ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಂತ್ ನಿನಿಶಾ, ಎಲ್ವಿನ್ ಆನಿ ಪ್ರೀತನ್ ಪಯ್ಲಿಂ
ಕೊಂಕಣಿ ನಾಟಕ್ ಸಭಾ ಆನಿ ಕವಿತಾ ಟ್ರಸ್ಟ್ ಹಾಂಣಿ ಸಾಂಗಾತಾ ಮೆಳುನ್ ಹ್ಯಾಚ್ 2026 ಆಗೋಸ್ತ್ ಮ್ಹಯ್ನ್ಯಾಚೆ 2 ತಾರಿಕೆರ್ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡಲ್ಲ್ಯಾ 24ವ್ಯಾ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಂತ್ ಭುರ್ಗ್ಯಾಂಚ್ಯಾ ವಿಭಾಗಾಂತ್ ಬೊಂದೆಲ್ಚ್ಯಾ ನಿನಿಶಾ ಪ್ರಿಶಾ ಮೊಂತೇರೊನ್ ಪಯ್ಲೆಂ ಸ್ಥಾನ್ ಜೊಡ್ಲೆಂ ಜಾಲ್ಯಾರ್, ಯುವಜಣಾಂಚ್ಯಾ ವಿಭಾಗಾಂತ್ ಶಿರ್ತಾಡಿಚ್ಯಾ ಎಲ್ವಿನ್ ಡೆಸಾನ್ ಪಯ್ಲೆಂ ಸ್ಥಾನ್ ಆಪ್ಣಾಯ್ಲೆಂ. ಮ್ಹಾಲ್ಗಡ್ಯಾಂಚ್ಯಾ ವಿಭಾಗಾಂತ್ ದೆರೆಬೈಲ್ಚ್ಯಾ ಪ್ರೀತನ್ ರೆನಿಟಾ ಪಿರೇರಾಕ್ ಪಯ್ಲೆಂ ಸ್ಥಾನ್ ಫಾವೊ ಜಾಲೆಂ.
ಪಂದ್ರಾ ವರ್ಸಾ ಸಕಯ್ಲ್ಯಾ ಭುರ್ಗ್ಯಾಂಚ್ಯಾ ವಿಭಾಗಾಂತ್ 33 ಜಣಾಂನಿ ಭಾಗ್ ಘೆತಲ್ಲೊ ಆಸುನ್ ದುಸ್ರೆಂ ಇನಾಮ್ ಹೊಸ್ಪೆಟ್ಚ್ಯಾ ಏಂಜೆಲ್ ಮೇಘನ್ ಕುಟಿನ್ಹಾಕ್ ಗೆಲೆಂ. ತಿಸ್ರೆಂ ಇನಾಮ್ ಬೊಂದೆಲ್ಚ್ಯಾ ನಿಶೆಲ್ ಪರ್ಲ್ ಮೊಂತೇರೊಕ್ ಮೆಳ್ಳೆಂ. ಪ್ರೋತ್ಸಾಹಕ್ ಇನಾಮಾಂ ಆನ್ಯಾ ಡೆಸಾ ಮಿಯಾಪದವ್, ಸಿಯಾನಾ ವೇಗಸ್, ಬಜ್ಜೋಡಿ ಆನಿ ಎಲ್ರಿನ್ ರಿಶಾಕ್ ಡಿಸೋಜಾ, ಕಾಸ್ಸಿಯಾ ಹಾಂಕಾಂ ಫಾವೊ ಜಾಲಿಂ.
ಪಂದ್ರಾ ತೆಂ ತೀಸ್ ವರ್ಸಾಂ ಭಿತರ್ಲ್ಯಾ ಯುವಜಣಾಂಚ್ಯಾ ವಿಭಾಗಾಂತ್ ನೋವ್ ಜಣಾಂನಿ ಭಾಗ್ ಘೆತಲ್ಲೊ ಆಸುನ್, ದುಸ್ರೆಂ ಇನಾಮ್ ನೀರ್ಮಾರ್ಗಾಚ್ಯಾ ಪ್ರಿನ್ಸಿಯಾ ಡಿಸೋಜಾನ್ ಜೊಡ್ಲೆಂ ಜಾಲ್ಯಾರ್, ತಿಸ್ರೆಂ ಇನಾಮ್ ಗುರ್ಪುರ್ಚ್ಯಾ ಆಲ್ರೀಶಾ ವೆಲನಿ ರೊಡ್ರಿಗಸ್ ಆನಿ ಬೆಂದುರ್ಚ್ಯಾ ಎಶ್ಲಿನ್ ವಿಸ್ಮಯ ಲೋಬೊಕ್ ಫಾವೊ ಜಾಲೆಂ.
ತೀಸ್ ವರ್ಸಾಂ ವಯ್ಲ್ಯಾಂಚ್ಯಾ ಜ್ಯೇಷ್ಠಾಂಚ್ಯಾ ವಿಭಾಗಾಂತ್ ನೋವ್ ಜಣಾಂನಿ ಭಾಗ್ ಘೆತಲ್ಲೊ ಆಸುನ್, ದುಸ್ರೆಂ ಇನಾಮ್ ಕಾಸ್ಸಿಯಾಚ್ಯಾ ಐರಿನ್ ಮೆಂಡೊನ್ಸಾಕ್ ಫಾವೊ ಜಾಲೆಂ ಜಾಲ್ಯಾರ್ ತಿಸ್ರೆಂ ಇನಾಮ್ ನಕ್ರೆಚ್ಯಾ ಲವೀಟಾ ಡಿಸೋಜಾಕ್ ಫಾವೊ ಜಾಲೆಂ.
ಹಿ ಸಗ್ಳಿ ಸರ್ತ್ ವಿನ್ಸಿ ಪಿಂಟೊ ಆಂಜೆಲೊರ್, ಸ್ಮಿತಾ ಶೆಣೈ ಆನಿ ಫೆಲ್ಸಿ ಲೋಬೊ ಹಾಂಣಿ ವೊರವ್ಣಿ ಕೆಲಿ.
ಸ್ಪರ್ಧ್ಯಾಚೆ ಸುರ್ವೆರ್ ಕೊಂಕಣಿ ನಾಟಕ್ ಸಭೆಚೊ ಅಧ್ಯಕ್ಷ್ ಫಾ. ರೊಕಿ ಡಿಕುನ್ಹಾ, ಉಪಾಧ್ಯಕ್ಷ್ ಫ್ಲೊಯ್ಡ್ ಡಿಮೆಲ್ಲೊ, ಕಾರ್ಯದರ್ಶಿ ಪ್ಯಾಮೆಲಾ ಸಾಂತೊಸ್ ಆನಿ ಕೊಂಕಣಿ ನಾಟಕ್ ಸಭೆಚೆ ಹೆರ್ ಕಾರ್ಭಾರಿ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಂಚೆ ಬರಾಬರ್ ವೇದಿರ್ ಆಸಲ್ಲೆ. ವೇದಿ ವಯ್ಲ್ಯಾ ಮಾನೆಸ್ತಾಂನಿ ವೊರಯ್ಣಾರಾಂ ಬರಾಬರ್ ಆನಿ ಕಾಂಯ್ ಥೊಡ್ಯಾ ಸ್ಪರ್ಧಿಕಾಂ ಸಾಂಗಾತಾ ಪಣ್ಟಿ ಪೆಟೊವ್ನ್ ಹಿ ಸರ್ತ್ ಉಗ್ತಾವಣ್ ಕೆಲಿ. ಫಾ. ರೊಕಿ ಡಿಕುನ್ಹಾನ್ ಯೆವ್ಕಾರಾಚಿಂ ಉತ್ರಾಂ ಉಲೊವ್ನ್ ಸರ್ತೆಚ್ಯೆ ಯಶಸ್ವೆಖಾತೀರ್ ಮಾಗ್ಲೆಂ. ಮೆಲ್ವಿನ್ ರೊಡ್ರಿಗಸಾನ್ ಪಾಟ್ಲ್ಯಾ ಜಾಯ್ತ್ಯಾ ವರ್ಸಾಂನಿ ಹಿ ಏಕ್ ಸರ್ತ್ ಚಲೊವ್ನ್ ವ್ಹರುಂಕ್ ಸಂಧಿ ದಿಲ್ಲ್ಯಾ ಕೊಂಕಣಿ ನಾಟಕ್ ಸಭೆಚೊ ಉಪ್ಕಾರ್ ಭಾವುಡ್ಲೊ. ಕವಿತಾ ಟ್ರಸ್ಟಾಚ್ಯಾ ವಾವ್ರಾವಿಶಿಂ ಸಾಂಗುನ್, ವೊರಯ್ಣಾರಾಂಚಿ ವಳಖ್ ಕರುನ್ ದಿಲಿ ಆನಿ ಸರ್ತೆಚ್ಯಾ ನೆಮಾಂವಿಶಿಂ ವಿವರ್ ದಿಲೊ.
ಜೋಕಿಮ್ ಪಿಂಟೊನ್ ಉಪ್ಕಾರ್ ಭಾವುಡ್ಲೆ. ಮೆಲ್ವಿನ್ ರೊಡ್ರಿಗಸಾನ್ ಫಳಿತಾಂಶ್ ಪರ್ಗಟ್ ಕೆಲೆಂ. ಸಕ್ಕಡ್ ಸ್ಪರ್ಧಿಕಾಂಕ್ ಕವಿತಾ ಟ್ರಸ್ಟಾಚೆಂ ಪುಸ್ತಕ್ 'ಸಾಹಸಿ ಆನಿ ದಯಾಳಿ ಜಿವಿತಾಂ' ವಾಂಟ್ಲೆಂ.
ಎವ್ರೆಲ್ ರೊಡ್ರಿಗಸ್ ಆನಿ ವೆಂಕಟೇಶ್ ನಾಯಕ್ ಹಾಂಣಿ ಕವಿತಾ ಟ್ರಸ್ಟಾ ತರ್ಫೆನ್ ಸಹಕಾರ್ ದಿಲ್ಲೊ.
कोंकणी कविता सादरीकरण सर्तेंत निनीशा, एल्वीन आनी प्रीतन पयलीं
कोंकणी नाटक सभा आनी कविता ट्रस्ट हांणी सांगाता मेळून ह्याच 2026 आगोस्त म्हयन्याचे 2 तारकेर डॉन बोस्को सालांत मांडून हाडल्ल्या 24व्या कोंकणी कविता सादरीकरण सर्तेंत भुरग्यांच्या विभागांत बोंदेलच्या निनीशा प्रिशा मोंतेरोन पयलें स्थान जोडलें जाल्यार, युवजणांच्या विभागांत शिर्ताडीच्या एल्विण डेसान पयलें स्थान आपणायलें. म्हालगड्यांच्या विभागांत देरेबैलच्या प्रीतन रेनीटा पिरेराक पयलें स्थान फावो जालें.
पंद्रा वरसां सकयल्या भुरग्यांच्या विभागांत 33 जणांनी भाग घेतल्लो आसून दुसरें इनाम होस्पेटच्या एंजेल मेघन कुटीन्हाक गेलें. तिसरें इनाम बोंदेलच्या निशेल पर्ल मोंतेरोक मेळ्ळें. प्रोत्साहक इनामां आन्या डेसा, मियापदव, सियाना वेगस, बज्जोडी आनी एल्रीन रिशाक डिसोजा, कास्सीया हांकां फावो जालीं.
पंद्रा तें तीस वर्सां भितरल्या युवजणांच्या विभागांत नोव जणांनी भाग घेतल्लो आसून, दुसरें इनाम नीरमार्गाच्या प्रिन्सिया डिसोजान जोडलें जाल्यार, तिसरें इनाम गुरपुरच्या आल्रीशा वेलनी रोड्रीगस आनी बेंदूरच्या एशलीन विस्मया लोबोक फावो जालें.
तीस वर्सां वयल्यांच्या ज्येष्ठांच्या विभागांत नोव जणांनी भाग घेतल्लो आसून, दुसरें इनाम कास्सीयाच्या आयरीन मेंडोन्साक फावो जालें जाल्यार तिसरें इनाम नक्रेच्या लवीटा डिसोजाक फावो जालें.
ही सगळी सर्त विन्सी पिंटो आंजेलोर, स्मिता शेणै आनी फेल्सी लोबो हांणी वोरवणी केली.
स्पर्ध्याचे सुरवेर कोंकणी नाटक सभेचो अध्यक्ष फा. रॉकी डिकुन्हा, उपाध्यक्ष फ्लोयड डिमेल्लो, कार्यदर्शी प्यामेला सांतोस, आनी कोंकणी नाटक सभेचे हेर कार्भारी कविता ट्रस्ट अध्यक्ष मेल्विन रोड्रीगस हांचे बराबर वेदीर आसल्ले. वेदी वयल्या मानेस्तांनी वोरयणारां बराबर आनी कांय थोड्या स्पर्धिकां सांगाता पणटी पेटोवन ही सर्त उगतावण केली. फा. रॉकी डिकुन्हान येवकाराचीं उत्रां उलोवन सर्तेचे यशस्वे खातीर मागलें. मेल्विन रोड्रीगसान फाटल्या जायत्या वर्सांनी ही एक सर्त चलोवन व्हरुंक संधी दिल्ल्या कोंकणी नाटक सभेचो उपकार भावुडलो. कविता ट्रस्टाच्या वावराविशीं सांगून, वोरयणारांची वळख करून दिली आनी सर्तेच्या नेमांविशीं विवर दिलो.
जोकीम पिंटोन उपकार भावुडले. मेल्विन रोड्रीगसान फळितांश पर्गट केलें. सक्कड स्पर्धिकांक कविता ट्रस्टाचें पुस्तक 'साहसी आनी दयाळी जिवितां' वांटलें.
एवरेल रोड्रीगस आनी वेंकटेश नायक हांणी कविता ट्रस्टा तर्फेन सहकार दिल्लो.