ಸಂಪಾದಕೀಯ್:
ದೇಶ್ ಪ್ರೇಮಾಮುಕಾರ್ ಅಡ್ಚೊನ್ ಗೆಲ್ಲೆಂ ಬಾಯ್ಲೆಚೆಂ ಮೊವಾಳ್ ಕಾಳೀಜ್
ಹೊ ಸಗ್ಳೊ ಸಂಸಾರ್ ಆಜ್ ಝುಜಾಚೆಂ ಆಂಗಣ್ ಜಾಲಾಂ. ಹ್ಯಾ ಆಂಗ್ಣಾಂತ್ ಝುಜ್ತಲೆ ಝುಜಾರಿ ವೆವೆಗ್ಳ್ಯಾ ಕುಟ್ಮಾಂ ಥಾವ್ನ್ ಆಯಿಲ್ಲೆ. ಎಕೆಕಾ ಜಿವಾ ಪಾಟ್ಲ್ಯಾನ್ ಕಿತ್ಲೆಶಿಂ ಕಾಳ್ಜಾಂ ವೊಳುನ್ ಆಸ್ತಾತ್. ಪುಣ್ ದೆಶಾಕ್ ಹ್ಯಾ ಕಾಳ್ಜಾಂಚಿಂ ಖಂತ್ ಆಸನಾ ಆನಿ ಝುಜ್ಚ್ಯಾ ಜಿವಾಚಿ ಪರ್ವಾ ಆಸನಾ. ದೇಶ್‌ಪ್ರೇಮಾ ಮುಕಾರ್ ಮನ್ಶಾ ಸಂಬಂಧಾಂಕ್ ಅರ್ಥ್ ಆಸನಾ. ಹಾಂಗಾಸರ್‌ಯ್ ದೇಶಾಚ್ಯಾ ಮೊಗಾಮುಕಾರ್ ಅಡ್ಚೊನ್ ಗೆಲ್ಲೆಂ ಏಕ್ ಕಾಳೀಜ್ ಕಳ್ವಳ್ಚೆಂ ದಿಸ್ತಾ.
ಆಶಾ ಪಿಂಟೊ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಚೆರ್ ತಿಚಿ ಕವಿತಾ ಪೇಶ್ ಕರುನ್ ಆಸಾ. ತಿಚಿ ಕವಿತಾ ವಾಚ್ತಾನಾ, ಹೆ ವಾಟೆನ್ ಜರ್ ತಿ ಸರಾಗ್ ಚಮ್ಕೊನ್ ಗೆಲಿ ಜಾಲ್ಯಾರ್ ವೆಗಿಂಚ್ ವಾಟೆಚೆ ಬಗ್ಲೆಂನಿ ಪರ್ಮಳಿಕ್ ಫುಲಾಂಚಿಂ ಝಾಡಾಂ ರೊಯ್ತಲಿ ಮ್ಹಣ್ಚ್ಯಾಕ್ ದುಭಾವ್ ನಾ.
ಪಾಟ್ಲ್ಯಾ ದೋನ್ ಹಫ್ತ್ಯಾಂನಿ ಆಮ್ಚ್ಯಾ 'ದಿಣಿ ದಿಣಿ' ಸಂಗೀತ್ ಕೊವ್ಳೆಚ್ಯಾ ವಾವ್ರಾಕ್ ಲಾಗೊನ್ ಹಫ್ತ್ಯಾಕ್ ದೊನಾಂ ಲೆಕಾನ್ ಕವಿತಾ ದೀಂವ್ಕ್ ಜಾಲೆಂನಾ. ಹೊ ಊಣ್ ಭರ್‍ತಿ ಕರುನ್ ವೆಗಿಂಚ್ ಪಯ್ಲೆಂಚ್ಯಾಚ್ ವೆಗಾನ್ ಆಮಿ ತುಮ್ಚೆ ಸಮೊರ್ ಉಬೆ ಜಾತಲ್ಯಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಾಕೊನ್ ತುಕಾ ರಾವ್ತಾಂ
ಪ್ರಶಾಂತ್ ಹ್ಯಾ ಕಾಳ್ಕೆ ರಾತಿಂ, ನಿಳ್ಶಾ ಗಗನಾರ್
ಚಂದ್ರೆಮ್ ತೊ ಖೆಳ್ತಾ, ಮ್ಹಾಕಾಚ್ ಪಳೆಯ್ತಾ
ಎಕ್ಸುರಿಂ ಬಸ್ಲ್ಯಾಂ ಉಗ್ದಾಸ್ ತುಜೊ ಧೊಸ್ತಾ
ಚಂದ್ರಾಕ್ ಪಳೆಯ್ತಾಂ, ರುಪ್ಣೆಂ ತುಜೆಂ ದೆಖ್ತಾಂ
ಸಂಸಾರ್ ನಿದೊನ್ ಆಸಾ ಹಾಂವ್-ರೆ ತಾರಾಂ ಮೆಜ್ತಾಂ
ಅಂಧ್ಕಾರ್ ಭೊಂವ್ತಿಂ ಭರ್‍ಲಾ ಫುಡಾರಾ ಚಿಂತಪ್ ಧೊಸ್ತಾ
ಫಾಂತೆಂ ಉದೆತ್ ಕೆದ್ನಾಂ ಸುರ್ಯಾಕ್ ರಾಕೊನ್ ಆಸಾಂ
ಏಕ್ ನದರ್ ಪಳೆಂವ್ಕ್ ತುಕಾ ಜೀವ್ ಮ್ಹಜೊ ಆಶೆವ್ನ್ ಆಸಾ
ಮೆಟಾಂ ದೆಂವೊನ್ ಗೆಲೊಯ್ ತೆದ್ನಾಂ
ಪಾಟಿಂ ಲೆಗುನ್ ಪಳೆಂವ್ಕ್ ನಾಂಯ್
ದೊಳ್ಯಾಂ ಖಾಂಚಿಂನಿ ಉದೆಲ್ಲಿಂ ದುಖಾಂ
ಆಡಾಂವ್ಕ್ ಸಕ್ಲಿಂನಾಂತ್ ತುಜಿಂ ಪಾವ್ಲಾಂ
"ದೇಶ್ ಮ್ಹಾಕಾ ಆಪಯ್ತಾ, ದೇಶಾಕ್ ಮ್ಹಜಿ ಗರ್ಜ್ ಆಸಾ"
ಉತ್ರಾಂ ಆಜೂನ್ ಗಾಜ್ತಾತ್ ಕಾನಾಂತ್ ಮ್ಹಜ್ಯಾ
ವೀರ್ ಝುಜಾರಿ ತುಂ, ದೇಶಾನ್ ಆಪಯ್ಲೊ ತುಕಾ
ತುಜ್ಯಾ 'ಆಪ್ಲ್ಯಾಂಚೆಂ' ರುದಾನ್ ಆಯ್ಕಾಲ್ಲೆಂ ನಾ ಕಾನಾಂಕ್ ತುಜ್ಯಾ
ಘಡಿಯೊ ವೊರಾಂ ಜಾತಾತ್, ಸುರ್ಯೊ-ಚಂದ್ರ್ ಖೆಳ್ತಾತ್ ಆಪಾಲಿಪಾ
ಸಂಸಾರ್ ಸಾಂಗೊಂ ಕಿತೇಂಯ್ ಕರಿನಾ ಹಾಂವ್ ಪರ್ವಾ
ಫಾಲ್ಯಾಂ ಯೇ ತುಂ, ಯಾ ಯೇ ತುಂ ಪೊರ್ವಾಂ
ಆಕ್ರೇಚ್ಯಾ ಉಸ್ವಾಸಾ ಪರ್ಯಾಂತ್ ರಾಕ್ತೆಲಿಂ ಹಾಂವ್ ತುಕಾ
- ಆಶಾ ಪಿಂಟೊ