ಕೊಂಕ್ಣಿ ವ್ಯಾಕರಣಾಚೆರ್ ಉಜ್ವಾಡ್ ಫಾಂಕಯಿಲ್ಲೆಂ ಯಶಸ್ವಿ ಕಾಮಾಸಾಳ್
ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನ ಹಾಂಚ್ಯಾ ಜೋಡ್ ಪಾಲ್ವಾನ್ ಹ್ಯಾಚ್ ಫೆಬ್ರೆರ್ 27, 2022 ತಾರಿಕೆರ್ ’ಕೊಂಕ್ಣಿ ವ್ಯಾಕರಣಾಚ್ಯೊ ಸಾದ್ಯೊ ಗಜಾಲಿ’ ವಿಷಯಾಚೆರ್ ಅರ್ಧ್ಯಾ ದಿಸಾಚೆಂ ಕಾಮಾಸಾಳ್ ಮಾಂಡುನ್ ಹಾಡ್‍ಲ್ಲೆಂ.
ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್‍ಲ್ಲೆಂ ಹೆಂ ಕಾಮಾಸಾಳ್ ಕವಿತಾ ಟ್ರಸ್ಟಾಚೊ ಟ್ರಸ್ಟಿ ಮೆಲ್ವಿನ್ ರೊಡ್ರಿಗಸ್ ಹಾಣೆ ಚಲೊವ್ನ್ ವೆಲೆಂ. ಸುರ‍್ವೆರ್ ಹ್ಯಾ ಎಕಾ ಕಾಮಾಸಾಳಾಚಿ ಗರ್ಜ್ ವಿವರಾವ್ನ್ ಹಾಜರ್ ಆಸ್‍ಲ್ಲ್ಯಾಂಕ್ ತಾಣೆ ಯೆವ್ಕಾರ್ ದಿಲೊ. ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಅಧ್ಯಕ್ಷ್ ಶ್ರೀ ನಂದಗೋಪಾಲ್ ಶೆಣೈನ್ ಕೊಂಕ್ಣಿಚ್ಯಾ ವಾವ್ರಾಂತ್ ಪ್ರತಿಷ್ಠಾನಾಚೊ ಸಹಕಾರ್ ಕವಿತಾ ಟ್ರಸ್ಟಾಕ್ ಸದಾಂಚ್ ಆಸ್ತಲೊ ಆನಿ ಅಸಲೆಂ ಕಾಮಾಸಾಳ್ ಎಕಾಂತ್ ಸೊಂಪ್ಚೆಂ ನ್ಹಯ್, ಸರಾಗ್ ಜಾಂವ್ಕ್ ಜಾಯ್ ಮ್ಹಣುನ್ ಸಾಂಗುನ್ ಹ್ಯಾ ಕಾಮಾಸಾಳಾಕ್ ಚಾಲನ್ ದಿಲೆಂ.
ಹ್ಯಾ ಕಾಮಾಸಾಳಾಂತ್ ಕೊಂಕ್ಣಿ ಭಾಶೆಚಿಂ ವರ್ಣಾಂ, ಅಕ್ಷರಾಂ ಹ್ಯಾ ವಿಶಿಂ ದಾಖ್ಲ್ಯಾಂ ಸಮೇತ್ ಮ್ಹಾಯೆತ್ ದೀವ್ನ್, ವ್ಯಾಕರಣಾಕ್ ಸಂಬಂಧಿತ್ ನಾಮಾಂ (noun), ಸರ್ವ್‍ನಾಮಾಂ (pronoun), ವಿಶೇಷಣಾಂ (adjective), ಕ್ರಿಯಾಪದಾಂ (verb), ಕ್ರಿಯಾ ವಿಶೇಷಣಾಂ (adverb), ಪರಸರ್ಗ್ (postposition), ಸಮುಚ್ಚಯ್ (conjuntion), ಉದ್ಗಾರ್ (interjection) ಆನಿ ನಿಪಾತ್ (particles) - ಹ್ಯಾ ವಿಶಿಂ ಮೆಲ್ವಿನಾನ್ ವಿವರ್ ದಿಲೊ. ಇತ್ಲೆಂಚ್ ನ್ಹಯ್ ಉತ್ರಾಂ ಮ್ಹಳ್ಳಿಂ ತಿಂ ವಚನ್, ಲಿಂಗ್ ದಾಕೊಂವ್ಚೆ ಖಾತೀರ್ ವಾಕ್ಯಾಚ್ಯಾ ಸಂದರ್ಭಾರ್ ಕಶಿಂ ಬದಲ್ತಾತ್ ಮ್ಹಳ್ಳೆಂ ದಾಕೊವ್ನ್ ದಿಲೆಂ. ಕೊಂಕ್ಣಿಚ್ಯೆ ಬರ‍್ಪಾ ರಿತಿ ವಿಶಿಂ ಕಾಂಯ್ ಥೊಡ್ಯೊ ಸುಚೊವ್ಣ್ಯೊ ತಾಣೆ ದಿಲ್ಯೊ.
ಕಾಮಾಸಾಳಾಚ್ಯೆ ಆಕೇರಿಕ್ ಚರ್ಚಾ ಚಲ್ಲಿ. ಉಪ್ರಾಂತ್ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್ಚ್ಯಾ ವಾವ್ರಾಚಿ ಝಳಕ್ ಲಾಬ್ಚೆ ಖಾತೀರ್ ಹಾಜರ್ ಜಾಲ್ಲ್ಯಾಂನಿ ಭೊಂವ್ಡಿ ಕೆಲಿ.
ಹ್ಯಾ ಕಾಮಾಸಾಳಾಕ್ ವಿಶ್ವ ಕೊಂಕಣಿ ಕೇಂದ್ರಾಚೊ ಮುಖೆಲ್ ನಿರ್ವಹಣ್ ಅಧಿಕಾರಿ ಗುರು ಬಾಳಿಗಾ ಹಾಜರ್ ಆಸ್‍ಲ್ಲೊ. ಉಡುಪಿ, ಮಂಗ್ಳುರ್, ಮೂಡಬಿದ್ರಿ, ಕಾಸರ್‌ಗೋಡ್ ಪ್ರದೇಶಾಂ ಥಾವ್ನ್ ಚೊವೀಸ್ ಬರೊವ್ಪಿ ಹಾಜರ್ ಆಸ್‍ಲ್ಲೆ.
कोंकणी व्याकरणाचेर उजवाड फांकयिल्लें यशस्वी कामासाळ
कविता ट्रस्ट हांणी कोंकणी भास आनी संस्कॄती प्रतिष्ठान हांच्या जोड पालवान ह्याच फेब्रेर २७, २०२२ तारकेर ’कोंकणी व्याकरणाच्यो साद्यो गजाली’ विषयाचेर अर्ध्या दिसाचें कामासाळ मांडून हाडल्लें.
विश्व कोंकणी केंद्रांत चलल्लें हें कामासाळ कविता ट्रस्टाचो ट्रस्टी मेल्विन रोड्रीगस हाणे चलोवन वेलें. सुरवेर ह्या एका कामासाळाची गर्ज विवरावन हाजर आसल्ल्यांक ताणे येवकार दिलो. कोंकणी भास आनी संस्कृती प्रतिष्टानाचो अध्यक्ष श्री नंदगोपाल शेणैन कोंकणिच्या वावरांत प्रतिष्ठानाचो सहकार कविता ट्रस्टाक सदांच आसतलो आनी असलें कामासाळ एकांत सोंपचें न्हय, सराग जावंक जाय म्हणून सांगून कामासाळाक चालन दिलें.
ह्या कामासाळांत कोंकणी भाशेचीं वर्णां, अक्षरां ह्या विशीं दाखल्यां समेत म्हायेत दीवन, व्याकरणाक संबंधीत नामां, सर्वनामां, विशेषणां, क्रियापदां, क्रिया विशेषणां, परसर्ग, समुच्चय, उदगार आनी निपात - ह्या विशीं मेल्विनान विवर दिलो. इतलेंच न्हय उतरां म्हळ्ळीं तीं वचन, लिंग दाकोंवचे खातीर वाक्याच्या संदर्भार कशीं बदलतात म्हळ्ळें दाकोवन दिलें. कोंकणिच्ये बरपा रिती विशीं कांय थोड्यो सुचोवण्यो ताणे दिल्यो.
कामासाळाच्ये अखेरीक चर्चा चल्ली. उपरांत विश्व कोंकणी केंद्रांत चलच्या वावराची झळक लाबचे खातीर हाजर जाल्ल्यांनी भोंवडी केली.
ह्या कामासाळाक विश्व कोंकणी केंद्राचो मुखेल निर्वहण अधिकारी गुरू बाळिगा हाजर आसल्लो. उडुपी, मंगळूर, मूडबिद्री, कासरगोड प्रदेशां थावन चोवीस बरोवपी हाजर आसल्ले.