ಸಂಪಾದಕೀಯ್:
ಕ್ರಿಸ್ತಾಂವಾಂಚ್ಯಾ ಪ್ರಾಚಿತಾಚ್ಯಾ ಕಾಳಾಚೆಂ ಕಾಂತಾರ್
ಈಸ್ಟರ್ ಯಾ ಪಾಸ್ಖ್ ಪರ್ಬೆಚ್ಯಾ ಆದ್ಲೆ ಉಣ್ಯಾರ್ ಚಾಳೀಸ್ ದೀಸ್ ಕ್ರಿಸ್ತಾಂವಾಂಕ್ ಪ್ರಾಚಿತಾಚೆ. ಹ್ಯಾ ಕಾಳಾಕ್ ಕರೆಜ್ಮ್ ಮ್ಹಣ್ತಾತ್. ಹೊ ಪ್ರಾಚಿತಾಚೊ ಕಾಳ್ ಗೊಬ್ರಾಚ್ಯಾ ಯಾ ಸಿಂಜಿಚ್ಯಾ ಬುಧ್ವಾರಾ ಸುರು ಜಾವ್ನ್, ಚಾಳೀಸ್ ದೀಸ್ ಸಂಪ್ಲ್ಯಾ ಉಪ್ರಾಂತ್ಲ್ಯಾ ಆಯ್ತಾರಾ ಕಾಬಾರ್ ಜಾತಾ. ಹ್ಯಾ ಆಯ್ತಾರಾಕ್ ಪಾಸ್ಖ್ ಮ್ಹಣ್ತಾತ್.
ಕರೆಜ್ಮಾಚ್ಯಾ ಕಾಳಾಚಿ ರಿವಾಜ್ ಚಡುಣೆ ಚವ್ತ್ಯಾ ಶೆಕ್ಡ್ಯಾ ಆದ್ಲಿ. ಪಾಂಚ್ವ್ಯಾ ಥಾವ್ನ್ ನೊವ್ಯಾ ಶೆಕ್ಡ್ಯಾ ಪಾಸುನ್ ಹ್ಯಾ ಕಾಳಾರ್ ಕ್ರಿಸ್ತಾಂವ್ ಲೋಕ್ ಕಡ್ಡಾಯೆನ್ ಉಪಾಸ್ ಧರ್‍ತಾಲೆ. ಮಾಸ್, ಮಾಸ್ಳಿ, ತಾಂತಿಯಾಂ ಯಾ ದುಧಾಚ್ಯೊ ವಸ್ತು ಆಪಡಿನಾತ್‌ಲ್ಲೆ. ದಿಸಾಕ್ ಏಕ್ ಜೆವಣ್ ಮಾತ್ರ್ ಜೆವ್ಯೆತ್ ಆಸ್‌ಲ್ಲೆಂ. ಕ್ರಮೇಣ್ ನೊವ್ಯಾ ಶೆಕ್ಡ್ಯಾಂತ್ ಹಾಂತುಂ ತಿಕ್ಕೆಶೆ ತಬ್ದಿಲಿ ಆಯ್ಲಿ. ಪ್ರಾಚಿತಾಚ್ಯಾ ಕಾಳಾಚ್ಯಾ ಸುಕ್ರಾರಾಂನಿ ಮಾತ್ರ್ ಮಾಸ್ ಖಾಂವ್ಕ್ ನಜೊ ಮ್ಹಣ್ ಆಡ್ವಾರ್‍ಲೆಂ. ಕೊಂಕ್ಣಿ ಲೊಕಾಮಧೆಂ ಕ್ರಿಸ್ತಾಂವ್‌ಪಣ್ ಯೇವ್ನ್ ಚಡಿತ್ ಶೆಕ್ಡೆ ಜಾಂವ್ಕ್ ನಾಂತ್ ತರೀ, ಪನ್ನಾಸ್ ವರ್ಸಾಂ ಆದಿಂ ಪಾಸುನ್ ಕಠಿಣಾಯೆಚೊ ಉಪಾಸ್, ದಂಡವ್ಣಿ ಕೊಂಕಣಿ ಲೋಕ್ ಆಧಾರ್‍ತಾಲೊ.
ಚಾಳೀಸ್ ವರ್ಸಾಂ ಆದಿಂ ಪೋಪ್ ಪಾವ್ಲ್ ಸವ್ಯಾನ್ ಉಪಾಸಾಚೆ ರಿವಾಜಿಭಿತರ್ ದಾನ್‌ಧರ್ಮಾಚಿ ರಿವಾಜ್ ಮಿಸ್ಳಾಯ್ಲಿ.
ಹ್ಯಾ ಕಾಳಾಕ್ ಸಂಬಂಧ್ ಜಾಲ್ಲೆಂ ಕೊಂಕಣಿ ಕ್ರಿಸ್ತಾಂವಾಂ ಮಧ್ಲೆಂ ಭೋವ್ ಪರ್ನೆಂ, ಭೋವ್‌ಶ್ಯಾ ತರ್ಜಣ್ ಜಾಲ್ಲೆಂ, ಫಾಮಾದ್ ಕಾಂತಾರ್ ಏಕ್, ತಾಚೆ ಭಾಶೆಕ್ ಲಾಗೊನ್ ಆನಿ ಕಾವ್ಯ ಶೈಲೆಕ್ ಲಾಗೊನ್ ಆಮಿ ಹಾಂಗಾಸರ್ ದಿಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಟಾ ಉಟಾ ಪ್ರಾಣಿಯಾ
ಉಟಾ ಉಟಾ ಪ್ರಾಣಿಯಾ
ಸಾಂಡಾ, ಸಾಂಡಾ ಸಂಸಾರ್ ಮಾಯಾ
ಪಾಟ್ ಕರುನಿ ತೆಯಾ
ವೊಳ್ಕಾ ಜೆಜು ರಾಯಾ
ಅಥಿರ್ ಸಂಸಾರ್,
ಅಥಿರ್ ತಾಚೊ ಆಧಾರ್
ಅಥಿರ್ ಹಂಕಾರ್,
ಅಥಿರ್ ತಾಚೊ ದಳ್ಬಾರ್
ತಾಚೆರ್ ಪಾತ್ಯೆವ್ನ್ ರಾವ್ಲಲೆ
ಪ್ರಾಚಿತ್ ಕರುಂಕ್ ನಾ ಪಾವ್ಲೆ
ನಿದ್ರೆಸ್ತ್ ಜಾವ್ನ್ ಉರಲೆ
ಜಾಗ್ರುತ್ ಜಾಯ್ನಾಸ್ತಾಂ ಸರಲೆ
ಜೆ ಕೊಣ್ ತಾಕಾ ಭುಲಲೆ
ನಾನಾ ಪರಿಂ ಫಟ್ವಲೆ
ಈಶ್ಟ್ ಈಷ್ಟ್ ಮ್ಹಣೊನ್ ಚಲಲೆ
ಶೆಕಿಂ ಗುಲಾಮ್ ಜಾಂವ್ಕ್ ಪಾವಲೆ
ದೊತೊರ್ನ್ ಶಿಕೊಂಕ್ ಪೊಳ್ತಾಲೆ
ಖಂಯ್ ಆತಾಂ ತೆ ಪಾವಲೆ?
ಫಾಲ್ಯಾಂ ಶಿಕೊಂವ್ ಮ್ಹಣ್ತಾಲೆ
ಫಾಲ್ಯಾಂ ಜಾಯ್ನಾಸ್ತಾಂ ಸರಲೆ
ಸೈರೆ ಧಾಯ್ರೆ ಸರಲೆ
ಈಷ್ಟ್ ಮಂತ್ರ್ ಪಯ್ಲೆಂ ಅಂತರ್‍ಲೆ
ಹೆಂ ಮನಿಂ ಚಿಂತುನ್ ಆಪಾಪಲೆ
ಹಾಕ್ ಮಾರ್‍ಯಾಂ ಜೆಜುಕಡೆ
ಥರ್ಥರ್‍ಯಾಂ ಕಾಂಪೊನಿ
ಮ್ಹಣ್ತಾಂವ್ ಮನಿಂ ವಿಳಾಪ್ ಕರುನಿ
ಹಾ ಕಟಾ ಕಟಾ ಸೊಮ್ಯಾಂ ಆಮ್ಚಿ ಜಿಣಿ
ಇತ್ಲ್ಯಾನ್ ಜಾಲ್ಯಾಂವ್ ನಿರ್ಗುಣಿ
ಹೆ ಪುಣಿ ಸಬ್ದ್ ಆಯ್ಕೊನಿ
ಕಾಕ್ಳುತ್ ಆಮ್ಚೆರ್ ಠೆವುನಿ
ಆಟವ್ ಕರ್ ಸೊಮ್ಯಾ ಆಮ್ಚೊ ಮ್ಹಣೊನಿ
ಅಪ್ರಾಧ್ ಮಾಗ್ತಾಂವ್ ಭೊಗ್ಸುನಿ ಆಮೆನ್
-ಕೊಂಕ್ಣೀ ಭಕ್ತಿಕ್ ಗಿತಾಂ, ಮಂಗ್ಳುರ್ ದಿಯೆಸೆಜ್, ೨೦೦೦, ಇಕ್ರಾವೊ ಛಾಪೊ