ಸಂಪಾದಕೀಯ್:
ನಿತಳ್ ಹಾಸೊ ದಿಂವ್ಚ್ಯಾ ಪ್ರೇತನಾಂತ್ ಹರ್‍ಯೆಕ್ ಪಾವ್ಟಿಂ ಸಲ್ವಣಿ
ಹಾಸೊ ಸುಖಾಚೊ ಸಂಕೇತ್. ಎಕ್ಲೊ ಮನೀಸ್ ಹಾಸ್ತಾ ಮ್ಹಳ್ಯಾರ್ ಸಗ್ಳೆಂ ಬರೆಂ ಮ್ಹಳ್ಳೊ ಅರ್ಥ್. ಪುಣ್ ಖಂಯ್ಚೇಂಯ್ ಸಾರ್ಕೆಂ ನಾತಲ್ಲ್ಯಾ ವೆಳಾರ್ ಹಾಸೊ ತರೀ ಕಸೊ ಯೆತಲೊ? ಹಾಂಗಾಚ್ಯಾ ಕವಿ ಭೊಂವಾರಿಂ ಖಂಯ್ಚೇಂಯ್ ಬರೆಂ ನಾ. ಸಗ್ಳ್ಯಾಂನಿ ದುಕಾಂಚಿಂ ದುಕಾಂ.
ಹಾಂಗಾಸರ್ ಹಾಸೊ ಕಾರಣ್ ದೀವ್ನ್, ಸಮಾಜಾಚಿ ಕರಾಳ್ ಸ್ಥಿತಿ ಮುಖಾರ್ ಹಾಡ್ಚೆಂ ಸುಫಳ್ ಪ್ರೇತನ್ ಕವಿ ಜೊ. ಸಿ. ಸಿದ್ದಕಟ್ಟೆನ್ ಕೆಲಾಂ.
ದುಕಾಂತ್ ಆಸ್ಚ್ಯಾ ಮನ್ಶಾನ್ ಕಾಂಯಿಂಚ್ ಘಡನಾತಲ್ಲೆಬರಿ ಹಾಸೊ ದಾಕೊವ್ನ್ ಫಟಂವ್ಚೆಂ ಪ್ರೇತನ್ ಕರ್‍ಚೆಂ ಆಮಿ ಪಳೆಲಾಂ. ಫಟ್ಕಿರ್‍ಯೊ ಹಾಸೊ ತಾಂಕಾಂ ಮ್ಹಣ್ತಾತ್. ಮಾಗೀರ್ ಥೊಡ್ಯೊ ನಂಜಿ ಹಾಸೋಯ್ ಆಸ್ತಾತ್. ಹಾಂಗಾಸರ್ ಕವಿ ಬೋವ್ಶಾ ನಿತಳ್ ಹಾಶ್ಯಾವಿಶಿಂ ಮಾತ್ರ್ ಉಲಯ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಶೆಂ ಹಾಸುಂ?
ಫೊಟೊಗ್ರಾಫರಾ ಫುಡೆಂ ರಾವ್ಲ್ಯಾರ್
ವ್ಹಯ್, ಹಾಂವ್ ಮಾತ್ಶೆಂ ಹಾಸ್ತಾಂ
ಪಾಪ್! ಮ್ಹಜ್ಯಾ ಫಾಂಟೆಲ್ಲೆ ಸೊಂಡಿಯೆನಿಮ್ತಿಂ
ತಾಚೆಂ ಕೆರಿಯರ್ ಕಿತ್ಯಾ ಭಿಗ್ಡಾಂವ್?
ಹಾಸುಂಕ್ ಮ್ಹಾಕಾಯ್ ಖೂಬ್ ಮನ್ ಆಸಾ
ಪೂಣ್
ಭೊಂವಾರಿಂತ್ಲೆಂ ಮ್ಹಾಕಾ ಕಾಂಯ್ ಹಾಸಯ್ನಾ.
ತುಜ್ಯೊ ದಾಂತಾಪಂಗ್ತಿ 'ಸೊಭಿತ್' ಮ್ಹಣಾ
ಪಾಟ್ಲ್ಯಾ ಘರ್‍ಚೆಂ ಚೆಡುಂ.
ಆಯ್ಚೆ ಸಕಾಳಿಂ ತೆಂ ಗುಲ್ಲ್ ಜಾಲಾಂ
ಕೊಣಾಚ್ಯಾ ನಶಿಬಾಕ್ ಹಾಸುಂ?
ಹಾತ್ ಧರ್‍ತಾತ್ ಬಸ್ಸಾಕ್
ವ್ಹಡ್ಲಿಂ ಕಟ್ಟೊಣಾಂ ಭಾಂದ್ಚಿಂ
ಮ್ಹೆಳಿಂ ಮ್ಹೆಳಿಂ ಮನ್ಶಾಂ
ಬಸ್ಸ್ ಗಡ್ದೆನ್ ವೆತಾ-ರಾವನಾ
ಆತಾಂ ಸಾಂಗಾ, ಹಾಸುಂ?
ಟ್ರಾಫಿಕ್ ಸಿಗ್ನಲಾಕಡೆ ಮೊಗ್ರೆಂ ವಿಕ್ತಾ ಪೋರಿ
ಕಾರಾರ್ ಬಸಲ್ಲೊ ಕಾಳ್ಯಾ ಗ್ಲಾಸಾಂಚೊ
ಮೊಗ್ರ್ಯಾಂ ನಿಬಾನ್ ಹಾತ್ ಚಿಡ್ಡಿತಾ
ತುಮಿಂಚ್ ಸಾಂಗಾ, ಹಾಸುಂ?
ಹೊಸ್ಪಿಟ್ಲಾಚೊ ಕೊರಿಡೊರ್ ಸಾಫ್ ಕರ್‍ತಾ ತಿತ್ಲೆಂಯ್
ದಾಕ್ತೆರಾಂಚ್ಯಾ ಬುಟಾಂಚಿ ಸವಾರಿ
ಖರ್‍ಶೆತಾ ಮುಡ್ಕೆಲ್ಲಿ ಮ್ಹಾತಾರಿ
ಕಿತೆಂ ಚಿಂತುನ್ ಹಾಸುಂ?
ಪಿಯೊನಾಕ್ ಸಾಟಾಂಚಿ ಪಿರಾಯ್
ತಿಸಾಂಚೊ ಮೆನೆಜರ್ ತಾಕಾ
ವೊಮ್ತೆಂ ಉದಾರೆಂ ಧುತಾ
ಕಸೊ ಸಾಂಗಾ ಹಾಸುಂ?
ಥೊಡೆ ಪಾವ್ಟಿಂ ಹಾಸ್ಯಾಂ ಮ್ಹಣ್
ವೀಜ್ ದಿವೆ ಪಾಲ್ವವ್ನ್ ಹಾಸ್ತಾಂ ಕಾಳೊಕಾಂತ್
ಕೋಣ್ ತರೀ ಸ್ವಿಚ್ ದಾಂಬ್ತಾ
ತೆನ್ನಾ ಹಾಂವ್ ದುಕಾಂನಿ ಆಸ್ತಾಂ.
-ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್
संपादकीय:
नितळ हासो दिंवच्या प्रेतनांत हरयेक पावटीं सलवणी
हासो सुखाचो संकेत. एकलो मनीस हासता म्हळ्यार सगळें बरें म्हळ्ळो अर्थ. पूण खंयचेंय सारकें नातल्ल्या वेळार हासो तरी कसो येतलो? हांगाच्या कवी भोंवारीं खंयचेंय बरें ना. सगळ्यांनी दुकांचीं दुकां.
हांगासर हासो कारण दीवन, समाजाची कराळ स्थिती मुखार हाडचें सुफळ प्रेतन कवी जो. सी. सिद्दकट्टेन केलां.
दुकांत आसच्या मनशान कांयींच घडनातल्लेबरी हासो दाकोवन फटंवचें प्रेतन करचें आमी पळेलां. फटकिऱ्यो हासो तांकां म्हणतात. मागीर थोड्यो नंजी हासोय आसतात. हांगासर कवी बोवशा नितळ हाश्याविशीं मात्र उलयता.
-मेल्विन रोड्रीगस
कविता:
कशें हासूं?
फोटोगराफरा फुडें रावल्यार
व्हय, हांव मातशें हास्तां
पाप! म्हज्या फांटेल्ले सोंडियेनिमतीं
ताचें केरियर कित्या भिगडांव?
हासूंक म्हाकाय खूब मन आसा
पूण
भोंवारिंतलें म्हाका कांय हासयना.
तुज्यो दांतापंग्ती 'सोभित' म्हणा
पाटल्या घरचें चेडूं.
आयचे सकाळीं तें गुल्ल जालां
कोणाच्या नशिबाक हासूं?
हात धरतात बससाक
व्हडलीं कट्टोणां भांदचीं
म्हेळीं म्हेळीं मनशां
बस्स गडदेन वेता-रावना
आतां सांगा, हासूं?
ट्राफीक सिगनलाकडे मोग्रें विकता पोरी
कारार बसल्लो काळ्या ग्लासांचो
मोगऱ्यां निबान हात चिड्डिता
तुमींच सांगा, हासूं?
होस्पिटलाचो कोरिडोर साफ करता तितलेंय
दाकतेरांच्या बुटांची सवारी
खर्शेता मुडकेल्ली म्हातारी
कितें चिंतून हासूं?
पियोनाक साटांची पिराय
तिसांचो मेनेजर ताका
वोमतें उदारें धुता
कसो सांगा हासूं?
थोडे पावटीं हासयां म्हण
वीज दिवे पालववन हास्तां काळोकांत
कोण तरी स्वीच दांबता
तेन्ना हांव दुकांनी आसतां.
-जो. सी. सिद्दकट्टे, कार्मेलीत