ಕವಿತಾ:
ಮುಲ್ತಾನಾಂತ್ಲೆ ಸುಲ್ತಾನ್
-ವಿಶೆಂತ್ ಫೆರ್ನಾಂದ್, ಆಬುಧಾಬಿ
ಆಕ್ರೇಕ್ ತರೀ ನಪಯಿಂಚ್ ಆಕ್ಲಾಸ್
ಭಾರತಾನ್ ಹಾಡ್ಲೊ ಸಗ್ಳ್ಯಾನ್ ಉಲ್ಲಾಸ್
ಕುರ್ಕುರಿತ್ ಖೆಳ್ ಖೆಳೊನ್ ಧೈರಾನ್
ಆಪ್ಣಾಯ್ಲಿ ಜೀಕ್ 'ಟೀಮ್ ಇಂಡಿಯಾನ್'!
ಖೆಳ್ಣ್ಯೊ ಕಿತೆಂ, ಧೆಂಕ್ ಕಿತೆಂ?
ಖಿಣಾನ್ ಕೊಸಾಳ್ಳೆಂ ಮುಲ್ತಾನ್
ಸೊಸ್ಣಿಕಾಯೆ ಭಾರತ್ ಖೆಳ್
ಸುಮಾರ್ ಜಾಲೆಂ ಪಾಕಿಸ್ತಾನ್!
ಮುಶಾರ್ರಫ್ ಉಕಲ್ತಾ ಚೆಪೆಂ
ದಿಲೆಂ ಶಾಭಾಸ್ಕೆಚೆಂ ತುಪೆಂ
ತೆಂಚ್ ಜಾವ್ನ್ ಘೆತ್ಲೆಂ ಪ್ರೇರಣ್
ಗಾಜ್ಲೆಂ ಸಗ್ಳ್ಯಾನ್ ಇಂಡಿಯಾ ಲಕ್ಷಣ್
ಅನ್ಭೋಗ್ ಘೆವುನ್ ಪಾವ್ಲಾಂ ಕಾಡ್ತಾ
ಚವ್ತೆ ಸರಣಿಕ್ ಖಾಂದ್ ಮಾರ್‍ತಾ
ಪಾಕಿಸ್ತಾನ್ ದವರ್‍ತಾ ಬೋಟ್ ನಾಕಾಕ್
ನಿಶ್ಶಬ್ದ್ ಚರ್‍ತಾ ಪ್ರೇಕ್ಷಕಾಂಚ್ಯಾ ಬಾಂಕಾರ್!
ಝುಜ್ ಕಠಿಣ್ ಜಿವಾ ಆಂಗಾಂತ್
ದೊಳೆ ಮಿಳ್ಮಿಳ್ತಾತ್ ಖೆಳಾಂಗ್ಣಾಂತ್
ಪಾಕಿಸ್ತಾನಿ ಖೆಳ್ಗಾಡಿ ತಳ್ಮಳ್ತಾತ್
ಪ್ರೇಕ್ಷಕ್ ಬರ್ಪೂರ್ ಪುರ್ಪುರ್‍ತಾತ್!
ಜಿಕ್ಲೆಂ ಜಿಕ್ಲೆಂ ಇಂಡಿಯಾ ಸರಣಿ
ನಾಚಯ್ಲೆಂ ಆಮ್ಕಾಂ ರೈನಾ ಧೋನಿನ್
ಖರೆಂಚ್ ತುಮಿ ಆಮ್ಚೆ ಸುಲ್ತಾನ್
ಉಡಾಸಾಂತ್ ಉರ್‍ತಲೆಂ ಸದಾಂ ಮುಲ್ತಾನ್!
-ವಿಶೆಂತ್ ಫೆರ್ನಾಂದ್, ಆಬುಧಾಬಿ
(ಫೆಬ್ರೆರ್ 16, 2006 ತಾರಿಕೆರ್ ಪಾಕಿಸ್ತಾನಾಚ್ಯಾ ಮುಲ್ತಾನಾಂತ್ ಚಲ್‌ಲ್ಲ್ಯಾ ಭಾರತ್-ಪಾಕಿಸ್ತಾನಾ ಮಧ್ಲ್ಯಾ ಎಕಾ ದಿಸಾಚ್ಯಾ ಕ್ರಿಕೆಟ್ ಖೆಳಾಂತ್ ಭಾರತ್ ಜಿಕ್ಲೆಂ ಮಾತ್ರ್ ನ್ಹಯ್ ಆನಿಕ್‌ಯ್ ಏಕ್ ಖೆಳ್ ಬಾಕಿ ಆಸ್ತಾನಾಂಚ್ ಶಿಂಕಳ್ ಜಿಕ್ಲೆಂ. ಹ್ಯಾ ಉಡಾಸಾಚಿ ಹಿ ಕವಿತಾ)