ಸಂಪಾದಕೀಯ್:
ಬೊಕ್ಡೆಚ್ಯಾ ಬಿಟಿಯಾಂನಿ ಮೊತಿಯಾ ಸೊದ್ಚೆ ಮನೀಸ್
ಖಂಯ್ಚೆ ಭಾಶೆಚ್ಯಾ ಸಾಹಿತ್ಯಾಂತ್ ವಿಮರ್ಸೊ ಆಸಾ, ತೆ ಭಾಶೆಚೆಂ ಸಾಹಿತ್ಯ್ ಗಿರೇಸ್ತ್ ಆಸ್ತಾ. ವಿಮರ್ಶಕ್ ನಾತ್‌ಲ್ಲೆ ಜಾಲ್ಯಾರ್ ಬರಯ್ತಲೆ ಭೊರವ್ನ್‌ಚ್ ಆಸ್ತೆ! ಕೊಂಕಣಿ ಭಾಶೆಂತ್ ವಿಮರ್ಶಕ್ ಭೋವ್ ಉಣೆ. ದೆಕುನ್ ಭೊರಯಿಲ್ಲೆಂ ಇಲ್ಲೆಂ ಚಡ್ ದಿಸ್ತಾ. ತ್ಯಾ ದೆಕುನ್ ಆಮ್ಚ್ಯಾ ವಾಚ್ಪ್ಯಾಂನಿ ಕೊಡು ಸಂಕ್‌ಪಾಷಾಣ್ ಯಾ ಮಾತ್ತಿ ಗೊಬೊರ್ ಖಾಂವ್ಚೊ ಕಿತ್ಯಾಕ್ ಮ್ಹಣೊನ್ ವಾಚ್ಚೇಂಯ್ ಬಂಧ್ ಕೆಲಾಂ.
ತಶೆಂ ಮ್ಹಣೊನ್ ಸಗ್ಳೆ ವಿಮರ್ಶಕ್ ಹೆಳ್‌ಲ್ಲೆ ಆಸನಾಂತ್. ತೆ ಬೊಕ್ಡೆಚ್ಯಾ ಬಿಟಿಯಾಂನಿ ಮೊಲಾಧಿಕ್ ಮೊತಿಯಾಂ ಸೊದ್ತಾತ್ - ಗರ್ಜ್ ನಾಸ್ತಾಂ, ವೇಳ್ ಆಸಾ ದೆಕುನ್. ತಾಂಚೆಂ ಗುಸ್ಪಡ್ ಗೊಂದೊಳಾಂಚೆಂ ರಾಜ್. ತೆ ಉಜ್ವಾಡಾಂತ್ ಆಸ್ಲಲ್ಯಾಂಕ್ ಕಾಳೊಕಾಕ್ ವ್ಹರ್‍ನ್ ಪಾಯ್ತಾತ್ ಆನಿ ಕಾಳೊಕಾಂತ್ ಆಸ್ಲಲ್ಯಾಂಕ್ ಪಾತಾಳಾಕ್!
ಅಸಲ್ಯಾ ವಿಮರ್ಶಕಾಂಚೆಂ ಭ್ಯೆಂ ಹೆ ಕವಿತೆಂತ್ಲೊ ನಾಯಕ್ ಉಜಾರ್ ಕರ್‍ತಾ ಆನಿ ತೆಂ ಭೋವ್ ಶಾಣೆ ರಿತಿನ್ ಕವಿ ರೊಬರ್ಟ್ ಫೆರ್ನಾಂಡಿಸಾನ್ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿಚೆಂ ಶಿಂದಪ್
"ಕವಿತೆಂತ್ ಎಕಾ ಮ್ಹಜ್ಯಾ
ಕೊಂಬೊ ಕೊಂಬಿ ಸಂಗಿಂ ಖೆಳ್ಳಿಂ
ಕೊಂಬ್ಯೆಕ್ ಆಯಿಲ್ಲೊಚ್ ಗುರ್ವಾಚಾರ್
ಡಜನ್‌ಭರ್ ತಾಂತ್ಯಾಂ ಮೆಳ್ಳಿಂ
ತೆಲಾ-ತುಪಾನ್ ಭಾಜ್‌ಲ್ಲಿಂ
ಪಾವ್ಲಿಂ ಪೊಟಾಂತ್ ಎಎಕ್ಲ್ಯಾಂಚ್ಯಾ
ರೊವಾಣೆಕ್ ಆಯಿಲ್ಲೆ ಕೊಂಬ್ಯೆಕ್
ಧಾಂವ್ಡಾವ್ನ್ ದಾಕಯ್ಲಿ ದುರ್ಧಶಾ
ಕೊಂಬಿ ಬಾವ್ಡಿ ಕಷ್ಟಾಂತ್ ಪಡ್ಲಿ
ಇಲ್ಲಿ ಉಡ್ಲಿ ಇಲ್ಲಿ ರಡ್ಲಿ
ಕರ್‍ಚೆಂ ಕಿತೆಂ ನೆಣಾಸ್ತಾಂ
ಕೊಂಬ್ಯಾ ಸರ್ಶಿಂ ಪೋಳ್ನ್ ಧಾಂವ್ಲಿ"
ಛೆ! ನಾಕಾಸ್ಲಿ ಹಿ ಕವಿತಾ ಗಿರಾಂತ್!
ಕವನ್ ವಿಮರ್ಶಕಾಂ ಹಾತಾಂತ್
ದಿಷ್ಟಿಕ್ ಪಡ್ಲ್ಯೊ ಖಂಯ್ ತಾಂಕಾಂ
ಇಮಾಜ್ಯೊ ಕೊನ್ಶಾ ಕೊನ್ಶಾಂತ್
ಕೋಣ್ ಮ್ಹಣಾಲೆ ಕವಿ ಹಾಂಗಾ
ನಿರಾಶ್‌ವಾದ್ ಪಾಚಾರ್‍ತಾ
ಮನ್ಶಾಪಣಾ ಮೊಲಾಂ ದಯಾ-
ದಾಕ್ಷೆಣ್ ನಾಸ್ತಾಂ ಪುರ್‍ತಾ
ಕೊಣಾಕ್ ದಿಸೊನ್ ಆಯ್ಲೆಂ ಹಾಂತುಂ
ಅಸ್ಕತ್ಯಾಂಚೆಂ ಶೋಷಣ್
ಕೊಂಬ್ಯೆ ಹಕ್ಕಾಂ ಕರುನ್ ಇನ್ಕಾರ್
ಬಂಡವಾಳ್‌ಶಾಹಿ ಪೋಷಣ್
ಥೊಡೆ ಸಾಂಗಿ ಕವಿತೆಂತ್ ಹ್ಯಾ
ಪೊಳ್ಕುರ್‌ಪಣ್ ಝಳ್ಕತಾ
ಬಂಡಾಯ್ ದಿಸ್ತಾ ತರೀ ಕವಿ
ಸಲ್ವಣ್ ವೊಳ್ಕೊನ್ ಘೆತಾ
ಜವಾಬ್ದಾರಿ ಮಾರ್ನ್ ಚುಕಾರಿ
ಕವಿ ಜಾಲಾ ಶಾಣೊ
ವಾಟೆ-ಕಾಂಟೆ ಕಾಡ್ಚ್ಯಾ ಬದ್ಲಾಕ್
ಘಾಲುಂಕ್ ದೀವ್ನ್ ವ್ಹಾಣೊ
ಕೋಣ್ ಸಾಂಗಿ ಹಾಂತುಂ ಬರ್ಪೂರ್
ಉಪ್ಯೆತಾ ಕರುಣಾರಸ್
ಎಎಕ್ಲ್ಯಾಚಿಂ ಉತ್ರಾಂ ಆಯ್ಕೊನ್
ಯೆತಾ ಮ್ಹಾಕಾ ಖರಸ್
ಥೊಡೆ ಸಾಂಗಿ ಅಪ್ರೂಪ್ ಶೈಲಿ
ಹಿ ಏಕ್ ಅದ್ಭುತ್ ಕೃತಿ
ಕೋಣ್‌ಚ್ ನೆಣಾ ನಾ ಕಾಂಯ್ ಖಾಸ್
ಶಿವಾಯ್ ಗೊಬೊರ್ ಮಾತ್ತಿ
ಕವಿತೆಂತ್ ಹ್ಯಾ ಕಿತೆಂ ವಿಶೇಸ್?
ಸೊಧುನ್ ಆಸಾಂ ಆಜೂನ್
ವಿಮರ್ಶಕಾಂಕ್ ಫುಡ್ ಕರುಂಕ್
ತಾಂತ್ಯಾಂ ಖಾತಾಂ ಭಾಜುನ್!
- ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್, ದುಬಾಯ್