ಸಂಪಾದಕೀಯ್:
ಶಿಯಾಳಾಚ್ಯಾ ಉದ್ಕಾಚೊ ಜಾದೂ
ಆಂಗ್ಣಾಂತ್ ಪಾಯ್ ನಿಸ್ರೊನ್ ಉಸ್ಳಾಲ್ಲೊ ಮನೀಸ್ ಶೀದಾ ವಚೊನ್ ಜೋಯ್ಸಾಚ್ಯಾ ಕಾಳ್ಜಾ ಕೊಬ್ಲ್ಯಾಕ್ ಶಿರ್ಕಜಾಯ್ ಕಾಂಯ್? ಹೊ ಖಂಯ್ಚ್ಯಾ ಶಿಯಾಳಾಚ್ಯಾ ಉದ್ಕಾಚೊ ಜಾದು? ಗಾಂವ್ಚ್ಯಾ ಬೊಂಡ್ಯಾಂನಿ ಹಿಂ ಕಸಲಿಂ ಆಜ್ಯಾಪಾಚಿಂ ಉದ್ಕಾಂ ದಿಪ್ಕಲ್ಯಾಂತ್? ಪಾಟ್ಲಾವ್ ಕರ್‍ನ್ ಗೆಲ್ಲೊ ಮನೀಸ್ ಪಾಟಿಂ ಯೇನಾಸ್ತಾಂ ಜೋಯ್ಸಾಚ್ಯಾ ಕಾಳ್ಜಾಲ್ಹಾರಾಂಕ್ ಕಸೊ ಸಾಂಪ್ಡಾಲೊ? ಮೊಗಾಚೊ ಹೊ ಕಸಲೊ ಏಕ್ ಚಮತ್ಕಾರ್!
ಓಸ್ಟಿನ್ ಪ್ರಭುಚಿ ಕವಿತಾ ಮ್ಹಳ್ಯಾರ್ ಶಿಯಾಳಾಚ್ಯಾ ಉದ್ಕಾಬರಿ. ತಾನ್ ಭಾಗಯ್ತಾ! ಶಿಯಾಳಾಂತ್ಲಿಂ ಉದ್ಕಾಂ ತಾಳ್ಯಾಂತ್ ದೆಂವ್‌ಲ್ಲ್ಯಾಬರಿ, ತಾಚೆ ಕವಿತೆಂತ್ಲಿಂ ಉತ್ರಾಂ ಸರಾಗ್ ವ್ಹಾಳ್ತಾತ್. ಪಂಚ್ವೀಸ್ ವರ್ಸಾಂ ಆದ್ಲ್ಯಾ ಮೊಗಾಳ್ ಘಡಿತಾಚಿ ಕಾಣಿ, ಸಲೀಸಾಯೆನ್, ಸಂಪ್ಯಾ ಉತ್ರಾಂನಿ ತಾಣೆ ವಿಣ್ಲ್ಯಾ. 'ಕಾಣಿಯೆ-ಕವಿತೆ'ಚೆಂ ರೂಪ್ ಹೆಂ. ಕವಿತೆಚ್ಯಾ ಹ್ಯಾ ರುಪಾಚೊ ಒಸ್ಟಿನಾನ್‌ಚ್ ಕೊಂಕಣಿಂತ್ ಚಡಿತ್ ಪ್ರಯೋಗ್ ಕೆಲ್ಲೊ ಝಳ್ಕತಾ.
ಮಾಗೀರ್ ಎಕೆಕ್ಲ್ಯಾ ಕವಿಂನಿ ಕವಿತೆಚ್ಯಾ ಎಕೆಕಾ ರುಪಾಂನಿ ತಾಂಚಿ ಶ್ಯಾಥಿ ದಾಕಯ್ಲಿ ತರ್ ಕೊಂಕಣಿ ಕವಿತೆಚ್ಯಾ ರಾವ್ಳೆರಾಚಿ ಸೊಭಾಯ್ ದೊಡ್ತಿ ಜಾತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೆಂ ಜೋಯ್ಸ್
ತಾಂಬ್ಡೆಂ ತಾಂಬ್ಡೆಂ ಆಂಗ್ಲೆಂ ಘಾಲುನ್ ಥಕಾ ಥಕಾ ಚಲ್ತಾಯ್ಗೊ
ಪಾಟ್ಲ್ಯಾನ್ ತುಜ್ಯಾ ಚಲ್ತಾಸ್ತಾನಾ ತುಂ ಬಾವ್ಲೆಪರಿಂ ದಿಸ್ತಾಯ್ಗೊ
ಹಾಲ್ಚೆ ತುಜೆ ತೆ ಕುಲೆ ಪಳೆವ್ನ್ ಉಡೊನ್ ಪಡ್ಲಾಂ ಹಾಂವ್
ತೆ ಮಾಸಾ ಮುದೆ ಪಳೆವ್ನ್ ಬಾಯೆ ಪಿಸೊಚ್ ಜಾಲಾಂ ಹಾಂವ್!
ರಾವ್ಗೊ ಬಾಯೆ ಚಿಕ್ಕೆ ವ್ಹಳೂ ಚಲೊಂಕ್ ತುಕಾ ಜಾಲಾಂ ಕಿತೆಂ
ತುಕಾ ವೆಂಗೊಂಕ್ ಕಾಳೀಜ್ ಮ್ಹಜೆಂ ಕೆನ್ನಾಂ ಥಾವ್ನ್ ರಾವ್ಲಾಂ ರಿತೆಂ
ತಾಂಬ್ಡೆ ತುಜೆ ಪೊಲೆ ಚಿಂತುನ್ ಮೊಗಾರ್ ಪಡ್ಲಾಂ ಹಾಂವ್
ಭಿಂರ್ಡಾಂ ಸಾರ್ಕೊ ರಂಗ್ ಪಳೆವ್ನ್ ಪಿಸೊಚ್ ಜಾಲಾಂ ಹಾಂವ್!
ಸದಾಂನೀತ್ ರಸ್ತ್ಯಾರ್ ತುಂ ಚಲೊನ್ ವೆಚೆಂ ಪಳೆವ್ನ್ ರಾವ್ತಾಂ
ದಿಸಾಕ್ ತುಜೊ ನಿಯಾಳ್ ಕರುನ್ ಸಪ್ಣಾಂತ್ ತುಕಾ ವೆಂಗೊನ್ ಧರ್‍ತಾಂ
ನಾಂವ್ ತುಜೆಂ ಜೋಯ್ಸ್ ಮ್ಹಣೊನ್ ಜಾಣಾಂ ಜಾಲಾಂ ಹಾಂವ್
ಮುಖಾಮುಖಿಂ ಉಲಂವ್ಚೆ ಘಡ್ಯೆಕ್ ರಾಕೊನ್ ರಾವ್ಲಾಂ ಹಾಂವ್
ತುಂ ಥಕಾ ಥಕಾ ಚಲ್ತಾಸ್ತಾನಾ ತಿ ಪಾಂತಿ ಸುಂಯ್ ಸುಂಯ್ ಹಾಲ್ತಾ ಪಳೆ
ತೆ ಪಾಂತಿಯೆ ಮಧೆಂ ಬಾಂದ್ಲ್ಯಾಯ್ ತುಂವೆಂ ಉರುಟ್ ದೋನ್ ತಾಂಬ್ಡೆ ಗುಳೆ
ಕೇಸ್ ತುಜೆ ಪಳೆವ್ನ್ ಸಗ್ಳೊಚ್ ಪಿಸೊಚ್ ಜಾಲಾಂ ಹಾಂವ್
ತ್ಯಾ ಕೆಸಾಂ ಮಧೆಂ ಬೊಟಾಂ ಚರಂವ್ಕ್ ರಾಕೊನ್ ರಾವ್ಲಾಂ ಹಾಂವ್!
ಪಾಂತಿ ತುಜಿ ಸೊಡವ್ನ್ ಹಾಂವ್ ತೋಂಡ್ ಮ್ಹಜೆಂ ಪುಸ್ತಲೊಂ
ಸಗ್ಳ್ಯಾ ಕೆಸಾಂಕ್ ತೇಲ್ ಮಾಖುನ್ ಶೆಂಡೊ ತುಕಾ ಬಾಂದ್ತಲೊಂ
ತುಕಾ ಮ್ಹಜ್ಯಾ ಹಾತಿಂ ಘೆವುಂಕ್ ರಾಕೊನ್ ರಾವ್ಲಾಂ ಹಾಂವ್
ಮುಖಾಮುಖಿಂ ಭೆಟ್ ಕರುಂಕ್ ತಯಾರ್ ಆಸಾಂ ಹಾಂವ್
ಚಲ್ತಾಂ ಚಲ್ತಾಂ ದೆವಾನ್‌ಚ್ ರಸ್ತ್ಯಾ ದಿವೊ ತಾಂಬ್ಡೊ ಕೆಲೊ
ಆಮ್ಕಾಂ ಎಕಾಮೆಕಾಕ್ ಮೆಳೊಂಕ್ ಉಗ್ತೊ ಏಕ್ ಆವ್ಕಾಸ್ ದಿಲೊ
ಗುಲೊಬಾಸಾರ್ಕೆ ವೋಂಟ್ ತುಜೆ ಪಳೆಂವ್ಕ್ ಆಸಾಂ ಹಾಂವ್
ಚುಂಬನ್ ದಿವುನ್ ಪೊಟ್ಲುನ್ ಧರುನ್ ಮ್ಹಜೆಂಚ್ ಕರ್‍ತಾಂ ಹಾಂವ್
ಧವೆ ಕುಡಿಕ್ ತಾಂಬ್ಡೆಂ ಆಂಗ್ಲೆಂ ಭಾರಿಚ್ ತುಕಾ ಸೊಭ್ತಾಗೊ
ಚಂದ್ರಾ ಭೊಂವಾರಿಂ ಸುರ್ಯಾ ಕಿರ್ಣಾಂ ಪ್ರಕಾಶ್ ಕಶೆಂ ದಿಸ್ತಾಯ್ಗೊ
ಭಾರಿಚ್ ಲಾಗಿಂ ಪಾವ್ಲಾಂ ತುಜೊ ಪರ್ಮಳ್ ಹುಂಗ್ತಾಂ ಹಾಂವ್
ಭುರ್ಗ್ಯಾಪರಿಂ ಉಸ್ಕ್ಯಾರ್ ಬಸವ್ನ್ ಕಾಣಿ ಸಾಂಗ್ತಾಂ ಹಾಂವ್
ಮೊಳ್ಬಾವಯ್ಲೆಂ ನೆಕೆತ್ರ್ ಹಾಂವ್ ವೆಂಗೊನ್ ತುಕಾ ಧರ್‍ತಲೊಂ
ಉಲಯ್ತಲ್ಯಾಂಕ್ ಭಿಂರ್ಡಿ ಸೊಲಾಂ ಖಾವವ್ನ್ ಆಂಬೊಟ್ ಕರ್‍ತಲೊಂ
ವ್ಹಕಲ್ ಮ್ಹಜಿ ಕರುಂಕ್ ತುಕಾ ರಾಕೊನ್ ರಾವ್ಲಾಂ ಹಾಂವ್
ಸಾಂಗ್‌ಗೊ ಬಾಯೆ ಕೊಣ್‌ಗೊ ತೊ ಮುಕ್ಲೊ ಮ್ಹಜೊ ಮಾಂವ್
ಭಾಂಗರಾಚಿ ವಜ್ರಾ ಮುದಿ ಬೊಟಾಂತ್ ತುಜ್ಯಾ ಲಕಯ್ತಾಂ
ಲಗ್ನಾ ಉಪ್ರಾಂತ್ ಹನಿಮುನಾಕ್ ಆಮೇರಿಕಾ ಸಗ್ಳೆಂ ದಾಕಯ್ತಾಂ
ಘರಾ ಪಾವ್ತಚ್ ಆಮ್ಚ್ಯಾ ಘರ್ಚಿ ರಾಣಿ ಕರ್‍ತಾಂ ಹಾಂವ್
ಲಾಸ್ ವೇಗಸ್, ಡಿಸ್ನಿ ವರ್‍ಲ್ಡ್ ಆಪವ್ನ್ ವ್ಹರ್‍ತಾಂ ಹಾಂವ್
ಖಟ್ಲ್ಯಾರ್ ಆಮ್ಚ್ಯಾ ರಾಣ್ಯೆ-ಪಾಟ್ ಹಾಂವ್ ತುಕಾ ಸೊಭಯ್ತಾಂ
ಸಗ್ಳ್ಯಾ ಆಂಗಾರ್ ಉಮೆ ದಿವುನ್ ಚೊಕ್ಲೆಟ್ ತುಕಾ ಖಾವಯ್ತಾಂ
ಇತ್ಲೆ ದೀಸ್ ಚಿಂತುನ್ ತುಕಾ ಸೊಸುನ್ ರಾವ್ಲಾಂ ಹಾಂವ್
ವೇಳ್ ವಿಭಾಡ್ ನಾಸ್ತಾಂ ತುಜೊ ಹಾತ್ ಧರ್‍ತಾಂ ಹಾಂವ್
ಚೆಡುಂ ಜಾಂವ್, ಚೆಡೊ ಜಾಂವ್ ಜೊಯ್ಸ್‌ಲಿನ್ ತಾಕಾ ಆಪವ್ಯಾಂ
ಘಟ್‌ಮೂಟ್ ಕರುಂಕ್ ಸದಾಂ ತಾಕಾ ತೆಲಾತುಪಾನ್ ನ್ಹಾಣವ್ಯಾಂ
ತುಜೆಚ್ ಸಂಗಿಂ ಆಪುರ್ಬಾಯೆಚೆಂ ಕುಟಮ್ ಬಾಂದ್ತಾಂ ಹಾಂವ್
ಧನ್ಯಾ ದೆವಾಕ್ ಅರ್ಗಾಂ ದಿವುನ್ ರುಂಬಾ ನಾಚ್ತಾಂ ಹಾಂವ್
ಇತ್ಲೆ ಸಭಾರ್ ದೀಸ್ ಜಾಲೆ ಮುಖಮಳ್ ತುಜೆಂ ಪಳೆಂವ್ಕ್ ನಾ
ದಿಷ್ಟಿಕ್ ದೀಷ್ಟ್ ದೀವ್ನ್ ಯೆದೊಳ್ ತುಜೆಲಾಗಿಂ ಉಲಂವ್ಕ್ ನಾ
ಸಂದರ್ಭ್ ಆತಾಂ ಮೆಳ್ಳೊ ಮ್ಹಾಕಾ ಸೊಡ್ಚೊನಾ ಭಿಲ್ಕುಲ್ ಹಾಂವ್
ಖಬರ್ ಆಮ್ಚ್ಯಾ ಮೊಗಾಚಿ ಆತಾಂ ಗಾಜೊಂ ಗಾಂವಾನ್ ಗಾಂವ್
ಇತ್ಲ್ಯಾರ್ ತಾಕಾ ದೆಖ್ಲೆಂ ಹಾಂವೆಂ ಮ್ಹಜ್ಯಾ ಜಿವ್ಯಾ ದೊಳ್ಯಾಂನಿ
ಪಳೆವ್ನ್ ಸಗ್ಳೊಚ್ ಶೆರ್ಮೆವ್ನ್ ಗೆಲೊಂ ಸ್ತಬ್ದ್ ಜಾಲೊಂ ಮನಿಂ
ಪಾಟ್ಲ್ಯಾನ್ ಇತ್ಲೆಂ ಸೊಭಿತ್ ದಿಸ್ಲೆಂ ಪಿಸೊಚ್ ಜಾಲೊಂ ಹಾಂವ್
ಮುಖಮಳ್ ತೆಂ ಪಳೆವ್ನ್ ತಾಚೆಂ ಚಿಂತ್ಲೆಂ ಸೊಡ್ಯಾಂ ಹೊ ಗಾಂವ್
ಹಾಯ್ ಜೋಯ್ಸ್ ಕಶೆಂ ಆಸಾಯ್? ಕೊಂಕ್ಣೆಂತ್ ಹಾಂವ್ ಉಲಯ್ಲೊಂ
ಕುಡಿಭಿತರ್ ಸಂಪೂರ್ಣ್ ಶೆರ್ಮೆವ್ನ್ ಥಂಡ್ ಜಾವ್ನ್ ಘಾಮೆಲೊಂ
ಭಾಯ್ಲೊ ಶೃಂಗಾರ್ ಜಾಯ್‌ಗಿ ಮ್ಹಾಕಾ ಚಿಂತುಂಕ್ ಪಡ್ಲೊಂ ಹಾಂವ್
ವ್ಹಳು ವ್ಹಳು ಉತ್ರಾಂ ವ್ಹಾಳವ್ನ್ ಉಲವ್ನ್ ರಾವ್ಲೊಂ ಹಾಂವ್
ಹಾಯ್ ಮ್ಹಣೊನ್ ಲಜ್ಲೆಂ ಜೋಯ್ಸ್ ಲಜ್ಯೆ ಕಾಂಟಿಯೆ ಪಾನಾಪರಿಂ
ರಸ್ತ್ಯಾ ದಿವೊ ಪಾಚ್ವೊ ಜಾತಚ್ ತೆಂ ಚಲೊಂಕ್ ಲಾಗ್ಲೆಂ ಸರಾಸರಿ
ಪಾಟ್ಲ್ಯಾನ್ ತಾಚ್ಯಾ ಚ್ಯಾರ್ ನಂಬರ್ ಬಸ್ಸಾರ್ ಚಡ್ಲೊಂ ಹಾಂವ್
ಅರ್ಧ್ಯಾ ಘಂಟ್ಯಾನ್ ಕುಲ್ಶೇಕರ್ ಭರಾನ್ ಪಾವ್ಲೊಂ ಹಾಂವ್
ಥಕಾ ಥಕಾ ಚಲೊನ್ ಜೋಯ್ಸ್ ಬಾವ್ಡೆಂ ಆತಾಂ ಧಾಂವೊಂಕ್ ಲಾಗ್ಲೆಂ
ಇಗರ್ಜೆ ಹಿತ್ಲಾಂತ್ ಮಧೆಂ ರಿಗೊನ್ ಗುಡೊ ದೆಂವೊನ್ ಘರಾ ಪಾವ್ಲೆಂ
ಪಾಟ್ಲ್ಯಾನ್ ವಚೊನ್ ಹಾಂವ್‌ಯ್ ತಾಚ್ಯಾ ಘರಾ ಪಾವ್ಲೊಂ ಹಾಂವ್
ಆವಯ್ಕ್ ದೆಖ್ತಚ್ ಹಾತ್ ಜೊಡುನ್ ಉಬೊ ರಾವ್ಲೊಂ ಹಾಂವ್
'ಅರೆ, ಹೊ ಕೋಣ್ - ದೆವಾಚೆಂ ಬೆಸಾಂವ್' ಮ್ಹಣೊನ್ ಮಾಂಯ್ ಹಾಸ್ತಾಲಿ
'ಬಸ್-ರೆ ಪುತಾ, ಕಿತೆಂ ಜಾಯ್ ತುಕಾ?' ಮ್ಹಣೊನ್ ತಿ ಮ್ಹಣಯೆರ್ ಬಸ್ತಾಲಿ
ಜೋಯ್ಸಾಚ್ಯಾ ಹಾಂವ್ ಮೊಗಾರ್ ಪಡ್ಲಾಂ ಸಾಂಗೊಂಗಿ ಆತಾಂ ಹಾಂವ್?
ಚಿಂತುಂಕ್ ಹೆಂ ಸರ್ವ್ ಸಕನಾಸ್ತಾಂ ಮೊನೊಂಚ್ ಜಾಲೊಂ ಹಾಂವ್
ಬಾಬಾನ್ ಹಾಡ್ಲಲೆಂ ಬೊಂಡ್ಯಾ ಉದಕ್ ವ್ಹಳು ಪಿಯೆವ್ನ್ ರಾವ್ತಾನಾ
ಕಾಳೀಜ್ ಮ್ಹಜೆಂ ಗುಡು-ಗುಡು ಆವಾಜ್ ಕರುಣ್ ಧಾಂವ್ತಾನಾ
ಲಜ್-ಮರ್ಯಾದ್ ಸರ್ವ್ ಸಾಂಡುನ್ ಜಾಗೊ ಜಾಲೊಂ ಹಾಂವ್
ಜೋಯ್ಸಾಚ್ಯಾ ಹಾಂವ್ ಮೊಗಾರ್ ಪಡ್ಲಾಂ ಸಾಂಗೊಂಕ್ ಲಾಗ್ಲೊಂ ಹಾಂವ್
ಉಪ್ರಾಂತ್ ಕಿತೆಂ ಜಾಲೆಂ ತೆಂ ಗುಮಾನಾಕ್ ಮ್ಹಜ್ಯಾ ಭಿಲ್ಕುಲ್ ನಾ
ಜಾಗೊ ಫಾದರ್ ಮುಲ್ಲರ್ ಆಸ್ಪತ್ರೆಂತ್ ನರ್ಸ್ ಮುಕಾರ್ ರಾವ್ತಾನಾ
ಹಾಂಗಾ ಕಸೊ ಪಾವ್ಲೊಂ ದೆವಾ ಶೆರ್ಮೆವ್ನ್ ಗೆಲೊಂ ಹಾಂವ್
ಜೋಯ್ಸ್ ವ್ಹಳು ಭಿತರ್ ರಿಗ್ತಾಂ, ಗುಸ್ಪಡೊನ್ ಗೆಲೊಂ ಹಾಂವ್
ಕೊಂಬ್ಯಾಪರಿಂ ರಿಗ್ಲೊಯ್ ತುಂ ಪೋಯ್ರ್ ಆಮ್ಚ್ಯಾ ಘರಾಂತ್
ಮತ್ ಚುಕೊನ್ ಪಡ್ಲೊಯ್ ಉಪ್ರಾಂತ್ ಆಮ್ಚ್ಯಾ ತ್ಯಾ ಜಾಲಾಂತ್
ಜೋಯ್ಸಾನ್ ಸಾಂಗ್ತಚ್ ಸಗ್ಳೊಚ್ ಅಬ್ಳೆ ಲಜೆನ್ ಬುಡ್ಲೊಂ ಹಾಂವ್
ಅಶೆಂ ಕಶೆಂ ಜಾಲೆಂ ಚಿಂತುನ್ ಚಿಂತೇಸ್ತ್ ಜಾಲೊಂ ಹಾಂವ್
'ದೂಕ್ ಆತಾಂ ಕಶಿ ಆಸಾ?' ನರ್ಸಾನ್ ಮ್ಹಾಕಾ ವಿಚಾರ್‍ಲೆಂ
ಜೋಯ್ಸ್ ಅಬ್ಳೆ ತುಕ್ಕ್ ಕರುನ್ ಹಾಸೊನ್ ಕುಡಾಭಾಯ್ರ್ ಗೆಲೆಂ
ಬೊಂಡೊ ಪಿಯೆವ್ನ್ ಮುಕಾರ್ ವೆತಾಂ ಜಾಲಾಂತ್ ಪಡ್ಲೊಂ ಹಾಂವ್
ದಾಂತ್ ಝಡೊನ್, ವೋಂಟ್ ಫುಟೊನ್ ಖಟ್ಲ್ಯಾರ್ ನಿದ್ಲಾಂ ಹಾಂವ್
ಜೋಯ್ಸಾಚೆ ತೆ ಕುಲೆ ಪಳೆವ್ನ್ ಪಿಸೊ ಜಾಲ್ಲೊಂ ಹಾಂವ್
ತೋಂಡ್ ಪಳೆವ್ನ್ ಕಂಗಾಲ್ ಜಾವ್ನ್ ಶೆರ್ಮೆವ್ನ್ ಗೆಲ್ಲೊಂ ಹಾಂವ್
ನಿದ್ಲಾಂ ಖಾಟ್ಯೆರ್ ಕರ್‍ಚೆಂ ಕಿತೆಂ ಕಂಗಾಲ್ ಜಾಲಾಂ ಹಾಂವ್
'ಮಾಂಯ್-ಬಾಬಾನ್ ತುಕಾ ಖಾಯ್ಸ್ ಕೆಲಾ' -ಉಡೊನ್ ಪಡ್ಲೊಂ ಹಾಂವ್
ಜೋಯ್ಸ್ ಮುಕಾರ್ ರಾವ್ಲಾಂ ಉಬೆಂ ಆಪುರ್ಬಾಯೆಚ್ಯಾ ಆಂಜ್ಯಾಪರಿಂ
ನರ್ಸ್ ಮ್ಹಣ್ತಾ ಉಲಯ್ ಆತಾಂ ತರ್ನ್ಯಾ ತರ್ನ್ಯಾ ಕೊಂಬ್ಯಾಪರಿಂ
ವ್ಹಳು ವ್ಹಳು ಜೋಯ್ಸಾಚೊ ತೊ ಹಾತ್ ಧರಿ ಹಾಂವ್
ಮೊಗಾ ಮ್ಹಜ್ಯಾ ತುಂಚ್_ಗೊ ಮ್ಹಜೆಂ ಫುಳಕಿತ್ ಜಾಲೊಂ ಹಾಂವ್
ಪಂಚ್ವೀಸ್ ವರ್ಸಾಂ ಆದ್ಲೆಂ ಘಡಿತ್ ಚಿಂತುನ್ ಹಾಂವ್ ಆಸ್ಲೊಂ
ಜೋಯ್ಸಾನ್ ಜೆವ್ಣಾಕ್ ಆಪಯ್ತಾನಾ ಕುಜ್ನಾ ಕುಶಿನ್ ಘುಸ್ಲೊಂ
ಲಗ್ನಾ ಉಪ್ರಾಂತ್ ಚ್ಯಾರ್ ಭುರ್ಗ್ಯಾಂಚೊ ಬಾಪಯ್ ಜಾಲಾಂ ಹಾಂವ್
ಆಮ್ಚೊ ಮೋಗ್ ಹೊ ಸದಾಂಚ್ ಬಾಳ್ವೊಂ ದೆವಾಲಾಗಿಂ ಮಾಗ್ತಾಂ ಹಾಂವ್
ಓಸ್ಟಿನ್ ಪ್ರಭು, ಚಿಕಾಗೊ