ಸಂಪಾದಕೀಯ್:
ಏಕ್ ಬೀಜ್ ಆನಿ ತಾಚೊ ಸಂಸಾರ್
ಏಕ್ ಬೀಜ್, ಎಕೆ ಬೊಂಡಿಯೆಂತ್ ಆಸ್ತಾ ಜಾಂವ್ಕ್ ಪುರೊ, ಎಕೆ ಸಾಂಗೆಂತ್ ಆಸ್ತಾ ಜಾಂವ್ಕ್ ಪುರೊ, ಎಕಾ ಫಳಾಂತ್, ಎಕಾ ರಾಂದ್ವಯೆಂತ್ ಆಸ್ತಾ ಜಾಂವ್ಕ್ ಪುರೊ. ಎಕಾ ಬಿಂಯಾಕ್, ಬೀಜಾಕ್ ತಾಚೆಂ ಮ್ಹಳ್ಳೆಂ ಘರ್ ಆಸ್ತಾ. ತಸಲ್ಯಾ ಘರಾಂತ್ ಫಿಛಾರ್ ಆಸಲ್ಲೆಂ ಬೀಜ್ ಎಕಾ ದಿಸಾ ಪಾಕ್ಟೆ ಖೊವವ್ನ್ ಪಕ್ಷಿಬರಿ ಉಬುನ್ ಗೆಲೆಂ. ಮಾಗೀರ್ ಪಾವ್ಸಾಕ್ ಭುಂಯ್ತ್ ರಿಗುನ್ ಆತಾಂ ಮಾತ್ಯೆಂತ್ ತಾಚೆಂ ಆನ್ಯೇಕ್ ಘರ್ ಕರುನ್ ಬಸ್ಲಾಂ.
ತೆಂ ಘರ್ ತಾಚೆಂ ನಿಮಾಣೆಂ ಘರ್ ನ್ಹಯ್, ಥಂಯ್ ಥಾವ್ನ್ ಪರ್‍ತ್ಯಾನ್ ಝಾಡ್ ಜಾವ್ನ್, ರೂಕ್ ಜಾವ್ನ್ ತಾಕಾ ಫಳಾಧಿಕ್ ಜಾಂವ್ಕ್ ಆಸಾ. ಫಳೆಂವ್ಕ್ ಆಸಾ. ಬಿಂಯಾಂಚೊ ಸಂಸಾರ್ ಘಡೊಂವ್ಕ್ ಆಸಾ.
ಅರುಣ್ ಸಾಖರ್‍ದಾಂಡೆಚಿ ಹಿ ಕವಿತಾ ಶಿಂಪಡ್ಲಲ್ಯಾ ಬಿಂಯಾಂಕ್ ನವೊ ಜೀವ್ ದಿತಾ. ಮಾಗೀರ್ ಹೆಂ ಬೀಜ್, ಮತಿಂತ್ ಕಿರ್‍ಲಲ್ಲೆಂ ಏಕ್ ಚಿಂತಪ್ ಜಾಂವ್ಕಯ್ ಸಾಧ್ಯ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬೀಜ್
ಹಾಂವ್ ಘರಾಂತ್ ಬಸ್ಲಾಂ
ಘರ್ ನಿಯಾಳೀತ್
ಅಚಕೀತ್
ಘರ್ ಜಾಲೆಂ ವಣತ್
ವಣ್ತಿಚೆಂ ಜಾಲೆಂ ದಾರ್
ದಾರ್ ಜಾಲೆಂ ಜನೆಲ್
ಆನಿ ಧಾಂವ್ಪಾಕ್ ಲಾಗ್ಲೆಂ
ಮ್ಹಜೆ ಫಾಟ್ಲ್ಯಾನ್
ಹಾಂವೆಂ ಮಾರ್‍ಲಿ ಉಡ್ಕಿ
ಭಂಯಾನ್
ಜನೆಲಾಂತ್ಲ್ಯಾನ್
ಹಾಂವ್ ಜಾಲೊಂ ಪಕ್ಷಿ
ಆನಿ ಉಡುಂಕ್ ಲಾಗ್ಲೊಂ
ಊಂಚ್ ಮಳ್ಬಾಂತ್
ಉಡ್ಟಾಂ ಉಡ್ಟಾಂ
ಮ್ಹಜಿಂ ಜಾಲಿಂ ಕುಪಾಂ
ಕಡ್ಕಡ್ ಕರುನ್ ಸರ್ಸರ್‍ಲೆಂ
ಜೊಗೂಲ್ ಮ್ಹಜ್ಯಾಂತ್ಲ್ಯಾನ್
ಆನಿ ವೊತುಂಕ್ ಲಾಗ್ಲೊ ಪಾವ್ಸ್
ಹಾಂವ್ ಮಾತ್ಯೆಂತ್ ಜಿರುನ್ ಗೆಲೊಂ
ಆನಿ ವೊಗ್ಗಿ ಆಸಾಂ ಮಾತ್ಯೆ ಪೊಂದಾ
ವಾಟ್ ಪಳಯ್ತ್
ಫುಡ್ಲ್ಯಾ ಪಾವ್ಸಾಚಿ
-ಅರುಣ್ ಸಾಖರ್‌ದಾಂಡೆ
संपादकीय:
एक बीज आनी ताचो संसार
एक बीज, एके बोंडियेंत आसाता जावंक पुरो, एके सांगेंत आसता जावंक पुरो, एका फळांत, एका रांदवयेंत आसता जावंक पुरो. एका बिंयाक, बीजाक ताचें म्हळ्ळें घर आसता. तसल्या घरांत फिछार आसल्लें बीज एका दिसा पाकटे खोववन पक्षीबरी उबून गेलें. मागीर पावसाक भुंयत रिगून आतां मातयेंत ताचें आनयेक घर करून बसलां.
तें घर ताचें निमाणें घर न्हय, थंय थावन परत्यान झाड जावन, रूक जावन ताका फळाधिक जावंक आसा. फळेवंक आसा. बिंयांचो संसार घडोवंक आसा.
अरूण साखरदांडेची ही कविता शिंपडलल्या बिंयांक नवो जीव दिता. मागीर हें बीज, मतींत किरलल्लें एक चिंतप जांवकय साध्य आसा.
-मेल्विन रोड्रीगस
कविता:
बीज
हांव घरांत बसलां
घर नियाळीत
अचकीत
घर जालें वणत
वणटीचें जालें दार
दार जालें जनेल
आनी धांवपाक लागलें
म्हजे फाटल्यान
हांवें मारली उडकी
भंयान
जनेलांतल्यान
हांव् जालों पक्षी
आनी उडूंक लागलों
ऊंच मळबांत
उडटां उडटां
म्हजीं जालीं कुपां
कडकड करून सरसरलें
जोगूल म्हज्यांतल्यान
आनी वोतूंक लागलो पावस
हांव मातयेंत जिरून गेलों
आनी वोग्गी आसां मातये पोंदा
वाट पळयत
फुडल्या पावसाची
-अरूण साखरदांडे