ಮಂಗ್ಳುರಾಕ್ ಕೇಕಿ ದಾರುವಾಲಾ: ಕವಿತಾ ಟ್ರಸ್ಟ್ ತರ್ಫೆನ್
ಜೇಮ್ಸ್ ಆನಿ ಶೋಭಾ ಮೆಂಡೊನ್ಸಾ ಉಪನ್ಯಾಸ್ ಆಗೋಸ್ತ್ 6 ತಾರಿಕೆರ್.
ಕೊಂಕಣಿ ಕವಿತೆಚ್ಯೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್ಚ್ಯಾ ಕವಿತಾ ಟ್ರಸ್ಟಾನ್ ಹ್ಯಾಚ್ ಆಗೋಸ್ತ್ 6 ತಾರಿಕೆರ್ ಸನ್ವಾರಾ ಸಾಂಜೆರ್ 5:30 ವೊರಾಂಚೆರ್ ಮಂಗ್ಳುರಾಂತ್ ಜೇಮ್ಸ್ ಆನಿ ಶೋಭಾ ಮೆಂಡೊನ್ಸಾ ವರ್ಸುಗೆಚೊ ಉಪನ್ಯಾಸ್ ಮಾಂಡುನ್ ಹಾಡ್ಲಾ.
ಮಂಗ್ಳುರ್ ಹಂಪನ್ಕಾಟ್ಯಾರ್ ಕೆ. ಎಸ್. ರಾವ್ ರಸ್ತ್ಯಾರ್ ಆಸ್ಚ್ಯಾ ಗ್ಯಾಲರಿ ಒರ್ಕಿಡ್ ಹಾಂಗಾಸರ್ ನಾಮ್ಣೆಚೊ ಇಂಗ್ಲಿಷ್ ಕವಿ ಆನಿ ಲೇಖಕ್, ಕೇಕಿ ಎನ್. ದಾರುವಾಲಾ ಹೊ ಉಪನ್ಯಾಸ್ ದಿತಲೊ. ಹ್ಯಾ ಉಪನ್ಯಾಸಾಚೊ ವಿಷಯ್ ಆಸಾ: "ಕವಿತಾ: ಎಕೆ ಸೊಧ್ನೆಚೆಂ ಬರೆಂ ಆನಿ ವಾಯ್ಟ್".
ಕವಿತಾ ಟ್ರಸ್ಟಾಚ್ಯಾ ಜಾಯ್ತ್ಯಾ ಕಾರ್ಯಕ್ರಮಾಂ ಪಯ್ಕಿ ಹ್ಯೆ ಕಾರ್ಯಾವಳೀಕ್ ವಿಶೇಸ್ ಸ್ಥಾನ್ ಆಸಾ. ಯೆದೊಳಚ್ ಹ್ಯಾ ಉಪನ್ಯಾಸಾನ್ ಸಾಹಿತಿಕ್ ವರ್ತುಲಾಂತ್ ಆನಿ ಕವಿಂ ಮಧೆಂ ನಾಂವ್ ಕೆಲಾಂ. ಪಾಟ್ಲ್ಯಾ ಚ್ಯಾರ್ ವರ್ಸಾಂನಿ ಕವಿತಾ ಟ್ರಸ್ಟಾಚ್ಯಾ ಹ್ಯೆ ಕಾರ್ಯಾವಳಿಂತ್ ಉಪನ್ಯಾಸ್ ದಿಂವ್ಚ್ಯಾಕ್ ನಾಮ್ಣೆಚೆ ಕವಿ ಗುಲ್ಝಾರ್, ಅಶೋಕ್ ವಾಜಪೇಯಿ, ಜೆರಿ ಪಿಂಟೊ ಆನಿ ಆರುಂಧತಿ ಸುಬ್ರಹ್ಮಣ್ಯಮ್ ಯೇವ್ನ್ ಗೆಲ್ಯಾಂತ್.
ಕವಿ ಕೇಕಿ ಎನ್. ದಾರುವಾಲಾ ಯೆದೊಳಚ್ ಬಾರಾ ಕವಿತೆಚಿಂ ಪುಸ್ತಕಾಂ ಪರ್ಗಟಾಯಿಲ್ಲೊ ಭಾರತೀಯ್ ಲೇಖಕ್. ತಾಚ್ಯೊ ದೋನ್ ಕಾದಂಬರಿ ತಶೆಂ ಪಾಂಚ್ ನವಲಿಕಾಂಚಿಂ ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್. ಪೀಟರ್ ಫೋರ್ಬ್ಸಾನ್ ಸಂಪಾದಿತ್ ಕರುನ್ ವೈಕಿಂಗ್ ಲಂಡನ್ ಹಾಂಣಿ ಪರ್ಗಟ್ ಕೆಲ್ಲ್ಯಾ 'ಸ್ಕ್ಯಾನಿಂಗ್ ದ ಸೆಂಚುರಿ' ಪುಸ್ತಕಾಂತ್ ತಾಚ್ಯೊ ಕವಿತಾ ಆಟಾಪ್ಲ್ಯಾತ್. ಪೆಂಗ್ವಿನ್ ಇಂಡಿಯಾ ಹಾಂಣಿ ತಾಚೆಂ 'ಕಲೆಕ್ಟಡ್ ಪೊಯೆಮ್ಸ್' (2006) ಪುಸ್ತಕ್ ಪರ್ಗಟ್ ಕೆಲಾಂ. ತಾಚ್ಯೊ ಕವಿತಾ ಸ್ವೀಡಿಶ್, ಸ್ಪಾನಿಶ್, ಮಗ್ಯಾರ್, ಮೆಸಿಡೋನಿಯನ್ ಆನಿ ರುಶಿಯನ್ ಭಾಸಾಂನಿ ಅನುವಾದ್ ಜಾಲ್ಯಾತ್. ಪಾಂಚ್ ನವಲಿಕಾಂಚಿಂ ಪುಸ್ತಕಾಂ ಬರಯಿಲ್ಲ್ಯಾ ದಾರುವಾಲಾಚೆಂ 'ಐಲೆಂಡ್ಸ್' ಪುಸ್ತಕ್ ಆಯ್ಲೆವಾರ್ಚೆಂ. ತಾಚಿ ಆಯ್ಲೆವಾರ್ಚಿ ಕಾದಂಬರಿ 'ಎನ್ಸೆಸ್ಟರಲ್ ಎಫೇರ್ಸ್' ಹಾರ್ಪರ್ ಕೊಲಿನ್ಸಾನ್ 2015 ಇಸ್ವೆಂತ್ ಪರ್ಗಟ್ ಕೆಲಾಂ.
ಒಕ್ಸ್ಫರ್ಡ್ ಕ್ವೀನ್ ಎಲಿಜಾಬೆತ್ ಹೌಸಾಂತ್ ವಿಸಿಟಿಂಗ್ ಫೆಲೊ ಜಾವ್ನ್ ಏಕ್ ವರಸ್ ಸಾರಲ್ಲ್ಯಾ ದಾರುವಾಲಾನ್ 1980 ಇಸ್ವೆಂತ್ ಜಿಂಬಾಬ್ವೆ ಎಲಿಸಾಂವಾ ಸಂದರ್ಭಾರ್ ಕೊಮನ್ವೆಲ್ತ್ ಪರಿವೀಕ್ಷಕ್ ಮ್ಹಣುನ್ ವಾವ್ರ್ ಕೆಲಾ. ಜೊಂಯ್ಟ್ ಇಂಟಲೆಜೆನ್ಸ್ ಕಮಿಟಿಚೊ ಚೇರ್ಮೆನ್ ಜಾವ್ನ್ ಸರ್ಕಾರಿ ವಾವ್ರಾ ಥಾವ್ನ್ ತೊ 1995 ಇಸ್ವೆಂತ್ ನಿವೃತ್ತ್ ಜಾಲೊ. ಭಾರತಾಚ್ಯಾ ಪ್ರಧಾನ್ ಮಂತ್ರಿಚೊ ವಿಶೇಸ್ ಸಹಾಯಕ್ ಮ್ಹಣುನಯ್ ತೊ ವಾವುರ್ಲಾ. ಅಲ್ಪಸಂಖ್ಯಾತಾಂಚ್ಯಾ ರಾಷ್ಟ್ರೀಯ್ ಕಮಿಶನಾಚೊ ಸಾಂದೊ ಜಾವ್ನಯ್ ತೊ ವಾವುರ್ಲಾ.
ಕೇಕಿ ದಾರುವಾಲಾಕ್ ಲಾಭಲ್ಲೆ ಪ್ರಮುಖ್ ಪುರಸ್ಕಾರ್: ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ (1984), ಕೊಮನ್ವೆಲ್ತ್ ಪೊಯೆಟ್ರಿ ಎವಾರ್ಡ್ (ಆಶಿಯಾ), 1987, ತಾಚಿ ಕಾದಂಬರಿ 'ಫೊರ್ ಪೆಪ್ಪರ್ ಎಂಡ್ ಕ್ರೈಸ್ಟ್' ಕೊಮನ್ವೆಲ್ತ್ ಬಹುಮಾನಾ ಖಾತೀರ್ (ಆಶಿಯಾ-ಯುಕೆ) ನಿಮಾಣ್ಯಾ ವಿಂಚ್ಣುಕೆಚ್ಯಾ ಪಾಂವ್ಡ್ಯಾಕ್ ಪಾವಲ್ಲಿ.
ಹ್ಯಾ ಉಪನ್ಯಾಸಾಕ್ ಭಾಗ್ ಘೆಂವ್ಕ್ ಆಶೆತೆಲ್ಯಾಂನಿ kavitatrust@gmail.com ಹಾಕಾ ಈಮೇಯ್ಲ್ ಧಾಡುಂಯೆತ್ ಯಾ 9980136297 ಹ್ಯಾ ನಂಬ್ರಾಕ್ ಸಂಪರ್ಕ್ ಕರ್ಯೆತ್.
मंगळुराक केकी दारुवाला: कविता ट्रस्ट तरफेन
जेम्स आनी शोभा मेंडोन्सा उपन्यास आगोस्त ६ तारकेर.
कोंकणी कवितेच्ये समग्र वाडावळी खातीर वावूरच्या कविता ट्रस्टान ह्याच आगोस्त ६ तारिकेर सनवारा सांजेर ५:३० वोरांचेर मंगळुरांत जेम्स आनी शोभा मेंडोन्सा वरसुगेचो उपन्यास मांडून हाडला.
मंगळुर हंपनकाट्यार के. एस. राव रसत्यार आसच्या गॅलरी ऑर्कीड हांगासर नामणेचो इंगलीष कवी आनी लेखक, केकी एन. दारुवाला हो उपन्यास दितलो. ह्या उपन्यासाचो विषय आसा: "कविता: एके सोधनेचें बरें आनी वायट".
कविता ट्रस्टाच्या जायत्या काऱ्यक्रमां पयकी ह्ये काऱ्यावळीक विशेस स्थान आसा. येदोळच ह्या उपन्यासान साहितीक वर्तुलांत आनी कवीं मधें नांव केलां. पाटल्या च्यार वर्सांनी कविता ट्रस्टाच्या ह्ये काऱ्यावळींत उपन्यास दिंवच्याक नामणेचे कवी गुलझार, अशोक वाजपेयी, जेरी पिंटो आनी आरुंधती सुब्रह्मण्यम येवन गेल्यांत.
कवी केकी एन. दारुवाला येदोळच बारा कवितेचीं पुस्तकां पर्गटायिल्लो भारतीय लेखक. ताच्यो दोन कादंबरी तशें पांच नवलिकांचीं पुस्तकां पर्गट जाल्यांत. पीटर फोब्सान संपादीत करून वैकिंग लंडन हांणी पर्गट केल्ल्या 'स्कॅनींग द सेंचुरी' पुस्तकांत ताच्यो कविता आटापल्यात. पेंग्वीन इंडिया हांणी ताचें 'कलेक्टड पोयेम्स' (२००६) पुस्तक पर्गट केलां. ताच्यो कविता स्वीडीश, स्पानीश, मग्यार, मेसिडोनियन आनी रुशियन भासांनी अनुवाद जाल्यात. पांच नवलिकांचीं पुस्तकां बरयिल्ल्या दारुवालाचें 'आयलॅंड्स' पुस्तक आयलेवारचें. ताची आयलेवारची कादंबरी 'एन्सेस्टरल एफेर्स हार्पर कॉलिन्सान २०१५ इस्वेंत पर्गट केलां.
ऑक्सफर्ड क्वीन एलिजाबेत हौसांत विसिटिंग फेलो जावन एक वरस सारल्ल्या दारुवालान १९८० इस्वेंत जिंबाब्वे एलिसांवा संदर्भार कॉमनवेल्त परिवीक्षक म्हणून वावर केला. जोंयट इंटलेजेन्स कमिटिचो चेरमेन जावन सर्कारी वावरा थावन तो १९९५ इस्वेंत निवृत्त जालो. भारताच्या प्रधान मंत्रिचो विशेस सहायक म्हणुनय तो वावूरला. अल्पसंख्यातांच्या राष्ट्रीय कमिशनाचो सांदो जावनय तो वावूरला.
केकी दारुवालाक लाभल्ले प्रमूख पुरसकार: साहित्य अकाडेमी पुरसकार (१९८४), कॉमनवेल्त पोयेट्री एवार्ड (आशिया), १९८७, ताची कादंबरी 'फॉर पेप्पर एंड क्रैस्ट' कॉमनवेल्त बहुमाना खातीर (आशिया-युके) निमाण्या विंचणुकेच्या पांवड्याक पावल्ली.
ह्या उपन्यासाक भाग घेवंक आशेतेल्यांनी kavitatrust@gmail.com हाका ईमेयल धाडुंयेत या ९९८०१३६२९७ ह्या नंबराक संपर्क करयेत.