Kavita Kular

ಕಾಣಿ ಮರ್ಣಾಂಚಿ

ಸಂಪಾದಕೀಯ್:

ಜಲ್ಮಾಕ್, ಜಿವಿತಾಕ್ ನಾತಲ್ಲೆಂ ಮೊಲ್ ಮರ್ಣಾಕ್

ಕಾಮೆಲ್ಯಾಂಚ್ಯಾ ಜಿವಿತಾಚಿ ಕಾಣಿ ಹ್ಯೆ ಕವಿತೆಂತ್ ವಿಣ್ಲ್ಯಾ ಗ್ವಾದಲೂಪ್ ಡಾಯಸಾನ್. ಜಲ್ಮ್, ಜಿವಿತ್ ಆನಿ ಮರಣ್ ಮ್ಹಳ್ಳ್ಯಾ ತ್ರಿಕೋನಾ ಭಿತರ್ ಹೆ ಮಜ್ದೂರ್ ಕೆದಳಾ ಜಲ್ಮಲೆ, ಕಶೆ ಜಿಯೆಲೆ ಮ್ಹಳ್ಳೆಂಚ್ ಕೊಣಾಯ್ಕಿ ಕಳಿತ್ ನಾತಲ್ಲ್ಯಾ ವೆಳಾರ್, ತಾಂಚ್ಯೆ ಮರ್ಣಾಚ್ಯೆ ಖಬ್ರೆಕ್ ಜೆಂ ಮೊಲ್ ಮೆಳುನ್ ಆಸಾ ತಾಚೆರ್ ಪ್ರಶ್ನ್ ಉಟಯ್ಲಾ ಕವಯಿತ್ರಿನ್. ತಶೆಂ ಸವಾಲ್ ಉಟೊವ್ನ್ ತಾಂಚ್ಯಾ ಜಿವಿತಾಚ್ಯಾ ಸಂಕಷ್ಟಾಂಚೆರ್ ನದರ್ ಭೊಂವ್ಡಾಂವ್ಕ್ ಆಮ್ಕಾಂ ಉಲೊ ದಿಲಾ.

ಮನ್ಶಾಜಿವಾ ಮೊಲಾಂಕ್ ಉಕ್ಲುನ್ ಧರ‍್ಚಿ ಕವಿತಾ ಹಿ. ಆಯ್ಚ್ಯಾ ಕಾಳಾಚ್ಯಾ ಘಡಿತಾಂಚೆರ್ ಆರ್ಸೊ ಧರಲ್ಲಿ ಕವಿತಾ ಹಿ. ದೆಕುನ್ ಹ್ಯೆ ಕವಿತೆಚೊ ಪ್ರಭಾವ್ ತುಮ್ಚೆರ್ ಖಿಣಾನ್ ಜಾತಲೊ ಮ್ಹಳ್ಳ್ಯಾಕ್ ನವಲ್ ನಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:


ಕಾಣಿ ಮರ್ಣಾಂಚಿ

ಪಂದ್ರಾ ಮಜ್ದೂರ್ ಮೆಲೆ!
ದುರ್ದೈವಿ ಖಬರ್ ಆಯ್ಕಲಿ
ಪುಣ್ ವಾಯ್ಟ್ ದಿಸ್ಲೆಂ ನಾ
ಕಿತ್ಯಾಕ್ ಜಾಣಾಂ?
ತೆ ಮೆಲೆ ಮ್ಹಣ್ಪಾಕ್
ಆಮ್ಕಾಂ ಅಧಿಕಾರ್ ನಾ
ಆರೆ! ತೆ ಮೆಲೆ ಮ್ಹಣ್ಪಾಕ್
ತಾಂಚ್ಯಾ ಜಿತೆಪಣಾಚೊ ಪುರಾವೊ
ಆಸಾ ತುಮ್ಚೆ ಕಡೆನ್?
ತಾಂಣಿ ಕೆಲೆ ರಸ್ತೆ
ತಾಂಣಿ ಬಾಂದ್ಲ್ಯೊ ಇಮಾರತಿ
ರಗ್ತಾಚೆಂ ಉದಕ್ ಕರುನ್
ರಾತಿಚೆ ದೀಸ್ ತಶೆಂಚ್
ದಿಸಾಚ್ಯೊ ಕೆಲ್ಯೊ ರಾತಿ
ಆಸಾ ಹಾಚಿ ನೋಂದ್
ಕಶ್ಟಾಂಚೆಂ ಪೀಕ್ ಲುಂವುಂಕ್
ದಿಲ್ಯಾ ತುಮಿ ತಾಂಕಾಂ ಸಂದ್
ಖಂಯ್ಚ್ಯಾ ತರಿ ಫಾತ್ರಾಚೆರ್
ಆಸಾ ವ್ಹಯ್ ತಾಂಚೆಂ ನಾಂವ್
ತಾಂಚೆಂ ಘರ್ ಖಂಯ್ಚೆಂ
ಖಂಯ್ಚೊ ತಾಂಚೊ ಗಾಂವ್?
ತುಮ್ಚೆ ಖಾತೀರ್ ಸದಾಂಚ್
ಥಾರ‍್ಲೆ ತೆ ಘಾಟಿ
ತಾಂಣಿ ಬಾಂದಿಲ್ಲ್ಯಾ ಬಂಗ್ಲ್ಯಾಂಚೆರ್
ತುಮ್ಚ್ಯಾ ನಾಂವಾಂಚಿ ಪಾಟಿ
ಕೆನ್ನಾ ತರಿ ಒಣವ್ ಘಾಲುನ್
ಅಣ್ಭವ್ಲಿ ತಾಂಚಿ ಜೀಣ್?
ಆತಾಂ ಕಿತ್ಯಾಕ್ ಸಗ್ಳೊ
ತಾಂಚ್ಯಾ ಮರ್ಣಾಂಚೊ ಶಿಣ್
ಹೆಂ ಪಳಯಾತ್, ತೆ ಮರುಂಕ್ ನಾಂತ್
ಕಾರಣ್ ತೆ ಜಿತೆಚ್ ನಾಸ್ಲೆ
ತುಮ್ಕಾ ಸಾವ್ ಸಾಬೀತ್ ಕರುಂಕ್
ಖಂಯ್ ತರಿ ಹಿಶೊಬ್ ಚುಕ್ಲೊ
ಆತಾಂ ತುಮ್ಕಾಂ ರಾನ್ ಮೊಕ್ಳೆಂ
ಪೈಶಾಂನಿ ಜೊಖುಂಕ್ ತಾಂಚೆಂ ಮರಣ್
ಪುಣ್ ಸಾಂಬಾಳುನ್...
ತಾಂಚ್ಯೆ ಜಿಣ್ಯೆಕ್ ಮೊಲ್ ನಾಸ್ಲೆಂ
ಮರ್ಣಾಂಕ್ ಮಾತ್ರ್ ಕೆದೊ ಪ್ರೆಸ್
ಖರೆಂಚ್, ಮಹಾನ್ ಮ್ಹಜೊ ದೇಸ್

-ಗ್ವಾದಲೂಪ್ ಡಾಯಸ್

ಪಾಟಿ=ನಾಂವಾಚೆಂ ಫಳೆಂ ವಾ ಬೋರ್ಡ್.
ಒಣವ್=ಪಾಟ್ ಬಾಗ್ವೊನ್ ರಾಂವ್ಚೆಂ.
ಸಾವ್=ಸಭ್ಯ್ (ಸಾವ್xಚೋರ್).
ಪ್ರೆಸ್=ಪ್ರೈಸ್ ವಾ ಮೋಲ್ ವಾ ದರ್.
ರಾನ್ ಮೊಕ್ಳೆಂ=ಜಾಯ್ ತಶೆಂ ಕರ‍್ಚೆಂ ಸ್ವಾತಂತ್ರ್ಯ್

संपादकीय:

जल्माक, जिविताक नातल्लें मोल मर्णाक.

कामेल्यांच्या जिविताची काणी ह्ये कवितेंत विणल्या ग्वादलूप डायसान. जल्म, जिवीत आनी मरण म्हळ्ळ्या त्रिकोना भितर हे मजदूर केदळा जल्मले, कशे जियेले म्हळ्ळेंच कोणायकी कळीत नातल्ल्या वेळार, तांच्ये मर्णाच्ये खबरेक जें मोल मेळून आसा ताचेर प्रश्न उटयला कवयित्रीन. तशें सवाल उटोवन तांच्या जिविताच्या संकष्टांचेर नदर भोंवडावंक आमकां उलो दिला.

मनशाजिवा मोलांक उकलून धर‍्ची कविता ही. आयच्या काळाच्या घडितांचेर हारसो धरल्ली कविता ही. देकून ह्ये कवितेचो प्रभाव तुमचेर खिणान जातलो म्हळ्ळ्याक नवल ना.

-मेल्विन रोड्रीगस

कविता:

काणी मरणांची

पंदरा मजदूर मेले!
दुर्दैवी खबर आयकली
पूण वायट दिसलें ना
कित्याक जाणां?
ते मेले म्हणपाक
आमकां अधिकार ना
आरे! ते मेले म्हणपाक
तांच्या जितेपणाचो पुरावो
आसा तुमचे कडेन?
ताणीं केले रस्ते
ताणीं बांदल्यो इमारती
रगताचें उदक करून
रातीचे दीस तशेंच
दिसाच्यो केल्यो राती
आसा हाची नोंद
कश्टांचें पीक लुंवूंक
दिल्या तुमी तांकां संद
खंयच्या तरी फातराचेर
आसा व्हय तांचें नांव
तांचें घर खंयचें
खंयचो तांचो गांव?
तुमचे खातीर सदांच
थारले ते घाटी
ताणीं बांदिल्ल्या बंगल्यांचेर
तुमच्या नांवांची पाटी
केन्ना तरी ओणव घालून
अणभवल्ली तांची जीण?
आतां कित्याक सगळो
तांच्या मरणांचो शीण
हें पळयात, ते मरूंक नांत
कारण ते जितेच नासले
तुमका साव साबीत करूंक
खंय तरी हिशोब चुकलो
आतां तुमकां रान मोकळें
पैशानीं जोखूंक तांचें मरण
पूण सांभाळून...
तांचे जिणेंक मोल नासलें
मरणांक मात केदो प्रेस
खरेंच, महान म्हजो देस

- ग्वादलूप डायस



Title : ಕಾಣಿ ಮರ್ಣಾಂಚಿ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.


 A  B  C  D  E  F  G  H  I  J  K  L  M
 
 N  O  P  Q  R  S  T  U  V  W  X  Y  Z