ಸಂಪಾದಕೀಯ್:
ಮಾಡಾರ್ ಚಡುನ್ ಆಪ್ಲ್ಯಾ ಜಿವಿತಾಕ್ ಉಜ್ವಾಡ್ ಸೊದ್ಚೊ ಪಾಡೆಲಿ
ಪಾಡೆಲಿ (ಮಾಡಾರ್ ಚಡುನ್ ನಾರ್‍ಲ್ ಕಾಡ್ಪಿ) ಮ್ಹಳ್ಯಾರ್ ಮಾಡಾರ್ ಚಡ್ ಕಾಳ್ ಜಿಯೆಂವ್ಚೊ ಮನೀಸ್. ತಾಚೊ ಸಂಸಾರ್ ವೆಗ್ಳೊ. ತೊ ಶಿರ್‍ಲ್ಯಾಬರಿ ಮಾಡಾರ್ ಚಡ್ಚಿ ಕಲಾ ಜಾಣಾ. ಉಂಚಾಯೆಕ್ ಚಡುನ್, ಥಳಾಂತ್ ಸಾಸ್ಪುಂಚ್ಯಾ ಜಿವಿತಾಕ್ ಉಜ್ವಾಡಾಚಿ ಶಿರ್ ಸೊಧುನ್ ಕಾಡುಂಕ್ ತೊ ಸದಾಂ ವಾವುರ್‍ತಾ. ಪುಣ್ ಕೆನ್ನಾಂ ಪಾಸುನ್?
ಘರಾಂತ್ ವಾಡಿಲ್ಲ್ಯೊ ಚಲಿಯೊ ಆಸಾತ್. ಪೊಟ್ ಪೊಕೊರ್‍ಚಿ ಭುಕ್ ಆಸಾ. ಶಿಕಪ್ ತಾನೆಂವ್ಚಿಂ ಭುರ್ಗಿಂ ಆಸಾತ್. ತಾಂಚೆ ಖಾತೀರ್ ತೊ ವಯ್ರ್ ಚಡ್ತಾ ಆನಿ ಸಕ್ಲಾ ದೆಂವ್ತಾ. ಉಜ್ವಾಡಾ ಕುಶಿಂ ವಯ್ರ್ ಚಡ್ಚೊ ಮಾಡ್ ಆನಿ ಮಾಡಾರ್ ಚಡುನ್ ಆಪ್ಲ್ಯಾ ಜಿವಿತಾಕ್ ಉಜ್ವಾಡ್ ಸೊದ್ಚೊ ಪಾಡೆಲಿ. ಹಿಂ ದೋನ್ ಚಿತ್ರಾಂ ದೊಳ್ಯಾಂ ಸಾಮ್ಕಾರ್ ದವ್ರುನ್ ತುಮಿ ವಾಚಾ. ತವಳ್ ಪಾಡೆಲಿಚ್ಯಾ ಜಿವಿತಾಚೆ ಹಾಲ್-ಹವಾಲ್ ತುಮ್ಕಾಂ ಸಮ್ಜತಲೆ.
ರಮೇಶ್ ಸಾಜು ಘಾಡಿ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ತಾಕಾ ಆಮಿ ಯೆವ್ಕಾರ್ ದಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾಡೆಲಿ
ಪಾಯಾಂತ್ ಖಾಡುಂ
ಕೊಯ್ತೊ ಹಾತಾಂತ್
ಕೆದ್ನಾ ಶೆತಾಂತ್
ಕೆದ್ನಾ ಭಾಟಾಂತ್
ಸಾಂವ್ರಿ ಝಾಡಾರ್
ವಾಂಕ್ಡ್ಯಾ ಮಾಡಾರ್
ಶಿರ್‍ಳ್ಯಾಬರಿ ಚಡ್ಟಾಲೊ
ಭಾಟ್ಕಾರಾಚ್ಯಾ ಭಾಟಾಂತ್ ಮ್ಹಜೊ
ಬಾಪುಯ್ ಮಾಡ್ ಪಾಡ್ಟಾಲೊ.
ಹುಸ್ಕೆಚೊ ಮಾಥ್ಯಾರ್ ಭೊರೊ
ಕುಮ್ಯಾಚೊ ಹಾತಾನ್ ದೊರೊ
ಮುಕಾದಮ್ ಸದಾಚ್ ತಾಕಾ
ಹಿಶೊಬಾಕ್ ನಾಡ್ಟಾಲೊ
ಭಾಟ್ಕಾರಾಚ್ಯಾ ಭಾಟಾಂತ್ ಮ್ಹಜೊ
ಬಾಪೂಯ್ ಮಾಡ್ ಪಾಡ್ಟಾಲೊ .
ಆಂಬ್ಯಾ ಭೆಂದರ್
ಮಾಡಾಕ್ ಆಳಿ
ಪಿಡೆ ಕಾಪೂನ್
ಚುಡ್ಟಾ ದಾಳಿ
ಹಡ್ಡೆ ಧರೂನ್ ರಾತ್ ಭರ್
ಖೊಂಕ್ಲಿ ಬಾಪುಯ್ ಕಾಡ್ಟಾಲೊ
ಭಾಟ್ಕಾರಾಚ್ಯಾ ಭಾಟಾಂತ್ ಮ್ಹಜೊ
ಬಾಪೂಯ್ ಮಾಡ್ ಪಾಡ್ಟಾಲೊ .
ಹಾತಾಂಕ್ ಖಿಂಣಾ
ಪಾಯಾಂಕ್ ಖಿಂಣಾ
ಕೆದ್ನಾ ಉಧಾರ್
ಕೆದ್ನಾ ರಿಣಾ
ವಾಡಿಲ್ಲ್ಯಾ ತ್ಯಾ ಚಲಿಯಾಂಚೊ
ಹುಸ್ಕೊ ಬಾಪುಯ್ ಕಾಡ್ಟಾಲೊ
ಭಾಟ್ಕಾರಾಚ್ಯಾ ಭಾಟಾಂತ್ ಮ್ಹಜೊ
ಬಾಪೂಯ್ ಮಾಡ್ ಪಾಡ್ಟಾಲೊ
ಅಶ್ಯಾಚ್ ಎಕಾ ಪಾವ್ಸಾ ದಿಸಾ
ದೇವ್ ತಾಕಾ ವಿಸ್ರಲೊ
ಪಿಡ್ಯಾಕ್ ಹಾತ್ ಘಾಲ್ತನಾ
ಪಾಂಯ್ ತಾಚೊ ನಿಸ್ರಲೊ....
ವಾಕ್ಡೊ ಉಂಚ್ ಮಾಡ್ ಆತಾ
ಪಾಡ್ಚೆ ವಿಣೆ ಉರ್‍ತಲೊ
ಮಾಡಾಂಕ್ ಮ್ಹಜ್ಯಾ ಆಳಿ ಕಾಡೂನ್
ಹುಸ್ಕಿ ಕೊಣ್ ಪುರ್‍ತಲೊ..
ಗಾಂವ್ಕಾರಾಂಕ್ ತ್ಯಾ ದಿಸಾ
ಪ್ರಶ್ನ್ ಹೊಚ್ ಪಡಿಲ್ಲೊ..
ಬಾಪಾಯ್ಚ್ಯಾ ಮಡ್ಯಾರ್ ಮ್ಹಜ್ಯಾ
ಸಗ್ಳೊ ಗಾಂವ್ ರಡಿಲ್ಲೊ..
- ರಮೇಶ್ ಸಾಜು ಘಾಡಿ, ಸಾಳ್ಗಾಂವ್
संपादकीय:
माडार चडून आपल्या जिविताक उजवाड सोधचो पाडेली
पाडेली म्हळ्यार माडार चड काळ जियेंवचो मनीस. ताचो संसार वेगळो. तो शिरल्याबरी माडार चडची कला जाणा. उंचायेक चडून, थळांत सास्पुंच्या जिविताक उजवाडाची शीर सोधून काडुंक तो सदां वावुरता. पूण केन्नां पासून?
घरांत वाडिल्ल्यो चलियो आसात. पोट पोकोरची भुक आसा. शिकप तानेंवचीं भुरगीं आसात. तांचे खातीर तो वयर चडता आनी सकला देंवता. उजवाडा कुशीं वयर चडचो माड आनी माडार चडून आपल्या जिविताक उजवाड सोधचो पाडेली. हीं दोन चित्रां दोळ्यां सामकार दवरून तुमी वाचा. तवळ पाडेलिच्या जिविताचे हाल-हवाल तुमकां समजतले.
रमेश साजू घाडी पयले फावटीं कविता कुळाराक आयला. ताका आमी येवकार दितांव.
-मेल्विन रोड्रीगस
कविता:
पाडेली
पायांन खाडू
कोयतो हातांन
केदना शेतांन
केदना भाटांन
सांवरी झाडार
वाकड्या माडार
शिल्ल्यावरी चडटालो
भाटकाराच्या भाटान म्हजो
बापुय माड पाडटालो.
हुसकेचो माथ्यार भोरो
कुमयाचो हातान दोरो
मुकादम सदाच ताका
हिशोबाक नाडटालो
भाटकाराच्या भाटान म्हजो
बापूय माड पाडटालो .
आम्ब्या भेंदर
माडाक आळी
पिडे कापून
चुडटा दाळी
हड्डे धरून रात भर
खोंकली बापुय काडटालो
भाटकाराच्या भाटान म्हजो
बापूय माड पाडटालो .
हातांक खिंणा
पायांक खिंणा
केदना उधार
केदना रिणा
वाडिल्ल्या त्या चलयांचो
हुसको बापुय काडटालो
भाटकाराच्या भाटान म्हजो
बापूय माड पाडटालो
अश्याच एका पावसा दिसा
देव ताका विसरलो
पिड्याक हात घालतना
पांय ताचो निसरलो....
वाकडो उंच माड आता
पाडचे विणे उरतलो
माडांक म्हज्या आळी काडून
हुसकी कोण पुरतलो..
गांवकारांक त्या दिसा
प्रश्न होच पडिल्लो..
बापायच्या मड्यार म्हज्या
सगळो गांव रडिल्लो..
- रमेश साजू घाडी, साळगांव