Kavita Khobro

ನೂತನ್ ಸಾಖರ್‌ದಾಂಡೆ ಹಿಕಾ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

ನೂತನ್ ಸಾಖರ್‌ದಾಂಡೆ ಹಿಕಾ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

ಕೊಂಕಣಿ ಕವಿತಾ ಶೆತಾಕ್ ಮಹತ್ವಾಚಿ ದೇಣ್ಗಿ ದಿಲ್ಲ್ಯಾಂಕ್ ಕವಿತಾ ಟ್ರಸ್ಟಾನ್ ಹರ್‍ಯೆಕಾ ವರ್ಸಾ ದಿಂವ್ಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಆಂವ್ದುಂಚ್ಯಾ ವರ್ಸಾ ಗೊಂಯ್ಚ್ಯಾ ಮಾಪ್ಶಾಂಚ್ಯಾ ನೂತನ್ ಸಾಖರ್‌ದಾಂಡೆ ಹಿಕಾ ಫಾವೊ ಜಾಲಾ. 2017 ಫೆಭ್ರೆರ್ 5 ತಾರಿಕೆರ್ ಸಾಂಜೆರ್ 4 ವೊರಾಂಚೆರ್ ಮಂಗ್ಳುರ್‍ಚ್ಯಾ ಗ್ಯಾಲರಿ ಓರ್ಕಿಡ್‌ ಹಾಂಗಾಸರ್ ಚಲ್ಚ್ಯಾ 'ಕವಿತಾ ಸಂಭ್ರಮ್' ಕಾರ್ಯಾವಳಿ ವೆಳಾರ್ ಮಂಗ್ಳುರ್‍ಚೊ ಲೊಕಾಮೊಗಾಳ್ ಆಮ್‌ದಾರ್ ಜೆ.ಆರ್. ಲೋಬೋ ಹೊ ಪುರಸ್ಕಾರ್ ತಿಕಾ ಹಾತಾಂತರ್ ಕರ್‍ತಲೆ. ಹೊ ಪುರಸ್ಕಾರ್ ರು. 25,000, ಪ್ರಮಾಣ್ ಪತ್ರ್ ತಶೆಂಚ್ ಯಾದಸ್ತಿಕಾ ಆಟಾಪ್ತಾ.

ಹ್ಯಾಚ್ ಸಂದರ್ಭಾರ್ ಕವಿ ಎಮ್. ಪಿ. ರೊಡ್ರಿಗಸ್ ಹಾಂಚೊ ಕವಿತಾ ಸಂಗ್ರಹ್ 'ರಸ್ತ್ಯಾ ದೆಗೆಚಿಂ ಫುಲಾಂ' ಮೊಕ್ಳೀಕ್ ಜಾತಲೊ. ಹ್ಯಾಚ್ ವೆಳಾರ್ ಚಲ್ಚೆ ಕವಿಗೋಷ್ಟಿಂತ್ ವಿ. ಕೆ. ಯಾದವ್ (ತುಳು), ವಿಲ್ಸನ್ ಕಟೀಲ್, ನವೀನ್ ಸುರತ್ಕಲ್ ಆನಿ ಸುರೇಶ್ ಬಾಳಿಗಾ ಆಪಾಪ್ಲ್ಯೊ ಕವಿತಾ ವಾಚ್ತಲೆ.

1958 ದಶೆಂಬರಾಂತ್ ಗೊಂಯ್ಚ್ಯಾ ಮಾರ್ಸೆಲಾಂತ್ ಜಲ್ಮಲ್ಲ್ಯಾ ನೂತನ್ ಸಾಖರ್‌ದಾಂಡೆನ್ ಪಾಟ್ಲ್ಯಾ ತೀಸ್ ವರ್ಸಾಂ ಥಾವ್ನ್ ಕವಿತಾ ತಶೆಂ ಅನುವಾದಾಚ್ಯಾ ಶೆತಾಂತ್ ಯೋಗದಾನ್ ದಿಲಾಂ. ತಿಚೆ `ಜೀಣ್ ಜಾಲಿ ಕಸ್ತೂರಿ' ಆನಿ 'ಪಾಸ್‌ವರ್ಡ್' ಕಾವ್ಯಸಂಗ್ರಹ್ ಯೆದೊಳ್ ಪರ್ಗಟ್ ಜಾಲ್ಯಾತ್. ಒಡಿಶಾ ಕವಯಿತ್ರಿ ಪ್ರತಿಭಾ ಸತ್ಪತಿಚೆಂ ಕವಿತಾ ಪುಸ್ತಕ್ 'ತನ್ಮಯಧೂಲ್' ಕೊಂಕಣಿಕ್ ತಿಣೆಂ ಅನುವಾದಿತ್ ಕೆಲಾಂ. ತಿಚಿ 'ಶೆಣಿಲ್ಲೊ ಗಾಂವ್' ಕವಿತಾ ಭಾರತಾಚ್ಯಾ ಆಟ್ರಾ ಭಾಸಾಂಕ್ ಅನುವಾದಿತ್ ಜಾಲ್ಯಾ. ಗೊಂಯ್ಚ್ಯಾ ಹೈಸ್ಕೂಲ್ ತಶೆಂ ವಿಶ್ವವಿದ್ಯಾಲಯಾಂಚ್ಯಾ ಪಾಠ್ ಪುಸ್ತಕಾಂನಿ ತಿಚ್ಯಾ ಕವಿತಾಂಚೊ ಆಸ್ಪಾವ್ ಜಾಲಾ. ನೂತನಾಚ್ಯಾ ಪಾಸ್‍ವರ್ಡ್ ಪುಸ್ತಕಾ ಖಾತೀರ್ ಡೊ. ಟಿ. ಎಮ್. ಎ. ಪೈ ಫೌಂಡೇಶನ್ ಅತ್ಯುತ್ತಮ್ ಪುಸ್ತಕ್ ಪ್ರಶಸ್ತಿ ಲಾಭ್ಲ್ಯಾ. ಹ್ಯಾ ಶಿವಾಯ್ ತಿಕಾ ಜಾಯ್ತ್ಯೊ ಪ್ರಶಸ್ತ್ಯೊ ತಶೆಂ ಪುರಸ್ಕಾರ್ ಫಾವೊ ಜಾಲ್ಯಾತ್.

ಕವಿತಾ ಟ್ರಸ್ಟಾನ್ ದಿಂವ್ಚೊ ಹೊ ಪುರಸ್ಕಾರ್ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಆಡಳ್ತ್ಯಾ ನಿರ್ದೇಶಕ್ ಜೋಸೆಫ್ ಮಥಾಯಸ್ ಹಾಂಣಿ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾರ್ 2008 ವರ್ಸಾ ಸ್ಥಾಪನ್ ಕೆಲ್ಲೊ. ಕೊಂಕಣಿ ಕವಿತೆಕ್ ಅಂತರಾಷ್ಟ್ರೀಯ್ ಪಾಂವ್ಡ್ಯಾಕ್ ಪಾವೊಂವ್ಚ್ಯಾ ಶೆವೊಟಾ ಖಾತೀರ್ ಕವಿತಾ ಟ್ರಸ್ಟ್ ನಿರಂತರ್ ವಾವುರ್‍ತಾ.

ಯೆದೊಳ್ ಪಾಸುನ್ ಹೊ ಪುರಸ್ಕಾರ್ ಆರುಣಾ ರಾವ್ ಕುಂದಾಜೆ, ಮುಂಬಯ್ (2008), ದೆ. ಲಿಯೊ ಡಿಸೋಜಾ (ಕಾವ್ಯದಾಸ್), ಮಂಗ್ಳುರ್ (2009), ಕಾಶಿನಾಥ್ ಶಾಂಭಾ ಲೊಳಿಯೆಂಕಾರ್, ಗೊಂಯ್ (2010), ದೆ. ಪಿ.ಎನ್. ಶಿವಾನಂದ ಶೆಣೈ, ಕೊಚ್ಚಿ (2011), ಡೊ. ರಾಜಯ್ ಪವಾರ್, ಗೊಂಯ್ (2012), ಯೂಸುಫ್ ಅ. ಶೇಖ್, ಗೊಂಯ್ (2013), ಇಕ್ಬಾಲ್ ಸಯೀದಿ, ಭಟ್ಕಳ್ (2014) ಆನಿ ಎಮ್. ಪಿ. ರೊಡ್ರಿಗಸ್, ಮಂಗ್ಳುರ್ (2015) ಹಾಂಕಾಂ ಫಾವೊ ಜಾಲಾ.

 

Read More About Mathias Family Poetry Award and Its Sponsors

नूतन साखरदांडे हिका कविता ट्रस्टाचो मथायस कुटम कविता पुरस्कार

कोंकणी कविता शेताक महत्वाची देणगी दिल्ल्यांक कविता ट्रस्टान हरयेका वर्सा दिंवचो मथायस कुटम कविता पुरस्कार ह्या वर्सा गोंयच्या मापशांच्या नूतन साखरदांडे हिका फावो जाला. २०१७ फेभ्रेर ५ तारकेर सांजेर ४ वोरांचेर मंगळूरच्या गॅलरी ऑर्कीड हांगासर चलच्या 'कविता संभ्रम' काऱ्यावळी वेळार मंगळूरचो लोकामोगाळ आमदार जे.आर. लोबो हो पुरस्कार तिका हातांतर करतले. हो पुरस्कार रू. २५,०००, प्रमाण पत्र तशेंच यादस्तिका आटापता. 

ह्याच संदर्भार कवी एम. पी. रोड्रीगस हांचो कविता संग्रह 'रस्त्या देगेचीं फुलां' मोकळीक जातलो. ह्याच वेळार चलचे कविगोष्टींत वी. के. यादव (तुळू), विल्सन कटील, नवीन सुरत्कल आनी सुरेश बाळिगा आपापल्यो कविता वाचतले.

१९५८ दशेंबरांत गोंयच्या मार्सेलांत जल्मल्ल्या नूतन साखरदांडेन फाटल्या तीस वर्सां थावन कविता तशें अनुवादाच्या शेतांत योगदान दिलां. तिचे `जीण जाली कस्तूरी' आनी 'पासवर्ड' काव्यसंग्रह येदोळ पर्गट जाल्यात. ओडिया कवयित्री प्रतिभा सत्पतिचें कविता पुस्तक 'तन्मयधूल' कोंकणीक तिणें अनुवादीत केलां. तिची 'शेणिल्लो गांव' कविता भारताच्या आटरा भासांक अनुवादीत जाल्या. गोंयच्या हैसकूल तशें विश्वविद्यालयांच्या पाठ पुस्तकांनी तिच्या कवितांचो आस्पाव जाला. नूतनाच्या पासवर्ड पुस्तका खातीर डॉ. टी. एम. ए. पै फौंडेशन अत्युत्तम पुस्तक प्रशस्ती लाभल्या. ह्या शिवाय तिका जायत्यो प्रशसत्यो तशें पुरस्कार फावो जाल्यात.

कविता ट्रस्टान दिंवचो हो पुरस्कार मेरिट फ्रैट सिस्टम्स हाचो आडळत्या निर्देशक जोसेफ मथायस हांणी आपल्या कुटमाच्या नांवार २००८ वर्सा स्थापन केल्लो. कोंकणी कवितेक अंतराष्ट्रीय पांवड्याक पावोंवच्या शेवोटा खातीर कविता ट्रस्ट निरंतर वावुरता.

येदोळ पासून हो पुरस्कार आरुणा राव कुंदाजे, मुंबय (२००८), दे. लियो डिसोजा (काव्यदास), मंगळूर (२००९), काशिनाथ शांभा लोळियेंकार, गोंय (२०१०), दे. पी.एन. शिवानंद शेणै, कोच्ची (२०११), डॉ. राजय पवार, गोंय (२०१२), यूसूफ अ. शेख, गोंय (२०१३), इकबाल सयीदी, भटकळ (२०१४) आनी एम. पी. रोड्रीगस, मंगळूर (२०१५) हांकां फावो जाला.



Title : ನೂತನ್ ಸಾಖರ್‌ದಾಂಡೆ ಹಿಕಾ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.