ಸಂಪಾದಕೀಯ್:
ದೇವ್ ಏಕ್ ತರ್ ತಾಚಿ ಪುಜಾ ಕರ್‍ಚ್ಯೊ ರಿತಿ ಕಿತ್ಯಾಕ್ ವೆಗ್ಳ್ಯೊ?
ಆಮ್ಚ್ಯಾ ನ್ಹೆಸ್ಣಾಚೆರ್ ಆನಿ ಭಾಯ್ಲ್ಯಾ ಆಡಂಭರಾಚೆರ್ ಹೊಂದುನ್ ಆಮ್ಚೊ ದೇವ್ ಕೊಣ್ ಮ್ಹಳ್ಳೆವಿಶಿಂ ಕಳ್ತಾ. ಹರ್‍ಯೆಕಾ ಧರ್ಮಾಚ್ಯಾಂನಿ ಮಾಗ್ಚಿ ರೀತಯ್ ವೆವೆಗ್ಳಿ ಆಸ್ತಾ. ಆಮ್ಚ್ಯಾ ದಿಂಬಿಯಾಂನಿ ಫರಕ್, ವಾತಿ ಜಳೊಂವ್ಚ್ಯಾಂತ್ ಫರಕ್. ಹಾತ್ ಜೊಡ್ಚ್ಯಾಂತಯ್ ಫರಕ್.
ಹಾಂಗಾಸರ್ ಕವಯಿತ್ರಿ - ಹೆಂ ಕಿತ್ಯಾಕ್ ಅಶೆಂ - ಮ್ಹಣುನ್ ಸವಾಲ್ ಕರ್‍ತಾ. ಸರ್ವಾಂಕ್ ದೆವಾನ್ ರಚ್ಲಾಂ ತರ್ ತಾಚೆಚ್ ಕಿತ್ಯಾಕ್ ವಾಂಟೆ ಆನಿ ಫಾಂಟೆ ಆಮಿ ಕರ್‍ತಾಂವ್ ಮ್ಹಳ್ಳಿಂ ಸವಾಲಾಂ ತಿ ವಿಚಾರ್‍ತಾ. ನಿಮಾಣೆಂ ಹ್ಯೊ ವಾಟೊ ವೆಗ್ಳ್ಯೊ ಜಾತಿತ್, ಪುಣ್ ಸರ್ವಯ್ ಮನ್ಶಾಂನಿ ಹ್ಯಾ ಸಂಸಾರಾಥಾವ್ನ್ ಪಾಟಿಂ ಪಾವೊಂವ್ಚೆ ವಾಟೆಂತ್ ಫರಕ್ ಆಸ್ಚೊನಾ ಮ್ಹಣುನ್ ತಿಚೊ ಸಮಜ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವಾಟ್
ಕಪಲಾಕ್ ಲಾಯ್ಲ್ಯಾರ್ ಏಕ್ ಧರ್ಮ್
ಲಾಯ್ನಾ ಜಾಲ್ಯಾರ್ ವೆಗ್ಳೊ
ಮಂಗಳ್‌ಸೂತ್ರಾಚೊ ಆಕಾರ್ ಸಾಂಗ್ತಾ
ತುಜೊ ಖಂಯ್ಚ್ಯಾ ಧರ್ಮಾಚೊ ಗಳೊ
ದಿಮಿ ಮಾರ್‍ಲ್ಯಾರ್ ಏಕ್ ದೇವ್ ಪಾವ್ತಾ
ಆಸರ್‌ಮಾಂಡ್ಯೆನ್ ದುಸ್ರೊ
ದಿಮ್ಯೆರ್ ಬಸೂನ್ ಜಮೀನಿಕ್ ತಕ್ಲಿ
ಲಾಯ್ಲ್ಯಾರ್ ಪಾವ್ತಾ ತಿಸ್ರೊ
ಉಗ್ತ್ಯಾ ಹಾತಾನ್ ಮಾಗ್ಚೆಂ
ಕಾಂಯ್ ಜೊಡ್ಚೆ ದೋನೂಯ್ ಹಾತ್?
ಸಕಾಳ್ ಸಾಂಜೆವೆಳಾ ದಿವ್ಲಿ
ಕಾಂಯ್ ತಿನ್ಸಾನ್ಚಿ ಮೆಣಾವಾತ್?
ಎಕೆಚ್ ವಾಟೆನ್ ಆಯ್ಲ್ಯಾಂತ್ ಸಗ್ಳಿಂ
ಕಿತ್ಯಾಕ್ ಹೆ ಫಾಂಟೆಂ?
ಸೊಬೀತ್ ಸೃಷ್ಠ್ ರಚ್ಲಿ ಜಾಣೆ
ತಾಚೆಚ್ ಕಿತ್ಯಾಕ್ ವಾಂಟೆ?
ಆಗ್ಳೆ ವೆಗ್ಳೆ ವಾಟೆರಯ್
ಪಾಂಯಾಂಚೊ ಕಾಡ್ಟಾತ್ ಶೆಕ್
ಕಿತ್ಲ್ಯಾಯ್ ವಾಟಾಂನಿ ಚಲ್ಲೆ ತರೀ
ಪರ್‍ತಿಚಿ ವಾಟ್ ಏಕ್
ಸಗ್ಳ್ಯಾಂಕ್ ಪರ್‍ತಿಚಿ ವಾಟ್ ಏಕ್
-ರೂಪಾಲಿ ಮಾವ್ಜೊ ಕೀರ್ತನಿ
संपादकीय:
देव एक तर ताची पूजा करच्यो रिती कित्याक वेगळ्यो?
आमच्या न्हेसणाचेर आनी भायल्या आडंभराचेर होंदून आमचो देव कोण म्हळ्ळेविशीं कळता. हरयेका धर्माच्यांनी मागची रीतय वेवेगळी आसता. आमच्या दिंबियांनी फरक. वाती जळोंवच्यांत फरक. हात जोडच्यांतय फरक.
हांगासर कवयित्री - हें कित्याक अशें - म्हणून सवाल करता. सरवांक देवान रचलां तर ताचेचे कित्याक वांटे आनी फांटे आमी करतांव म्हळ्ळीं सवालां ती विचारता. निमाणें ह्यो वाटो वेगळ्यो जातीत, पुण सरवय मनशांनी ह्या संसारा थावन फाटीं पावोंवचे वाटेंत फरक आसचोना म्हणून तिचो समज.
-मेल्विन रोड्रीगस
कविता:
वाट
कपलाक लायल्यार एक धर्म
लायना जाल्यार वेगळो
मंगळसुत्राचो आकार सांगता
तुजो खंयच्या धर्माचो गळो
दिमी मारल्यार एक देव पावता
आसरमांडयेन दुसरो
दिम्येर बसून जमनीक तकली
लायल्यार पावता तिसरो
उकत्या हातान मागचें
काय जोडचे दोनूय हात ?
सकाळ साजवेळ दिवली
काय तिनसानची मेणवात?
एकेच वाटेन आयल्यांत सगळी
कित्याक हे फाटें?
सोबीत सृष्ट रचली जाणे
ताचेच कित्याक वाटें?
आगळे वेगळे वाटेरय
पायांचो काडटात शेक
कितल्याय वाटांनी चल्ले तरी
परतीची वाट एक
सगळ्यांक परतीची वाट एक
- रुपाली मावजो किर्तनी