ಸಂಪಾದಕೀಯ್:
ಸೊಭಾಯ್ ಮ್ಹಳ್ಯಾರ್ ಏಕ್ ಕಲ್ಪನಾ ಮಾತ್ರ್
ಸೊಭಾಯ್ ಮ್ಹಳ್ಳಿ ಏಕ್ ಕಲ್ಪನಾ ಮಾತ್ರ್. ಮನ್ಶಾಚೆ ಕುಡಿ ಪರಸ್ ಗುಣಾಂಕ್ ಮಹತ್ವ್ ಚಡ್. ನ್ಹೆಸಣ್, ಮೇಕಪ್, ಭಾಂಗರ್, ನಗ್ - ಹೆಂ ಸಗ್ಳೆಂ ಮನ್ಶಾಕ್ ನೆಟಯ್ತಾ ಖರೆಂ. ಪುಣ್ ಹೆಂ ಸಗ್ಳೆಂ ತಾತ್ಕಾಲಿಕ್. ಎಕ್ಲೊ ಮನೀಸ್ ಆನ್ಯೇಕ್ ಮನ್ಶಾಚ್ಯಾ ಲಾಗ್ಶಿಲ್ಯಾ ಸಂಪರ್ಕಾಂತ್ ಆಯ್ಲ್ಯಾ ಉಪ್ರಾಂತಚ್ ತಾಚಿ ಖರಿ ಸೊಭಾಯ್, ಮ್ಹಣ್ಜೆ ಗೂಣ್ ಕಿತೆಂ ಮ್ಹಣ್ ಜಾಹೀರ್ ಜಾತಾ.
ತ್ಯಾ ದೆಕುನ್ ಹ್ಯಾ ತಾತ್ಕಾಲಿಕ್ ಸಂಸಾರಿ ವಸ್ತುಂಕ್ ಲಬ್ದನಾಸ್ತಾಂ, ನೀಜ್ ಸೊಭಾಯೆತೆವ್ಶಿಂ ಗುಮಾನ್ ದೀಂವ್ಕ್ ನವ್ಯಾನ್ ಕವಿತಾ ಕುಳಾರಾಕ್ ಪಾವಲ್ಲೊ ರೊಬಿನ್ ಮೆಂಡೊನ್ಸಾ ಸಾಂಗ್ತಾ. ರೊಬಿನಾಕ್ ಯೆವ್ಕಾರ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸೊಭಾಯ್
ಸೊಭಿತ್ ಹಾಂವ್ ಸೊಭಿತ್ ಮ್ಹಣುನ್
ಆಶೆನ್ ರಾವನಾಕಾ
ಸೊಭಾಯೆಚ್ಯಾಕಿ ಗೂಣ್ ಸೊಭಿತ್
ಸಾಬಾಚೆಂ ಉದಕಯ್ ಸೊಭಾಯೆಚೆಂ
ಪುಣ್
ತೆಂ ಮ್ಹೆಳೆಂ ಉದಕ್
ನಿತಳ್ ಕರ್‍ತಾಂ ಆಪುಣ್ ಮ್ಹೆಳ್ತಾ
ಪಿಯೆಂವ್ಕ್ ಜಾಯ್ನಾ ತೆಂ
ಕಾಳೊ ಹಾಂವ್ ಕಾಳೊ
ಮ್ಹಣುನ್ ಲಜೆನಾಕಾ
ಕಾಂಟ್ಯಾ ವಯ್ಲಿಂ
ಕಣೆರಾಂಯ್ ಕಾಳಿಂ
ಕಾಣೆರಾಂ ಕಾಳಿಂ ಜಾಲ್ಯಾರಿ
ಖಾವ್ನ್ ಪೊಳೆ ತಾಚಿ ರೂಚ್
ಭಾಂಗರ್ ಘಾಲ್ನ್
ದಳ್ಬಾರ್ ದಾಕಯ್ನಾಕಾ
ಭಾಂಗರ್ ಸದಾಂಯ್
ತುಜೆಂ ಆಸ್ಚೆಂ ನಾ
ದೊನ್ಪಾರ್ ಆಸಲ್ಲೊ
ಸಾಂಜ್ ಜಾಂವ್ಕ್
ವೇಳ್ ಲಾಗ್ಚೊನಾ
-ರೊಬಿನ್ ನೀರುಡೆ
संपादकीय:
सोभाय म्हळ्यार एक कल्पना मात्र
सोभाय म्हळ्ळी एक कल्पना मात्र. मनशाचे कुडी परस गुणांक महत्व चड. न्हेसण, मेकप, भांगर, नग - हें सगळें मनशाक नेटयता खरें. पूण हें सगळें तातकालीक. एकलो मनीस आनयेक मनशाच्या लागशिल्या संपरकांत आयल्या उपरांतच ताची खरी सोभाय, म्हणजे गूण कितें म्हण जाहीर जाता.
त्या देकून ह्या तातकालीक संसारी वस्तूंक लब्दनास्तां, नीज सोभायेतेवशीं गुमान दीवंक नव्यान कविता कुळाराक पावल्लो रोबीन मेंडोन्सा सांगता. रोबिनाक येवकार.
-मेल्विन रोड्रीगस
कविता:
सोभाय
सोभित हांव सोभित म्हणून
आशेन रावनाका
सोभायेच्याकी गूण सोभित
साबाचें उदकय सोभायेचें
पुण
तें म्हेळें उदक
नितळ करतां आपुण म्हेळता
पियेवंक जायना तें
काळो हांव काळो
म्हणून लजेनाका
कांट्या वयलीं
कणेरांय काळीं
काणेरां काळीं जाल्यारी
खावन पोळे ताची रूच
भांगर घालन
दळबार दाकयनाका
भांगर सदांय
तुजें आसचें ना
दोनपार आसल्लो
सांज जावंक
वेळ लागचोना
-रोबीन निरुडे