ಸಂಪಾದಕೀಯ್:
ಕಾಳೊಕಾಂತ್ಲ್ಯೊ ಗಜಾಲಿ ಉಜ್ವಾಡಾಂತ್ ಆಮ್ಚೆ ಸಾಂಗಾತಾ ವಾಂಟುನ್ ಘೆತಾನಾ
ಥೊಡ್ಯೊ ಲಿಪ್ತ್ಯೊ ಗಜಾಲಿ ಉಗ್ತ್ಯಾನ್ ಸಾಂಗ್ತಾನಾ ಉಸ್ತುರ್‍ಯಾಂ ವಚೊಂಕ್ ಪುರೊ. ಆಜ್ಯಾಪ್ ನಾ. ಮನ್ಶಾಕ್ ಜಿವಿತಾಂತ್ಲ್ಯೊ ಸದಾಂಚ್ಯೊ ಜಾಯ್ತ್ಯೊ ಗಜಾಲಿ ಉಜ್ವಾಡಾಂತ್ ಪಳೆಂವ್ಕ್ ಭ್ಯೆಂ. ಅಸಲೆ ಸಂಗ್ತಿಂಕ್ ಕಾಳೊಕಾಚೆಂ ಆಶೀರ್ವಾದ್ ಜಾಯ್ಜಾಯಿಚ್. ಪುಣ್ ಹೆ ಕವಿತೆಂತ್ಲೊ ನಾಯಕ್, ಕಾಳೊಕಾಚೊ ದುಸ್ಮಾನ್. ಮನ್ಶಾಚ್ಯಾ ಮನಾಂಕ್ ಮಾಂಡ್‌ಲ್ಲ್ಯಾ ಕಾಳ್ಯಾ ಕುಪಾಂಚೊ ದುಸ್ಮಾನ್. ತೊ ಉಜ್ವಾಡಾಂತ್ ಜಿಯೆತಾ ದೆಕುನ್, ಹೆರಾಂನಿ ಕಾಳೊಕಾಂತ್ ಉಚಾರ್‍ಚ್ಯೊ, ಆಧಾರ್‍ಚ್ಯೊ ಗಜಾಲಿ ತೊ ಬಿಂದಾಸ್ ಉಚಾರ್‍ತಾ. ತಾಕಾ ತಾಂತುಂ ಕಸಲೋಯ್ ಫರಕ್ ಪಡನಾ.
ಟೈಟಸ್ ನೊರೊನ್ಹಾ ಅಪ್ರೂಪಾನ್ ಬರಯ್ತಾ ತರೀ, ತಾಚ್ಯಾ ಉಗ್ತ್ಯಾಪಣಾಕ್ ಲಾಗೊನ್ ಫಾಮಾದ್. ಪಾಟ್ಲ್ಯಾ ದಿಸಾಂನಿ ಮಂಗ್ಳುರಾಂತ್ ಚಲ್‌ಲ್ಲ್ಯಾ ವಿವಿಧ್ ಭಾಸಾಂಚ್ಯಾ ಕವಿಸಮ್ಮೇಳನಾಂತ್ ಸರ್ವಯ್ ಲೊಕಾಕ್ ಪಿಶ್ಯಾರ್ ಘಾಲ್ಲಿ ಕೀರ್ತ್ ತಾಚಿ. `ಜಾಗೆ ಕವಿ' ಪಂಗ್ಡಾಚಿ ಸುರ್‍ವಾತೆಚ್ಯಾ ದಿಸಾಂನಿ ಕವಿತೆಚೊ ಪಾವ್ಸ್ ಸರಾಗ್ ವೊತುಂಕ್ ಸಹಕಾರ್ ದಿಲ್ಲ್ಯಾ ಕವಿಂ ಪಯ್ಕಿ ತೋಯ್ ಎಕ್ಲೊ.
ಮಂಗ್ಳುರಾಂತ್ ಆನಿ ಲಾಗ್ಶಿಲ್ಯಾ ಗಾಂವಾಂನಿ ಆಪ್ಲೆ ಖಾಶೆಲೆ ಶೈಲೆನ್ ಕವಿತಾಗೋಷ್ಟಿ ಚಲವ್ನ್ ವೆಲ್ಲೊ ಟೈಟಸ್ ನೊರೊನ್ಹಾ ಜನೆರಾಂತ್ ಚಲ್ಚ್ಯಾ ಕವಿತಾ ಫೆಸ್ತಾಂತ್ಲೆ ಕವಿತಾಗೋಷ್ಟಿಚೆಂ ಸುಂಕಾಣ್ ಧರ್‍ತಾ ತಿ ಗಜಾಲ್ ಖುಶೆಚಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮ್ಚೆ ಮಧ್ಲಿ ಗಜಾಲ್, ತುಮ್ಚೆ ಮಧೆಂ ಇಲ್ಲಿ
ಆಮ್ಚೆಂ ಕಾಜಾರ್ ಪಾತ್ಯೆಣೆರ್
ಆನಿ ಸಮ್ಜಣೆರ್ ಆಸಾ.
ತೆಂ ಮ್ಹಾಕಾ ಪಾತ್ಯೆನಾ
ಹಾಂವ್ ತಾಕಾ ಸಮ್ಜನಾ
ಹಾಂವ್ ಆನಿ ತೆಂ
ಗಿರೇಸ್ತ್‌ಕಾಯೆಕ್ ಜಾಂವ್
ವಿಲಾಸಿ ವಸ್ತುರಾಂಕ್ ಜಾಂವ್
ಭಿಲ್ಕುಲ್ ಮೋಲ್ ದೀನಾಂವ್
ಆಮ್ಕಾಂ ಖಬರ್ ಆಸಾ
ಜಿವಿತಾಂತ್ ಬರ್‍ಯೊ ಸಂಗ್ತಿ ವಿಣ್ಗ್ಯೊಚ್ ಆಸ್ತಾತ್.
ವಯಾಗ್ರಾ ಆತಾಂ ಪಾವ್ಡರಾಂತ್ ಮೆಳ್ತಾ
ಮ್ಹಾಕಾ ಆನಿ ತಾಕಾ ಆತಾಂ ತಾಚಿ ಗರ್ಜ್ ನಾ
ಚಾಯೆಂತ್ ಘಾಲುನ್ ಪಿಯೆವ್ಯೆತಾ
ರೂಚ್ ಕಶೀಯ್ ಚಡ್ ಜಾತಾ
ಬಿಸ್ಕಿಟ್ ಬುಡಯ್ಲ್ಯಾರ್, ಮೋವ್ ಪಡೊನ್
ಖಿರೊನ್ ವಚನಾ.
ಆಮಿ ದೊಗಾಂಯ್ ದಿಸಾಕ್
ಏಕ್ ಪಾವ್ಟಿಂ ತರೀ
ಎಕಾ ಪಾಂಯಾನ್ ರಾವ್ತಾಂವ್
ನಿರ್ವೊಗ್ ನಾಸ್ತಾನಾ,
ದುಸ್ರೆಂ ಕೆನ್ನಾಂಯ್ ನ್ಹಯ್
ಪ್ಯಾಂಟ್ ಘಾಲ್ತಾನಾ.
ನ್ಯೂಟನಾಚೆಂ ಕಾನೂನ್ ಆಮ್ಕಾಂ
ಲಾಗು ಜಾಯ್ನಾ, ತೆಂ ಬಗ್ಲೆನ್ ಆಸ್ತಾನಾ
ಗ್ರ್ಯಾವಿಟೇಶನಾಕ್ ಲಾಗೊನ್
ಸಗ್ಳ್ಯೋಯ್ ಸಂಗ್ತಿ ಸಕಯ್ಲ್ ದೆಂವ್ತಾತ್
ತೆಂ ಆಮಿ ಪಾತ್ಯೆನಾ.
ಪಯ್ಲೆಂ ಆಮಿ ಚಿಂತ್ಲೆಂ
ದೊನಾಂ ಭಿತರ್ ಏಕ್ ಬರೆಂ
ಆತಾಂ ಆಮ್ಕಾಂ ಖರೆಂಚ್ ಕಳ್ಳಾಂ
ಮೊಗಾರ್ ಪಡೊನ್ ಕಾಜಾರ್ ಜಾಂವ್ಚೆಂ
ವಾ ಕುಟ್ಮಾನ್ ಮೆಳೊನ್ ಕಾಜಾರ್ ಕರ್‍ಚೆಂ
ಪುರಾಯ್ ಭೆಷ್ಟೆಂ
ಆಮಿಂಚ್ ವಚೊನ್ ಬಾಂಯ್ತ್ ಉಡ್ಲ್ಯಾರೀಯ್
ಮೊರ್‍ಚೆಂ ಆಮಿಂಚ್ ದೊಗಾಂನಿ
ಮ್ಹಾಲ್ಘಡ್ಯಾಂನಿ ಮ್ಹಳಾಂ ಕಾಜಾರ್ ಮ್ಹಳ್ಯಾರ್
ಏಕ್ ಸಂಸ್ಥೊ. ಪುಣ್ ಹಾಂವ್ ಮ್ಹಣ್ತಾಂ
ಕೊಣಾಕ್ ಜಾಯ್ ಸಂಸ್ಥ್ಯಾಂತ್ ಜಿಯೆಂವ್ಕ್?
ಮ್ಹಜಿ ಬಾಯ್ಲ್ ವಿಚಾರ್‍ತಾ ಮಧೆಂ ಮಧೆಂ
ಜೀನ್ಸ್ ಪ್ಯಾಂಟ್ ಘಾಲುಂ?
ಹಾಂವ್ ಮ್ಹಣ್ತಾಂ ನಾಕಾ ಕೊಣ್ಣಾ
ಲೋಕ್ ಕಿತೆಂ ಮ್ಹಣ್ತಾ?
ಧುವ್ ಮ್ಹಜಿ ಆವಯ್ ಲಾಗಿಂ
ಮಾಮ್ಮಾ ಮಿನಿಸ್ಕರ್ಟ್ ನ್ಹೆಸೊಂ?
ಆವಯ್ ಮ್ಹಣ್ತಾ
ಕಿತೆಂ ನ್ಹೆಸ್, ಪುಣ್ ಕಿತೆಂ ತರೀ ನ್ಹೆಸ್ ಪುತಾ.
ಆಮ್ಕಾಂ ಭುರ್‍ಗೆಂ ಜಾಲ್ಲೆಂಚ್
ಘರಾ ಆಮ್ಚ್ಯಾ ದೂಧ್ ಜಾಲೆಂ
ಮಾಜಾರ್ ಚೊರೊನ್ ಪಿಯೆನಾ
ಹುನ್ ಕರ್‍ಚಿ ಗರ್ಜ್ ನಾ
ಇxಠಿiಡಿಥಿ ಆಚಿಣe ನಾ
ನ್ಯಾಚುರಲ್ ಪ್ಯಾಕಿಂಗ್
ಎಕಾಕ್ ಏಕ್ ಫ್ರೀ
ವ್ಹಡ್ಲಿ ದೊರಿ ಗಳ್ಯಾಕ್ ಬಾಂಧುನ್
ಫೆನಾಕ್ ಉಮ್ಕಾಳ್ಳ್ಯಾರ್
ಏಕ್‌ಚ್ ಪಾವ್ಟಿಂ ಮೊರ್‍ಯೆತೆಂ
ಧಾಕ್ಟಿ ಶಿಂಕಳ್ ಹಾತಾಂತ್ ಧರುನ್
ಕಾಜಾರಾ ದಿಸಾ ಬಾಯ್ಲೆ ಗಳ್ಯಾಕ್
ಬಾಂದ್ಲಿ ಪಳೆ, ಆತಾಂ,
ಇಲ್ಲೊ ಇಲ್ಲೊ ಸದಾಂ ಮೊರ್‍ತಾಂ.
-ಟೈಟಸ್ ನೊರೊನ್ಹಾ, ತಾಕೊಡೆ