ಸಂಪಾದಕೀಯ್:
ಥಿರಾರ್ ನಾತ್‌ಲ್ಲಿ ಮತ್ ಆನಿ ಚರಬ್ ಮಾಂಡ್‌ಲ್ಲೆಂ ಕಾಳೀಜ್
ಸಂಸಾರಿ ಸುಖಾ ಮುಕಾರ್ ಸಗ್ಳೆಂ ವೆರ್ಥ್. ಸುಖ್ ಕೊನ್ಶಾಕ್ ಸಾಣ್ಸುನ್ ಕೊಣ್ ತೊ ಮನೀಸ್ ದುಕಾಚ್ಯಾ ಸಾಗೊರಾಂತ್ ಉಡ್ಕ್ಯೊ ಮಾರಿತ್? ಪಿಯೆಂವ್ಕ್ ದಿಲ್ಲೊ ಸುಖಾಚೊ ಸಾಗು ಪಾಟಿಂ ಲೊಟುನ್, ಕೊಣ್ ಮನೀಸ್ ಕೊಡ್ಸಾಣೆಚಿ ಕಾಲ್ಸ್ ಪಿಯೆಂವ್ಕ್ ಫುಡೆಂ ಸರಿತ್? ಆಕ್ರೇಕ್ ಹೆಂ ಪುರಾಯ್ ಕರಿಜೆ ತರೀ ಕಿತ್ಯಾಕ್? ತುಜೊ ಧರ್ಮ್ ಅಶೆಂ ಕಾಂಯ್ ಸಾಂಗ್ತಾ?
ಕ್ರಿಸ್ತಾಂವಾಂಚ್ಯಾ ಧರ್ಮಾಂತ್ 'ಕರೆಜ್ಮ್' ಏಕ್ ಪ್ರಾಚಿತಾಚೊ ಕಾಳ್. ಪ್ರಾಚಿತ್ ಮ್ಹಳ್ಯಾರ್ ಪೊರಾಜಿತ್. ಕೆಲ್ಲ್ಯಾ 'ಕರ್ಮಾಚೊ' ಫಳ್ ಭೊಗ್ಚೊ ಹೊ ಕಾಳ್. ಥಿರಾರ್ ನಾತ್‌ಲ್ಲೆ ಮತಿಕ್ ಲಗಾಮ್ ಅಂರ್ದುಂಚೊ ಕಾಳ್, ಚರ್ಬೆನ್ ಸೊರ್ಕೆಲ್ಲ್ಯಾ ಕಾಳ್ಜಾರ್ ಹುನೊನಿ ಕಾಯ್ಲಾತೊ ದವರ್‍ನ್ ಚರಬ್ ಜಿರಂವ್ಚೊ ಕಾಳ್. ಜೆಜು ಸೊಮ್ಯಾಚಿ ಆವಯ್ ಜಾವ್ನಾಸ್‌ಲ್ಲೆ ಮೆರಿ ಮಾಯೆಚಿ ದೂಕ್ ತರೀ ಚಿಂತುನ್, ಕರೆಜ್ಮಾಚ್ಯಾ ನಾಂವಾರ್ ಕರ್‍ಚೊ ವೇಸ್ ಆನಿ ತರೀ ಕರಿನಾಕಾತ್ ಮ್ಹಣೊನ್ ಹೆ ಕವಿತೆಂತ್ಲೊ ನಾಯಕ್ ಉಲೊ ದಿತಾ.
ಮೆಲ್ವಿನ್ ಪೆರ್ನಾಲ್ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಹೆಂ ಘರ್ ತಾಚೆಂಚ್ ಕರ್‍ನ್ ಘೆಂವ್ಕ್ ತಾಕಾ ಚಡಿತ್ ವೇಳ್ ಲಾಗೊಂಕ್ ನಜೊ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕರೆಜ್ಮ್
ಖುರ್ಸಾ ಮುಳಿಂ ದುಕಿ ಮಾತಾ
ನಿಯಾಳ್ನ್ ಆಧುನಿಕ್ ನಾರಿ ಪಾತ್ಕಾಂ ನ್ಹಾತಾ
ಸೊಡ್ವಣ್ ದೀಂವ್ಕ್ ತೊ ಖುರ್ಸಾರ್ ಮೆಲೊ
ಕಳಿತ್ ಆಸೊನ್‌ಯ್ ತೊಪುನ್‌ಚ್ ಆಸಾಂವ್ ಪಾತ್ಕಾಂಚೊ ಭಾಲೊ
ತೊ ಮ್ಹಣ್ತಾ ಸೊರೊ ಸೊಡ್ತಾಂ
ಹೊ ಮ್ಹಣ್ತಾ ಪೆಲ್ಯಾಕ್ ಬರೆಂ ಕರ್‍ತಾಂ
ಕರೆಜ್ಮಾಂತ್ ಹಾಂಚೆ ಪ್ರಾಚಿತಾಚೆ ನಾಟಕ್
ದಿತಿತ್ ಕಾಂಯ್ ನಿರ್ಗತಿಕಾಂಚ್ಯಾ ಪೊಟಾಕ್?
ಪಾಂಗುರ್‍ತಾತ್ ಕೂಡ್ ದಂಡವ್ಣೆಚೊ ವೇಸ್
ಉಪಾಸ್ ಜಿಂಜ್ವಾರ್ ಆವ್ತಾರಾಂಚೊ ಘೊಸ್
ಸರ್ವಾಂಕ್ ಆಶಾ ಭೊಗುಂಕ್ ಸಂಸಾರಿ ಸುಖ್
ಸೊಸ್ತಿತ್ ಎಕೆ ಘಡ್ಯೆಕ್ ಮರ್ಯೆಚಿ ದೂಕ್?
-ಮೆಲ್ವಿನ್ ಪೆರ್ನಾಲ್