೆಂವ್ಕ್ ಆಶೆಂವ್ಚಿಂ ಜಾಯ್ತಿಂ ಮನ್ಶಾಂ
ಆನಿ ತಾಂಚ್ಯಾ ಜಿವಿತಾಚೆಂ ಏಕ್‌ಚ್ ಝುಜ್
ಕೊಣಾಯ್ಕಿ ದಿಸನಾಸ್ಚಿಂ
ಕಾಳ್ಜಾ ಗೊಪಾಂತ್ ಲಿಪ್‍ಲ್ಲಿಂ
ಗೊಬೊರ್ ಜಾಯ್ನಾತ್ಲಿಂ ತಾಂಚಿಂ ಸ್ವಪ್ಣಾಂ
ರಂಗೀನ್ ಸುತಾಂನಿ ಸೊಭಂವ್ಚಿಂ
ಆನಿ ಆನ್ಯೇಕ್ ದೀಸ್ ಜಿಯೆಂವ್ಚಿಂ....
ದಿಸಾಚಿ ಹರ‍್ಯೆಕ್ ಘಡಿ ಬಳಾನ್ ಲೊಟುನ್
ಅತ್ರೆಗಾಚಿಂ ಕಿರ್ಣಾಂ ದೊಳ್ಯಾಂನಿ ಘೆವ್ನ್
ಭರ‍್ವಸ್ಯಾಚ್ಯಾ ಪಾತೆಕಾಂಕ್
ಭುಕೆಚ್ಯೆ ವೊಡ್ಣೆಕ್
ವಿಕ್ತಿಂ ವಿಕ್ಚಿಂ
ಬಳ್ವಂತ್ ಕಾಳ್ಜಾಚಿಂ
ಅಬಲ್ ಮನ್ಶಾಂ ತಿಂ.......
ತಾಂಬ್ಡಿಂ ತೊಮೆಟಾಂ
ಪಿಕಿಂ ತೊರೆಂಜಾಂ
ಪಾಚ್ವಿಂ ಮೌಳಿಂಗಾಂ
ತರ‍್ನಿ ಜಿವಿ ಭಾಜಿ; ಸುಕಿ ಭಾಕ್ರಿ
ವಿಕ್ತಿ ಘೆಂವ್ಚ್ಯಾಕ್
ಆಶೆನ್ ರಾಕ್ಚಿಂ ತಿಂಚ್ ಮನ್ಶಾಂ
ಕೊಣೆಂಯ್ ತಿಂ ಘೆತ್ಲಿಂ ತರ್
ತಾಂಚಿ ಆನಿ ತಾಂಚ್ಯಾಂಚಿ
ಜಿಣಿಯೆಚಿ ಆನ್ಯೆಕ್ ಘಡಿ
ಬರ‍್ಯಾನ್ ಪಾಶಾರ್ ಜಾಯ್ತ್
ಮ್ಹಳ್ಳಿ ಆಶಾ ಉರ‍್ಬಾ ತಾಂಚೆ ಥಂಯ್
ಆನಿ ತಿಚ್ ಆಶಾ...
ಆನ್ಯೇಕ್ ದೀಸ್ ಬರ‍್ಯಾನ್ ಜಿಯೆಂವ್ಚಿ....
ಆನಿ ಪಳೆಯಾ
ಥೊಡ್ಯಾಚ್ ಮೆಟಾಂ ಪಯ್ಸ್
ಆನ್ಯೆಕಾ ಗುಡಾ ಸಾರ‍್ಕೆ ಆಂಗ್ಡಿಂತ್
ಥಂಡ್ ಸಿಮೆಟಿ ಧರ‍್ಣಿರ್ ಶಿಂಪ್ಡಲ್ಲ್ಯಾ
ಆನಿಕ್‍ಯ್ ಜಿವ್ಸಾಣೆಚ್ಯಾ
ತಾಂಬ್ಡ್ಯಾಚ್ ರಗ್ತಾ ವ್ಹಾಳ್ಯಾ ವಯ್ರ್‌ಚ್
ಉಬೊ ಬಕ್ರ್ಯಾಂ ಜಮೊ
ಜಿಣಿಯೆಚ್ಯಾ ಆಕ್ರೆಚ್ಯಾ ಹಂತಾರ್
ಎಕ್ಲ್ಯಾಚ್ಯಾ ಫಾಯ್ದ್ಯಾಕ್
ಥೊಡ್ಯಾಂಚ್ಯೆ ಕುಡಿಚ್ಯೆ ವೊಡ್ಣೆ-ಖುಶೆಕ್
ಆಪ್ಲ್ಯಾಚ್ ಜಿವಾಚಿ ಬಲಿ ಜಾಂವ್ಕ್
ಬಲಾತ್ಕಾರಾನ್ ತಯಾರ್
ಕಾಪ್ತಲೊ ಕಸಾಯ್‌ಗಾರ್ ಲಾಗಿಂ ಯೆತಾಂ
ತ್ಯಾಚ್ ಜಾಗ್ಯಾರ್ ತಾಂಚಿ ನಿರಂತರ್ ಧಾಂವ್
ನಿರಂತರ್ ತಾಚ್ಯಾ ಘಾಸಾಕ್ ಮೆಳ್ಚಿ ಚುಕೊವ್ಣಿ
ಫಕತ್
ಆನ್ಯೇಕ್ ಚಡ್ತಿಕ್ ಘಡಿಭರ್ ಹ್ಯಾ ಸಂಸಾರಿಂ ಜಿಯೆಂವ್ಚ್ಯೆ ಆಶೆನ್
ಜೊನ್ಸನ್ ಮಾರ‍್ಕೆಟಿಂತ್
ಮನ್ಶಾಂ ಮದ್ಲ್ಯಾ ಬಕ್ರ್ಯಾಂಚಿ
ಆಡೂಕ್ ವಿವಿಂಗಡ್ ಜಿಣಿಯೆಂತ್ಲಿ
ಏಕಚ್ ಧಾಂವ್
ಏಕಚ್ ಆಶಾ
ಅಸ್ಕತ್ ಆಕ್ರೇಚ್ಯಾ ಜಿವಿತಾಂತ್
ಆನಿ ಏಕ್ ಘಡಿ ಚಡ್ತಿಕ್
ಜಿಯೆಂವ್ಚಿ ಅಸಹಾಯಕ್ ಉರ‍್ಡೊಣಿ...
ತೇಂಯ್ ಏಕ್ ಬಳ್ವಂತ್ ಝುಜ್...
ಆನಿ ಏಕ್ ಝುಜ್, ಉಗ್ತ್ಯಾ ಮಯ್ದಾನಾ ವಯ್ಲೆಂ...
ಮನ್ಶಾಂನಿಂಚ್ ರಚ್‌ಲ್ಲೆಂ
ಆಪ್ಲ್ಯಾಚ್ ಆಂದ್ಳ್ಯಾಪಣಾಕ್ ಅಸ್ಮಿತಾಯ್ ದೀಂವ್ಕ್
ಮನ್ಶಾಂ ಮದ್ಲ್ಯಾ ಬಕ್ರ್ಯಾಂಚೆಂ ನ್ಹಯ್
ಮನ್ಶಾಂ ಮದ್ಲ್ಯಾ ಮನ್ಶಾಂಚೆಂ
ಮಾಸಾಚ್ಯೆ ಆಂಗ್ಡಿಂತ್ ಉಮ್ಕಳ್ಚ್ಯಾ ಟಿ ವಿ ಪಡ್ದ್ಯಾರ್ ದಿಸ್ಚೆಂ
ಭಾರಿಚ್ ಆತುರಿತ್ ಘಡಿತಾಂ ಪಿಂತ್ರಾವ್ಣಿ
ಮನ್ಶಾನ್ ಮನ್ಶಾಂಕ್
ಪಕತ್ ಆಪ್ಲ್ಯಾ ಆಂದ್ಳ್ಯಾಪಣಾನ್
ಮಾತಿಯೆನ್ ರಚ್ಲೆಲ್ಯಾ ದೆವಾಕ್ ನಮಾನ್ ಕರುಂಕ್
ಮನ್ಶಾ ರಗ್ತಾಕ್ ಬಲಿ ದಿಂವ್ಚೆಂ
ಬಲಿ ಘೆಂವ್ಚೆಂ.........
ಹ್ಯೆ ಧಾಂವ್ಣೆಂತ್ ಬಚಾವಿ ನಾ..
ಧರ‍್ಮಾಕ್ ಧರ‍್ಮಾಚೊ ವಾಟ್ವಾಸ್ ಪುಸುಂಕ್
ಜಿವಿತ್ ವಾಂಚೊಂವ್ಕ್ ನ್ಹಯ್....
ಆಪ್ಲೆಂ ಧಾರ‍್ಮಿಕ್ ಪಿಶೆಪಣ್ ವಾಂಚೊಂವ್ಕ್
ಕಾಳ್ಜಾಂತ್ಲಿ ಉತ್ರಾಂ ಮುಟಿಂತ್ ಆರಾವ್ನ್
ಹಿ ಏಕ್ ವಿಚಿತ್ರ್ ಬಲಿ
ಆಮ್ಚ್ಯಾಚ್ ಗಾಂವಾಂತ್ಲಿ....
ಭಾಂಗ್ರಾಳ್ಯಾ ದೆಶಾಂತ್ಲಿ.....
ಆತಾಂ....
ಟಿವಿ ವಯ್ಲಿ ಪಿಂತುರಾಂ ದೆಖೊನ್
ಕಸಾಯ್‌ಗಾರಾಚಿ ಸುರಿ ಸಯ್ತ್ ಥಂಯಿಂಚ್ ಥಂಡ್
ದೊಳ್ಯಾಂನಿ ದುಕಾಂಚಿ ಥಾಂಬನಾ ತಸ್ಲಿ ಝರ್
ಯೆದೊಳ್ ಕೆದ್ನಾಂಯ್ ಬಕ್ರ್ಯಾಂಚೊ ಗಳೊ ಕಾಪುಂಕ್ ಕಾಂಪನಾತ್ಲೊ
ತೊ ಹಾತ್, ಆಜ್ ಮಾತ್ರ್ ಕಾಂಪ್ತಾಲೊ...
ಆನಿ ತ್ಯಾಚ್ ವೆಳಿಂ
ತ್ಯಾಚ್ ವರ‍್ವಿಂ
ಬಕ್ರ್ಯಾಕ್ ಮಾತ್ರ್ ಆನ್ಯೇಕ್ ಘಡಿ ಚಡ್ತಿಕ್ ಜಿಯೆಂವ್ಚೊ ಅಚಾನಕ್ ಆವ್ಕಾಸ್ ...
- ಕ್ಲೆರೆನ್ಸ್, ಕೈಕಂಬ
संपादकीय:
जॉन्सन मार्केटिच्या कॅन्वसावयलीं पिंतुरां
जॉन्सन मार्केट एक निमित्त मात्र. जॉन्सन मार्केट एक कॅन्वस मात्र. ह्या कॅन्वसाचेर कवी क्लेरेन्स कैकंबान तीन वेवेगळीं पिंतुरां सोडयल्यांत - जिवांच्या मोलाचीं. एक आन्येका प्रास थर्थरांवचें. काळजाक सुरी तोपचें. मनाक पोकोरन सोडचें.
एक्येकडे पोटांच्ये भुकेखातीर जिवीत शिजोंवचीं मनशां, आन्येकाकडे कसायिखान्याच्या दारार जिणियेचीं निमाणीं वोरां पाशार करून आसचे निश्पापी बकरे आनी तिसरें - कसाप्प्याचें काळीज सयत कडोंवचें देवाचें पुन्य जोडच्याक मनशान मनशाक बली दिंवचें पिंतूर.
क्लेरेन्स एकलो काणयांगार. पूण कविता ताका नसाय न्हय. ती ताणे उमळशिकेन वेंगोवन घेतल्या.
-मेल्विन रोड्रीगस
कविता:
जॉन्सन मार्केटीक एक भेट ....
मंगळुरी नळ्यांच्या पाक्या पोंदा
साळयांच्या दाट जाळां संगीं
राजवट चलोंवचो
हरयेका दिसाचो पातळ काळोक
आजय तसोच आसल्लो
उगत्या आंगणा थावन
उदका तोडांतलें
उगत्या बागलां तोंडांतल्यान
भुकेच्या उज्याक मात्र पालवोंक सकनातलें
व्हाळचें घाणेड्डें जिवें वारें
आजय व्हाळतालें
तांतुंच
सदांचो दंदो करून
जियेवंक आशेंवचीं जायतीं मनशां
आनी तांच्या जिविताचें एकच झूज
कोणायकी दिसनासचीं
काळजा गोपांत लिपल्लीं
गोबोर जायनातलीं तांचीं स्वपणां
रंगीन सुतांनी सोभंवचीं
आनी आन्येक दीस जियेंवचीं....
दिसाची हरयेक घडी बळान लोटून
अत्रेगाचीं किरणां दोळ्यांनी घेवन
भरवस्याच्या पातेकांक
भुकेच्ये वोडणेक
विकतीं विकचीं
बळवंत काळजाचीं
अबल मनशां तीं.......
तांबडीं तोमेटां
पिकीं तोरेंजां
पाचवीं मौळिंगां
तरनी जिवी भाजी; सुकी भाक्री
विकती घेंवच्याक
आशेन राकचीं तिंच मनशां
कोणेंय तीं घेतलीं तर
तांची आनी तांच्यांची
जिणयेची आन्येक घडी
बरयान पाशार जायत
म्हळ्ळी आशा उरबा तांचे थंय
आनी तीच आशा...
आन्येक दीस बरयान जियेंवची....
आनी पळेया
थोड्याच मेटां पयस
आन्येका गुडा सारके आंगडींत
थंड सिमेटी धरणीर शिंपडल्ल्या
आनीकय जिवसाणेच्या
तांबड्याच रगता व्हाळ्या वयरच
उबो बकऱ्यां जमो
जिणयेच्या आक्रेच्या हंतार
एकल्याच्या फायद्याक
थोड्यांच्ये कुडिच्ये वोडणे-खुशेक
आपल्याच जिवाची बली जावंक
बलात्कारान तयार
कापतलो कसायगार लागीं येतां
त्याच जाग्यार तांची निरंतर धांव
निरंतर ताच्या घासाक मेळची चुकोवणी
फकत
आन्येक चडतीक घडिभर ह्या संसारीं जियेंवच्ये आशेन
जॉन्सन मारकेटींत
मनशां मदल्या बकऱ्यांची
आडूक विविंगड जिणयेंतली
एकच धांव
एकच आशा
अस्कत आक्रेच्या जिवितांत
आनी एक घडी चडतीक
जियेंवची असहायक उरडोणी...
तेंय एक बळवंत झूज...
आनी एक झूज, उगत्या मयदाना वयलें...
मनशांनींच रचल्लें
आपल्याच आंदळ्यापणाक अस्मिताय दीवंक
मनशां मदल्या बकऱ्यांचें न्हय
मनशां मदल्या मनशांचें
मासाच्ये आंगडींत उमकळच्या टी वी पडद्यार दिसचें
भारीच आतुरीत घडितां पिंत्रावणी
मनशान मनशांक
पकत आपल्या आंदळ्यापणान
मातयेन रचलेल्या देवाक नमान करुंक
मनशा रगताक बली दिंवचें
बली घेंवचें.........
ह्ये धांवणेंत बचावी ना..
धर्माक धर्माचो वाटवास पुसूंक
जिवीत वांचोवंक न्हय....
आपलें धार्मीक पिशेपण वांचोवंक
काळजांतली उतरां मुटींत आरावन
ही एक विचित्र बली
आमच्याच गांवांतली....
भांग्राळ्या देशांतली.....
आतां....
टिवी वयलीं पिंतुरां देखोन
कसायगाराची सुरी सयत थंयिंच थंड
दोळ्यांनी दुकांची थांबना तसली झर
येदोळ केदनांय बकऱ्यांचो गळो कापुंक कांपनातलो
तो हात, आज मात्र कांपतालो...
आनी त्याच वेळीं
त्याच वरवीं
बकऱ्याक मात्र आन्येक घडी चडतीक जियेंवचो अचानक आवकास ...
- क्लेरेन्स, कैकंबा