ಸಂಪಾದಕೀಯ್:
ಸಮಾಜಾಚೆರ್ ಥಾಪಲ್ಲಿಂ ರಗ್ತಾಳಿಂ ಖತಾಂ ಪುಸ್ಚಿಂ ಕೊಣೆಂ?
ಸಮಾಜಾಂತ್ ಮನಿಸ್ ಎಕಾಮೆಕಾ ಪೂರಕ್ ಜಾವ್ನ್ ಜಿಯೆಲ್ಯಾರ್ ಸಂತೊಸ್ ಆನಿ ಶಾಂತಿ ಅಸ್ತಾ. ಪುಣ್ ಜೆದ್ನಾಂ ಮನಿಸ್ ಮ್ಹೊಂವ್ ವಾಂಟ್ಚ್ಯಾ ಬದ್ಲಾಕ್ ವೀಕ್ ವಾಂಟ್ತಾ, ಮತ್ಲಬಿ ಮಾಧ್ಯಮಾಂ ವೀಕ್ ವೊಂಕ್ತಾತ್, ತೆದ್ನಾಂ ಮನ್ಶಾಪಣ್ ವಳ್ವಳ್ತಾ . ಅಸಲಿ ವಿಕಾಳ್ ಸ್ಥಿತಿ ಸಮಾಜಾಚೊ ಮೋಗ್ ಕರ್‍ಚೆ ಜವಾಬ್ದಾರೆಚ್ಯಾ ಕವಿಕ್ ಸೊಸನಾ. ತೆಂಯ್ ಮರ್ಜೆನ್ ಆನಿ ಹಂಕಾರಾನ್ ಜಿಯೆಂವ್ಚ್ಯಾ ಸಮಾಜಾಚ್ಯಾ ಎಕಾ ವರ್ಗಾನ್ ಬೆಪರ್‍ವಾ ಕರ್‍ನ್ ದೆಗೆಕ್ ಲೊಟ್ಚ್ಯಾ ಮನ್ಶಾಚೆರ್ ಜುಲುಮ್ ಚಲಯ್ತಾನಾ ಕವಿ ಕಾಂಟಾಳ್ತಾ ಆನಿ ತಾಂಕಾಂ ‘ಜಿವಿಂ ಮಡಿಂ’ ಮ್ಹಣ್ ವೊಲಾಂವ್ಚ್ಯಾಕ್ ದಾಕ್ಶೆನಾ. ಮೊಳ್ಬಾಕಚ್ ಪಾಕೆಂ ಕರ್‍ನ್ ರಸ್ತ್ಯಾ ದೆಗೆನ್ ನಿದಲ್ಲ್ಯಾ ಕುಲ್ಕಾರಾಂಚೆರ್ ಹಂಕಾರಾಚಿಂ ರೊದಾಂ ಧಾಂವುನ್ ಜೀವ್ ಆನಿ ಹಾತ್ ಪಾಂಯ್ ಚೆಂಚುನ್ ಗೆಲ್ಯಾರೀ ತೆರಾ ವರ್ಸಾಂ ಉಪ್ರಾಂತೀ ಹ್ಯಾ ದುಬ್ಳ್ಯಾಂಕ್ ನೀತ್ ದೀಂವ್ಕ್ ಸಕನಾತಲ್ಲ್ಲ್ಯಾ ಆಮ್ಚೆ ವ್ಯವಸ್ಥೆಂತ್ ಸತಾಚೆ ಸೊದ್ನೆರ್ ಆಸ್ಚ್ಯಾ ಕವಿಕ್ ಸಂಕ್‌ಪಾಶಣ್ ದಿಸನಾಸ್ತಾ ಆನಿ ಕಿತೆಂ ದಿಸತ್?
ಕವಿನ್ ಹಾಂಗಾ ಉಂದ್ರಾಕ್ ಚಿಲ್ಲರ್ ಜೀವಿ ಮ್ಹಣ್ ಪಿಂತ್ರಾವ್ನ್, ತ್ಯಾ ಮರುನ್ ಗೆಲ್ಲ್ಯಾ ಉಂದ್ರಾಕ್ ಆನಿ ನಿಮಾಣೆ ಪೆಪರಾಂ ವಿಕ್ಚ್ಯಾ, ಗಾಡಿಯಾಂಚೆ ಆರ್ಸೆ ಪುಸ್ಚ್ಯಾ ಭುರ್ಗ್ಯಾಂ ಸಂಗಿಂ ಏಕ್ ಗಾಂಚ್ ಘಾಲಾ. ಫಾಲ್ಯಾಂ ಹ್ಯಾ ಭುರ್ಗ್ಯಾಂಚಿ ಗತ್‍ಯ್ ಹ್ಯಾ ಉಂದ್ರಾಪರಿಂ ಜಾಯ್ನಾ ಜಾಂವ್ ಮ್ಹಳ್ಳೊ ಅಕಾಂತ್ ಕವಿತೆಂತ್ ಝಳ್ಕತಾ. ಸಲ್ಮಾನ್ ಖಾನಾಚೆ ಗಾಡಿಯೆ ಪಂದಾ ಚೆಂಚುನ್ ಗೆಲ್ಲ್ಯಾಂಚಿ ಗತ್ ಪಳೆತಾನಾ ಆನಿ ಆಯ್ಲೆವಾರ್ ಭಿಕ್ ಮಾಗುಂಕ್ ಹಾತ್ ವೊಡ್ಡಾಯಿಲ್ಲ್ಯಾ ಎಕಾ ಭುರ್ಗ್ಯಾಕ್ ಎಕಾ ಮಂತ್ರಿಣೆನ್ ಖೊಟಾಯಿಲ್ಲೆಂ ಪಳೆತಾನಾ ಕವಿಚೆ ಆಕ್ಲಾಸ್ ಕಿತ್ಲೆ ಖರೆ ತೆಂ ಸುಸ್ತತಾ.
-ಆಂಡ್ರ್ಯೂ ಎಲ್ ಡಿಕೂನ್ಹಾ
ಕವಿತಾ:
ಉಂದಿರ್ ಆನಿ ಖತಾಂ
ಕಾಲ್ ಸಕಾಳಿಂ
ಆಫಿಸಾಕ್ ವೆಚ್ಯಾ ಆಮ್ಸೊರಾನ್
ಟಯರಾಂನಿ; ಪಂದಾ ಚಿರ್ಡಲ್ಲ್ಯಾ
ರಸ್ತ್ಯಾರ್ ಮರುನ್ ಪಡಲ್ಲ್ಯಾ
ಉಂದ್ರಾಚೆಂ ರಗತ್
ದಾಟ್ ಜಾಲ್ಲೆಂ
ಆಜ್ ರಸ್ತ್ಯಾಚ್ಯಾ ತೆಚ್ ಸುವಾತೆರ್
ಮೆಲ್ಲೊ ಉಂದಿರ್ ದಿಸ್ಲೊನಾ
ಮಾಜ್ರಾನ್ ಗಿಳ್ಳಾಸ್ತಲೊ
ಪುಣ್ ಮಾಜರ್ ಖಂಯ್ ಮೆಲಾಂ
ಪೆಟ್ಯಾನ್ ಗಿಳ್ಳಾಸ್ತಲೆಂ
ಮುಖ್ಲಿ ಗೇರ್ ಘಾಲಿ
ಪೆಟ್ಯಾಕ್ ವಾಗಾನ್
ವಾಗಾಕ್ ಕೊಣೆ ಗಿಳ್ಳಾಸ್ತಲೊ
ಕೊಣೆ ಕೊಣಾಕ್ ಮಾರ್‍ಲೆಂ ತೆಂ
ಸಂಕ್‌ಪಾಶಾಣ್ ಘಾಲ್ಚ್ಯಾದಿಂ
ಮನಿಸ್ ಜಾಲ್ಲ್ಯಾನ್ ಚಿಂತ್ಲೆಂ ವ್ಹಯ್?
ಜಿವಿ ಮಡಿಂ ಮೆಲ್ಲ್ಯಾ ಮಡ್ಯಾಂಕ್ ಸಮ್ಜತಿತ್?
ರಸ್ತ್ಯಾ ಸಿಗ್ನಲಾಚೆರ್ ಉಬೊ
ಭುರ್ಗೊ ಎಕಾ ಹಾತಿಂ ದಿಸಾಳೆಂ
ಆನ್ಯೇಕಾ ಹಾತಿಂ ಮ್ಹೆಳೆಂ ವಸ್ತುರ್ ಘೆವ್ನ್
ವಿಕ್ತಾ ವಾ ಗಾಡಿ ಪುಸ್ತಾ
ಹಾಂವ್ ವ್ಹಳೂ ಪುಸ್ಪುಸ್ತಾಂ;
’ಖತಾಂ ಪುಸುನ್ ಕಾಡ್ಶಿ?’.
- ವಲ್ಲಿ ಕ್ವಾಡ್ರಸ್
संपादकीय
समाजाचेर थापल्लीं रगताळीं खतां पुसचीं कोणें?
समाजांत मनीस एकामेका पूरक जावन जियेल्यार संतोस आनी शांती असता. पुण जेदनां मनीस म्होंव वांटच्या बदलाक वीक वांटता, मतलबी माध्यमां वीक वोंकतात, तेदनां मनशापण वळवळता . असली विकाळ स्थिती समाजाचो मोग करचे जवाबदारेच्या कविक सोसना. तेंय मर्जेन आनी हंकारान जियेंवच्या समाजाच्या एका वर्गान बेपर्वा कर्न देगेक लोटच्या मनशाचेर जुलूम चलयताना कवी कांटाळता आनी तांकां 'जिवीं मडीं' म्हण वोलांवच्याक दाकशेना. मोळबाकच पाकें कर्न रस्त्या देगेन निदल्ल्या कुलकारांचेर हंकाराचीं रोदां धांवून जीव आनी हात पांय चेंचून गेल्यारी तेरा वर्सां उपरांती ह्या दुबळ्यांक नीत दीवंक सकनातल्ल्ल्या आमचे व्यवस्थेंत सताचे सोदनेर आसच्या कविक संकपाशण दिसनासतां आनी कितें दिसत?
कवीन हांगा उंद्राक चिल्लर जीवी म्हण पिंत्रावन, त्या मरून गेल्ल्या उंद्राक आनी निमाणे पेपरां विकच्या, गाडियांचे आरसे पुसच्या भुरग्यां संगीं एक गांच घाला. फाल्यां ह्या भुरग्यांची गत्य ह्या उंदरापरीं जायना जांव म्हळ्ळो अकांत कवितेंत झळकता. सल्मान खानाचे गाडिये पंदा चेंचून गेल्ल्यांची गत पळेताना आनी आयलेवार भीक मागूंक हात वोडडायिल्ल्या एका भुरग्याक एका मंत्रिणेन खोटायिल्लें पळेताना कविचे आकलास कितले खरे तें सुस्तता.
-आंडऱ्यू एल डिकूनहा
कविता:
उंदीर आनी खतां
काल सकाळीं
आफिसाक वेच्या आमसोरान
टयरांनी; पंदा चिरडल्ल्या
रस्त्यार मरून पडल्ल्या
उंद्राचें रगत
दाट जाल्लें
आज रस्त्याच्या तेच सुवातेर
मेल्लो उंदीर दिसलोना
माजरान गिळ्ळास्तलो
पुण माजर खंय मेलां
पेट्यान गिळ्ळास्तलें
मुखली गेर घाली
पेट्याक वागान
वागाक कोणे गिळ्ळासतालो
कोणे कोणाक मारलें तें
संकपाशाण घालच्यादीं
मनीस जाल्ल्यान चिंतलें व्हय?
जिवी मडीं मेल्ल्या मड्यांक समजतीत?
रस्त्या सिगनलाचेर उबो
भुरगो एका हातीं दिसाळें
आनयेका हातीं म्हेळें वस्तुर घेवन
विकता वा गाडी पुसता
हांव व्हळू पुसपुस्तां;
'खतां पुसून काडशी?'.
- वल्ली क्वाड्रस