ಸಂಪಾದಕೀಯ್:
ಹಿಂ ಪಿಶೆಪಣಾಂ ನ್ಹಯ್, ನವ್ಯಾ ವರ್‍ಸಾಚ್ಯಾ ಭರ್‍ವಶಾಚಿಂ ಕಿರ್ಣಾಂ!
ಅಸಲಿಂ ಸಪ್ಣಾಂ ಸಪ್ಣೆಂವ್ಚೆಂ ಪಿಶೆಪಣ್ ನ್ಹಯ್! ಹರ್‍ಯೆಕಾ ದಿಸಾ ಅಸಲೊ ಭರ್‍ವಸೊ ಆಪ್ಣಾಯ್ಲೊ ತರ್ ಆನಿ ತೆ ದಿಶೆನ್ ಆಮ್ಚೆಂ ತನ್, ಮನ್ ದೀವ್ನ್ ಧನಾಂತ್ಲೊ ಥೊಡೊ ವಾಂಟೋಯ್ ಅಸಲ್ಯಾ ವಾವ್ರಾಕ್ ಭೆಟಯ್ಲೊ ತರ್ ಖಂಯ್ಚೀಂಯ್ ಸಪ್ಣಾಂ, ಸಪ್ಣಾಂ ಜಾವ್ನ್ ಉರ್‍ಚಿಂನಾಂತ್. ಹಾಂಗಾಸರ್ ಕವಿ ನವ್ಯಾ ಭರ್‍ವಶ್ಯಾಚ್ಯಾ ಆಂಗಾಲಾಪಾನ್ ಬುಡ್‌ಲ್ಲೊ ದಿಸ್ತಾ ತರೀ, ಹೊ ಆಂಗಾಲಾಪ್ ಕಾಂಯ್ ಫಟ್ಕಿರೊ ಕೊಣ್ಣಾ ಚಿಂತುನ್ ಆಪ್ಣಾಕ್‌ಚ್ ತೊ ಗುನ್ಯಾಂವ್ಕ್ ಲೆಕ್ತಾ ಆನಿ ಪಿಸೊ ಮ್ಹಣ್ತಾ.
ಪಾಟ್ಲಿಂ ವರ್‍ಸಾಂ ದೆಕ್ಲ್ಯಾರ್ ಕವಿನ್ ಚಿಂತ್‌ಲ್ಲ್ಯಾಬರಿ ಅಶೆಂ ಸಪ್ಣೆಂವ್ಚೆಂ ಪಿಶೆಪಣ್ ಮ್ಹಣ್ ಮ್ಹಾಕಾಯ್ ಭೊಗ್ತಾ. ತರೀಪುಣ್ ಹರ್‍ಯೆಕಾ ಕಾಳ್ಯಾ ಕುಪಾಚೆ ಶಿರೆ ಪಾಟ್ಲ್ಯಾನ್, ಭರ್‍ವಶ್ಯಾಚೆಂ ಕೀರ್ಣ್ ಆಸಾ ಮ್ಹಣ್ ಹಾಂವ್ ಸಮ್ಜಲಾಂ.
ಆನಿ ಅಸಲೊಚ್ ಭರ್‍ವಸೊ ಘೆವ್ನ್ ಆಮಿ ಹೆಂ ನವೆಂ ವರಸ್ ಸುರು ಕರ್‍ಯಾಂ. ಅಸಲೊಚ್ ಭರ್‍ವಸೊ ಆಮಿ ಆಮ್ಚ್ಯಾ ಕವಿಂನಿ ಪೊಟ್ಲುನ್ ಧರ್‍ಲೊ ತರ್ ಹ್ಯಾ ವರ್‍ಸಾ ಸುಖಾಚ್ಯಾ ಅನ್ಭೋಗಾಂತ್ ಸದಾಂನೀತ್ ಆಮಿ ನ್ಹಾಂವ್ಕ್ ಸಕ್ತಲ್ಯಾಂವ್. ಮತಿಚಿಂ ವೇದನಾಂ ಥಾಂಬಂವ್ಚ್ಯೊ ಥೆರಪಿ ಹಾಂಗಾಸರ್ ರುತಾ ಕರುಂಕ್ ಸಕ್ತಲ್ಯಾಂವ್. ಥೆರಪಿಚಿಂ ವಿಧಾನಾಂ ಸಮ್ಜನಾತ್‌ಲ್ಲೆ ಕಿತೇಂಯ್ ಜಾಳ್ ವೊಂಕುಂದಿತ್, ಆಮ್ಕಾಂ ಆಮ್ಚೆರ್ ಖೂಬ್ ಭರ್‍ವಸೊ ಆಸಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಾಂವ್ ಕಸ್ಲೊ ಪಿಸೊ?
ತೊ ದೀಸ್ ಉದೆತಲೊ
ಅಂಧ್ಕಾರಾಚೆ ರಾತ್ರಿ ಪಾಟ್ಲೊ
ಆನಿ ಸುರ್ಯೊ ಕೆದಿಂಚ್ ಬುಡ್ಚೊನಾ
ತೊ ದೀಸ್ ಉದೆತಲೊ
ತ್ಯಾ ದಿಸಾ ರಾವ್ತಲಿಂ ಸರ್ವ್ ಝುಜಾಂ
ರಾಷ್ಟ್ರಾಂ ಮಧ್ಲ್ಯೊ ಗಡಿ ಮಾಜ್ವತಲ್ಯೊ
ಸರ್ವ್ ಪಿಡಾ ಥಾಂಬ್ತಲ್ಯೊ
ನೆಣ್ತ್ಯಾ ಭುರ್ಗ್ಯಾಂಕ್ ಕಾಮ್ ಕರುಂಕ್ ಆಸ್ಚೆಂನಾ
ಆನಿ ಸುರ್ಯೊ ಕೆದಿಂಚ್ ಬುಡ್ಚೊನಾ
ಊಂಚ್ ಕೀಳ್ ಕೊಣೀ ಆಸ್ಚೊನಾ
ಲೋಂಚ್ ಆನಿ ದೋತ್ ಆಸ್ಚಿನಾ
ನಾ ಕೊಣೀ ಭುಕೆಂತ್, ನಾ ಕೊಣೀ ದುಕಿಂತ್
ಏಕ್‌ಚ್ ದೇವ್, ಏಕ್‌ಚ್ ಮನೋಭಾವ್
ಏಕ್‌ಚ್ ಹಾವ್‌ಭಾವ್
ಧರ್ಮಾಖಾತೀರ್ ಮೊರೊಂಕ್ ಆಸ್ಚೆಂನಾ
ಆನಿ ಸುರ್ಯೊ ಕೆದಿಂಚ್ ಬುಡ್ಚೊನಾ
ಹಾಂವ್ ಕಸ್ಲೊ ಪಿಸೊ
ಸಪ್ಣೆತಾಂ ಅಸೊ?
-ಜೊಸ್ಸಿ ಮಸ್ಕರೇನ್ಹಸ್