ಸಂಪಾದಕೀಯ್:
ಜಿವಿತಾಚೊ ನವೊ ಏಕ್ ಸೊಲ್ಲೊ ಬರಯ್ಜಾಯ್ ಜಾಲಾ
ಆಯ್ಚ್ಯಾ ದಿಸಾ ಸಂವ್ಸಾರ್ ರಾವಲ್ಲೆಕಡೆಚ್ ರಾವ್ಲಾ. ಸ್ತಬ್ದ್ ಜಾಲಾ. ಮುಖಾರ್ ವಚನಾ. ವೆಪಾರ್ ವಯ್ವಾಟ್ ಕುಸ್ಕಲಾ. ಮೊಗ್ರಿಂ ಫುಲುಂಕ್ ವಗತ್ ಘೆತಾತ್. ದೀಸ್ ಉಜ್ವಾಡುಂಕ್ ಖರ್ಶೆತಾ. ಭಿರಾಂತ್ ವಿಸ್ತಾರ‍್ಲ್ಯಾ.
ಹ್ಯೆ ಭಿರಾಂತೆಚ್ಯಾ ಝೊಡ್-ವಾರ‍್ಯಾಕ್ ಕಾಂಯ್ ಜೀವ್ ಖೊಲಿಯೊ ಝಡಲ್ಲೆಪರಿಂ ಮಾತಿಯೆಂತ್ ಜಿರುನ್ ಆಸಾತ್. ಕಾಂಯ್ ಥೊಡ್ಯಾಂಲಾಗಿಂ ಸ್ವಪ್ಣಾಂ ಆಸಾತ್, ತಿಂ ತರೀ ಸತ್ ಜಾಂವ್ದಿತ್ ಮ್ಹಳ್ಳಿ ಆಶಾ ಘೆವ್ನ್ ಹಿ ಕವಿತಾ ಉದೆಲ್ಯಾ.
ದಿನೇಶ್ ಕೊರೆಯಾಚಿ ಸುಂದರ್ ಕವಿತಾ ಹಿ. ಹ್ಯೆ ಕವಿತೆನ್ ಪರ‍್ತ್ಯಾನ್ ಏಕ್ ಪಾವ್ಟಿಂ ತಾಜಾ ವಾರೆಂ ವ್ಹಾಳಯ್ಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸೊಲ್ಲೊ ಕರ‍್ಯಾಂ
ತುಂ ಆನಿ ಹಾಂವ್
ಆಜ್ ಏಕ್ ಸೊಲ್ಲೊ ಕರ‍್ಯಾಂ.
ಉದೆಂವ್ಚಿಂ ಕಿರ್ಣಾಂ ಫಾಂಕುಂಕ್ ಸೊಡ್ಯಾಂ
ವೊಗಿಂ ಮೊಗ್ರಿಂ ಫುಲುಂಕ್ ವಗತ್ ಲಾಯ್ತಾತ್ ತರ್
ಕಳೆಚ್ ಜಾವ್ನ್ ರಾವುಂಕ್ ದಿವ್ಯಾಂ
ತುಂ ಆನಿ ಹಾಂವ್
ಏಕ್ ಸೊಲ್ಲೊ ಕರ‍್ಯಾಂ.
ಕಾಳೊಕ್ ಆಸುಂ ತರ್ ಆಸುಂ
ಕಾಜುಲ್ಯಾಂಚಿ ಖಂತ್ ಆಮ್ಕಾಂ ಕಿತ್ಯಾಕ್?
ಥೊಡ್ಯಾಂಕ್ ಅಸ್ಲಿಯ್ ಸವಯ್:
ಹರ್ ಎಕ್ಯೆ ಘಡಿಯೆಕ್‌ ಸುಟ್ಕಾ ಭೊಗ್ಚಿ ಪಿಸಾಯ್.
ವಾರ‍್ಯಾ-ಲ್ಹಾರಾಂಕ್ ಝಡುಂಕ್ ಚಿಂತ್ಚ್ಯಾ
ಹರೆಕ್ಯೆ ಖೊಲಿಯೆಚ್ಯಾ ನಿರ್ಧಾರಾಕ್
ಖಾಲ್ತಿಮಾನ್ ಘಾಲ್ಯಾಂ
ವೊಡ್ತಾ ಮದ್ಲ್ಯೆ ವಾಟೆರ್
ಜರಿತರಿ ಚಾಲ್ ಥಾಂಬ್ತಾ ತರ್
ಮೆಟಾಂ ರಾವಯಾಂ.
ತುಂ ಆನಿ ಹಾಂವ್-
ಹರ್ಯೆಕ್ಯೆ ಜೀವಿಚ್ಯಾ ಕಾಳ್ಜಾಂತ್
ಆಜಾದಿಚಿ ಥಂಡಾಯ್ ಭರ‍್ಲ್ಯಾ
ತರ್ ಆಸುಂ; ಮುಖಾರ್ಸುನ್ ವಚುಂ -
ಆಮಿ ತಿ ಆನಿಕೀ ನಿಂವಯಾಂ.
ಹೆಂ ವರಸ್ ಅಶೆಂಚ್ ಆಸುಂ.
ಗಾಡಿ ಥಾಂಬ್ಲ್ಯಾ ತರ್ ಥಾಂಬುಂ!
ಕೊಣಾಕ್ ದೊಳ್ಯಾಂ-ಖಾಂಚಿಂನಿ
ಸಪ್ಣಾಂ ದೆಖ್ಚಿ ಸವಯ್ ಪಡ್ಲ್ಯಾ
ತಾಂಚಿ ಆಶಾ ಜ್ಯಾರಿ ಜಾಂವ್ ಮ್ಹಳ್ಳಿ ಭಾಸ್
ಫಿಚ್ಯಾರ್ ವೊಂಟಾಂನಿಂಚ್ ಉಚಾರ‍್ಯಾಂ!
ತುಂ ಆನಿ ಹಾಂವ್
ಆಜ್ ಏಕ್ ಸೊಲ್ಲೊ ಕರ‍್ಯಾಂ.
-ದಿನೇಶ್ ಕೊರೆಯಾ
संपादकीय:
जिविताचो नवो एक सोल्लो बरयजाय जाला
आयच्या दिसा संवसार रावल्लेकडेच रावला. स्तब्द जाला. मुखार वचना. वेपार वयवाट कुस्कला. मोग्रीं फुलुंक वगत घेतात. दीस उजवाडूंक खर्शेता. भिरांत विसतारल्या.
ह्ये भिरांतेच्या झोड-वारयाक कांय जीव खोलयो झडल्लेपरीं मातयेंत जिरून आसात. कांय थोड्यांलागीं स्वपणां आसात, तीं तरी सत जांवदीत म्हळ्ळी आशा घेवन ही कविता उदेल्या.
दिनेश कोरेयाची सुंदर कविता ही. ह्ये कवितेन परत्यान एक फावटीं ताजा वारें व्हाळयलां.
-मेल्विन रोड्रीगस
कविता:
सोल्लो करयां
तूं आनी हांव
आज एक सोल्लो करयां.
उदेंवचीं किर्णां फांकूंक सोड्यां
वोगीं मोग्रीं फुलूंक वगत लायतात तर
कळेच जावन रावूंक दिव्यां
तूं आनी हांव
एक सोल्लो करयां.
काळोक आसूं तर आसूं
काजुल्यांची खंत आमकां कित्याक?
थोड्यांक असलीय सवय:
हर एक्ये घडयेक सुटका भोगची पिसाय.
वारया-ल्हारांक झडूंक चिंतच्या
हरेक्ये खोलयेच्या निर्धाराक
खाल्तीमान घाल्यां
वोडता मदल्ये वाटेर
जरितरी चाल थांबता तर
मेटां रावयां.
तूं आनी हांव-
हरयेक्ये जीविच्या काळजांत
आजादिची थंडाय भरल्या
तर आसूं; मुखार्सून वचूं -
आमी ती आनिकी निंवयां.
हें वरस अशेंच आसूं.
गाडी थांबल्या तर थांबूं!
कोणाक दोळ्यां-खांचींनी
सपणां देखची सवय पडल्या
तांची आशा ज्यारी जांव म्हळ्ळी भास
फिच्यार वोंटांनींच उचारयां!
तूं आनी हांव
आज एक सोल्लो करयां.
-दिनेश कोरेया