ಸಂಪಾದಕೀಯ್:
ನಿರಾಶೆಚೊ ಕವಿ, ಭರ್‍ವಶಾಚ್ಯಾ ಮಾಟ್ವಾಕ್ ಪಾಂಯ್ ತೆಂಕ್ತಾನಾ!
ಆಮ್ಚ್ಯಾ ತರ್‍ನ್ಯಾ ಜನಾಂಗಾಕ್ ಕಿತೆಂ ಜಾಲಾಂ ತೆಂ ಕಳನಾ. ಜಿವಿತ್ ಮ್ಹಳ್ಯಾರ್ ನಿರಾಶೆಚೊ ದರ್ಯೊ ಕಸೊ ತೆ ಚಿಂತಾತ್! ಹರ್‍ಯೆಕ್ ದೀಸ್ ನವ್ಯಾ ಸುರ್ಯಾಚ್ಯಾ ಉದೆವಾ ಸಾಂಗಾತಾ ವಿಶೇಸ್ ಭರ್‍ವಸೊ ಘೆವ್ನ್ ಯೆತಾ ಮ್ಹಳ್ಳೆಂ ಚಿಂತುಂಕ್ ತಾಂಕಾಂ ಕಳನಾ. ನಿರಾಶಾ ಪಾಂಗ್ರುನ್ ನಿದ್‌ಲ್ಲೊ ಮನೀಸ್ ನಿರಾಶೆಚಿಂ ಸಪ್ಣಾಂ ಮಾತ್ರ್ ಸಪ್ಣೆಂವ್ಕ್ ಸಕ್ತಾ.
ಹಾಂಗಾಚೊ ಕವೀಯ್ ತಸೋಚ್. ನಿರಾಶೆಚೆ ಕಾಯ್ಲಿರ್ ಭಾಜುನ್ ಗೆಲಾ. ತಾಚೊ ಚಂದ್ರೆಮ್ ಉದೆಲೊನಾ ಮ್ಹಣ್ ಖಂತ್ ಕಾಡ್ಚೊ ತೊ, ಸುರ್ಯಾ ತೆವ್ಶಿಂ ದೀಷ್ಟ್ ಕಿತ್ಯಾಕ್ ಜೊಕಿನಾ ಮ್ಹಳ್ಳೆಂ ಕಳನಾ. ತಾರಾಂನಿ ಆಪ್ಣಾಕ್ ಸಾಂಗಾತ್ ದಿಲೊನಾ ಮ್ಹಣ್ಚೊ ತೊ, ತಾರಾಂಚೊ ಚಮತ್ಕಾರ್ ಫುಲಾಂಚೆ ಪಾಕ್ಳೆಂನಿ ಕಿತ್ಯಾಕ್ ಚೊವುಂಕ್ ಸಕನಾ ಮ್ಹಳ್ಳೆಂ ಕಳನಾ.
ಡೊನಿ ಕೊರೆಯಾ ಜೆದ್ನಾಂ ಎಕ್ಸುರೊ ಆಸ್‌ಲ್ಲೊ ತವಳ್ ಕಾಂಯ್ ಹಿ ನಿರಾಶೆಚಿ ಕವಿತಾ ತಾಣೆ ಲಿಖ್‌ಲ್ಲಿ ಆಸ್ಯೆತ್. ಪುಣ್ ಹೆ ಕವಿತೆಂತ್ಲೆ ನಿರಾಶೆಕ್ ಫೊಂಡಾಂತ್ ಪುರುನ್, ನವ್ಯಾ ಎಕಾ ಭರ್‍ವಶ್ಯಾ ಸಂಗಿಂ ಹ್ಯಾಚ್ ದಶೆಂಬ್ರಾಚೆ ತೀಸ್ ತಾರಿಕೆರ್ ತೊ ಲಗ್ನಾ ಬಾಂಧಾಂತ್ ಎಕ್ವಟ್ತಾನಾ ಆಮಿ ತಾಕಾ ಉಲ್ಲಾಸ್ ಪಾಟಯ್ತಾಂವ್. ತೇಂಯ್ ಯೆದೊಳ್‌ಚ್ 'ಕವಿತಾ ಕುಳಾರ್' ಸಜಯಿಲ್ಲ್ಯಾ ಆಶಾ ರೊಡ್ರಿಗಸಾಚೊ ತೊ ಪತಿ ಜಾತಾ ಮ್ಹಣ್ತಾನಾ ತಾಂಚ್ಯಾ ಕುಟ್ಮಾಂತ್ ಸದಾಂನೀತ್ ಕವಿತಾ ವ್ಹಾಳೊಂದಿ ಮ್ಹಳ್ಳಿಚ್ ಆಮ್ಚಿ ಆಶಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮಾಶೆಚೊ ಚಂದ್ರ್
ಜಿಗಿಬಿಗಿ ತಾರಾಂ ಮಧೆಂ ಚಂದ್ರೆಮ್ ಖೂಬ್ ಸೊಭ್ತಾ
ಉದೆಂತಿಂತ್ ರವಿ ದಿಸ್ಲೊ ತರ್ ಚೊರಾಬರಿ ಲಿಪ್ತಾ
ಚಂದ್ರ್-ಸುರ್ಯಾಚೊ ಹೊ ಆಪಾಲಿಪಾ ಖೆಳ್ ತರಿ
ಸದಾಂಚೊ ಹೊ ಮೇಳ್ ತರಿ
ಜಾಲ್ಯಾ ಹಿ ಪ್ರಾಕೃತಿಕ್ ರೀತ್
ಚಂದ್ರ್ ಸುರ್ಯಾಚ್ಯಾ ಹ್ಯಾ ಖೆಳಾದ್ವಾರಿಂ
ಸದಾಂಚ್ ಜಾತಾ ದೀಸ್ ಆನಿ ರಾತ್
ಅಚಾನಕ್ ಸೊಭಿತ್ ಚಂದ್ರಾಕ್ ಲಿಪವ್ನ್
ವೆಂಗ್ಲೆಂಯ್ ತುಂವೆ ಸುಖಾಚ್ಯಾ ಸುರ್ಯಾಕ್
ತಾರಾಂಕ್ ತುಜೆ ಸರ್ಶಿಂ ಆಪವ್ನ್
ಬುಡಯ್ಲೊಯ್ ಮ್ಹಾಕಾ ದುಖಾಚ್ಯಾ ದರ್ಯಾಂತ್
ಉಪ್ರಾಂತ್ ಪರತ್ ಚಂದ್ರೆಮ್ ಉದೆಲೊನಾ
ತಾರಾಂನಿಂಯ್ ಸಾಂಗಾತ್ ದಿಲೊನಾ
ಆತಾಂ ಹಾಂವ್ ಎಕ್ಸುರೊಂ
ಒದ್ದಾಡ್ತಾಂ ಜಾಳಾಂತ್ಲೆ ಮಾಸ್ಳೆಬರಿ
ನಿಯಾಳ್ತಾನಾ ತುಕಾ, ವ್ಹಾಳ್ತಾತ್
ದೊಳ್ಯಾಂನಿ ದುಖಾಂ-ಝರಿ
ಜಿವಂತ್ ಆಸಾಂ ತರಿ
ಜೀವನ್ ಮ್ಹಜೆಂ
ಸಾರಿಯೆರ್ ದವರ್‌ಲ್ಲ್ಯಾ ಮೊಡ್ಯಾಬರಿ
ತುಂ ಘಾಮೆತಾಯ್ ಆತಾಂ ಸುರ್ಯಾಚೆ ಧಾವೆಕ್
ಆಶೆತಾಯ್ ಆತಾಂ ಚಂದ್ರಾಚೆ ಥಂಡಾಯೆಕ್
ಉದೆಂವ್ಚಿ ಆಶಾ ಆಸಾ ತರಿ
ಚಾಂದ್ನೆಂ ಶಿಂಪ್ಚಿ ಸಕತ್ ನಾ
ಆಮಾಶೆಚೊ ಚಂದ್ರ್ ಜಾಲೊಂ ತರ್
ಚಾಂದ್ನೆಂ ನಾ, ಥಂಡಾಯ್ ನಾ
ಕೊಣಾಕ್‌ಚ್ ಹಾಂವ್ ಉಪ್ಕಾರ್‍ನಾ
ಉದೆವ್ನ್ ಕಿತೆಂಚ್ ಫಾಯ್ದೊ ನಾ!
-ಡೊನಾಲ್ಡ್ ಕೊರೆಯಾ, ಪೆರ್ನಾಲ್