ಸಂಪಾದಕೀಯ್:
ಉತ್ರಾಂನಿ ಆಸ್ಚೊ ಉಸ್ವಾಸ್ ಆನಿ ತಾಂಚಿಂ ಮಹಿಮಾಂ
ಉತ್ರಾಂಚಿಂ ಮಹಿಮಾಂ ಕಸಲಿಂ ಮ್ಹಣುಂ! ಹ್ಯಾ ಮಹಿಮೆಭರಿತ್ ಉತ್ರಾಂ ಖಾತೀರ್ ಎಕಾ ಕವಿಕ್, ಲೇಖಕಾಕ್, ಭಾಷಣ್‍ಗಾರಾಕ್ ಮಾನ್-ಮರ್ಯಾದ್ ಮೆಳ್ತಾ. ಆನಿ ಕೊಣ್, ಹ್ಯಾ ಉತ್ರಾಂಕ್ ಫಾವೊತ್ಯಾ ಪರಿಂ ಜೊಡುಂಕ್ ಸಕನಾಸ್ತಾಂ, ಮರ್ಯಾದ್ ಹೊಗ್ಡಾವ್ನ್ ಘೆತಾ.
ಆಯ್ಲೆವಾರ್‍ಚ್ಯೊ ಥಳೀಯ್ ಗಜಾಲಿ ತಶೆಂ ರಾಷ್ಟ್ರೀಯ್ ಗಜಾಲಿ ಮತಿಂತ್ ದವರುನ್ ಮೆಲ್ವಿನ್ ಕೊಳಾಲ್‌ಗಿರಿನ್ ಹಿ ಕವಿತಾ ವಿಣ್ಲ್ಯಾ. ಉತ್ರಾಂನಿ ವೀಕ್ ವೊಂಕ್ಚ್ಯಾ ಮನ್ಶಾಕ್ ಮನೀಸ್ ಖಿಣಾನ್ ವೊಳ್ಕುಂಕ್ ಸಕ್ತಾ - ಮಾಗೀರ್ ತೊ ಆಪ್ಣೆಂ ತಶೆಂ ಮ್ಹಣುಂಕಚ್ ನಾ ಮ್ಹಣುನ್ ಭಾಸುಂ.
ಹಾಂವೆಂ ಯೆದೊಳಚ್ ಸಾಂಗಲ್ಲೆಬರಿ ಉತ್ರಾಂನಿ ಉಸ್ವಾಸ್ ಆಸ್ತಾ. ಉತ್ರಾಂನಿ ಉಸ್ವಾಸ್ ಆಸಾ ದೆಕುನ್ ತಾಂಕಾಂ ಮನ್ಶಾಂಕ್ ಆಸಲ್ಲೆಬರಿ ಆತ್ಮೊ ಲೆಗುನ್ ಆಸಾ. ನ್ಹಯ್ ತರ್ ಜಾಲ್ಲೆಂ, ಠಾಗೋರಾಚೆಂ 'ಜನ ಗಣ ಮನ' ಆಜ್ ಪರ್‍ಯಾಂತ್ ಉರ್‍ತೆಂನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉತ್ರಾಂ
ಥೊಡ್ಯಾಂನಿ ಉತ್ರಾಂ ಗುಂತುನ್
ಮೊಗಾಚೊ ಸುವಾದ್ ಪಾಚಾರ್‍ಲೊ
ಆನಿ ಥೊಡ್ಯಾಂನಿ ಉತ್ರಾಂ ವಿಣುನ್
ಚಾಟಿಯೆಕ್ ಲಜೆಕ್ ಘಾಲ್ಚೊ ಮಾರ್ ದಿಲೊ
ಥೊಡ್ಯಾ ಉತ್ರಾಂಕ್ ಸಂಗೀತ್ ಸಜೊವ್ನ್
ಗಾವ್ನ್ ಎಕ್ಲೊ ಕೊಗುಳ್ ಜಾಲೊ
ಥೊಡ್ಯಾ ಉತ್ರಾಂಕ್ ಮೊವಾಳಾಯ್ ಭರ್‍ಸುನ್
ಉಲೊವ್ನ್ ಶೆವ್ಟಲ್ಲ್ಯಾಂಕ್ ಥೊಡೆ ಭುಜ್ವಣ್ದಾರ್ ಜಾಲೆ
ಥೊಡ್ಯಾಂನಿ ಉತ್ರಾಂ ವ್ಹಾಳ್ ವ್ಹಾಳೊವ್ನ್
ಅಧಿಕಾರ್ ಆಪ್ಣಾಯ್ಲೊ
ಆನಿ ಥೊಡ್ಯಾಂನಿ ಉತ್ರಾಂ ಜರೊವ್ನ್
ದಿಸ್ಪಡ್ತೊ ಗ್ರಾಸ್ ಜೊಡ್ಲೊ
ಆನಿ...
ತ್ಯಾ ಎಕಾ ಕವಿನ್ ಲಿಖ್ಣಿ ಪೀಳ್ನ್
ಸಜಯಿಲ್ಲಿಂ ಉತ್ರಾಂ ರಾಷ್ಟ್ರಾಚೆಂ ಗೀತ್ ಜಾಲೆಂ
ತ್ಯಾ ಉತ್ರಾಂ ಬರಾಬರ್
ತೋಯ್ ಅಮರ್ ಜಾಲೊ
ತಿ ಎಕ್ಲಿ, ಖಂಯ್ ಥಾವ್ನ್‌ಕಿ ಸರ್ವ್ ಸಾಂಡುನ್
ಅನಾಥ್ ಜಾವ್ನ್ ಭಾರತ್ ಭುಮಿಚೆ
ಮಾತಿಯೆಚೊ ಸ್ವಾಧ್ ಘೆವ್ನ್ ಜಿಯೆಲ್ಲಿ
ತಿಚ್ಯಾ ತೊಂಡಾ ಥಾವ್ನ್ ಭಾಯ್ರ್ ಸರಲ್ಲ್ಯಾ
ಉತ್ರಾಂಕ್ ಮ್ಹೊಂವಾಚ್ಯಾಕಿ ಚಡ್ ರೂಚ್ ಆಸ್ಲೆಂ.
ಗೊಪಾಂತ್ ತಿಣೆ ಸುಶೆಗ್ ದೀವ್ನ್
ಸಾಸ್ಣಾಕ್ ವೊಳ್ಕಿಚಿ ಮದರ್ ಜಾಲಿ.
ಆನಿ ಹಾಂಗಾಸರ್ ಹೊ ಎಕ್ಲೊ
ದಾಟ್ ಮಿಶಿಯಾಂ ಪಾಟ್ಲ್ಯಾನ್ ಲಿಪಲ್ಲೆ
ಚರಬ್ ಮಾಂಡಲ್ಲೆ ಜಿಬೆಥಾವ್ನ್ ವಿಕಾಳ್ ಉತ್ರಾಂ ವೊಂಕ್ತಾ
ನಿಸ್ವಾರ್ಥಿ ಸೆವೆನ್ ಪರ್ಜಳ್ಚ್ಯಾ ಆಂಜ್ಯಾಕೀ
ಕಾಳೆಂ ಭಾಂಗರ್ ಮ್ಹಣ್ತಾ
ಉಲೊಂವ್ಕ್ ತೋಂಡ್ ಉಗ್ತೆಂ ಕರ್‍ತಾನಾಂಚ್ ಘಾಣ್ತಾ
ವೊಂಕ್ತಲೊ ತೊ ವೊಂಕುಂದಿ
ತೆ ಘಾಣಿಂತಚ್ ತೊ ಲೊಳುಂದಿ
ಗೊಡ್ಶಾ ಉತ್ರಾಂಚೊ ಸ್ವಾಧ್ ಸೆಂವ್ಚ್ಯಾಂಕ್
ವಿಕಾಚಿ ಘಾಣ್ ಪಾರ್ಕುಂಕ್ ಕಷ್ಟ್ ಜಾಂವ್ಚೆಂ ನಾ
ಥೆಂಬೆ-ಥೆಂಬೆ ವೀಕ್ ತೊಂಡಾ ಥಾವ್ನ್
ಶಿಂಪ್ತಾನಾ ಗೊಡ್ಶಾ ಉತ್ರಾಂಚಿ
ಯಾದ್ ಸೊಡ್ನ್ ದುಸ್ರಿ ಯಾದ್ ಯೆಂವ್ಚಿ ನಾ
-ಮೆಲ್ವಿನ್ ಕೊಳಾಲ್‌ಗಿರಿ
संपादकीय:
उतरांनी आसचो उस्वास आनी तांचीं महिमां
उत्रांचीं महिमां कसलीं म्हणूं! ह्या महिमेभरीत उत्रां खातीर एका कविक, लेखकाक, भाषणगाराक मान-मर्याद मेळता. आनी कोण, ह्या उतरांक फावोत्या परीं जोडूंक सकनास्तां, मर्याद होगडावन घेता.
आयलेवारच्यो थळीय गजाली तशें राषट्रीय गजाली मतींत दवरून मेल्विन कोळालगिरीन ही कविता विणल्या. उतरांनी वीक वोंकच्या मनशाक मनीस खिणान वोळकूंक सक्ता - मागीर तो आपणें तशें म्हणुंकच ना म्हणून भासूं.
हांवें येदोळच सांगल्लेबरी उतरांनी उस्वास आस्ता. उतरांनी उस्वास आसा देकून तांकां मनशांक आसल्लेबरी आत्मो लेगून आसा. न्हय तर जाल्लें, ठागोराचें 'जन गण मन' आज पर्यांत उरतें ना.
-मेल्विन रोड्रीगस
कविता:
उतरां
थोड्यांनी उतरां गुंतून
मोगाचो सुवाद पाचारलो
आनी थोड्यांनी उतरां विणून
चाटियेक लजेक घालचो मार दिलो
थोड्या उतरांक संगीत सजोवन
गावन एकलो कोगूळ जालो
थोड्या उतरांक मोवाळाय भरसून
उलोवन शेवटल्ल्यांक थोडे भुज्वणदार जाले
थोड्यांनी उतरां व्हाळ व्हाळोवन
अधिकार आपणायलो
आनी थोड्यांनी उतरां जरोवन
दिस्पडतो ग्रास जोडलो
आनी...
त्या एका कवीन लिखणी पीळन
सजयिल्लीं उतरां राषट्राचें गीत जालें
त्या उतरां बराबर
तोय अमर जालो
ती एकली, खंय थावनकी सर्व सांडून
अनाथ जावन भारत भुमिचे
मातियेचो स्वाध घेवन जियेल्ली
तिच्या तोंडा थावन भायर सरल्ल्या
उतरांक म्होंवाच्याकी चड रूच आसलें.
गोपांत तिणे सुशेग दीवन
सासणाक वोळकिची मदर जाली.
आनी हांगासर हो एकलो
दाट मिशियां पाटल्यान लिपल्ले
चरब मांडल्ले जिबेथावन विकाळ उत्रां वोंकता
निस्वार्थी सेवेन पर्जळच्या आंज्याकी
काळें भांगर म्हणता
उलोवंक तोंड उगतें करतानांच घाणता
वोंकतलो तो वोंकुंदी
ते घाणिंतच तो लोळुंदी
गोडशा उतरांचो स्वाध सेंवच्यांक
विकाची घाण पारकूंक कष्ट जांवचें ना
थेंबे-थेंबे वीक तोंडा थावन
शिंपताना गोडशा उतरांची
याद सोडन दुसरी याद येंवची ना
-मेल्विन कोळालगिरी