ಸಂಪಾದಕೀಯ್:

ದೆವಾಕ್ ಘಡೊಂವ್ಚೆಂ ವಿಧಾನ್

ದೆವಾಕ್ ಕೊಣ್ ಘಡಯ್ತಾ? ದೆವಾಕ್ ಘಡೊಂವ್ಕ್ ಕಿತ್ಲೊ ಕಾಳ್ ಲಾಗ್ತಾ? ಹ್ಯೆ ಕವಿತೆಂತ್ ತಾಕಾ ಜಾಪ್ ಆಸಾ. ಆನಿ ಹಿ ಜಾಪ್ ಖರಿ ಮ್ಹಳ್ಳೆಬರಿ ಮ್ಹಜ್ಯಾ ದೊಳ್ಯಾಂ ಹುಜಿರ್ ದೆವಾಕ್ ಘಡಯಿಲ್ಲೆಂ ಘಡಿತ್ ಹಾಂಗಾ ಬರಯ್ತಾಂ.

ಹಾಂವ್ ಮಂಗ್ಳುರ್ ಪದ್ವಾ ಹೈಸ್ಕುಲಾಂತ್ ಸತ್ತರಾವ್ಯಾ ದಶಕಾಂತ್ ಶಿಕ್ತಾನಾ ಆಮ್ಚ್ಯಾ ಖೆಳಾಂಗ್ಣಾಕ್ ಲಾಗುನ್ ಏಕ್ ರುಕಾಚೆಂ ಪೆಡ್ ಆಸಲ್ಲೆಂ. ಆಮಿ ಭುರ್ಗೆಂ ಖೆಳುನ್ ಥಕ್ಲ್ಯಾ ಉಪ್ರಾಂತ್ ಹ್ಯಾ ಪೆಡಾಭೊಂವ್ತಿಂ ಬಸ್ತಲ್ಯಾಂವ್. ಮಾಗೀರ್ ಏಕ್ ದೀಸ್ ಥಂಯ್ಸರ್ ಕೊಣೆ ಕೊಣ್ಣಾ ಏಕ್ ಫಾತರ್ ದವರ್‍ಲೊ. ಕುಕುಮ್ ಆಯ್ಲೆಂ. ಭುರ್ಗ್ಯಾಂನಿ ಪೆಡಾಚೆರ್ ಬಸ್ಚೆಂ ರಾವಯ್ಲೆಂ. ಪಾಶಾರ್ ಜಾಂವ್ಚೊ ಲೋಕ್ ಪೆಡಾಮುಳಾಂತ್ ವ್ಹಾಣೊ ದವರುನ್ ನಮಸ್ಕಾರ್ ಕರುನ್ ಪಾಂಚ್ ಪಯ್ಶೆ ಉಡೊವ್ನ್ ವೆತಾಲೊ. ಉಪ್ರಾಂತ್ ಪಯ್ಶಾಂಕ್ ಮ್ಹಣುನ್ ಏಕ್ ಥಾಲೆಂ ಆಸ್ಚೊ ಕಂರ್ಡೊ ಥಂಯ್ ಉಬೊ ಜಾಲೊ.

ವರ್ಸಾಂ ಉಪ್ರಾಂತ್ ಥಂಯ್ ದೆವೂಳ್ ಆಯ್ಲೆಂ. ಭಟ್ ಆಯ್ಲೊ. ಪುಜಾ ಸುರು ಜಾಲಿ. ಆತಾಂ ತೀಸ್ ವರ್ಸಾಂ ಉಪ್ರಾಂತ್ ವ್ಹಡ್ ಜಾತ್ರಾಚ್ ಥಂಯ್ಸರ್ ಜಾತಾ. ಹಾಂವ್ ಹ್ಯಾ ಎಕಾ ದೆವಾಚ್ಯಾ ಜಲ್ಮಾಕ್ ಗೊವಾಯ್ ಆಸಾಂ. ತ್ಯಾ ದೆಕುನ್ ಆರ್. ರಾಮನಾಥಾನ್ ಕಿತೆಂ ಬರಯ್ಲಾಂ, ತೆಂ ಸ್ವೀಕಾರ್ ಕರುಂಕ್ ಕೊಣಾಯ್ಕಿ ಕಷ್ಟ್ ಜಾಲೆ ತರೀ ಮ್ಹಾಕಾ ಜಾಂವ್ಚೆನಾಂತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಫಾತೊರ್

ಸಾದಾರಣ್‌ಸೊ ದೇವ್ ಕಸೊ ದಿಸ್ತಾ
ಅಸೊ ಏಕ್ ಕಾಳೊ ಕುಳ್‍ಕುಳೀತ್
ತುಂ ಫಾತೊರ್ ಘೆ
ಆನಿ ರಸ್ತ್ಯಾಚೆ ಕಡೆಕ್
ಎಕಾ ಉಂಚ್‌ವಟ್ಯಾರ್ ನಿವಳ್ಶೆ ಜಾಗೆರ್ ದವರ್
ತ್ಯಾ ಫಾತ್ರಾಕ್ ಬರೊ ಧುವ್ನ್
ಗಂಧ್-ಪಿಂಜರ್ ಲಾಯ್
ಥೊಡಿಂ ಫುಲಾಂ ಘಾಲ್
ಚಾರ್ ಉಜ್ವಾತಿ ಜಳಯ್
ಫುಡ್ಯಾನ್ ಪಾಂಚ್ ಕೆಳಿಂ ಆನಿ ಸವ್ವಾ ರುಪಯಾ ದವರ್
ಇತ್ಲೆಂ ಜಾತಗೀರ್ ಕಡೆಕ್ ರಾವ್ನ್ ಮಜಾ ಪಳಯ್...
ರಸ್ತ್ಯಾಂತ್ಲ್ಯಾನ್ ಯೆತಲೆ-ವತಲೆ ಲೋಕ್ ತಾಕಾ ಪಾಂಯಾಂ ಪಡ್ಟಲೆ
ಉಪ್ರಾಂತ್ ತಾಕಾ ಫುಲಾಂ ಘಾಲ್ತಲೆ
ಉಜ್ವಾತಿ ಪೆಟಯ್ತಲೆ
ಫಳಾಂ ದವರ್‍ತಲೆ
ಪಯ್ಶೇಯ್ ದವರ್‍ತಲೆ
ಹೊ ನಾಂವ್ ನಾಶಿಲ್ಲೊ ದೇವ್ ಹಳೂಹಳೂ ಫಾಮಾದ್ ಜಾತಲೊ...

ಕಾಲಾಂತರಾನ್-
ತ್ಯಾ ವಾಠಾರಾಂತ್ಲೆ ಕಾಂಯ್ ಬುದ್ವಂತ್ ಭಾವಿಕ್
ಎಕ್ಠಾಂಯ್ ಯೇವ್ನ್ ಥಂಯ್ ದೆವ್ಳಿ ಬಾಂದ್ತಲೆ
ತ್ಯಾ ದೆವಾಚೊ ಬಾರ್ಸೊ ಕರುನ್
ತಾಕಾ ಏಕ್ ನಾಂವ್ ದವರ್‍ತಲೆ
ಆಠಯ್‍ವಡ್ಯಾಚೊ ಏಕ್ ದೀಸ್
ತಾಚ್ಯಾ ಉತ್ಸವಾಚೊ ಥಾರಾಯ್ತಲೆ
ಆನಿ ವರ್ಸಾಚೊ ಏಕ್ ದೀಸ್ ತಾಚೆ ಜಾತ್ರೆಚೊ
ಆತಾಂ ಹೊ ನಾಂವ್ ಆಶಿಲ್ಲೊ ದೇವ್ ಖೂಬ್ ಫಾಮಾದ್ ಜಾತಲೊ....
ಲೋಕ್ ತಾಕಾ ಅರ್ಗಾಂ ವೊಂಪ್ತಲೆ
ನವಸ್ ಕರ್‍ತಲೆ.... ನವಸ್ ಫೆಡ್ಟಲೆ..
ಆನಿ ಹೆಂ ಸಗ್ಳೆಂ ತುಂ ತುಜ್ಯಾ ದೊಳ್ಯಾಂನಿ ಪಳಯ್ತಲೊ..
ಏಕ್ ಫಾತೊರ್ ದವರುನ್ ಲೊಕಾಂಕ್ ಫಟಯ್ಲೆಂ
ಹಾಚೆಂ ಸಮಾಧಾನ್ ಮಾತ್ ತುಕಾ ನಕ್ಕೀಚ್ ಜಾಂವ್ಚೆಂ ನಾ...

ಹಾಂ, ಬರಿ ಯಾದ್ ಜಾಲಿ
ಅಸಲೋಚ್ ಆನಿ ಏಕ್ ಫಾತೊರ್ ಮಾತ್
ತುಂ ಖಂಯಿಂಚ್ ದವರುಂ ನಾಕಾ...

-ಆರ್. ರಾಮನಾಥ್