ಸಂಪಾದಕೀಯ್:
ಶಿಕ್ಷಣಾಚೊ ಕಾಳೊ ಧುಂವರ್
ಆಯ್ಚ್ಯಾ ದಿಸಾ ಶಾಳೆಂನಿ ಶಿಕೊಂವ್ಚ್ಯಾ ಆಮ್ಚ್ಯಾ ಶಿಕ್ಷಣಾಚಿ ವಾಟ್ ಕಶಿ ಘುಂವ್ಲ್ಯಾ, ಆಮ್ಚಿಂ ಭುರ್ಗಿಂ ಶಿಕ್ಷಣಾಚ್ಯಾ ನಾಂವಾರ್ ಕಿತೆಂ ಶಿಕುನ್ ಆಸಾತ್ ಮ್ಹಳ್ಳೆಂ ಹೆ ಕವಿತೆದ್ವಾರಿಂ ಪ್ರಸನ್ನ್ ನಿಡ್ಡೋಡಿ ಸಾಂಗ್ತಾ.
ಎಕಾ ತೆಂಪಾರ್ ಶಿಕ್ಷಕಾನ್ ವಿದ್ಯಾರ್ಥಿಕ್ ಏಕ್ ಥಾಪಡ್ ಮಾರ‍್ಲೆಂ ತರ್, ಆನಿ ಭುರ್ಗ್ಯಾಂನಿ ಹಿ ಗಜಾಲ್ ಘರಾ ಯೇವ್ನ್ ಸಾಂಗ್ಲಿ ತರ್, ’ತುಕಾ ಆನಿ ದೋನ್ ಪಡಜಾಯ್ ಆಸಲ್ಲೆ’ ಅಶೆಂ ಆವಯ್ ಬಾಪಯ್ ಸಾಂಗ್ತಾಲಿಂ. ಆಜ್ ಶಿಕ್ಷಕಾನ್ ವಿದ್ಯಾರ್ಥಿಚೆರ್ ಹಾತ್ ಉಕಲ್ಲೊ ತರ್, ಶಿಕ್ಷಕಾಚೆರ್ ಹಲ್ಲೊ ಚಲೊಂವ್ಕ್ ಆವಯ್ ಬಾಪಯ್ ಪಾಟಿಂ ಸರನಾಂತ್.
ಅಸಲ್ಯಾ ಎಕೆ ಪರಿಸ್ಥಿತಿಂತ್ ಆಮ್ಚೆಂ ಶಿಕ್ಷಣ್ ಉಸ್ಮಡ್ತಾನಾ, ಇಸ್ಕೊಲಾಚ್ಯಾ ಬ್ಯಾಗಾಂನಿ ಸುರಿ, ಕೊಯ್ತಿ, ಪಿಸ್ತುಲ್ಯೊ ಯೇನಾಸ್ತಾಂ ರಾವ್ತಿತ್? ಹೊ ಕಾಳೊ ಧುಂವರ್ ನಿತಳ್ ಕರ‍್ಚೊ ತರೀ ಕಸೊ?
- ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಇಸ್ಕೊಲಾಚ್ಯಾ ಬ್ಯಾಗಾಂತ್
ಲ್ಹಾನ್ಪಣಾರ್ ಮ್ಹಜ್ಯಾ
ಇಸ್ಕೊಲಾಚ್ಯಾ ಲ್ಹಾನ್‌ಶ್ಯಾ ಬ್ಯಾಗಾಂತ್
ಬೂಕ್, ಸ್ಲೇಟ್ ಆನಿ ಲಿಕ್ಣಿ ಮಾತ್ರ್
ಭುತಿ ಎಕಾ ಖಾಂದಾರ್ ತರ್
ಇಸ್ಕೊಲಾ ಬ್ಯಾಗ್ ಆನ್ಯೆಕಾರ್.
ಮೈಲಾಂಚಿ ವಾಟ್ ಚಲುನ್ ತರೀ
ಶಿಕ್ಷಕ್ ತೆ ಗುರು-ದೊತೊರ್
ಲಿಸಾಂವಾಂ ಸವೆಂ ಶಿಕ್ಷಣಾಚಿಂ ಮೌಲ್ಯಾಂ
ಆನಿ ಫುಡಾರಾಚಿ ಜಬ್ಬೊರ್ ಆಶಾ
ಆಸ್ಲಿ ತಕ್ಲೆಂತ್ ಫಿಚಾರ್.
ಆಜ್ -
ಇಸ್ಕೊಲಾ ಬ್ಯಾಗ್ ವ್ಹಡ್ ಜಾಲಾಂ
ಬುಕಾಂ ಸವೆಂ ಲಿಕ್ಣಿ ಆಸಾ
ತಶೆಂ ಫಾತರ್, ಕೊಯ್ತಿ, ತಲ್ವಾರ್
ಆನಿ ಅಪ್ರೂಪ್ ಪಿಸ್ತುಲ್!
ಭುತಿಯೆ ಸಾಂಗಾತಾ
ರೇಂವ್, ಸುರಿ ಆನಿ ಕಲ್ಲರ್...
ಆದಿಂ ಬುಕಾಂ ಥಾವ್ನ್‌ಚ್ ಲಿಸಾಂವ್
ಆಜ್ ಕೊಯ್ತಿ, ತಲ್ವಾರ್ ಆನಿ ಫಾತರ್
ಹಾಡ್ಲ್ಯಾರ್ ಮಾತ್ರ್ ಬೆಸಾಂವ್...
ಇಸ್ಕೊಲ್ ಶಿಕ್ಷಕ್ ಥೊಡೆ ಜಾಲ್ಯಾತ್ ಭಕ್ಷಕ್
ನೇತಾ ಜಾಲ್ಯಾತ್ ದಾತಾರ್
ದ್ವೇಷ್, ಗಾಳಿ ಆನಿ ಮೊಸೊರ್
ಕರ‍್ತಾ ಆಮ್ಚೆಂ ಬಳ್ ಕಮರ್.
ಆಜ್ ಇಸ್ಕೊಲಾ ಪರಿಕ್ಷೆಂತ್
ಕೆದ್ನಾಂಯ್ ಹಾಂವ್ ಪಾಸ್
ದೆಕುನ್ ಭೊಂವ್ತಾಂ ಬೆಕಾರ್
ಲಿಸಾಂವಾಂ ನಿಬಾನ್ ಧರ್ಮಾ ಬೊಬೆನ್
ಇಸ್ಕೊಲ್ ಜಾಲಾಂ ಉಜ್ಯಾ ಕಿಟಾಳ್
ಆನಿ ಗಾಂವಾಂತ್ ಭರ‍್ಲಾ ಕಾಳೊ ಧುಂವರ್!
-ಪ್ರಸನ್ನ್ ನಿಡ್ಡೋಡಿ
संपादकीय:
शिक्षणाचो काळो धुंवर
आयच्या दिसा शाळेंनी शिकोंवच्या आमच्या शिक्षणाची वाट कशी घुंवल्या, आमचीं भुरगीं शिक्षणाच्या नांवार कितें शिकून आसात म्हळ्ळें हे कवितेद्वारीं प्रसन्न निड्डोडी सांगता.
एका तेंपार शिक्षकान विद्यार्थीक एक थापड मारलें तर, आनी भुरग्यांनी ही गजाल घरा येवन सांगली तर, ’तुका आनी दोन पडजाय आसल्ले’ अशें आवय बापय सांगतालीं. आज शिक्षकान विद्यार्थिचेर हात उकल्लो तर, शिक्षकाचेर हल्लो चलोवंक आवय बापय फाटीं सरनांत.
असल्या एके परिस्थितिंत आमचें शिक्षण उस्मडताना, इस्कोलाच्या बॅगांनी सुरी, कोयती, पिस्तुल्यो येनासतां रावतीत? हो काळो धुंवर नितळ करचो तरी कसो?
- मेल्विन रोड्रीगस
कविता:
इस्कोलाच्या बॅगांत
ल्हानपणार म्हज्या
इस्कोलाच्या ल्हानश्या बॅगांत
बूक, स्लेट आनी लिकणी मात्र
भुती एका खांदार तर
इस्कोला बॅग आन्येकार.
मैलांची वाट चलून तरी
शिक्षक ते गुरू-दोतोर
लिसांवां सवें शिक्षणाचीं मौल्यां
आनी फुडाराची जब्बोर आशा
आसली तकलेंत फिचार.
आज -
इस्कोला बॅग व्हड जालां
बुकां सवें लिकणी आसा
तशें फातर, कोयती, तलवार
आनी अपरूप पिस्तूल!
भुतये सांगाता
रेंव, सुरी आनी कल्लर...
आदीं बुकां थावनच लिसांव
आज कोयती, तलवार आनी फातर
हाडल्यार मात्र बेसांव...
इस्कोल शिक्षक थोडे जाल्यात भक्षक
नेता जाल्यात दातार
द्वेष, गाळी आनी मोसोर
करता आमचें बळ कमर.
आज इस्कोला परीक्षेंत
केदनांय हांव पास
देकून भोंवतां बेकार
लिसांवां निबान धर्मा बोबेन
इस्कोल जालां उज्या किटाळ
आनी गांवांत भरला काळो धुंवर!
-प्रसन्न निड्डोडी