ಸಂಪಾದಕೀಯ್:
ಗಾಂವ್ಚೆ ಮಾತ್ಯೆಂತ್ ಆಮ್ಚ್ಯಾ ಪುರ್ವಜಾಂಚಿಂ ಪಾವ್ಲಾಂ ಲೊಳ್ಳ್ಯಾಂತ್
ಹಿ ಮಾತಿ ಕೊಣಾಚಿ? ಹ್ಯೆ ಮಾತ್ಯೆಂತ್ ಆಮ್ಚ್ಯಾ ಕೊಣ್ ಪುರ್ವಜಾಂಚಿಂ ಪಾವ್ಲಾಂ ಲೊಳ್ಳ್ಯಾಂತ್? ಆಮ್ಕಾಂ ಆಮ್ಚ್ಯಾ ಆಜ್ಯಾ-ಆಜಿಯಾಂಕ್, ಪಣ್ಜ್ಯಾ-ಪಣ್ಜೆಂಕ್ ಪಳೊಂವ್ಚೆಂ ಭಾಗ್ ಮೆಳುಂಕ್ ನಾ ಜಾವ್ಯೆತ್. ಪುಣ್ ಕೊಣಾಕ್ ತಾಂಚಿ ಯಾದ್ ಧೊಸ್ತಾ, ತಾಂಕಾಂ ತಸಲ್ಯಾ ಮನ್ಶಾಂಚ್ಯಾ ಪಾವ್ಲಾಂಚೊ ಪರ್ಮಳ್ ಗಾಂವ್ಚೆ ಮಾತ್ಯೆಂತ್ ಜರೂರ್ ಮೆಳ್ತಾ.
ಹಿಂ ಭುರ್ಗಿಂ ಆಮೇರಿಕೆಥಾವ್ನ್ ಆಯ್ಲ್ಯಾರ್ ಕಿತೆಂ ಜಾಲೆಂ? ತಾಂಚಿಂ ಪಾಳಾಂ-ಮುಳಾಂ ಹ್ಯೆಚ್ ಧರ್ತೆಚಿಂ. ಹ್ಯಾಚ್ ಗಾಂವ್ಚೆ ಮಾತ್ಯೆಚೊ ವಾಸ್ ತಾಂಕಾಂ ಸಮಾಧಾನಾಚಿ ನ್ಹೀದ್ ಹಾಡಯ್ತಾ.
ರಾಜಯ್ ಪವಾರಾನ್ ಸುಡಾಳ್ ಸಾಂಗನಾಸ್ತಾಂ ಸುಂದರ್ ಕವಿತಾ ದಿಲ್ಯಾ. ಚಿಂತಲ್ಯಾಕ್ ಜಾಯ್ಪುರ್ತೊ ಗ್ರಾಸ್ ಹ್ಯೆ ಕವಿತೆಂತ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗಾಂವ್ಚಿ ಮಾತಿ
ತೊ ಆಪ್ಲ್ಯಾ ಭುರ್ಗ್ಯಾಂಕ್ ಘೆವ್ನ್
ಆಮೆರಿಕೆಚ್ಯಾನ್ ಪಯ್ಲೆಚ್ ಫಾವ್ಟ್
ಆಪ್ಲ್ಯಾ ಗಾಂವಾಂತ್ ಆಯ್ಲೊ
ತಿಂ ಪಯ್ಲೆಚ್ ಫಾವ್ಟ್
ಗಾಂವ್ ಪಳಯ್ತಾಲಿಂ
... ರಂಗೀತ್ ಶಬ್ದುಲಿಂ, ಮಾತ್ಯೆಚ್ಯೊ ಚುಲಿ
...ಖಳ್ಖಳ್ಪಿ ವ್ಹಾಳ್, ಜಳ್ವಾಚೊ ದಾಳ್
ತಾರ್ವಾಂ ಆನಿ ಗೊರ್ವಾಂ
ಕುಕ್ಡಾಂ ಆನಿ ಬೊಕ್ಡಾಂ
ಶೆತಾಂ ಆನಿ ಜೊತಾಂ
...ಅಚ್ಕೀತ್ ಆವಯ್ ಬಾಪಾಯ್ಚಿ
ನದರ್ ಚುಕೊವ್ನ್ ತಿಂ
ನಾಂಗ್ರಿಲ್ಲ್ಯಾ ಶೆತಾಂತ್ ದೆಂವ್ಲಿಂ...
ಮೋವ್ ಮೋವ್ ಮಾತ್ಯೆಂತ್
ನಾಚ್ಲಿಂ ಖೆಳ್ಳಿಂ....
ಚಿಕಣ್ ಚಿಕಣ್ ಮಾತಿ
ಪಾಂಯಾಂಕ್ ಚಿಕಟಲ್ಲಿ ಪಳೊವ್ನ್
ಬಾಪುಯ್ ಆಡ್ಡಲೊ...
ಭಾಯ್ರೂಚ್ ಪಾಂಯ್ ಧುವ್ಪಾಕ್ ಲಾಯ್ಲೆ...
... ಪುಣ್ ಗಾಂವ್ಚಿ ಮಾತಿ ತಿ!
ಎಕ್ದಾಂ ಪಾಂಯಾಂಕ್ ಲಾಗ್ತಕೀಚ್
ಬೆಗೀನ್ ಸುಟನಾ...
ತರೀಯ್ ಬಾಪಾಯ್ನ್ ಘಾಂಸುನ್ ಘಾಂಸುನ್
ಪಾಂಯ್ ನಿತಳ್ ಕೆಲೆಚ್...
ಭುರ್ಗ್ಯಾಂಕ್ ನ್ಹೀದ್ ಪಡನಾ ಜಾಲಿ
ರಾತಿಂ ನ್ಹಿದಿಲ್ಲೆ ಕಡೆನ್
ಭುರ್ಗ್ಯಾಂನಿ ಲ್ಹವೂಚ್
ಪಾಂಯ್ ನಾಕಾ ಕಡೆನ್ ವ್ಹರೂನ್
ವಾಸ್ ಘೆತ್ಲೊ.. ಗಾಂವ್ಚೆ ಮಾತ್ಯೆಚೊ
ಆನಿ ತೃಪ್ತ್ ಜಾವ್ನ್ ನ್ಹಿದ್ಲಿಂ...
-ರಾಜಯ್ ಪವಾರ್
संपादकीय:
गांवचे मातयेंत आमच्या पुरवजांचीं पावलां लोळ्ळ्यांत
ही माती कोणाची? ह्ये मातयेंत आमच्या कोण पुरवजांचीं पावलां लोळ्ळ्यांत? आमकां आमच्या आज्या-आजयांक, पणज्या-पणजेंक पळोंवचें भाग मेळुंक ना जाव्येत. पूण कोणाक तांची याद धोसता, तांकां तसल्या मनशांच्या पावलांचो पर्मळ गांवचे मातयेंत जरूर मेळता.
हीं भुरगीं आमेरिकेथावन आयल्यार कितें जालें? तांचीं पाळां-मुळां ह्येच धरतेचीं. ह्याच गांवचे मातयेचो वास तांकां समाधानाची न्हीद हाडयता.
राजय पवारान सुडाळ सांगनासतां सुंदर कविता दिल्या. चिंतल्याक जायपुरतो ग्रास ह्ये कवितेंत आसा.
-मेल्विन रोड्रीगस
कविता:
गांवची माती
तो आपल्या भुरग्यांक घेवन
आमेरिकेच्यान पयलेच फावट
आपल्या गांवांत आयलो
तीं पयलेच फावट
गांव पळयतालीं
... रंगीत शब्दुलीं, मातयेच्यो चुली
...खळखळपी व्हाळ, जळवाचो दाळ
तारवां आनी गोरवां
कुकडां आनी बोकडां
शेतां आनी जोतां
...अचकीत आवय बापायची
नदर चुकोवन तीं
नांग्रिल्ल्या शेतांत देंवलीं...
मोव मोव मातयेंत
नाचलीं खेळ्ळीं....
चिकण चिकण माती
पांयांक चिकटल्ली पळोवन
बापूय आड्डलो...
भायरूच पांय धुवपाक लायले...
... पूण गांवची माती ती!
एकदां पांयांक लागतकीच
बेगीन सुटना...
तरीय बापायन घांसून घांसून
पांय नितळ केलेच...
भुरग्यांक न्हीद पडना जाली
रातीं न्हिदिल्ले कडेन
भुरग्यांनी ल्हवूच
पांय नाका कडेन व्हरून
वास घेतलो.. गांवचे मातयेचो
आनी तृप्त जावन न्हिदलीं...
-राजय पवार