ಸಂಪಾದಕೀಯ್:
ಚಲಿಯೆಚ್ಯಾ ಆಂಗಾರ್ ಪ್ರಕೃತಿ ಫುಲೊನ್ ರಾವ್ತಾನಾ!
ಹರ್‍ಯೆಕಾ ಜಿವ್ಯಾ ವಸ್ತುಂಕ್ ಏಕ್ ಕಾಳ್‌ಚಕ್ರ್ ಮ್ಹಣೊನ್ ಆಸಾ. ಹ್ಯಾ ರೊದಾಚೊ ಎಕೇಕ್ ಕಾಳ್ ಎಕೆಕಾ ನಮುನ್ಯಾಚೊ. ಎಕಾ ಕಾಳಾಂತ್ ಸಗ್ಳೆಂ ಆಂಕ್ರೆತಾ, ಪಾಲೆತಾ ಆನಿ ಫುಲ್ತಾ - ವಸಂತ್‌ಕಾಳಾಂತ್ಲೆ ಪ್ರಕೃತಿಬರಿ! ತವಳ್ ಪಳೆಂವ್ಕ್ ಸಗ್ಳೆಂ ಸೊಭಿತ್ ದಿಸ್ತಾ. ಆಂಗ್ಣಾಂತ್ ನಾಚ್ತಲ್ಯಾಂಕ್ ಪಾಯಾಂಕ್ ಫಾತರ್ ಲಾಗನಾಂತ್, ಉಡ್ಕಾಣಾಂ ಘಾಲುನ್ ವೊಳನಾ. ಮತ್ ವಾರ್‍ಯಾರ್‌ಚ್ ಆಸ್ತಾ, ಪಿಸೊಳ್ಯಾಬರಿ ಉಬೊನ್!
ಅಸಲಿಚ್ ಏಕ್ ಗತ್ ಮನ್ಶಾಜಿವಾನ್ ದೆಖ್‌ಲ್ಲ್ಯಾವೆಳಾರ್ ಕಿತೆಂ ಜಾಯ್ತ್? ತಾಂತ್ಲ್ಯಾತಾಂತುಂ ಸೊಳಾ ಸರೊನ್ ಸತ್ರಾ ಲಾಗ್ಚೆ ಚಲಿಯೆಚ್ಯಾ ಜಿವಾಂತ್! ಹಾಚಿ ಜಾಪ್ ದೀಂವ್ಕ್ ಚಲಿಯೆಕ್ ಸೊಡ್ಲ್ಯಾರ್ ಹೆರಾಂಕ್ ಕಿತ್ಲೆಂ ಜಾಯ್ತ್? ತಾಂತ್ಲ್ಯಾ ತಾಂತುಂ ಸೊಳಾ ಭರ್‍ತಿ ಜಾವ್ನ್ ಸತ್ರಾವ್ಯಾಚೆರ್ ಪಾಂಯ್ ತೆಂಕ್‌ಲ್ಲೆ ಚಲಿಯೆನ್ ಸಾಂಗ್ಲ್ಯಾರ್! ಮೆಲಿಟಾ ಪಿಂಟೊ ಹ್ಯಾಚ್ ಪ್ರಾಯೆ ವರ್ಗಾಂತ್ಲಿ. ತಿಕಾ ಹಿ ಹಕೀಗತ್ ಬರ್‍ಯಾನ್ ಕಳಿತ್ ಆಸಾ.
ಬಾಯ್ ಮೆಲಿಟಾ ಕೊಂಕಣಿ ಕವಿತಾಶೆತಾಂತ್ ಭರ್‍ವಶ್ಯಾಚೆಂ ಶಿಮ್ಟಿ ನೆಕೆತ್ರ್. ಬೋವ್ ಲ್ಹಾನ್ ಪ್ರಾಯೆರ್‌ಚ್ ಆಂಬ್ರಾವಯ್ಲ್ಯಾ ತಾರಾಂಕ್ ಆಪ್ಣಾಚೆ ಕಾಳ್ಜಾ ದಾಲಿಯೆಂತ್ ಸಜಂವ್ಚಿ ಕಲಾ ತಿಣೆ ಬರಿಚ್ ಸಮ್ಜೊನ್ ಘೆತ್ಲ್ಯಾ. ಫುಡಾರಾಂತ್ ತಿಚ್ಯಾ ಕವಿತೆಚ್ಯಾ ಆಂಗ್ಣಾಂತ್ ಸಗ್ಳೆಂ ಪಾಚ್ವೆಂ ರಾಜ್ ಕರುಂ ಅಶೆಂ ಆಮಿ ಮ್ಹಣ್ತಾಂವ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಗ್ಳೊ ಸಂಸಾರ್, ಸೊಭಿತ್ ಸುಂದರ್
ಭಾಗಿಂತ್ ಆಮ್ಚ್ಯಾ ಫುಲ್ಲ್ಯಾಂತ್ ಫುಲಾಂ
ರಂಗ್-ರಂಗಾಳ್ ಪರ್ಮಳಿಕ್
ರಾತಿಂ ಕಾಳ್ಕಾಂತ್ ಲಾಂಪ್ಯಾಂವ್ ಘೆವುನ್
ಭೊಂವ್ತಾತ್ ಕಾಜುಲೆ ಪರ್ಜಳಿಕ್
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ಗರ್ಭೆಸ್ತ್ ಮೊಡಾಂ ಮಾಂಡ್ಲ್ಯಾಂತ್ ಮೊಳ್ಬಾರ್
ವೊತುಂಕ್ ಗಾಂವಾರ್ ಪಾವ್ಸಾ ಶಿಂವೊರ್
ಪೃಥ್ವೆರ್ ಸೊಭ್ತಾ ಪಾಚ್ವೊ ಸಾಡೊ
ಪಡ್ಲ್ಯಾಂತ್ ನಾಚಾರ್ ಪಿಸೊಳಿಂ, ಭೊಂವರ್
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ಪಾವ್ಸಾ ಮಾಮಾನ್ ಧಾರಾಳ್ ವೊತುನ್
ನಿತಳ್ ಧುಲಾಂ ಪೃಥ್ವೆ ಮ್ಹೆಳೆಂ
ತೊಡಾಂ ವ್ಹಾಳಾಂನಿ ಹಾಸ್ತಾತ್, ಖೆಳ್ತಾತ್
ಮಾಸ್ಳ್ಯಾಂ ಸಂಗಿಂ ಬುಳ್ಬುಳೆ
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ರಾತಿಂ ಪೃಥ್ವಿ ಆಸ್ತಾ ಶಾಂತ್
ಪಯ್ಶಿಲ್ಯಾನ್ ಗಾಜ್ತಾ ಧರ್‍ಲ್ಯಾ ಗಾಜ್
ಸಕಾಳಿಂ ಉಟ್ತಚ್ ಸುಕ್ಣ್ಯಾ ಸಂಗೀತ್
ಮನ್ ಪಿಸ್ವಯ್ತಾ ಕೊಂಬ್ಯಾ ಸಾದ್
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ದರ್ಯಾ ವೆಳೆರ್ ರೆಂವೆ ರಾಶಿರ್
ಪಾರ್ಪೊಳ್ ಲ್ಹಾರಾಂ ದಿತಾತ್ ಉಮೆ
ಮ್ಹಜೆಂ ಆಂಗ್ ಪೊಶೆಂವ್ಕ್, ಮಾಖುಂಕ್
ಶೆಣಾಯ್ತಾತ್ ಮ್ಹಜೆರ್ ಉದ್ಕಾ ಥೆಂಬೆ
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ಗರ್ಮೀಯ್ ನಾ, ನಾ ವಿಶೇಸ್ ಥಂಡಿ
ವಾರೆಂ ಕಿತ್ಯಾಕ್ ಪ್ರಶಾಂತ್ ಅಶೆಂ?
ತಣಾಂ ಪಾನಾಂಕ್ ಮನ್ಶಾ ಪ್ರಾಣಿಂಕ್
ದಿಸ್ತಾ ಲಾಗ್ಲಾಂ ಮೊಗಾ ಪಿಶೆಂ!
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ಪೃಥ್ವಿ ಸೊಭ್ತಾ ಮನ್ ಪಿಸ್ವತಾ
ಜಿವಾಂತ್ ಉಲ್ಲಾಸ್, ಸುಡ್ಸುಡಾಯ್
ಆಂಗಾರ್ ಸಬಾರ್ ಬದ್ಲಾವಣ್ಯೊ
ದಿಸೊಂಕ್ ಲಾಗ್ಲ್ಯಾ ನವಿ ಸೊಭಾಯ್
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ಪಾಯ್ ರಾವನಾಂತ್ ಧರ್ಣಿರ್ ಆತಾಂ
ವಾರ್‍ಯಾರ್‌ಚ್ ಉಬ್ಯಾಶೆಂ ಭೊಗ್ತಾ
ಹಾಸ್ಯಾಂ, ಖೆಳ್ಯಾಂ, ನಾಚ್ಯಾಶೆಂ ಜಾತಾ
ಹರ್ ರಾತಿಂ ಏಕ್ ಸಪಣ್ ಧೊಸ್ತಾ
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ಮ್ಹಾಕಾ ಸೊಭಿತ್ ಸುಂದರ್
ನವಲ್ ಸೊಡಂವ್ಕ್, ಮಿಸ್ತೆರ್ ನಿತ್ಳಾಂವ್ಕ್
ವಿಚಾರ್‍ಲೆಂ ಆವಯ್ಕ್ ಅಶೆಂ ಕಶೆಂ?
ಸಾಂಗ್ಲೆಂ ತಿಣೆಂ ಮೊಗಾನ್ ಸಮ್ಜಾವ್ನ್
ಪುತಾ, ಪ್ರಾಯ್ ಭರ್‍ತಚ್ ಜಾತಾ ಅಶೆಂ
ಹ್ಯಾ ದಿಸಾಂನಿ ಸಗ್ಳೊ ಸಂಸಾರ್
ದಿಸ್ತಾ ತುಕಾ ಸೊಭಿತ್ ಸುಂದರ್!
- ಮೆಲಿಟಾ ಪಿಂಟೊ, ಇಜಯ್