ಸಂಪಾದಕೀಯ್:
ದೆವಾಚೆಂ ಅಸ್ತಿತ್ವ್ ಸೊದುಂಕ್ ವಚುನ್ ಆಪ್ಣಾಕಚ್ ಹೊಗ್ಡಾವ್ನ್ ಘೆತಲ್ಲೊ ಮನೀಸ್
ಹಾಂಗಾಸರ್ ಆರ್. ರಾಮನಾಥ್ ಹಾಚಿ 'ಅಸ್ತಿತ್ವ್' ಕವಿತಾ ಪರ್ಗಟ್ ಕೆಲ್ಯಾ. ಹ್ಯೆ ಕವಿತೆಂತ್ ದೆವಾಚ್ಯಾ ಅಸ್ತಿತ್ವಾಚೆರ್ ಕೆಲ್ಲೆಂ ಏಕ್ ಖಡಕ್ ಭಾಶ್ಯ್ ಆಸಾ. ದೆವಾಚೆಂ ಅಸ್ತಿತ್ವ್ ದಾಕೊಂವ್ಕ್ ಕೆಲ್ಲೊ ಏಕ್ ಅದ್ಭುತ್ ಪ್ರಯೋಗ್ ಆಸಾ.
ಪುಣ್ ದೇವ್ ಇತ್ಲೊ ಸಲೀಸಾಯೆನ್, ಕಷ್ಟಾಂವಿಣೆಂ ಮೆಳುಂಕ್ ಸಕ್ತಾ? ಹೆಂ ಏಕ್ ಸೊಡಂವ್ಕ್ ಜಾಯ್ನಾ ತಸಲೆಂ ಸವಾಲ್. ದೆವಾಚೆಂ ಅಸ್ತಿತ್ವ್ ಸೊದ್ತಾಂ ಸೊದ್ತಾನಾ ಮನೀಸ್ ಸೈತ್ ಸಾಸ್ಣಾಕ್ ನಾಂಚ್ ಜಾತಾ. ಆಖ್ಖಿ ಜಿಣಿ ದೆವಾಕ್ ಸೊದುಂಕ್ ವಚುನ್ ಆಪ್ಣಾಕಚ್ ಹೊಗ್ಡಾವ್ನ್ ಘೆತಲ್ಲ್ಯಾ ಮನ್ಶಾಚಿ ಕಾಣಿ ಹ್ಯೆ ಕವಿತೆಂತ್ ಆಸಾ. ಹಿ ಕವಿತಾ ಕಿತೆಂ ಉಗ್ಡಾಪೆಂ ಕರ್‍ತಾ ತೆಂ ಚಿಂತುಂಕ್ ತುಮ್ಕಾಂಚ್ ಸೊಡ್ತಾಂ.
ಆರ್. ರಾಮನಾಥ್ ಆಯ್ಲೆವಾರ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲ್ಯಾ ಕವಿತಾ ಫೆಸ್ತಾ ಸಂದರ್ಭಾರ್ ಚಲಲ್ಲೆ ಕವಿಗೋಷ್ಟಿಂತ್ ಭಾಗ್ ಘೆಂವ್ಕ್ ಮಂಗ್ಳುರಾಕ್ ಪಾವಲ್ಲೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಸ್ತಿತ್ವ್
ಹಾಂವೆಂ ಮ್ಹಜ್ಯಾ ದೆವಾಕ್
ಎಕೆ ವಣ್ಟಿರ್ ಉಮ್ಕಳಾಯ್ಲೊ
ಆನಿ ದುಸ್ರೆ ವಣ್ಟಿರ್ ಉಮ್ಕಳಾಯ್ಲಿ
ಮ್ಹಜೆ ದೇವತೆಕ್
- ಆನಿ ದೋನೀ ವಣ್ಟಿಚಿಂ ತೊಕಾಂ
ಎಕಾಮೆಕಾಕ್ ತೆಂಕ್ತಾ ಥಂಯ್ ಹಾಂವೆಂ ಬಸ್ಕಣ್ ಮಾರ್‍ಲಿ
ದೊಳೆ ಸತಾಡ್ ಉಗ್ತೆ ದವರುನ್...
ಉಪ್ರಾಂತ್-
ಖೂಬ್ ತೇಂಪ್ ಜಾಲೊ
ತಿಂ ದೊಗಾಂಯ್
ಎಕಾಮೆಕಾಕ್ ಮೆಳ್ಪಾಕ್
ವಣ್ಟಿವಯ್ಲ್ಯಾನ್ ದೆಂವ್ಲಿಂಚ್ ನಾಂತ್...
ಖರೆಂ ಮ್ಹಳ್ಯಾರ್,
ಹಾಂವೆಂ ಚಿಂತಿಲ್ಲೆಂ
ತಿಂ ದೊಗಾಂಯ್ ದೆಂವ್ತಚ್
ತಾಂಚ್ಯಾ ಪಾಂಯಾಂಕ್ ಘಟ್ ಧರುನ್
ಸಮೇಸ್ತಾಂಕ್ ತಾಂಚೆಂ ಅಸ್ತಿತ್ವ್ ದಾಕೊವ್ಪ್
ನಾಜಾಲ್ಯಾರ್ ತಾಂಚ್ಯಾ ವಾಂಗ್ಡಾ
ನಾಂಚ್ ಜಾವಪ್
ಆಸುಂ-
ಕೆನ್ನಾಯ್ ತರೀ
ನಾಂಚ್ ಜಾತಲೊಂಚ್,, ಸಾಸ್ಣಾಚೊ...
- ಆರ್. ರಾಮನಾಥ್
ತೊಕಾಂ=ಕೊನ್ಶೆ
ಸತಾಡ್=ಝೆಮೆನಾಸ್ತಾಂ, ಸಗ್ಳೆಚ್ ಉಗ್ತೆ.
संपादकीय:
देवाचें अस्तित्व सोदुंक वचून आपणाकच होगडावन घेतल्लो मनीस
हांगासर आर. रामनाथ हाची 'अस्तित्व' कविता पर्गट केल्या. ह्ये कवितेंत देवाच्या अस्तित्वाचेर केल्लें एक खडक भाश्य आसा. देवाचें अस्तित्व दाकोवंक केल्लो एक अदभूत प्रयोग आसा.
पूण देव इतलो सलीसायेन, कष्टांविणें मेळुंक सकता? हें एक सोडवंक जायना तसलें सवाल. देवाचें अस्तित्व सोदतां सोदताना मनीस सैत सासणाक नांच जाता. आख्खी जिणी देवाक सोदुंक वचून आपणाकच होगडावन घेतल्ल्या मनशाची काणी ह्ये कवितेंत आसा. ही कविता कितें उगडापें करता तें चिंतुंक तुमकांच सोडतां.
आर. रामनाथ आयलेवार कविता ट्रस्टान मांडून हाडल्ल्या कविता फेस्ता संदर्भार चलल्ले कविगोष्टींत भाग घेवंक मंगळुराक पावल्लो.
-मेल्विन रोड्रीगस
कविता:
असतित्व
हांवें म्हज्या देवाक
एके वणटीर उमकळायलो
आनी दुस्रे वणटीर उमकळायली
म्हजे देवतेक
- आनी दोनी वणटिचीं तोकां
एकामेकाक तेंक्ता थंय हांवें बसकण मारली
दोळे सताड उग्ते दवरून...
उपरांत-
खूब तेंप जालो
तीं दोगांय
एकामेकाक मेळपाक
वणटिवयल्यान देंवलिंच नांत...
खरें म्हळ्यार,
हांवें चिंतिल्लें
तीं दोगांय देंवतच
तांच्या पांयांक घट धरून
समेसतांक तांचें असतित्व दाकोवप
नाजाल्यार तांच्या वांगडा
नांच जावप
आसूं-
केन्नाय तरी
नांच जातलोंच,, सासणाचो...
- आर. रामनाथ
तोकां=कोनशे
सताड=झेमेनासतां, सगळेच उगते.