ಸಂಪಾದಕೀಯ್:
ಮ್ಹಜಿ ಸದಾಂಚ್ ಜತನ್ ಘೆಂವ್ಚೆಂ ಮ್ಹಜೆಂ ಘರ್
ಆಮಿ ಸಂವ್ಸಾರಾಚ್ಯಾ ಖಂಯ್ಚ್ಯಾ ಕೊನ್ಶಾಕ್ ಪಾವ್ಲ್ಯಾರೀ ಘರಾ ಪಾಟಿಂ ಪರ‍್ತತಾನಾ ಮೆಳ್ಚ್ಯಾ ಸುಖಾಕ್ ಸರ್ ಮ್ಹಳ್ಳಿ ನಾ. ಆಮ್ಚ್ಯಾ ಸಾಂಗಾತಾ ತೆಂ ಪಯ್ಣ್ ಕರಿನಾ ಜಾಲ್ಯಾರಿ, ಬಗ್ಲೆಕ್ ರಾವುನ್ ಆಮ್ಚಿ ಸದಾಂ ಜತನ್ ಕರ‍್ತಾಶೆಂ ಆಮ್ಕಾಂ ಭೊಗ್ತಾ. ಹೆಂ ಘರ್ ಮ್ಹಳ್ಯಾರ್ ಆಮಿ ಆಮ್ಚ್ಯಾ ವರ್ಸಾಂ ವರ್ಸಾಂಚ್ಯಾ ಜಿವಿತಾಚ್ಯಾ ಅನ್ಭೋಗಾನ್ ಆಮ್ಚ್ಯಾಚ್ ರಾಕಣೆ ಖಾತೀರ್ ರಚಲ್ಲಿಂ ನೆಮಾಂ.
ಆರ್. ಎಸ್. ಭಾಸ್ಕರ್ ಮ್ಹಾಲ್ಗಡೊ ಕವಿ. ಕವಿತೆಂತ್ ತಾಚಿ ಕೊಚ್ಚಿಚಿ ಬೋಲಿ ದಿಸ್ತಾ ತರೀ, ವಾಚ್ತಲ್ಯಾಕ್ ಕಾಂಯಿಂಚ್ ಆಡ್ಖಳ್ ಜಾಯ್ನಾ. ಸಬಾರ್ ಕಾಳಾ ಉಪ್ರಾಂತ್ ತೊ ಕವಿತಾ ಕುಳಾರಾಕ್ ಪಾವ್ಲಾ. ತಾಕಾ ಆಮಿ ಯೆವ್ಕಾರ್ ದಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಶೆಂ ಮ್ಹಜೆಂ ಘರ್
ಮ್ಹಜೆಂ ಘರ್ ಆಸಾ ನ್ಹಯ್ ?
ಕೆನ್ನಾ ಮ್ಹಾಕಾ ಆಪಯ್ತಾ
ಜಾಂವ್ ಹಾಂವ್ ವತಾ ಶಾರಾಂತ್
ಜಾಂವ್ ಶೆಜಾರ್ ರಾಜ್ಯಾಂತ್
ಜಾಂವ್ ಭಾಯ್ಲ್ಯಾ ರಾಜ್ಯಾಂತ್
ತೆಂ ಮ್ಹಾಕಾ ಆಪಯ್ತ್ ರಾವ್ತಾ
ಕೆನ್ನಾ ಹಾಂವ್ ಭಾಯ್ರ್ ಸರ‍್ತಾಂ
ಘರ್ ಮ್ಹಜೆಂ ಗಾಲ್ ಫುಗೊವ್ನ್ ರಾವ್ತಾ
ವತಾ ತೆ ಬರೆಂ, ಆನಿ
ಪರ್ತೂನ್ ವೆಂಗೊನ್ ಯೊ ಮ್ಹಣ್ಟಾ
ಕೆನ್ನಾ ಅಂತ್ರಳ್‌ಯಾನಾಂತ್ ವಚ್ಪಾಕ್ ಸೊದ್ತಾ
ತೆನ್ನಾ ಮಾರುತೀಕ್ ಮನಾಂತ್ ಘೆ ಮ್ಹಣ್ಟಾ
ಜಲಯಾನಾಂತ್ ಬಿ ವತಾ ಜಾಲ್ಯಾರ್
ವರುಣಾಕ್ ನಾಲ್ ದಿ ಮ್ಹಣ್ಟಾ
ಹೊಟೆಲಾಂತ್ ರಾವ್ತಾ ತೆನ್ನಾ
ಎಸಿ ಬೀಸಿ ಲಾವುಂ ನಾಕಾ ಮ್ಹಣ್ಟಾ
ಆಂಗಾರ್ ಶೀಯ್ ಘೆವ್ನ್ ಮಾಗೀರ್
ದುಯೆಸ್ತ್ ಹಾಡುಂ ನ್ಹಯ್ ಮ್ಹಣ್ಟಾ
ಖಾಣ್ ಜೆವಣ್ ಘೆತಾ ತೆನ್ನಾ
ಶಿವ್ರಾಕಚ್ ಮಾಗೂನ್ ಘೆ ಮ್ಹಣ್ಟಾ
ಮಾಂಸ್ ಬೀಂಸ್ ಖಾವ್ನ್ ಆನಿ
ಬಾಟೂನ್ ವಚೆಂ ನ್ಹಯ್ ಮ್ಹಣ್ಟಾ
ಮಾಯೆಸ್ತ್ ಅಶೆಂ ಘರ್ ಮ್ಹಜೆಂ
ಮನಾಂತ್ ಕೆನ್ನಾ ಹುಸ್ಕೊ ವಾವುರ‍್ಪಿ
ಪರ್ತೂನ್ ಹಾಂವ್ ಯೆತಾ ತೆನ್ನಾ
ಮನ್ ಮೆಕ್ಳೂನ್ ಯೆವ್ಕಾರ್ ದಿವ್ಪಿ
-ಆರ್. ಎಸ್. ಭಾಸ್ಕರ್
संपादकीय:
म्हजी सदांच जतन घेंवचें म्हजें घर
आमी संवसाराच्या खंयच्या कोनशाक पावल्यारी घरा फाटीं परतताना मेळच्या सुखाक सर म्हळ्ळी ना. आमच्या सांगाता तें पयण करीना जाल्यारी, बगलेक रावून आमची सदां जतन करताशें आमकां भोगता. हें घर म्हळ्यार आमी आमच्या वरसां वरसांच्या जिविताच्या अनभोगान आमच्याच राकणे खातीर रचल्लीं नेमां.
आर. एस. भास्कर म्हाल्गडो कवी. कवितेंत ताची कोच्चिची बोली दिसता तरी, वाचतल्याक कांयींच आडखळ जायना. सबार काळा उपरांत तो कविता कुळाराक पावला. ताका आमी येवकार दितांव.
-मेल्विन रोड्रीगस
कविता:
अशें म्हजें घर
म्हजें घर आसा न्हय ?
केन्ना म्हाका आपयता
जावं हांव वता शारांत
जावं शेजार राज्यांत
जावं भायल्या राज्यांत
तें म्हाका आपयत रावता
केन्ना हांव भायर सरता
घर म्हजें गाल फूगोवन रावता
वता ते बरें, आनी
परतून वेगोन यो म्हण्टा
केन्ना अंतराळयानांत वचपाक सोदता
तेन्ना मारुतीक मनांत घे म्हण्टा
जलयानांत बी वता जाल्यार
वरुणाक नाल दी म्हण्टा
होटेलांत रावता तेन्ना
एसी बीसी लावूं नाका म्हण्टा
आंगार शीय घेवन मागीर
दुयेस्त हाडूं न्हय म्हण्टा
खाण जेवण घेता तेन्ना
शिवराकच मागून घे म्हण्टा
मांस बींस खावन आनी
बाटून वचें न्हय म्हण्टा
मायेस्त अशें घर म्हजें
मनांत केन्ना हुसको वावुरपी
परतून हांव येता तेन्ना
मन मेकळून येवकार दिवपी
-आर.एस.भास्कर