ಸಂಪಾದಕೀಯ್:
ಕವಿತಾ ಕುಳಾರಾಂತ್ ಆಜ್ ಸಂಭ್ರಮ್‌ಚ್ ಸಂಭ್ರಮ್
ಆನಿ ಹೊ ಕವಿ ಅಸೋಯ್ ಕವಿತಾ ಬರಂವ್ಕ್ ಸಕತ್ ಮ್ಹಣೊನ್ ಹಾಂವೆಂ ಲೆಕೊಂಕ್ ನಾತ್‌ಲ್ಲೆಂ. ಸಾಟಾಂಚೆ ಜಿಣ್ಯೆಚೊ ಆಟಯಿಲ್ಲೊ ಅನ್ಭೋಗ್ ಘೆವ್ನ್ ಮ್ಹಳ್ಳೆಬರಿ ಹ್ಯಾ ತಿಸಾಂಕ್ ಪಾವೊಂಕ್ ನಾತ್‌ಲ್ಲ್ಯಾ ತರ್ನ್ಯಾ ಕವಿನ್ ಅಸಲಿ ಏಕ್ ತಾಕ್ತೆಚಿ ಕವಿತಾ ಬರಯ್ತಾನಾ ಮ್ಹಜ್ಯಾ ಕಾಳ್ಜಾಚ್ಯಾ ಕೊನ್ಶಾ ಕೊನ್ಶಾಥಾವ್ನ್ ಸಮಾಧಾನಾಚಿಂ ಆಲ್ಪುಲಿಂ ಫುಲ್ತಾತ್. ಕವಿತಾ ಕುಳಾರಾಚ್ಯಾ ಮಾಟ್ವಾಂತ್ ಆಜ್ ಸಂಭ್ರಮ್‌ಚ್ ಸಂಭ್ರಮ್!
ಏಕ್ ನಿರೋಪ್, ಏಕ್ ಸಂದೇಶ್ ಘೆವ್ನ್ ಸರ್ವಯ್ ಮನ್ಶಾಕುಳಾಕ್ ಜಾಗವ್ನ್ ಉಟಂವ್ಚೆಂ ಏಕ್ ಧೈರಾದಿಕ್ ಪ್ರೇತನ್ ಹಾಂಗಾಸರ್ ಕವಿನ್ ಬೋವ್ ಆಪುರ್ಬಾಯೆಚ್ಯಾ ಉತ್ರಾಂನಿ, ಮನಾಕ್-ಕಾಳ್ಜಾಕ್ ನಾಟ್ವೊಂಚೆಬರಿ ಕೆಲಾಂ.
ವಿತೊರಿ ಪೆರ್ನಾಲ್ ಕವಿತಾ ಕುಳಾರಾಕ್ ಕಾಂಯ್ ನವೊ ನ್ಹಯ್. ಹ್ಯಾ ಆದಿಂ ತಾಚಿ ಏಕ್ ಕವಿತಾ ಆಮಿ ಪರ್ಗಟ್ ಕೆಲ್ಲಿ. ಆಮಿ ಚಲಂವ್ಚ್ಯಾ ಕವಿತಾ ಕಾಮಾಸಾಳಾಂಕ್ ಹಾಜರ್ ಜಾವ್ನ್ ಆಸ್‌ಲ್ಲ್ಯಾ ವಿತೊರಿಚ್ಯಾ ಕವಿತಾಂನಿ ಆಮಿ ವಿಶೇಸ್ ಭರ್ವಸೊ ದೆಖ್‌ಲ್ಲೊ. ಆತಾಂ ಆಮ್ಚೊ ಭರ್ವಸೊ ಫಟ್ ನ್ಹಯ್ ಮ್ಹಳ್ಳೆಬರಿ ಹಿ ಕವಿತಾ ಉದೆಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಾಗವ್ಣಿ
ಫಾಲ್ಯಾಂ ಭಿತರ್ ಜಾಗೊ ಜಾ
ನಾಂತರ್ ವೇಳ್ ಉಬತ್
ಸಕಾಳ್ ನಿಕ್ಳತ್, ವಿಕಾಳ್ ವಾರ್‍ಯಾರ್
ಪೊಕಳ್ ದವ್ಲತ್ ರೊಂಬತ್.
ಸದಾಂ ಸವಯೆ, ನಿಶಾ-ನಶಾಚಿ
ಫಾತರ್ ಭಿಜಯ್ ಜಾತಾ ತರ್
ಪಾಳಾಂ ರೊಂಬಯ್ ಉಬ್ರಾಂತ್ ಮ್ಹಜ್ಯಾ
ವಾರ್‍ಯಾರ್ ಜೀವ್ ಉಬತ್ ಜರ್!
ಘಡಿಭರ್ ನಾಂಗೊರ್ ಹಾತಾಂತ್
ವೊಡಿ ವೊಡ್ನಿ ವೊಸ್ಯಾಚಿ
ಮೂಟ್ ಭರನಾ, ಆರಾಂವ್ ಕಿತೆಂ-ತರ್
ಖಾಲಿ ಬೊಶಿ ಕಾಶ್ಯಾಚಿ
ಝಾಡಾಂ ವಾಡ್ಲಿಂ, ರೂಕ್ ಜಾಲಿಂ
ತಣ್ ಕಿರ್ಲತ್-ಸುಕತ್!
ರಾತ್ ಪರತ್, ದೀಸ್ ಉದೆತ್
ನೀದ್ ಕೆದ್ನಾಂ ಸುಟತ್?
-ವಿತೊರಿ, ಪೆರ್ನಾಲ್