ಸಂಪಾದಕೀಯ್:
ಕರೆಜ್ಮಾಚೊ ಕಾಳ್, ಮನ್ಶಾಪ್ರಾಣಿಂಕ್ ಪ್ರಾಯಶ್ಚಿತ್ತಾಚೊ ಕಾಳ್.
ಕ್ರಿಸ್ತಾಂವಾಂಚೊ ಕರೆಜ್ಮ್ ಮ್ಹಣ್ತಾನಾ ಮ್ಹಾಲ್ಗಡ್ಯಾಂಕ್ 'ದೆವಾ ದಯಾಳ್', 'ಉಟಾ ಉಟಾ ಪ್ರಾಣಿಯಾ' ತಸಲಿಂ ಕಾಂತಾರಾಂ ಉಡಾಸಾಂತ್ ಯೆತಾತ್. ಆತಾಂಚ್ಯೆ ಪಿಳ್ಗೆಕ್ ಹ್ಯಾ ಕಾಂತಾರಾಂಚಿ ವೊಳಕ್ ನಾ ಆಸ್ಯೆತ್. ಸರಿಸುಮಾರ್ ಸತ್ತರ್ ವರ್ಸಾಂ ಆದಿಂ ಪರ್ಗಟ್ ಜಾಲ್ಲ್ಯಾ 'ಶೆಂಭರ್ ಕಂತಿಗೊ' ಪುಸ್ತಕಾಂತ್ ಹಿಂ ಕಾಂತಾರಾಂ ವಾಚುಂಕ್ ಮೆಳ್ತಾತ್.
ಹ್ಯಾ ಕಾಂತಾರಾಂತ್ಲೆ ಸಬ್ದ್ ಪರ್ನೆ ಕೊಂಕಣಿಂತ್ಲೆ. ಜಾಯ್ತೆ ಸಬ್ದ್ ಆಯ್ಚ್ಯಾ ಚಾಲ್ತ್ಯಾ ಉಲೊವ್ಪಾಂತ್ ಮಾಯಾಗ್ ಜಾಲ್ಯಾತ್. ತೆ ಪರತ್ ಉಡಾಸಾಂತ್ ಹಾಡ್ಚ್ಯಾ ಶೆವೊಟಾನ್ ಹೆಂ ಕಾಂತಾರ್ ಹಾಂಗಾಸರ್ ಆಮಿ ದಿತಾಂವ್. ಥೊಡ್ಯಾಂಕ್ ತರೀ ತೆಂ ಉಪ್ಕಾರಾಕ್ ಪಡ್ತಲೆಂ ಮ್ಹಳ್ಳೊ ಭರ್‍ವಸೊ.
-ಮೆಲ್ವಿನ್ ರೊಡ್ರಿಗಸ್
ಕಾಂತಾರ್
ಉಟಾ ಉಟಾ ಪ್ರಾಣಿಯಾ
ಉಟಾ ಉಟಾ ಪ್ರಾಣಿಯಾ
ಸಾಂಡಾ ಸಾಂಡಾ ಸಂಸಾರ್ ಮಾಯಾ
ಪಾಟ್ ಕರೊನಿ ತೆಯಾ
ವೊಳ್ಕಾ ಜೆಜು ರಾಯಾ.
ಅಥಿರ್ ಸಂಸಾರ್
ಅಥಿರ್ ತಾಚೊ ಆಧಾರ್
ಅಥಿರ್ ಹಂಕಾರ್
ಅಥಿರ್ ತಾಚೊ ದಳ್ಬಾರ್
ತಾಚೆರ್ ಪಾತ್ಯೆವ್ನ್ ರಾವ್ಲಲೆ
ಪ್ರಾಚಿತ್ ಕರುಂಕ್ ನಾ ಪಾವ್ಲೆ
ನಿದ್ರೆಸ್ತ್ ಜಾವ್ನ್ ಉರಲೆ
ಜಾಗ್ರುತ್ ಜಾಯ್ನಾಸ್ತಾಂ ಸರಲೆ.
ಜೆ ಕೊಣ್ ತಾಕಾ ಭುಲಲೆ
ನಾನಾ ಪರಿಂ ಫೊಟ್ವಾಲೆ
ಈಷ್ಟ್ ಈಷ್ಟ್ ಮ್ಹಣುನ್ ಚಲಲೆ
ಶೆಕಿಂ ಗುಲಾಮ್ ಜಾಂವ್ಕ್ ಪಾವ್ಲೆ.
ದೊತೊರ್ನ್ ಶಿಕುಂಕ್ ಪೊಳ್ತಾಲೆ
ಖಂಯ್ ಆತಾಂ ತೆ ಪಾವ್ಲೆ?
ಫಾಲ್ಯಾಂ ಶಿಕೊಂವ್ ಮ್ಹಣ್ತಾಲೆ
ಫಾಲ್ಯಾಂ ಜಾಯ್ನಾಸ್ತಾಂ ಸರಲೆ.
ಸೈರೆ ಧಾಯ್ರೆ ಸರಲೆ
ಈಷ್ಟ್ ಮಂತ್ರ್ ಪಯ್ಲೆ ಅಂತರ್‍ಲೆ
ಹೆಂ ಮನಿಂ ಚಿಂತುನ್ ಆಪಾಪ್ಲೆ
ಹಾಕ್ ಮಾರ್‍ಯಾಂ ಜೆಜುಕಡೆ.
ಥರ್ಥರ್‍ಯಾಂ ಕಾಂಪೊನಿ
ಮ್ಹಣ್ತಾಂವ್ ಮನಿಂ ವಿಳಾಪ್ ಕರೊನಿ
ಹಾ ಕಟಾ! ಕಟಾ! ಸೊಮಿಯಾ ಆಮ್ಚಿ ಜಿಣಿ
ಇತ್ಲ್ಯಾನ್ ಜಾಲ್ಯಾಂವ್ ನಿರ್ಗುಣಿ
ಹೆ ಪುಣಿ ಸಬ್ದ್ ಆಯ್ಕೊನಿ
ಕಾಕ್ಳುತ್ ಆಮ್ಚೆರ್ ಠೆವುನಿ
ಆಟೊವ್ ಕರ್ ಸೊಮಿಯಾ ಆಮ್ಚೊ ಮ್ಹಣೊನಿ
ಅಪ್ರಾಧ್ ಮಾಗ್ತಾಂವ್ ಭೊಗ್ಸುನಿ. ಆಮೆನ್.
-ಅನಾಮಿಕ್
संपादकीय:
करेज्माचो काळ, मनशाप्राणींक प्रायश्चित्ताचो काळ.
क्रिस्तांवांचो करेज्म म्हणताना म्हाल्गड्यांक 'देवा दयाळ', 'उटा उटा प्राणिया' तसलीं कांतारां उडासांत येतात. आतांच्ये पिळगेक ह्या कांतारांची वोळक ना आस्येत. सरिसुमार सत्तर वर्सां आदीं पर्गट जाल्ल्या 'शेंभर कंतिगो' पुस्तकांत हीं कांतारां वाचुंक मेळतात.
ह्या कांतारांतले सब्द पर्ने कोंकणिंतले. जायते सब्द आयच्या चालत्या उलोवपांत मायाग जाल्यात. ते परत उडासांत हाडच्या शेवोटान हें कांतार हांगासर आमी दितांव. थोड्यांक तरी तें उपकाराक पडतलें म्हळ्ळो भरवसो.
-मेल्विन रोड्रिगस
कांतार
उटा उटा प्राणिया
उटा उटा प्राणिया
सांडा सांडा संसार माया
पाट करोनी तेया
वोळका जेजू राया.
अथीर संसार
अथीर ताचो आधार
अथीर हंकार
अथीर ताचो दळबार
ताचेर पात्येवन रावलले
प्राचीत करुंक ना पावले
निद्रेस्त जावन उरले
जाग्रूत जायनासतां सरले.
जे कोण ताका भुलले
नाना परीं फोटवाले
ईष्ट ईष्ट म्हणून चलले
शेकीं गुलाम जावंक पावले.
दोतोर्न शिकुंक पोळताले
खंय आतां ते पावले?
फाल्यां शिकोंव म्हणताले
फाल्यां जायनासतां सरले.
सैरे धायरे सरले
ईष्ट मंत्र पयले अंतरले
हें मनीं चिंतून आपापले
हाक माऱ्यां जेजुकडे.
थर्थऱ्यां कांपोनी
म्हणतांव मनीं विळाप करोनी
हा कटा! कटा! सोमिया आमची जिणी
इतल्यान जाल्यांव निर्गुणी
हे पुणी सब्द आयकोनी
काकळूत आमचेर ठेवुनी
आटोव कर सोमिया आमचो म्हणोनी
अप्राध मागतांव भोगसुनी. आमेन.
-अनामीक