ಸಂಪಾದಕೀಯ್:
ದೋನ್ ಗಾಂವಾಂ ಮಧ್ಲಿ ನಂಯ್ ಆನಿ ತಾಂತುಂ ವ್ಹಾಳ್ಚೊ ಮನ್ಶಾ ಸ್ವಾರ್ಥ್
ದೋನ್ ಗಾಂವಾಂಕ್ ವೆಗ್ಳಿ ಕೆಲ್ಲಿ ಏಕ್ ನಂಯ್ ಎಕಾ ಮನ್ಶಾಚ್ಯಾ ವೆಕ್ತಿತ್ವಾವಿಶಿಂ ಉಲಂವ್ಚೆಂ ಹೆ ಕವಿತೆಂತ್ ಭರಾನ್ ಝಳ್ಕತಾ. ಜಾಯ್ತೆಪಾವ್ಟಿಂ ಮನ್ಶಾಚೊ ಸ್ವಾರ್ಥ್ ಮ್ಹಣ್ಯಾಂ ಯಾ ತಾಚಿ ನಿರ್ಲಕ್ಶಾ ಮ್ಹಣ್ಯಾಂ - ಜಾಯ್ತ್ಯಾ ಬರ್‍ಯಾ ಕಾಮಾಂಚೆರ್ ಕುರಾಡ್ ಕಶಿ ಮಾರ್ ಘಾಲ್ತಾ. ಆಕ್ರೇಕ್ ಆಪ್ಲ್ಯಾಚ್ ಮಾತ್ಯಾರ್ ಹಿ ಕುರಾಡ್ ಪಡ್ತಾನಾ ತಾಂಕಾಂ ಜಾಗ್ ಜಾತಾ ಜಾಲ್ಯಾರಿ ವೇಳ್ ಉತ್ರಾಲ್ಲೊ ಆಸ್ತಾ.
ಹಾಂಗಾಸರ್ ಹೆ ಕವಿತೆಂತ್ ನಂಯ್, ಸಾಂಕೊವ್ ಆನಿ ಗಾಂವ್ ಮುಕಾರ್ ದಿಸ್ತಾತ್ ತರೀ, ತಾಚ್ಯಾಕ್‌ಯ್ ಚಡಿತ್ ಮಾಪಾನ್ ಮನ್ಶಾಚ್ಯಾ ಕರ್‍ತುಬಾಂಕ್ ಧರ್‌ಲ್ಲೊ ಆರ್ಸೊ ಬಳ್ವಂತ್ ದಿಸ್ತಾ. ಹರ್‍ಯೆಕ್ ಪಾವ್ಟಿಂ ಜೆ ಕುಶಿಕ್ ತುಂ ಆರ್ಸೊ ಘುಂವ್ಡಾಯ್ತಾಯ್, ತಿತ್ಲೆಪಾವ್ಟಿಂ ವೆವೆಗ್ಳಿಂ ಮನ್ಶಾರುಪಾಂ ಝಳ್ಕೆಕ್ ಯೇವ್ನ್ ಹೆ ಕವಿತೆಚ್ಯಾ ಚಮತ್ಕಾರಾನ್ ಮನ್ ದಾಧೊಶಿ ಜಾತಾ.
ಅಸಲೆ ಚಮತ್ಕಾರ್ ಕರುಂಕ್ ಕವಿಂಕ್ ಮಾತ್ರ್ ಸಾಧ್ಯ್ ಆಸಾ. ತಾಂತ್ಲ್ಯಾ ತಾಂತುಂ ಜೋಮೆಲ್, ಬೊಂದೆಲ್ ತಸಲ್ಯಾ ಕವಿಂಕ್ ಮ್ಹಣೊನ್ ಹಾಂವೆಂ ಸಾಂಗ್ಲ್ಯಾರ್ ಹಾಂವೆಂ ಕಾಂಯ್ ಕವಿಂಚೆಂ ಗುಮಟ್ ವ್ಹಾಜಯಿಲ್ಲ್ಯಾಬರಿ ಜಾಂವ್ಚೆಂ ನಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನಂಯ್
ಅಲ್ತಡ್ಚೊ ಖಡ್ಪಿ ಗಾಂವ್
ಪಲ್ತಡ್ಚೊ ಮ್ಹಜೊ ಗಾಂವ್
ದೊಗೀ ಸಾಂಗಾತಾ ಮೆಳೊಂಕ್
ಆಂವ್ಡೆತಾತ್
ತಾಂಕಾಂ ವಿಂಗಡ್ ಕರುನ್
ಮಾಸಾಂ ಖಾವ್ನ್
ಖೆಬ್ಡಾಯೊ ಕರುನ್
ಮಧೆಂಚ್ ವ್ಹಾಳ್ಚಿ
ಗೂಂಡ್ ನಂಯ್
ದೊಗಾಂಯ್ಚಿ ಸೊಭಾಯ್ ಪಳೆತಾ
ತಾಂಚೊ ಸುಖಾಚೊ ನೀಸ್
ಘೊಟುನ್
ಸಿಸ್ರಿಚ್ಯಾ ದುಕಾಂನಿ ತಿ
ದೊಗಾಂಯ್ಚೆ ಗಳೆ ಭಿಜಯ್ತಾ
ಆಲ್ತಡ್ಚೆಂ ಮ್ಹೆಳೆಂ
ಪಲ್ತಡಿ ಪಾವಯ್ತಾ
ಪಲ್ತಡ್ಚೊ ಕಸ್ರೊ
ಹೆವ್ಶಿನ್ ವೊಂದಾಯ್ತಾ
ಚಿಂತಾಂ ಹಾಂವ್
ಹೆ ನಂಯ್ತ್
ಕಿತ್ಲೆ ಪಾವ್ಟಿಂ ಸಲಿಸಾಯೆನ್
ಉಪ್ಯೆವ್ನ್
ದುಕಾನಾಂತ್ಲ್ಯಾ ಬನಿಯಾಬರಿ
ದೊನೀ ಗಾವಾಂಕ್ ವಚೊಂಕ್ ನಾ?
ಕಿತ್ಲೆ ಪಾವ್ಟಿಂ
ಮಾಂಕ್ಡಾನ್ ಮಾಜ್ರಾಂಕ್
ದಿಲ್ಲೆಂ ತೀರ್ಪ್
ತ್ಯಾ ಗಾಂವ್ಚ್ಯಾ ಮಾತ್ಯಾರ್
ಥಾಪುಂಕ್ ನಾ?
ಮ್ಹಜೆ ಸಸಾರಾಯೆನ್
ನಂಯ್ ಪುಡ್ಪುಡಿತ್ ಜಾವ್ನ್
ಭರಾನ್ ವ್ಹಾಳ್ತಾ
ಆತಾಂ ಸಾಟ್ ಸತ್ತರ್ ಜಾವ್ನ್
ನಂಯ್ತ್ ಮಧೆಗಾತ್
ಆಸ್‌ಲ್ಲ್ಯಾ ಮ್ಹಾಕಾ
ಉಪ್ಯೆಂವ್ಕ್ ಹಾತ್ ಪಾಯ್
ಸಾಂಗಾತ್ ದೀನಾಂತ್
ತರ್ನಾಟ್‌ಪಣಾರ್
ದೊನೀ ಗಾಂವಾಂಕ್ ಎಕ್ಟಾಂವ್ಕ್
ನಂಯ್ ಉತ್ರೊನ್ ವಚೊಂಕ್
ಸಾಂಕೊವ್ ಬಾಂಧ್‌ಲ್ಲೊ ತರ್
ಹೆ ನಂಯ್ತ್
ಬುಡೊನ್ ಮರ್‍ಚೊ
ದೀಸ್ ಯೆತೊನಾ
-ಜೋಮೆಲ್ ಬೊಂದೆಲ್