ದೊರಿ ವೊಡ್ಚೊ ಖೆಳ್
ದೊರಿ ವೊಡ್ಚೊ ಖೆಳ್ ಹೊ,
ದೊರಿ ವೊಡ್ಚೊ ಖೆಳ್
ಜಿಣ್ಯೆ ಆನಿ ಮರ್ಣಾ ಮದ್ಲೊ
ದೊರಿ ವೊಡ್ಚೊ ಖೆಳ್
ಎಕೆ ಕುಶೀನ್ ಜಾಂಗ್ಳಾಂ ದಾಕೊವ್ನ್
ಕೆಂಟಕಿ ಫ್ರಾಯ್ಡ್ ಕುಂಕ್ಡಾಂ
ತೆಲಾಂತ್ ಉಪ್ಯೆವ್ನ್ ಉಡ್ಕ್ಯೊ ಮಾರ‍್ಚಿಂ
ಬಿಯಾತಿಣಿ ಸುಂಕ್ಟಾಂ
ಬಗ್ಲೆನ್ ಆಸಾ ಲೈತಾಂವ್, ಬಾಫಾತ್
ಇಂದಾದಾಂತ್ಲ್ಯೊ ವೊಬೊ
ಬಿಫಾ ಮಾಸಾ ಕಾಟ್ಲಿಸಾಂಚ್ಯೊ
ಆಯ್ಕೊಂವ್ಯೆತಾತ್ ಬೊಬೋ
ಉಂಡ್ಯಾ ಕಾಪಾಂ ಮದೆಂ ತಾಂತಿಂ
ಸೊಸೇಜ್ ಆನಿ ಮಾಯೊನೀಸ್
ತ್ಯಾಯಿ ಮದೆಂ ಭಾಯ್ರ್ ತಿಳ್ತಾ
ಯೆರೊಪಾಂತ್ಲಿ ಚೀಜ್ಹ್
ಮುಕ್ಲೆ ಕುಶೀನ್ ಬಾಂದುನ್ ಘಾಲ್ಯಾಂತ್
ಸ್ವಿಮ್ಮಿಂಗಾಚಿಂ ತಳಿಂ
ಘರಾಭಿತರ್ ಧಾಂವುಂಕ್ ಮೆಳ್ತಾತ್
ರಬ್ಬರಾಚಿಂ ಫಳಿಂ
ಮರ್ಜೆತೆಕಿದ್ ಸಗ್ಳೆಂ ಆಸಾ
ಎರೋಬಿಕ್ಸ್ ಯೋಗ
ದುಡು ದೀವ್ನ್ ಘಾಲಿಜೆ ಪಡ್ತಾ
ಮೊಡಸ್ತಾನಾಂ ಲಾಗಾ
ಚರ್ಬೆವೀಣ್ ದುದಾಂ, ಮಾಸಾಂ
ಉಬ್ಜಯಿಲ್ಲಿ ಮಾಸ್ಳಿ
ಪಾಚ್ವಿ ಕರಂಬ್, ಬೊಲ್ಸಾಂತ್ ಸದಾಂ
ವಿಟಾಮಿನ್ ಸಿಸ್ಲಿ.
ಕೊಣ್ ಜಿಕ್ತಾ, ಕೊಣ್ ಹಾರ‍್ತಾ
ದೊರಿ ವೊಡ್ಚ್ಯಾ ಖೆಳಾಂತ್
ಕೊಣ್ ಸೊಡಿತ್, ಕೊಣ್ ವೊಡಿತ್
ಪಂತಾಟಾಚ್ಯಾ ಖಳಾಂತ್
ಚರಬ್ ವಾಂಟ್ಚ್ಯಾ ವೆಪಾರ‍್ಯಾಂಚ್ಯೊ
ಸಾದ್ತಾತ್ ಪಳೆ ತಾಳಿಯೊ
ಚರಬ್ ಮೆಜ್ಚ್ಯಾ ದೊತೊರಾಂಚ್ಯೊ
ತಯಾರ್ ರಾವ್ಲ್ಯಾತ್ ಗುಳಿಯೊ
ದುಡು ದೀವ್ನ್ ಭಕಾಯ್ ಚರಬ್
ಜಿರಯ್ ದುಡು ದಿವುನ್
ಖಿಣಾಕ್ ತರೀ ಗಳಾಯ್ ಜಾಲಿ
ಯೇತ್ ಯಮ ದೆಂವುನ್
-ಮೆಲ್ವಿನ್ ರೊಡ್ರಿಗಸ್
दोरी वोडचो खेळ
दोरी वोडचो खेळ हो,
दोरी वोडचो खेळ
जिणये आनी मर्णा मदलो
दोरी वोडचो खेळ
एके कुशीन जांगळां दाकोवन
केंटकी फ्रायड कुंकडां
तेलांत उप्येवन उडक्यो मारचीं
बियातिणी सुंकटां
बगलेन आसा लैतांव, बाफात
इंदादांतल्यो वोबो
बिफा मासा काटलिसांच्यो
आयकोंव्येतात बोबो
उंड्या कापां मदें तांतीं
सोसेज आनी मायोनीस
त्यायी मदें भायर तिळता
येरोपांतली चीज
मुकले कुशीन बांदून घाल्यांत
स्विम्मिंगाचीं तळीं
घराभितर धांवुंक मेळतात
रब्बराचीं फळीं
मर्जेतेकीद सगळें आसा
एरोबिक्स योग
दुडू दीवन घालीजे पडता
मोडस्तानां लागा
चरबेवीण दुदां, मासां
उबजयिल्ली मासळी
पाचवी करंब, बोल्सांत सदां
विटामीन सिसली.
कोण जिकता, कोण हारता
दोरी वोडच्या खेळांत
कोण सोडीत, कोण वोडीत
पंताटाच्या खळांत
चरब वांटच्या वेपार्यांच्यो
सादतात पळे ताळयो
चरब मेजच्या दोतोरांच्यो
तयार रावल्यात गुळयो
दुडू दीवन भकाय चरब
जिरय दुडू दिवून
खिणाक तरी गळाय जाली
येत यम देंवून
-मेल्विन रोड्रीगस