ಹಾಂವ್ ಕರುಂಕ್ ಭಾಯ್ರ್ ಸರ‍್ಲಾಂ ಯೋಗ
ಸಗ್ಳೊ ಸಂಸಾರ್ ಕಾಡ್ತಾ ನವೊ ರಾಗ
ದೆಕುನ್ ಹಾಂವ್‍ಯೀ ಕರುಂಕ್ ಭಾಯ್ರ್ ಸರ‍್ಲೊಂ ಯೋಗ
ಕಾಣಿ ಮ್ಹಜಿ ಪಯ್ಲಿ ಆಯ್ಕಾ
ಮಾಗಿರ್ ತುಮ್ಚಿಂಯೀ ಸೂಚನಾಂ ಸಾಂಗಾ
ಏಕ್ ದೀಸ್ ಸಕಾಳಿಂ ಬೋವ್ ಫಾಂತ್ಯಾರ್
ಆಯ್ತೊ ಜಾಲೊಂ ಕರುಂಕ್ ಸೂರ್ಯ ನಮಸ್ಕಾರ್
ದೊನೀ ಹಾತ್ ಧರ್ನಿಕ್ ಲಾಯ್ತಾನಾ ಜಾಲೊ ದೊನ್ಪಾರ್
ನಮಸ್ಕಾರಾಕ್ ರಾಕುನ್ ನಿರಾಶಿ ಸುರ್ಯೊ ಬುಡ್ಲೊ ರಾತಿಚ್ಯಾ ಆಟ್ ವೊರಾರ್
ನಾಕ್ ಬೊಟಾಂನಿ ದಾಂಬುನ್, ಸುರು ಕೆಲೆಂ ಪ್ರಾಣಾಯಮ
ಬಂಧ್ ನಾಕಾಂತೀ ಆತಾಂ ವಾಳುಂಕ್ ಲಾಗ್ಲಾ ಪರ್ಮಳ್ ಘಮಘಮ
ಪಯ್ಲೆಂ ಕಾಂಟಾಳೊ ಯೆತಾಲೊ ಹಿ ವಾಳ್ಚ್ಯಾ ಭಾಜಿ ಖಾತಾನಾ
ಅತಾಂ ಬಾಯ್ಲ್ ಮ್ಹಣ್ತಾ, ಯೋಗ ಕರ್ತೆಲ್ಯಾಂಕ್ ದುಕ್ರಾಮಾಸ್ ಬಿಲ್ಕುಲ್ ಮೆಳನಾ.
ಕರಿಜೆ ಮ್ಹಣ್ ವ್ಹಡೆ ಆಶೆನ್ ಪದ್ಮಾಸನಾ
ದೊಂಪ್ರಾಂಚ್ಯೊ ಘಾಂಟಿ ದೊಡುಂಕ್ ಬಿಲ್ಕುಲ್ ಆಯ್ಕನಾಂತ್
ಮಾಗಿರ್ ದೊನೀಯಿ ಪಾಂಯ್ ಜಬರ್ದಸ್ತೆನ್ ಉಸ್ಕ್ಯಾರ್ ದವರ್ತಾನಾ
ಪೆಂಕ್ಟಾಂತ್ಲೊ ವಾಯ್ ಉಬೊನ್ ಗೆಲೊ ಆವಾಜ್ ನಾಸ್ತಾನಾ
ಹಲಾಸನ ಕರ‍್ತಾನಾ ತಕ್ಲೆ ವಯ್ಲ್ಯಾನ್ ಪಾಂಯ್ ವೆಲೆ
ಪಾಂಯ್ ಹಾತಾಂನಿ ಧರಿಜೆ ತರ್ ಪೆಂಕಡ್ ಮ್ಹಜೆಂ ಕುಸ್ಕಾಲೆಂ
ದುಖಿನ್ ವಳ್ವಳ್ತಾನಾ ಪಾಂಯ್ ಪಾಟಿಂ ಯೇಂವ್ಕ್ ಕಷ್ಟಾಲೆ
ಮಾಗಿರ್ ಪಾಂಯ್ ಪಾಟಿಂ ಹಾಡುಂಕ್ ಆಚಾರ್ಯಾಕ್ ಚ್ ಆಪಯ್ಜೆ ಪಡ್ಲೆಂ
ತ್ರೀಕೋನ ಆಸನ ಕರುಂಕ್ ಪಾಂಯ್ ಬಿಚ್ಚಾವ್ನ್ ರಾವ್ಲ್ಯಾರ್
ಕುಜ್ನಾಂತ್ಲೆ ಉಂದಿರ್ ಪಾಂಯಾ ಪೊಂದ್ಲ್ಯಾನ್ ಧಾಂವ್ತಾತ್, ಭಾಯ್ರ್ ಭಿತರ್
ತಾರ ಆಸನ ಕರುಂಕ್ ಹಾತ್ ಉಸವ್ನ್ ರಾವ್ಲ್ಯಾರ್
ಬಾಯ್ಲ್ ಮ್ಹಣ್ತಾ ಘೆವ್ನ್ ರಾವ್ಶಿ ತರ್, ಹ್ಯಾ ಪಾವ್ಸಾಕ್ ಸುಕತ್ ಥೊಡೆಂ ವಸ್ತುರ್
ಸಿತಾಲಿ ಪ್ರಾಣಾಯಮ ಮ್ಹಣೊನ್ ಜೀಬ್ ಭಾಯ್ರ್ ಘಾಲಿ
ವಾಟೆನ್ ವೆತೆಲಿಂ ಚೆಡ್ವಾಂ ಮ್ಹಣ್ತಾತ್, ವಿಸಿಲ್ ಮಾರ್ಚೊ ಕೋಣ್ ಹೊ ಮವಾಲಿ
ಜಾಣ್ವಿಕ್ ದೊಳೊ ಆಸನ್ ಮ್ಹಣೊನ್ ದೀಷ್ಟ್ ಬಂಧ್ ಕರಿಜೆ ಪಡ್ಲಿ
ಗಳ್ಯಾಂತ್ಲಿ ಚೇಯ್ನ್, ಬೊಟಾಂತ್ಲಿ ಮುದಿ ಕೊಣೆಂಗೀ ಉಸ್ಳಾಯ್ಲಿ
ಕರುಂಕ್ ಧರುನ್ ಆಸನ
ಇಲ್ಲೆಂಯೀ ಕೊನ್ಸಂಟ್ರೇಶನ್ ಮೆಳನಾ
ಮೋಗ್ ಕೆಲ್ಲ್ಯಾ ಚೆಡ್ವಾಚಿ ತಸ್ವೀರ್ ಮುಖಾರ್ ದವರ್ತಾನಾ
ಯೋಗ ವಿಸ್ರೊನ್ ವೆತಾ, ದೊಳ್ಯಾನಿಂ ದುಖಾಂ ದೆಂವ್ತಾನಾ
ಯೋಗ ಮ್ಹಜೆಂ ಪಳೆವ್ನ್ ಬಾಯ್ಲ್ ಗಾಳಿ ದಿತಾನಾ
ವೊಗೆಚ್ ನಿದ್ಲೊಂ ಸುರು ಕರ್ನ್ ಶವಾಸನ
ನಿದೆಂತೀ ಸಂಸಾರ್ ನಾ, ಗಾಂವಾರ್ ಹಾಂವ್ ಮೆಲಾಂ ಮ್ಹಣ್ ಖಬರ್ ಜಾತಾನಾ
ಜಾಗ್ ಜಾಲಿ ಮ್ಹಾಕಾ, ಮ್ಹಜ್ಯಾ ಮೊರ್ನಾಚೆಂ ಮೀಸ್ ಚಲ್ತಾನಾ
-ರೋಶು, ಬಜ್ಪೆ
हांव करुंक भयर सर्लां योगा
सगळो संवसार काडता नवो राग
देकून हांवयी करुंक भायर सरलों योगा
काणी म्हजी पयली आयका
मागीर तुमचिंयी सूचनां सांगा
एक दीस सकाळीं बोव फांत्यार
आयतो जालों करुंक सूर्य नमस्कार
दोनी हात धरणीक लायताना जालो दोनपार
नमस्काराक राकून निराशी सुर्यो बुडलो रातीच्या आट वोरार
नाक बोटांनी दांबून, सुरू केलें प्राणायम
बंध नाकांती आतां व्हाळूंक लागला पर्मळ घमघम
पयलें कांटाळो येतालो ही वाळचे भाजी खाताना
अतां बायल म्हणता, योगा करतल्यांक दुक्रामास बिल्कूल मेळना.
करिजे म्हण व्हडे आशेन पद्मासना
दोंपरांच्यो घांटी दोडुंक बिल्कूल आयकनांत
मागीर दोनीयी पांय जबर्दसतेन उसक्यार दवर्ताना
पेंकटांतलो वाय उबोन गेलो आवाज नासताना
हलासना करताना तकले वयल्यान पांय वेले
पांय हातांनी धरिजे तर पेंकड म्हजें कुस्कालें
दुखीन वळवळताना पांय फाटीं येवंक कष्टाले
मागीर पांय फाटीं हाडूंक आचाऱ्याकच आपयजे पडलें
त्रीकोन आसन करुंक पांय बिच्चावन रावल्यार
कुजनांतले उंदीर पांया पोंदल्यान धांवतात, भायर भितर
तार आसन करुंक हात उसवन रावल्यार
बायल म्हणता घेवन रावशी तर, ह्या पावसाक सुकत थोडें वस्तूर
सिताली प्राणायम म्हणुन जीब भायर घाली
वाटेन वेतेलीं चेडवां म्हणतात, विसील मारचो कोण हो मवाली
जाणवीक दोळो आसन म्हणोन दीष्ट बंध करिजे पडली
गळ्यांतली चेय्न, बोटांतली मुदी कोणेंगी उसळायली
करुंक धरून आसन
इल्लेंयी कोन्संट्रेशन मेळना
मोग केल्ल्या चेडवाची तस्वीर मुखार दवरताना
योग विसरोन वेता, दोळ्यानीं दुखां देंवताना
योगा म्हजें पळेवन बायल गाळी दिताना
वोगेच निदलों सुरू करन शवासन
निदेंती संवसार ना, गांवार हांव मेलां म्हण खबर जाताना
जाग जाली म्हाका, म्हज्या मोर्नाचें मीस चलताना
-रोशू, बजपे