ಸಂಪಾದಕೀಯ್:
ಕಿತ್ಯಾಕ್ ಸಗ್ಳೆ ಮನೀಸ್ ಕವಿ ಜಾವ್ನ್ ಪರ್ಜಳನಾಂತ್?
ಸೈಂಭಾನ್ ಸಗ್ಳೆ ಕವೀಚ್. ಪುಣ್ ಕೊಣ್‌ಯ್ ವೆಕ್ತಿ ಆಪ್ಲಿ ಕವಿತೆಚಿ ತಾಂಕ್ ಪಾರ್ಕುಂಕ್ ವಚನಾ. ಜಾಯ್ತ್ಯಾಂಚಿ ಪ್ರತಿಭಾ ಕಳ್ಶೆಪೊಂದಾ ಧಾಂಪುನ್‌ಚ್ ಆಸ್ತಾ. ಕವಿತಾ ಕುಳಾರಾಂತ್ ಸಾದರ್ ಜಾಲ್ಲೊ ಕವಿ ಜೊಸ್ಸಿ ಮಸ್ಕರೇನ್ಹಸಾಚಿ ಪ್ರತಿಭಾ ಕಳ್ಶೆಪೊಂದಾ ಉರ್‍ಲ್ಯಾ ಮ್ಹಳ್ಳೆಂ ಸಾಂಗೊಂಕ್ ಮ್ಹಾಕಾ ಧೈರ್ ಪಾವನಾ. ಹೊ ಕವಿ ಏಕ್ ಗೀತ್‌ಕಾರ್ ಜಾವ್ನ್, ಸಂಗೀತ್‌ಗಾರ್ ಜಾವ್ನ್, ಗಾವ್ಪಿ ಜಾವ್ನ್ ಜಾಯ್ತೆ ಪಾವ್ಟಿಂ - ಪರಡೆಲಾ ನಾಯ್ಟಾಂನಿ ಯಾ ಆಪ್ಲ್ಯಾಚ್ ಸಂಗೀತ್ ಸಾಂಜೆಂ ಮಾರಿಫಾತ್ ರಂಗ್‌ಮಾಂಚಿಯೆರ್ ಪರ್ಜಳ್ಳಾ. ಪುಣ್ ತಾಚೆ ಪ್ರತಿಭೆತಿತ್ಲೊ ಸನ್ಮಾನ್, ಪುರಸ್ಕಾರ್ ಯಾ ಮರ್‍ಯಾದ್ ಹೆ ವೆಕ್ತಿಕ್ ಲಾಭೊಂಕ್ ನಾತ್‌ಲ್ಲೆಂ ಆಮ್ಚೆಂ ದುರಾದೃಷ್ಟ್.
ತಾಚ್ಯಾ ಪದಾಂನಿ ಎಕೆ ಕವಿತೆಚೊ ಧಮ್, ಉತ್ರಾಂಚೊ ಭರ್ಮ್ ಆನಿ ಅಲಂಕಾರಾಂಚೊ, ಇಮಾಜಿಂಚೊ ಮಾಟವ್‌ಚ್ ಸಜಯಿಲ್ಲೊ ಆಮ್ಕಾಂ ದಿಸ್ತಾ. ತಾಚೆಂ ಸಂಗೀತ್ ಹಾಂವೆಂ ಆಯ್ಕಲಾಂ, ತಾಚ್ಯಾ ಸುಮಧುರ್ ತಾಳ್ಯಾಚೊ ಸ್ವಾಧ್ ಹಾಂವೆಂ ಚಾಕ್ಲಾ, ತಾಚ್ಯಾ ಪದಾಂಚಿಂ ಉತ್ರಾಂ ಭಾರ್ಕಾಯೆನ್ ಹಾಂವೆಂ ವಾಚ್ಲ್ಯಾಂತ್. ಕೊಂಕಣಿಚ್ಯಾ ಮೊಳ್ಬಾರ್ ಪರ್ಜಳ್ಚ್ಯಾ ಖಂಯ್ಚ್ಯಾಯ್ ಉಂಚ್ಲ್ಯಾ ಸಂಗೀತ್‌ಗಾರಾಂಕ್ ಹೊ ಕವಿ ಸೊಡ್ನ್ ದೀನಾ.
ತಾಚೆಂ ಏಕ್ ಸುಂದರ್ ಪದ್, ಜಾಕಾ ಹಾಂವ್ ಕವಿತಾಚ್ ಮ್ಹಣ್ತಾಂ - ಹಾಂಗಾಸರ್ ದಿಲಾಂ. ಕವಿ ಸವಾಲಾಂಚ್ಯಾ ಗೊಂದೊಳಾಂತ್ ಶಿರ್‍ಕಲಾ. ಗೊಂದೊಳಾಂಚ್ಯಾ ಝಾಂಟಾಂನಿ ತಾಚೆಂ ಚಿಂತಪ್ ಅಸ್ತವೆಸ್ತ್ ಜಾಲಾಂ. ತಾಚೆಲಾಗಿಂ ಜಾಪ್ ನಾ. ತುಮಿ ಜಾಪಿ ಸೊಧಾ. ಸೊಧ್ತಾನಾ ಜ್ಯೊ ಜಾಪಿ ತುಮ್ಕಾಂ ಲಾಭ್ತಲ್ಯೊ, ತ್ಯಾ ಜಾಪಿಂನಿ ತುಮ್ಚೆ ಮತಿಂತ್ ಉಜ್ವಾಡಾಚ್ಯೊ ಜ್ಯೋತಿ ಪೆಟಯ್ಲ್ಯಾರಿ ಪೆಟಯ್ಲ್ಯೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಿತ್ಯಾಕ್?
ತಿಂ ಝಡೊನ್ ಪಡ್ತಾತ್
ಆಜ್ ನ್ಹಯ್ ಫಾಲ್ಯಾಂ
ತರ್ ಹಿಂ ಫುಲಾಂ, ಫುಲ್ತಾತ್ ಕಿತ್ಯಾಕ್?
ಥೊಡ್ಯಾಚ್ ಘಡಿಯಾಂನಿ ದೀಸ್ ಉಜ್ವಾಡ್ತಾ
ತರ್ ಹಿಂ ಸಪ್ಣಾಂ, ಯೆತಾತ್ ಕಿತ್ಯಾಕ್?
ಝಗ್ಲಾಣೆಂ ಜಾವುನ್ ತುಂ ಆಯಿಲ್ಲೆಂಯ್
ಘರ್ ಪೆಟವ್ನ್ ಗೆಲೆಂಯ್
ಉಜ್ವಾಡಾಕ್ ಆತಾಂ ಮ್ಹಾಕಾ
ದಿವೊ ಕಿತ್ಯಾಕ್?
ಸದಾಂನೀತ್ ಯೆಂವ್ಚ್ಯಾ ಇಶ್ಟಾಂಕ್
ಮೊರ್ನಾಕ್ ವೇಳ್ ಮೆಳ್ಳೊನಾ
ತಾಂಚ್ಯಾಚ್ ಫೆಸ್ತಾ ದಿಸಾ
ಹಾಂವ್ ಮೆಲೊಂ ಕಿತ್ಯಾಕ್?
- ಜೊಸ್ಸಿ ಮಸ್ಕರೇನ್ಹಸ್