ಸಂಪಾದಕೀಯ್:
ಬಾಯ್ಲೆ ವಯ್ಲೆ ಜಾಳ್ ಭಯ್ಣಿಚೆರ್ ವೊಂಕ್ತಾನಾ!
ಏಕ್ ಭಾವ್, ಲಗ್ನ್ ಜಾಲ್ಲ್ಯಾ ಆಪ್ಣಾಚೆ ಭಯ್ಣಿಲಾಗಿಂ ಅಸೋಯ್ ರಾಜಾಂವ್ ಉಲಯ್ತಾ ಕಿತ್ಯಾಕ್? ಜೆಂ ಆಪ್ಣಾಚಿ ಭಯ್ಣ್ ಕರೀತ್ ಆಸಾ, ತೆಂಚ್ ಆಪ್ಣಾಚಿ ಬಾಯ್ಲ್ ಕರ್‍ತಾ ದೆಕುನ್ ತೊ ಬಾಯ್ಲೆಚೆರ್ ವೊಂಕಜೆ ಜಾಲ್ಲೆ ಜಾಳ್ ಭಯ್ಣಿಚೆರ್ ವೊಂಕುನ್ ಆಸಾ ಕಾಂಯ್? ಏಕ್ ಅಪ್ರೂಪಾಚಿ ಕವಿತಾ ಘೆವ್ನ್ ರೈಮಂಡ್ ಡಿ'ಕುನ್ಹಾ, ತಾಕೊಡೆ ಹಾಂಗಾಸರ್ ಕವಿತಾ ಕುಳಾರಾಕ್ ಪ್ರವೇಶ್ ಜಾಲಾ. ಕಾವ್ಯಾಳ್ ಸೊಭಾಯ್ ಬರ್ಪೂರ್ ಹೆ ಕವಿತೆಂತ್ ದಿಪ್ಕಲ್ಯಾ ಮಾತ್ರ್ ನ್ಹಯ್, ಜಾನಪದಾಚೊ ವಾಸ್‌ಯ್ ಹಿ ಕವಿತಾ ವಾಚ್ತಲ್ಯಾಂಕ್ ಆದಾಳ್ನಾಸ್ತಾಂ ರಾವನಾ.
ನವ್ಯಾ ವರ್‍ಸಾಚೆ ಸುರ್‍ವಾತೆ ಉಪ್ರಾಂತ್ ಕವಿತಾ ದೀಂವ್ಕ್ ಥೊಡಿ ಗಳಾಯ್ ಜಾಲ್ಲ್ಯಾಕ್ ಮಾಫ್ ಆಸೊಂ. ಆಮಿ 'ಕವಿತಾ'ಚೆಂ ಸಪಣ್ ಜ್ಯಾರಿ ಕರ್‍ಚ್ಯಾಕ್ ಹಾತಿಂ ಧರ್‌ಲ್ಲೆಂ ಏಕ್ ಮಿಸಾಂವ್ 'ದಿಣಿ ದಿಣಿ' ಮೊಕ್ಳಿಕೆಚ್ಯಾ ವಾವ್ರಾಂತ್ ಬುಡ್‌ಲ್ಲ್ಯಾಂವ್. ಕೊಂಕಣಿಚ್ಯಾ ಇತಿಹಾಸಾಂತ್‌ಚ್ ಪಯ್ಲೆಪಾವ್ಟಿಂ ಸಂಗೀತಾಚೊ ಏಕ್ ವೆಗ್ಳೊಚ್ ಸಂಸಾರ್ ತುಮ್ಕಾಂ ದಾಕಯ್ಜೆ ಮ್ಹಳ್ಳ್ಯಾ ಇರಾದ್ಯಾನ್ ಆಮಿ ನಿರ್ಮಾಣ್ ಕೆಲ್ಲೆ ಹೆ ಕೊವ್ಳೆಚೊ ವಿಕ್ರೊ ದೋನ್ ದಿಸಾಂ ಭಿತರ್ ಹಜಾರಾಂಕ್ ಮಿಕ್ವಲಾ ಮ್ಹಣ್ತಾನಾ, ಆಮ್ಚ್ಯಾ ಶೆವೊಟಾಚ್ಯಾ ಮಹತ್ವಾವಿಶಿಂ ಆನಿ ಆಮ್ಚ್ಯಾ ವಾವ್ರಾವಿಶಿಂ ತುಮಿ ಜಾಣಾ ಜಾತಲ್ಯಾತ್ ತೆಂ ಖಂಡಿತ್.
ತುಮ್ಚೊ ಸಹಕಾರ್ ಆಮ್ಕಾಂ ಜಾಯ್. ಏಕ್ ಪ್ರತಿ ಮೊಲಾಕ್ ಘೆಯಾ ಆನಿ ತುಮ್ಚ್ಯಾ ಮೊಗಾಚ್ಯಾಂಕ್ ತಿ ವಿಕ್ತಿ ಘೆಂವ್ಕ್ ಸಲ್ಹಾ ದಿಯಾ. ಆಮ್ಚ್ಯಾ ಈಮೆಯ್ಲಾಕ್ ತುಮಿ ಬರವ್ನ್ ಕಸಲ್ಯಾಯ್ ಸವಲಾಂಕ್ ಜಾಪಿ ಜೊಡ್ಯೆತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಾಯೆ ಮ್ಹಜೆ ಆಯ್ಕ್ ಮ್ಹಾಕಾ
ಯೆ ಯೆ ಮ್ಹಜೆ ಬಾಯೆ, ಪರ್ಮಳಾಚೆ ಜಾಯೆ
ದುಧಾಮೃತಾಚೆ ಗಾಯೆ, ಆಮಾಂ ಸರ್‍ವಾಂಚೆ ಶೆಕಾಯೆ
ಯೆ ಯೆ, ಕಿತೆಂಗೆ ಖಂತ್ ತುಜ್ಯಾ ದೊಳ್ಯಾಂನಿ
ಹಾಂವ್ ಆಸಾಂ ತುಜ್ಯಾ ಮಾಂವಾಡ್ಚ್ಯಾ ಗರ್ಜಾಂನಿ
ಆದಿಂ ಜಾಲೆಂ ತೆಂ, ಕಾಜಾರ್ ಜಾಲ್ಲೆಂ ಘರಾ ಭಾಯ್ರ್
ಆತಾಂ ಕಾಜಾರಾ ದಿಸಾ ಉದಾಸ್, ಬಿಂದಾಸ್ ಮಾಗೀರ್
ಒಪ್ಸುನ್ ದಿತಾನಾಂಚ್ ಸಾಂಗ್ಚೆಂ, ವಚೊನ್ ಯೆ ಪುತಾ
ಸುಕಾ-ದುಕಾಂತ್: ಸುಕ್, ಜಾಯ್ ತರ್ ಕುಳಾರ್ ದಿತಾ
ಮೊಡರ್ನ್ ಮೊಡರ್ನ್ ಹರ್‌ಕಡೆ ಮೊಡರ್ನ್ ನ್ಹಯ್‌ಗೆ
ಕಾಜಾರಾ ಪಯ್ಲೆಂ ಕಾಪಡ್ ನ್ಹೆಸ್ಚಿ ಆಶಾಮು-ಗೆ
ಕಾಜಾರ್ ಜಾಲ್ಲೆಂಚ್ ಪೆಂಟ್ - ಕಮೀಜ್ ಸೊಭ್‌ಗೆ
ಆಂಗ್‌ಭರ್ ಚುರಿದಾರ್ ನ್ಹೆಸ್ಲ್ಯಾರಿ ಪಿಯಾವ್ ಸರ್ಲ್‌ಮು-ಗೆ
ಕಿತೇಂಯ್ ಮ್ಹಣ್ ಸೊಭಾಯ್ ತುಜಿ ಮ್ಹಾಕಾ ವ್ಹಡ್ ಖುಶಿ
ಪಾವ್ಟಿಂಕ್ ಉಕ್ಡೊ ಜೆವಿತ್ ಕಾಂದೆ ಖಾಂವ್ಚೋಯ್ ಋಷಿ
ಯೆ ಯೆ ಕುಳಾರಾ ಯೆ, ತೂಪ್ ಕೆಲಾಂ ದುಧಾ ಸಾಯೆ
ಪೊಟ್ಲಿ ಬಾಂಧುನ್ ವ್ಹರುನ್ ವಚ್ ಆವಯ್ ಸಾಸಾಯೆ
ಹಾಂವ್ ತುಕಾ ವಿರೋಧ್ ನ್ಹಯ್, ತುಂ ಕುಳಾರಾ ಯೆ
ತುಂ ಯೆತಾನಾ ಮ್ಹಾಕಾ ಸಂಭ್ರಮ್ ಭೊಗೊಂ ಬಾಯೆ
ಮ್ಹಜ್ಯೆ ಬಾಯ್ಲೆಕಿ ತುಂ ವಾಟ್ ಜಾತಾಯೆ?
ತಿಕಾಯಿ ಪಿಡಾ ತುಜಿ ಆತಾಂ ಕುಳಾರ್‍ಚೆ ಅಸ್ಕತ್ಕಾಯೆ
ಬಾಯ್ ತುಂ ಬಾಯ್, ಕುಳಾರ್‍ಚಿ ಭರ್ಮಿಕಾಯ್
ತುಜಿ ತಿ ದೇಖ್ ಲ್ಹಾನಾಂ-ವ್ಹಡಾಂ ಪಾಳ್ತಾತ್ ನ್ಹಯ್
ದೆಕುನ್ ಮ್ಹಣ್ತಾಂ ತುಂ ತುಜ್ಯಾ ಘರಾ ದಿವೊ-ಯಿ,
ಕುಳಾರಾ ದೇಖ್ ಜಾಶಿ, ತರ್ ವ್ಹರ್‍ತಿ ಸೊಭಾಯ್!
-ರೈಮಂಡ್ ಡಿ'ಕುನ್ಹಾ, ತಾಕೊಡೆ