ಸಂಪಾದಕೀಯ್:
ಸರ್ವಯ್ ವಾಟಾಂ ಪಯ್ಕಿ ಜಿಣ್ಯೆಚೊ ಶೆವೊಟ್ ಪೊಂತಾಕ್ ಪಾವೊಂವ್ಚಿ ವಾಟ್ ಪ್ರಮುಖ್
ಹ್ಯಾ ಜಿವಿತಾಚ್ಯೆ ವಾಟೆರ್ ಚಮ್ಕುನ್ ವೆತಾನಾ, ಆಮಿ ಕೆದಳಾ ಖಂಯ್ಸರ್ ಪಾವ್ತಾಂವ್ ಮ್ಹಳ್ಳೆಂ ಜಾಣಾ ಜಾಂವ್ಚೆಂ ಕಷ್ಟಾಂಚೆಂ. ಥೊಡ್ಯಾ ವಾಟಾಂನಿ ಸುಖ್ ಆಸ್ಲ್ಯಾರ್, ಹೆರ್ ಥೊಡ್ಯಾ ವಾಟಾಂನಿ ದೂಕ್ ವ್ಹಾಳುನ್ ಆಸ್ತಾ. ಪುಣ್ಯ್, ಪಾಪ್, ಸಾವೆಂ, ಮ್ಹೆಳೆಂ, ಸುಖ್, ದೂಕ್, ದೇವ್, ದೆಂವ್ಚಾರ್, ಬರೆಂ, ಖೊಟೆಂ - ಹ್ಯಾ ವಾಟಾಂನಿ ಚಮ್ಕತಾನಾ ಆಮ್ಕಾಂ ಆಪ್ಡುಂಕ್, ಭೊಗುಂಕ್ ಮೆಳ್ತಲೆಂಚ್. ಹೆಂ ಆಡಾಂವ್ಕ್ ಕೊಣಾಯ್ಚ್ಯಾನ್ ಸಾಧ್ಯ್ ನಾ.
ಏಕ್ ವಾಟ್ ಆಮ್ಕಾಂ ಸಾಸ್ಣಾಚ್ಯಾ ವಿಶೆವಾಕ್ ಆಪೊವ್ನ್ ವ್ಹರ್‍ತಾ ಮ್ಹಳ್ಳೆಂ ಸತ್ ಆಮಾ ಸರ್ವಾಂನಿ ಸಮ್ಜುನ್ ಘೆಂವ್ಚೆಂ ಅವಶ್ಯ್ ಆಸಾ. ತೆಂ ಸಮ್ಜುನ್ ಘೆತ್ಲೆಂ ಜಾಲ್ಯಾರ್, ಜಿಣ್ಯೆಚೊ ಶೆವೊಟ್ ಪೊಂತಾಕ್ ಪಾವೊಂವ್ಚಿ ಗರ್ಜೆಚಿ ವಾಟ್ ಆಮ್ಕಾಂ ಕಿತ್ಯಾಕ್ ಚಡ್ ಪ್ರಮುಖ್ ಮ್ಹಳ್ಳೆಂ ಆಮಿ ಜಾಣಾ ಜಾತಲ್ಯಾಂವ್.
ಜೊಸ್ಸಿ ಪಿಂಟೊಚಿ ಬೋವ್ ಆಪುರ್ಬಾಯೆಚಿ ಹಿ ಕವಿತಾ 'ಮ್ಹಜೊ ಗಾಂವ್' ಪುಸ್ತಕಾಂತ್ಲಿ ಆಮಿ ವಿಂಚ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗಾಂವ್ಚಿ ವಾಟ್
ತೀನ್ ವಾಟೊ ಜೊಡ್ಚೆ ವಾಟೆರ್ ವಗೆ ಉಬೊ ಹಾಂವ್
ಖಂಯ್ಚಿ ವಾಟ್ ಧರುನ್ ವಚುಂ, ಪಾವುಂ ಮ್ಹಜೊ ಗಾಂವ್
ಎಕೆ ವಾಟೆರ್ ಲೊಕಾಹಾರಿ ಕಿತೆಂ ಬೆಂಡಾ ವ್ಹಾಜಪ್!
ದೋನ್ ಕಾಳ್ಜಾಂಕ್ ಮಾರ್‍ಲ್ಯೊ ಮ್ಹೊರಿ ಕಿತೆಂ ಸರ್ಗಾ ಸಜಪ್!
ಎಕೆ ವಾಟೆನ್ ಗೆಲೊ ಸೊಮ್ಗೊಳ್, ವ್ಹಾಜ್ಲ್ಯೊ ದಿವ್ಳಾ ಘಾಂಟಿ
ಸಂಸಾರಾಚಿ ವಿರಕ್ತ್ ಪೂರಾ ದಿಸ್ಲಿ ತ್ಯಾಯ್ ವಾಟೆರಿ
ಧರ್ಣಿ ಸಮಾ ಜಾಲ್ಲೊ ಎಕ್ಲೊ ಕರ್ಮಾ ಭರೊ ವ್ಹಾವವ್ನ್ ಗೆಲೊ
ಖಂಯ್ಚ್ಯಾ ಜಲ್ಮಾ ಕರ್ಮಾ ಕೊಣ್ಣಾ ಹೊ ಜೀವ್, ಜೀವಚ್ ಮೆಲೊ
ಎಕೆ ವಾಟೆನ್ ಮೊಡೆಂ ವ್ಹಾವವ್ನ್ ಗೆಲೆ ತೇಗ್ ಚ್ಯಾರ್
ತ್ಯೆಚ್ ವಾಟೆ ಪೊಂತಾ ಸಂಪ್ತಾ ಹೊ ಸಗ್ಳೊ ಸಂಸಾರ್
ಸೊಮ್ಯಾ ಮ್ಹಜ್ಯಾ ಜಿವಿತಾಚ್ಯಾ ಹ್ಯಾ ದೊನ್ಪಾರಾಂ ಮತಿಕ್ ಗಿನ್ಯಾನ್ ದಿ
ಜಿಣ್ಯೆ ಶೆವೊಟ್ ಪೊಂತಾಕ್ ಪಾವೊಂವ್ಕ್ ಮ್ಹಜ್ಯಾ ಗಾಂವ್ಚಿ ವಾಟ್ ದಿ.
- ಜೊಸ್ಸಿ ಪಿಂಟೊ, ಕಿನ್ನಿಗೋಳಿ
संपादकीय:
सर्वय वाटां पयकी जिण्येचो शेवोट पोंताक पावोंवची वाट प्रमूख
ह्या जिविताच्ये वाटेर चमकून वेताना, आमी केदळा खंयसर पावतांव म्हळ्ळें जाणा जांवचें कष्टांचें. थोड्या वाटांनी सूख आसल्यार, हेर थोड्या वाटांनी दूक व्हाळून आसता. पुण्य, पाप, सावें, म्हेळें, सूख, दूक, देव, देंवचार, बरें, खोटें - ह्या वाटांनी चमकताना आमकां आपडुंक, भोगुंक मेळतलेंच. हें आडावंक कोणायच्यान साध्य ना.
एक वाट आमकां सासणाच्या विशेवाक आपोवन व्हरता म्हळ्ळें सत आमा सर्वांनी समजून घेंवचें अवश्य आसा. तें समजून घेतलें जाल्यार, जिण्येचो शेवोट पोंताक पावोंवची गर्जेची वाट आमकां कित्याक चड प्रमूख म्हळ्ळें आमी जाणा जातल्यांव.
जोस्सी पिंटोची बोव आपुरबायेची ही कविता 'म्हजो गांव' पुस्तकांतली आमी विंचल्या.
-मेल्विन रोड्रीगस
कविता:
गांवची वाट
तीन वाटो जोडचे वाटेर वगे उबो हांव
खंयची वाट धरून वचूं, पावूं म्हजो गांव
एके वाटेर लोकाहारी कितें बेंडा व्हाजप!
दोन काळजांक मारल्यो म्होरी कितें सर्गा सजप!
एके वाटेन गेलो सोमगोळ, व्हाजल्यो दिवळा घांटी
संसाराची विरक्त पूरा दिसली त्याय वाटेरी
धर्णी समा जाल्लो एकलो कर्मा भरो व्हाववन गेलो
खंयच्या जल्मा कर्मा कोण्णा हो जीव, जीवच मेलो
एके वाटेन मोडें व्हाववन गेले तेग च्यार
त्येच वाटे पोंता सोंपता सगळो संसार
सोम्या म्हज्या जिविताच्या ह्या दोनपारां मतीक गिन्यान दी
जिण्ये शेवोट पोंताक पावोवंक म्हज्या गांवची वाट दी.
- जोस्सी पिंटो, किन्निगोळी