ಸಂಪಾದಕೀಯ್:
ಪಿಸೊಳಿಂ ಉಬ್‌ಲ್ಲೊ ಆನಿ ಬಟಾಟೆ ಮುಡ್ಡಿಲ್ಲೊ ಅನ್ಭೋಗ್
ಥೊಡ್ಯಾ ದಿಸಾಂ ಆದಿಂ ವಿಲ್ಫಿ ಕಿನ್ನಿಗೋಳಿಚಿ ಮೊಗಾಚಿ ಮೊಗಾಳ್ ಕವಿತಾ ಆಮಿ ಪರ್ಗಟ್ ಕೆಲ್ಲಿ. ತೆ ಕವಿತೆಕ್ ಜಾಪ್ ಮ್ಹಣೊನ್ ಹಾಂವ್ ಸಾಂಗನಾ ತರೀ, ಏಕ್ ಆರ್‍ಸೊ ಧರುನ್ ಕಶಿ ಹಿ ಕವಿತಾ ಉದೆಲ್ಯಾ. ಮೊಗಾಚೆ ರೊವಾಣೆಕ್ ಬಸ್‌ಲ್ಲ್ಯಾಂಕ್ ಖಂತಿ, ದುಕಿ, ಉಮಾಳೆ ಸಭಾರ್. ಆತ್ತಾಂ ಪೊಟಾಚ್ಯಾ ಥಳಾಂತ್ ಸಂತೊಸಾಚಿಂ ಪಿಸೊಳಿಂ ಉಬ್ಚೊ ಅನ್ಭೋಗ್ ಜಾತಾ ಜಾಲ್ಯಾರ್, ಆತ್ತಾಂ ಕೊಣ್‌ಗಿ ಕುಡಿಚ್ಯೊ ಶಿರೊ ಸಗ್ಳ್ಯೊ ಆರಾವ್ನ್ ಉಕಡ್ಲಲೊ ಬಟಾಟೊ ದೋನ್‌ಯ್ ಹಾತಾಂನಿ ಮುಡ್ಡಿಲ್ಲ್ಯಾಬರಿ ಮುಡ್ಡುಂಚೊ ಅನ್ಭೋಗ್!
ಅಸಲ್ಯಾ ಮೊಗಾಚ್ಯಾ ಆಟೆವಿಟ್ಯಾಂನಿ ಉಕಡ್ಲಲಿ ಏಕ್ ಕವಿತಾ ಬೋವ್‌ಚ್ ಆಪುರ್ಬಾಯೆನ್ ಹಾಂಗಾಸರ್ ಸಾದರ್ ಜಾಲ್ಯಾ. ಮೊಗಾರ್ ಪಡ್‌ಲ್ಲ್ಯಾಂಚ್ಯಾ ಕಾಳ್ಜಾಂಕ್ ತಿ ಅಂರ್ದುನ್ ಬಸ್ತಲಿ ತೆಂ ಖಂಡಿತ್.
ಆಸ್ಮಾ ಮೂಡಬಿದ್ರಿ ಭರ್ವಶ್ಯಾಚಿ ಕವಯಿತ್ರಿ. ಹ್ಯಾ ಆದೀಂಯ್ ತಿಚಿ ಕವಿತಾ ಆಮಿ ಪರ್ಗಟ್ ಕೆಲ್ಯಾ. ಹ್ಯಾ ವರ್ಸಾ ಚಡಾನ್‌ಚಡ್ ಕವಯಿತ್ರ್ಯೊ ಕವಿತಾ ಕುಳಾರ್ ಸಜಂವ್ಕ್ ಆಯ್ಲ್ಯಾತ್ ತಿ ಗಜಾಲ್ ಖುಶೆಚಿ. ತುಮಿ ಹಾರಿಂನಿ ಯೆಯಾ, ಕುಳಾರ್‍ಚೆಂ ದಾರ್ ತುಮ್ಕಾಂ ಸದಾಂಚ್ ಉಗ್ತೆಂ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಗಾ ಘಡಿ
ತುಜ್ಯಾ ಭಾಂಗ್ರಾಳ್ಯಾ ಸಪ್ಣಾಂಕ್
ಮ್ಹಜೆ ನಿದೆಂತ್ ಖೊವಯ್ತಾಂ
ಮ್ಹಣ್ತಾನಾ........
ಚಾಂದ್ನ್ಯಾ ರಾತಿಕ್ ಖಂಯ್ಸರ್
ಚೊರುನ್ ವೆತಾಯ್?
ತುಜ್ಯಾ ಆಮ್ರುಕ್ಯಾ ಹಾಸ್ಯಾಂಕ್
ಮ್ಹಜ್ಯಾ ವೊಂಟಾಂನಿ ರೊಂಬಯ್ತಾಂ
ಮ್ಹಣ್ತಾನಾ........
ಮಿಲನಾ ಘಡ್ಯೊ ಕಿತ್ಯಾ
ಪಿಸ್ಡುನ್ ಸೊಡ್ತಾಯ್?
ತುಜ್ಯಾ ಅತ್ಮ್ಯಾಚೆ ವೆಂಗೆಕ್
ಮ್ಹಜ್ಯಾ ಶಿರಾಂನಿ ಬಾಂದ್ತಾಂ
ಮ್ಹಣ್ತಾನಾ........
ಮೊಗಾ ಬಾವ್ಳೆ ಅಶೇಯ್
ಕಿತ್ಯಾ ಅಸ್ಕತ್ ಕರ್‍ತಾಯ್?
ಸಪ್ಣಾಂಕ್ ವಜ್ರಾ ವೋಪ್ ದಿತಾನಾ
ಪುನವ್ ಥಿಕ್ ಜಶೆಂ ಸೊಭೊನ್
ಹಾಸ್ಯಾಂಚಿ ಪಾಕ್ಳಿ ಫುಲ್ತಾನಾ
ಮೊಗಾ ವೊಳಿಂತ್ ಮೇಳ್ ಘಡುನ್
ವೆಂಗೆಂತ್ ಸದಾಂ ಉಸ್ವಾಸ್ ಸೊಡ್ತಾಂ
ಥಂಯ್ಸರ್ ಬಾವ್ಳ್ಯಾ ಖೆಳ್ ಚಡೊಂ
ಮೊಗಾ ಘಡಿ ಅಮರ್ ಉರೊಂ
-ಆಸ್ಮಾ, ಮೂಡ್‌ಬಿದ್ರಿ