ಸಂಪಾದಕೀಯ್:
ಆಮ್ಚೆಂ ಮಿಸಾಂವ್, ಕವಿತಾ ಬರಂವ್ಕ್ ಪ್ರೇರಣ್ ದಿತಾ
ಮಾರ್ಚ್ 10, 2006 ತಾರಿಕೆರ್ ದುಬಾಯಾಂತ್ 'ಕವಿತಾ' ತರ್ಫೆನ್ ಏಕ್ ವಿಶಿಷ್ಟ್ ಕವಿಗೋಶ್ಟಿ ಚಲ್ಲಿ. ಹ್ಯಾ ಸಂದರ್ಭಾರ್ ಮುಕೆಲ್ ಸೈರೊ ಜಾವ್ನ್ ದಾಯ್ಜಿ ದುಬಾಯ್ ಸಂಚಾಲಕ್, ಕಥಾಕಾರ್, ಅಂಕಣ್‌ಕಾರ್ ಜಾವ್ನ್ ಕೊಂಕಣಿ ಸಾಹಿತ್ಯಾಂತ್ ಆಪ್ಲೆಂ ನಾಂವ್ ಥಿರಾಯಿಲ್ಲೊ ಹೇಮಾಚಾರ್ಯ (ಸ್ಟೀವನ್ ಮಸ್ಕರೇನ್ಹಸ್) ಹಾಜರ್ ಆಸ್‌ಲ್ಲೊ. ತಾಣೆ ಆಪ್ಲ್ಯಾ ಉಲವ್ಪಾಂತ್ ಮಾಜ್ವೊನ್ ಗೆಲ್ಲ್ಯಾ ಜಾಯ್ತ್ಯಾ ಉಡಾಸಾಂಚೆ ವಾಟೆರ್ ಆಮ್ಕಾಂ ಚಲವ್ನ್ ವೆಲೆಂ.
ನಿಮಾಣೆ ಖಬರ್ ನಾಸ್ತಾಂ, 'ಕವಿತಾ'ನ್ ಕರ್‍ಚೊ ವಾವ್ರ್ ಮಾಂದುನ್ ಆಪ್ಣೆಂ ಬರಯಿಲ್ಲಿ ಏಕ್ ಕವಿತಾ ತಾಣೆ ವಾಚ್ಲಿ ಮಾತ್ರ್ ನ್ಹಯ್, ತಿ ಕವಿತಾ ಮ್ಹಾಕಾ ಏಕ್ ಯಾದಸ್ತಿಕಾ ಜಾವ್ನ್ ದಿಲಿ. ಇರಾದೊ ಕಸಲೋಯ್ ಆಸೊಂ, ಕವಿತಾ - ಕವಿತಾಚೆ ನದ್ರೆನ್ ಪಳೆಂವ್ ಜಾಲ್ಯಾರ್ ಏಕ್ ಉಂಚ್ಲಿ ಕವಿತಾ. ಕಥಾಕಾರ್ ಹೇಮಾಚಾರ್ಯಾಚೆ ಕಾಲೆತಿಂತ್ ಏಕ್ ಉಂಚ್ಲೊ ಕವಿ ಖಂಯ್‌ಕಿ ತಳ್ಮಳೊನ್ ಆಸಾ. ಆಮಿ ಆಮ್ಚ್ಯಾ ವಾವ್ರಾ ಮಾರಿಫಾತ್ ತ್ಯಾ ಕವಿಕ್ ಅತ್ಮೊ ದಿಲ್ಲಾ ಮ್ಹಳ್ಳೆಂ ಸುಖ್, ಸಮಾಧಾನ್ ಆಮ್ಕಾಂ. ಆಮಿ ಕವಿತಾ ಬರಂವ್ಕ್ ಗರ್ಜೆಚೊ ಭೊಂವಾರ್ ನಿರ್ಮಾಣ್ ಕರುನ್ ಆಸಾಂವ್ ಮ್ಹಳ್ಳ್ಯಾಕ್ ಹೊ ಏಕ್ ದಾಕ್ಲೊ.
ಹಿ ಕವಿತಾ ಆಮ್ಚೆ ಮಿಸಾಂವಾಚೆ ವಾಟೆರ್ ಆಮ್ಕಾಂ ಗರ್ಜೆಚಿ ಹುಮೆದ್ ಸದಾಂಕಾಳ್ ದಿತಲಿ ಮ್ಹಣ್ಚ್ಯಾಕ್ ದುಬಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿಂಕ್ ರಚ್ಚೊ ಕವಿ, ಬಾಬ್ ಮೆಲ್ವಿನ್ ಲುದ್ರಿಗ್
ಆಮೀಂಯ್ ಗೆಲ್ಲ್ಯಾಂವ್ ಚಮ್ಕೊನ್ ತ್ಯಾಚ್ ಉಬಿರಾಂತ್ಲ್ಯಾನ್
ಪುಣ್ ಆಮ್ಚ್ಯಾ ಪಾವ್ಲಾಂಚಿ ನಕ್ಷ್ಯಾ
ಚಲೊನ್ ಗೆಲ್ಲೆ ವಾಟೆರ್
ಖಂಚಂವ್ಕ್ ಆಮಿ ಸಕ್ಲೆನಾಂವ್
ಆಮೀಂಯ್ ಗೆಲ್ಲ್ಯಾಂವ್ ಚಮ್ಕೊನ್ ತ್ಯಾಚ್ ಉಬಿರಾಂತ್ಲ್ಯಾನ್
ಪುಣ್ ಮೋಗ್ ಆಶೆತೆಲ್ಯಾಂಚಿಂ ಕಾಳ್ಜಾಂ
ಭರುಂಕ್, ನಿರಾಶಿ ದುಖಿ ಮನಾಂ
ಜಿಕೊಂಕ್ ಆಮಿ ಸಕ್ಲೆನಾಂವ್
ಶೆಕಿಂ ತುಂವೀಂ ಆಯ್ಲೊಯ್ ತಿಚ್ ವಾಟ್ ಧರುನ್
ಆಮಿ ವಿಂಚುನ್ ಉಡಯಿಲ್ಲೆ ಕೊಂಗೆ
ತುಂವೆಂ ಆರಾವ್ನ್ ಧರ್‍ಲೆಯ್ ಜಶೆಂ
ಗುಲೊಬಿ ಝಾಡಾವಯ್ಲೆ ಬೊಂಗೆ, ಧೊವಾನ್ ಮಾಖ್ಲಲೆ
ಆಮಿ ಉಬಿರಾಂತ್ ಬೊಟಾಂ ರೊಂಬಯ್ನಾಸ್ತಾಂ
ಧರ್‌ಲ್ಲ್ಯೊ, ಉಗ್ತ್ಯೊ ಜಾಲ್ಲಲ್ಯೊ ಶಿಂಪಿಯೊ ಆನಿ ಕಂಗಾಲ್ ಕುಬೆ
ಪುಣ್ ತುಂ ಸಾರ್‍ಕೊಚ್ ಉಬಿರಾಂತ್ ಬುಡೊನ್ ಗೆಲೊಯ್
ತುಜ್ಯಾ ಹಾತಾಂನಿ ಆಯ್ಲಿಂ ಜಿವಿಂ ಜಿವಿಂ ಮಾಸಾಂ, ಕಾಲ್ವಾಂ
ಆಮಿ ಸೊಡಯಿಲ್ಲಿಂ ಫಕತ್ ನಿರಾಶೆಚಿಂ ಚಿತ್ರಾಂ
ಜಿಂ ಜಿವಿತಾಚ್ಯಾ ಕೆನ್ವಸಾಚೆರ್ ಖಂಚವ್ನ್ ಉರಂವ್ಕ್ ಸಕ್ಲೆನಾಂವ್
ಪುಣ್ ತುಂವೆಂ ಕೆಲಿಂಯ್ ವಿಚಿತ್ರಾಂ, ಹರ್ ಕೊಂಕ್ಣ್ಯಾಚೆ ಮತಿ ಮನಾಂತ್
ತುಜೆಂ ಕಾಮ್, ತುಜೆಂ ನಾಂವ್, ತುಜೆಂ ಮಿಸಾಂವ್, ಸದೆಂವ್ ಜಾಂವ್
-ಹೇಮಾಚಾರ್ಯ