ಸಂಪಾದಕೀಯ್:
ಕೊಂಕಣಿ ಗೀತ್‌ಕಾರ್, ಕವಿ ಮಿಕ್‌ಮ್ಯಾಕ್ಸ್ ಸಾಸಣ್ ಸುಖಾ ತೆವ್ಶಿಂ!
ಕೊಂಕಣಿ ಗೀತ್‌ಕಾರ್, ಕವಿ, ನಾಟಕ್‌ಕಾರ್, ನವಲಿಕಾಂಗಾರ್, ನವಲ್‌ಕಾರ್, ಪತ್ರ್‌ಕರ್ತ್ ಮಿಕ್‌ಮ್ಯಾಕ್ಸ್ ಹ್ಯಾಚ್ ಎಪ್ರಿಲಾಚೆ ಚೊವೀಸ್ ತಾರಿಕೆರ್ ಥೊಡೆ ಕಾಳಾಚೆ ಅಸ್ವಸ್ಥ್‌ಕಾಯೆ ಉಪ್ರಾಂತ್ ಮಂಗ್ಳುರ್‍ಚ್ಯಾ ಫಾ. ಮುಲ್ಲರ್‍ಸ್ ಆಸ್ಪತ್ರೆಂತ್ ಅಂತರ್‍ಲೊ. ಸರ್‍ತಾನಾ ತಾಕಾ ಪನ್ನಾಸ್ ಆನಿ ಸ ವರ್‍ಸಾಂ ಪ್ರಾಯ್. ತೊ ಆಪ್ಲಿ ಪತಿಣ್ ಹೆಲೆನ್ ತಶೆಂ ದೊಗಾಂ ಭುರ್ಗ್ಯಾಂಕ್ -ಕರೀಶ್ಮಾ ಆನಿ ಕರಣಾಕ್ ಸಾಂಡುನ್ ಸಾಸ್ಣಾಚ್ಯಾ ಸುಖಾತೆವ್ಶಿಂ ಗೆಲಾ.
ಮಿಕ್‌ಮ್ಯಾಕ್ಸಾಚೆಂ ಸಂಪೂರ್ಣ್ ನಾಂವ್ ಮೈಕಲ್ ಮ್ಯಾಕ್ಸಿಮ್ ಡಿ'ಸೋಜಾ. ತಾಚ್ಯಾ ಬಾಪಾಯ್ಚೆಂ ನಾಂವ್ ಪಾವ್ಲ್ ಡಿ'ಸೋಜಾ ತರ್ ಆವಯ್ಚೆಂ ನಾಂವ್ ಫ್ಲೋರಿನ್. ತಾಂಚ್ಯಾ ನೋವ್ ಭುರ್‍ಗ್ಯಾಂ ಪಯ್ಕಿ ಮಿಕ್ಕಿ ಎಕ್ಲೊ. ಜಲ್ಮಾನ್ ಬಜ್ಪ್ಯಾಂಚೊ ಮಿಕ್ಕಿ ಲ್ಹಾನ್ ವ್ಹಡ್ ಜಾಲ್ಲೊ ಇಜಯಾಂತ್. ನವಭಾರತ್ ಕನ್ನಡ್ ದಿಸಾಳ್ಯಾಂತ್ ಸಹಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲ್ಯಾ ಮಿಕ್‌ಮ್ಯಾಕ್ಸಾನ್ 'ಏರ್ ಇಂಡಿಯಾ'ಚ್ಯಾ ಓಮನ್ ಶಾಖ್ಯಾಂತ್ ವಾವ್ರ್ ಕೆಲಾ. ಕನ್ನಡಾಂತ್ ತಾಚೊ ಉಕಲ್ಲಲೊ ಹಾತ್.
ಮ್ಹಜೆ ಭೋವ್ ಲ್ಹಾನ್ ಪ್ರಾಯೆರ್ ಮಿಕ್ಕಿಕ್ ಹಾಂವೆಂ ವಿಲ್ಫಿ ನಾಯ್ಟಾಂನಿ 'ಎಮ್ಸಿ' ಜಾವ್ನ್ ದೆಖ್‌ಲ್ಲೊ. ಇಜಯ್ಚ್ಯಾ ಪರಡೆಲಾ ಪಂಗ್ಡಾಂತ್ ತಾಚೆಂ ಮುಕೆಲ್‌ಪಣ್ ಹಾಂವೆಂ ಆಯ್ಕಲ್ಲೆಂ. ಗೀತ್‌ಕಾರ್ ಜಾವ್ನ್ ತಶೆಂ ಗಾವ್ಪಿ ಜಾವ್ನ್‌ಯ್ ಹಾಂವೆಂ ತಾಚೆವಿಶಿಂ ಜಾಣ್ವಿಕಾಯ್ ಜೊಡ್‌ಲ್ಲಿ. ಮಾಗೀರ್ ಭೋವ್‌ಶ್ಯಾ ೧೯೮೩ ಇಸ್ವೆಂತ್ ಮಿತ್ರಾಚೊ ಸಹ-ಸಂಪಾದಕ್ ಜಾವ್ನಾಸ್ತಾಂ ತಾಚಿಂ ಪುಸ್ತಕಾಂ 'ಶನಿ', 'ಭೃಮಿದ್', 'ಮ್ಹಜಿ ವಾಟ್ ಮ್ಹಾಕಾ' ಮ್ಹಜ್ಯಾ ಹಾತಾಂತ್ಲ್ಯಾನ್ ಪಾಶಾರ್ ಜಾವ್ನ್ ಗೆಲಿಂ -ಪ್ರಕಾಶನಾಚೆ ವಾಟೆರ್ ಆಸ್ತಾಂ. ಕಾಂಯ್ ಧಾ ವರ್‍ಸಾಂ ಆದಿಂ ಮಸ್ಕತ್ ಪಾವ್‌ಲ್ಲ್ಯಾ ವೆಳಾರ್ ತಾಚ್ಯಾ ಘರಾ ಆಪವ್ನ್ ವ್ಹರ್‍ನ್ ತಾಚ್ಯಾ ಸಾಹಿತ್ಯಾಚಿ ತಾಣೆ ಮ್ಹಾಕಾ ವೊಳಕ್ ಕರ್‍ನ್ ದಿಲ್ಲಿ. ತ್ಯಾಉಪ್ರಾಂತ್ ಆಮಿ ಚಡ್ ಲಾಗಿಂ ಜಾಲ್ಲ್ಯಾಂವ್. ಆದ್ಲ್ಯಾ ವರ್‍ಸಾ ಇಜಯಾಂತ್ ಆಮಿ ಮೆಳ್‌ಲ್ಲ್ಯಾವೆಳಾರ್ ತಾಚ್ಯಾ ಜಿವಿತಾಚ್ಯೊ ಥೊಡ್ಯೊ ಗೊಂದೊಳಾಭರಿತ್ ಗಜಾಲಿ ಮ್ಹಾಕಾ ಸಾಂಗೊನ್ ತೊ ರಡ್‌ಲ್ಲೊ. ಅಸಲ್ಯಾ ಎಕಾ ಧೀಮಂತ್ ವೆಕ್ತಿಚ್ಯಾ ದೊಳ್ಯಾಂತುನ್ ದುಕಾಂ ದೆಂವ್ಚಿಂ ಪಳೆವ್ನ್ ಹಾಂವ್ ಕಡ್‌ಲ್ಲೊಂ. ತ್ಯಾ ದಿಸಾ ಘರಾ ಸಾಂಗಾತಾ ಬಸೊನ್ ಜೇವ್ನ್ ಕಾಂಯ್ ತೀನ್ ವೊರಾಂ ತರೀ ಆಮಿ ಖರ್ಚಿಲ್ಲಿಂ. ಹ್ಯಾಚ್ ವರ್‍ಸಾ ಜನೆರಾಂತ್ ತಾಚೆಂ ನಾಟಕಾಚೆಂ ಪ್ರದರ್ಶನ್ ಜೆಪ್ಪು ವಠಾರಾಂತ್ ಚಲ್ಚ್ಯಾ ಸಂದರ್ಭಾರ್ ತಾಕಾ ಮೆಳ್‌ಲ್ಲಿ ಘಡಿಚ್ ಮ್ಹಜಿ ನಿಮಾಣಿ ಜಾಯ್ತ್ ಮ್ಹಣ್ ಹಾಂವೆಂ ಲೆಕೊಂಕ್ ನಾತ್‌ಲ್ಲೆಂ.
ತಾಚೊ ತಶೆಂ ತಾಚ್ಯಾ ಕುಟ್ಮಾಚೊ ಲಾಗ್ಶಿಲೊ ಈಷ್ಟ್ ಜಾವ್ನಾಸ್ಚ್ಯಾ ಹೇಮಾಚಾರ್ಯಾನ್ ಶೃದ್ಧಾಂಜಲಿ ಜಾವ್ನ್ ಹಿ ಕವಿತಾ ಲಿಖ್ಲ್ಯಾ. ಕವಿತಾ ಕುಳಾರಾಂತ್ ಮಿಕ್‌ಮ್ಯಾಕ್ಸಾಚಿ 'ಭುರ್ಗೆಂಪಣ್' ಕವಿತಾ ಸದಾಂಕಾಳ್ ಉರ್‍ತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಿಕ್-ಮ್ಯಾಕ್ಸ್ (1950-2006)
ಕೊಂಕ್ಣಿ ಮಾಯೆಚ್ಯಾ ವೀರ್ ಕುಂವರಾ
ತುಂ ಪಾವ್ಲೊಯ್ ದೆವಾ ಘರಾ
ತುಜೊ ಉಗ್ಡಾಸ್ ಧೊಸ್ತಾಲೊ ಆಮ್ಕಾಂ
ಹರ್ ಸಕಾಳಿಂ ಫಾಂತ್ಯಾಪಾರಾ
ವೊರಾನ್ ವೊರಾ ಹರ್ ದೊನ್ಪಾರಾಂ
ತುಜಿ ಸ್ತುತಿ ಹ್ಯಾ ಕೊಂಕ್ಣೀ ಮಾಂಯ್ ಶೆರಾ
ತುಜೆವಿಣೆಂ ವ್ಹಡ್ ಆಕಾಂತ್ ಭೊಗ್ಲಾ
ಸಾಹಿತ್ಯಾಚ್ಯಾ ಹರ್ ಭೊಂವಾರಾ
ಸರ್ಗಾವಯ್ಲ್ಯಾ ಆಂಜ್ ಭಡ್ವ್ಯಾಂನೊ
ತಾಚೆ ಪಯ್ಲೆಂ ಗೆಲೆಲ್ಯಾ ಬೆನೆಟ್, ಚಾಫ್ರಾæ
ಎಟ್ಯೆಲ್, ಗಬ್ಬು, ಬಾಮ್ಸ್, ಜೊಸಾ
ತಾಕಾ ತುಮ್ಚೆ ಸನ್ನಿಧಾನಾಂತ್ ಆಪೊವ್ನ್ ವ್ಹರಾ
ಆಮಿ ಸಾಂಡ್ಲಲೊ ಈಶ್ಟ್ ಆಮ್ಚೊ
ತುಮ್ಚೊ ಸಾಂಗಾತ್ ಜೊಡುಂಕ್ ಪಾವ್ಲೊ
ಜಿಣ್ಯೆಂತ್ ಸದಾಂ ಆಮ್ಸರಿ ತೊ
ಸಾಸ್ಣಿಕ್ ಜಿವಿತ್ ಇತ್ಲೆ ವೆಗಿಂ ಆಪ್ಣಾಂವ್ಕ್ ಪಾವ್ಲೊ
-ಹೇಮಾಚಾರ್ಯ