ಸಂಪಾದಕೀಯ್:
ಗುಜ್ರಿ ಆಂಗ್ಡಿಂತ್ ಟಣ್ ಟಣ್ ಢಣ್ ಢಣ್ ಆನಿ ಮೌನ್
ಬಾರ್ಕುರ್ಚ್ಯಾ ವನಿತಾ ಮಾರ್ಟಿಸಾಚಿ "ಗುಜ್ರಿ ಆಂಗ್ಡಿಚೊ ಧನಿ" ಕವಿತಾ ಪಯ್ಲೆ ಪಾವ್ಟಿಂ ವಾಚ್ತಾನಾ ಗುಜ್ರಿ ಆಂಗ್ಡಿಂತ್ಲಿ ಸದಾಂಚಿ ಏಕ್ ಕಾಣಿ ತಶೆಂ ಭೊಗ್ತಾ ತರೀ, ಗುಂಡಾಯೆನ್ ವಾಚ್ತಾನಾ ಹಿ ಕವಿತಾ ಸಮಾಜಾಚ್ಯಾ ಆರ್ಥಿಕ್, ಸಾಮಾಜಿಕ್ ಆನಿ ನೈತಿಕ್ ವ್ಯವಸ್ಥೆಕ್ ಸವಾಲಾಂ ಘಾಲ್ಚೆಂ ಝಳ್ಕತಾ ಮಾತ್ರ್ ನ್ಹಯ್, ಕಲಾ ಆನಿ ಜಿವಿತಾಚೆರ್ ವಿಸ್ತಾರ್ ವಿಚಾರ್ ಉಬ್ಜಯ್ತಾ. ಹ್ಯೆ ಕವಿತೆಂತ್ಲೊ ತಿಳ್ಚೊ ಬೂಕ್ ಭುಕೆಚಿಂ ಆನಿ ಮನ್ಶಾ ಧರ್ಮಾಚಿಂ ಸತಾಂ ಉಗಡ್ತಾ.
ಮನಿಸ್ ಮ್ಹಳ್ಯಾರ್ ಫಕತ್ ಶಾರೀರಿಕ್ ನ್ಹಯ್. ತಾಕಾ ಕುಡಿಚೆ ಗರ್ಜೆ ಸಂಗಿಂ ಮತಿಚಿ ಆನಿ ಅತ್ಮ್ಯಾಚಿ ಗರ್ಜ್ಯೀ ಆಸಾ. ಪುಣ್ ಏಕ್ ಪ್ರಾಯೆಸ್ತ್ ಮಾಂಯ್ "ಮ್ಹಜಿ ಭುಕ್ ಥಾಂಬುಂಕ್ ಕಿತೆಂ ತರೀ ಕರ್ ರೇ ಪುತಾ" ಮ್ಹಣ್ ಗುಜ್ರಿ ಆಂಗ್ಡಿಚ್ಯಾ ಧನ್ಯಾಲಾಗಿಂ ವಿಚಾರ್ತಾನಾ ಸ್ವಶ್ಟ್ ಜಾತಾಕೀ ಭುಕೆ ಮುಕಾರ್ ಮನ್ಶಾಕುಳಾಕ್ ಜಾಗ್ರುತ್ ಕರ್ಚಿ ಕಲಾ ವಾ ತತ್ವಜ್ಞಾನ್, ಕಿತೆಂಚ್ ಮಹತ್ವಾಚೆಂ ನ್ಹಯ್ ಜಾತಾ. ಪವಿತ್ರ್ ಉತ್ರಾಕ್ ದರ್ವಡ್ ನಾ. ಭುಕೆಲ್ಲ್ಯಾ ಮನ್ಶಾಚ್ಯಾ ಅತ್ಮ್ಯಾ ದಾರಾಲಾಗಿಂ ತೆಂ ಶಾಂತ್ಪಣಿಂ ರಾಕೊನ್ ರಾವ್ತಾ. "ಮಾನ್ ಆನಿ ಗೌರವಾನ್" ಆಂಗ್ಡಿಚ್ಯಾ ಧನ್ಯಾಕ್ ಕವಿ ಉಬೆಂ ರಾವಯ್ತಾ. ಹಿ ಆಸಾ ಬುಧ್ವಂತ್ ಕವಿಚಿ ನೀತ್! ಹೊ ಮಾನ್ ಆನಿ ಗೌರವ್ ಆಸಾ, ಪಯ್ಲೆಂ, ಭುಕೆಚ್ಯಾ ವಾಸ್ತವಾಕ್ ಆನಿ ಉಪ್ರಾಂತ್ ಕಲಾತ್ಮಕ್ ಮೊಲಾಂಕ್. ಭುಕೆಕ್ ದೊನ್ಶಾಂಚೊ ನೋಟ್ ಧನಿ ದಿತಾ ತರ್ ಆನಿ ಕಲೆಕ್ ತಶೆಂ ಜಾಣ್ವಾಯೆಕ್ "ಜಾಯ್ನಾ ಮ್ಹಜ್ಯಾನ್ ಮೋಲ್ ಬಾಂಧುಂಕ್" ಮ್ಹಣ್ ಧನಿ ಖಾಲ್ತೊ ಜಾತಾ. ಭುಕೆಕ್ ಆನಿ ಕಲಾತ್ಮಕ್ ಮೊಲಾಂಕ್ ಜೊಕ್ತೊ ಮಾನ್ ಆನಿ ಗೌರವ್ ದೀವ್ನ್ ಆಮ್ಚಿ ನಾಗರಿಕತಾ ಸಾಂಬಾಳುಂಕ್ ಗರ್ಜ್ ಆಸ್ಚೆಂ ಖರೆಂ ವಿಧಾನ್ ಹೆಂ. ತೆದ್ನಾಂ ಮಾತ್ರ್ ತಿಳ್ಚ್ಯಾ ಬುಕಾಚ್ಯಾ ದೊಳ್ಯಾಂ ಹುಜ್ರಿಂ, ಗುಜ್ರಿ ಆಂಗ್ಡಿಚೊ ಧನಿ ವ್ಹಡ್ಲೊ ಆನಿ ವ್ಹರ್ತೊ ಜಾತಾ. ನಾತರ್ ಧನಿ ಕಿತ್ಲೊಯ್ "ಟಣ್ ಟಣ್ ಢಣ್ ಢಣ್" ಕರ್ನ್ ನಾಟಕ್ ಕರುಂದಿ, ಇತಿಹಾಸಾಂತ್ ತೊ ನಾಗರೀಕತಾ ಪಿಡ್ಡ್ಯಾರ್ ಕೆಲ್ಲೊ "ಖೊಟೊ" ಜಾವ್ನ್ ಉರ್ತಾ!
ಉಂಚ್ಲ್ಯಾ ಚಿಂತ್ಪಾಚ್ಯಾ ಕವಿ ವನಿತಾ ಮಾರ್ಟಿಸಾಕ್ ಕವಿತಾ ಕುಳಾರ್ ಮಾನಾನ್ ಆನಿ ಗೌರವಾನ್ ಸ್ವಾಗತ್ ಕರ್ತಾ!
-ಆಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ:
ಗುಜ್ರಿ ಆಂಗ್ಡಿಚೊ ಧನಿ
ರಸ್ತ್ಯಾ ದೆಗೆಚ್ಯಾ ಗುಜ್ರಿ ಆಂಗ್ಡಿಂತ್
ಕಲಂಬ್ ಮಾಂಡಲ್ಲೆಂ ತಗಡ್ ಏಕ್
ವಾರ್ಯಾಚ್ಯಾ ಅವ್ಜಡಾಕ್ ಹಾಲ್ತಾನಾ
ಚಿರ್ರ್ ಚಿರ್ರ್ ಟಪ್ ಟಪ್ ಕರ್ನ್ ಗಾಣಾಂ ಗಾಯ್ತಾನಾ
ಗುಜ್ರಿ ಡಬ್ಬ್ಯಾ ಭಿತರ್ ನಿದೊನ್ ಆಸಲ್ಲೊ ಬೂಕ್ ಏಕ್
ಹಳ್ವಾಯೆನ್ ತಕ್ಲಿ ಉಕಲ್ನ್ ತಿಳುಂಕ್ ಲಾಗ್ಲೊ
ಆಪ್ಲ್ಯಾ ಭೊಂವಾರಿಂಚೆ ಗುಜ್ರಿ ಸೊಭಾಯೆಕ್ ಪಳೆಂವ್ಕ್ ಲಾಗ್ಲೊ.
ಗುಜ್ರಿ ಆಂಗ್ಡಿಚೊ ಧನಿ
ವೀಜ್ ದಿವೆ ನಾತಲ್ಲೆ ಆಂಗ್ಡಿಚೆಂ ಶಟರ್ ಉಕಲ್ನ್ ಸರಾರಾಂ ಭಿತರ್ ರಿಗ್ಲೊ
ಸಾರ್ಣಿಖುಂಟೊ ಘೆವ್ನ್ ಥಂಯ್ ಥಂಯ್ ಝಾಡುಂಕ್ ಲಾಗ್ಲೊ
ಖೊಲಿ ಮಾತಿ ಕೋಯ್ರ್ ಆರಾವ್ನ್ ಉಡೊವ್ನ್
ಮಗ್ಗಾಂತ್ಲೆಂ ಉದಕ್ ಧರ್ಣಿರ್ ಶಿಂಪ್ಡಾಂವ್ಕ್ ಲಾಗ್ಲೊ
ಥಂಯಿಂಚ್ ಮುಲ್ಯಾಂತ್ ಪಡಲ್ಲೊ
ಲೊಂಕ್ಡಾಚೊ ಡಬ್ಬೊ ತಾಕಾ ತೀಳ್ನ್ ಪಳೆತಾನಾ
ಧನಿಯಾನ್ ತಾಕಾ ವೋಡ್ನ್ ಹಾಡ್ಲೆಂ
ಉದಕ್ ಶಿಂಪ್ಡಾಯಿಲ್ಲೆ ಧರ್ಣಿರ್ ಬಸಯ್ಲೆಂ
ಆನಿ ಪಳೆತಾಂ ಪಳೆತಾಂ ಪರ್ಮಳಿಕ್ ಅಗರ್ಬತ್ತಿ ತಾಚೆರ್ ಜಳಯ್ಲಿ
ಪೇಂಯ್ಟ್ ಉಕಲ್ನ್ ನಾಗ್ಡೆಂ ಜಾಲ್ಲೆಂ ಲೊಂಕ್ಡಾಚೆಂ ಕದೆಲ್ ವೋಡ್ನ್
ಖಾಂದಾ ವಯ್ಲೆಂ ಬಯ್ರಾಸ್ ತಾಚೆರ್ ದೋಡ್ನ್ ಘಾಲ್ನ್,
ಭಾರಿಚ್ ಗತ್ತಾನ್ ಬಸ್ಲೊ, ಗುಜ್ರಿ ಆಂಗ್ಡಿಚೊ ಧನಿ
ಶುರು ಜಾಲೊ ಆತಾಂ ವ್ಯಾಪಾರ್, ವ್ಯವಹಾರ್!
ಲೊಂಕಾಡ್, ಪ್ಲಾಸ್ಟಿಕ್,
ರಟ್ಟಾಂ ಸಾಂಗಾತಾಚ್ ತಾಚೆಂ ಕಾರ್ಭಾರ್
ಎಕ್ಲೊ ಸೈಕಲಾರ್ ಆಯ್ಲ್ಯಾರ್
ದುಸ್ರೊ ಗೂಡ್ಸ್ ರಿಕ್ಷಾರ್
ತಿಸ್ರ್ಯಾಚಿ ಆಟೋರಿಕ್ಷಾ ಚಿರ್ಡುನ್ ಭರಲ್ಲಿ
ಚೊವ್ತ್ಯಾಚೆ ಸ್ಕೂಟಿಚೆರ್
ಲಾಂಬ್ ರೂಂದ್ ಚಿಲಾಂ ಉಮ್ಕಳ್ತಾಲಿಂ
ಎಕ್ಲ್ಯಾ ಪಾಟ್ಲ್ಯಾನ್ ಎಕ್ಲೊ
ಭರುನ್ ವೊಮ್ತುನ್ ದಿತಾಲೊ
ತುಕುನ್ ಮೊಲಾ ಖಾತಿರ್ ಚವ್ಕಶಿ ಕರ್ತಾಲೊ
ರಾಸ್ ರಾಸ್ ಸಾಮಾನ್,
ಟಣ್ ಟಣ್ ಢಣ್ ಢಣ್ ಕರ್ನ್
ರಾಶಿಂತ್ ಒಟ್ರಾಶೆಂ ಉಡಯ್ತಾಲೊ
ತಿಳ್ಚೊ ಬೂಕ್ ಮಾತ್ರ್
ಧನಿಯಾಚೊ ಆವ್ತಾರ್ ದೆಖ್ತಾಲೊ
ಕಾರ್ಭಾರ್ಪಣ್ ತಾಚೆಂ ಪಳೆವ್ನ್
ಸಗ್ಳೊಚ್ ಕಾಲುಬುಲು ಜಾಲ್ಲೊ
ಪಿಳಿಪಿಳಿ ದೊಳೆ ಧಾಂಪಿನಾಸ್ತಾಂ ಪಳಯ್ತಾಲೊ
ವಸ್ತುಂಚೆಂ ಮೋಲ್, ಲೆಕ್ಕಾಚಾರ್
ಮತಿಂತ್ಚ್ ಆಟಯ್ತಾಲೊ
ತರ್.... ಮ್ಹಜೆಂ ಮೋಲ್ ಕಿತೆಂಗಾಯ್......
ಆಪ್ಣಾಇತ್ಲ್ಯಾಕ್ ಚಿಂತಾಲೊ
ಪಳೆತಾಂ ಪಳೆತಾಂ
ಆತಾಂ ಏಕ್ ಮ್ಹಾತಾರಿ ಮಾಂಯ್
ಚಲುನ್ ಥಂಯ್ಸರ್ ಆಯ್ಲಿ
ಭರಲ್ಲೆಂ ಪರ್ನೆಂ ಚೀಲ್ ಉಮ್ಕಳೊನ್
ಭಿತರ್ ಸರ್ಲಿ
’ತುಜೆಂ ಕಿತೆಂಗೇ ಮಾಂಯ್?’ ವಿಚಾರಿ ಘಡ್ಗಡ್ಯಾ ತಾಳ್ಯಾನ್
'ಹೆ ಥೊಡೆ ಬೂಕ್ ಘೆರೆ ಪುತಾ
ಮ್ಹಜಿ ಭುಕ್ ಥಾಂಬುಂಕ್
ಕಿತೆಂ ತರೀ ಕರ್ರೇ ಪುತಾ'
ಜಾಪ್ ತಿಚಿ ಸವ್ಕಾಸಾಯೆಚಿ, ಪುರಾಸಾಣೆಚಿ
ಗುಜ್ರಿ ಆಂಗ್ಡಿಚೊ ಧನಿ ಸಟ್ಟ್ ಕರ್ನ್ ನಿಟ್ಟ್ ಉಬೊ ಜಾಲೊ
ಚೀಲ್ ತಿಚೆಂ ಘೆವ್ನ್
ಬೂಕ್ ಕಾಡುಂಕ್ ಲಾಗ್ಲೊ
ಏಕ್, ದೋನ್, ತೀನ್... ಒಟ್ಟುಕ್ ಪಾಂಚ್ ಬೂಕ್ ತಿಚ್ಯಾ ಪುತಾಚೆ
ಆನ್ಯೇಕ್ ಮೂಟ್ಭರ್ ನ್ಯೂಸ್ ಪೇಪರಾಂ ತಿಚ್ಯಾ ಘರ್ಕಾರಾಚಿಂ
ಪೂತ್ ,
ಬಾಯ್ಲ್ ಭುರ್ಗ್ಯಾಂಸಂಗಿಂ
ಲಂಡನ್ ಆಸಾ
ಘರ್ಕಾರ್,
ಅಬ್ರಹಾಮ್ ಜಾಕೊಬಾ ಸಂಗಿಂ
ಸರ್ಗಾರ್ ಆಸಾ
ಧನಿ ಆತಾಂ ಮೌನಿ!!
ನಾ ಕಾಂಯ್ ಚವ್ಕಶಿ
ನಾ ಕಾರ್ಭಾರ್ಪಣ್
ಬೂಕ್ ಪೇಪರಾಂ ಆಪ್ಲ್ಯಾ ಹಾತಿಂ ಘೆತ್ಲಿಂ
ಶೀದಾ ವ್ಹರ್ನ್ ,
ತಿಳ್ಚ್ಯಾ ಬುಕಾಚ್ಯಾ ಡಬ್ಬ್ಯಾಂತ್ ದವರ್ಲಿಂ
ನಾ ಟಣ್ ಟಣ್ ಆವಾಜ್
ನಾ ಚರ್ಚಾ ಪ್ರತಿಕ್ರಿಯಾ
ದಿಲೊ ತಾಣೆಂ ತಿಕಾ ದೊನ್ಶಾಂಚೊ ಏಕ್ ನೋಟ್
ಮಾನ್ ಗೌರವಾನ್ ಉಬೊ ರಾವೊನ್ ನೀಟ್
'ಹೆ ಬೂಕ್ ಗುಜ್ರಿ ಬೂಕ್ ನ್ಹಯ್ ಮಾಂಯ್
ತೆ ಹಾಂವೆಂ ಬರ್ಯಾ ವಾಚ್ಪ್ಯಾಂಕ್ ಪಾವೊಂವ್ಕ್ ಜಾಯ್
ಜಾಯ್ನಾ ಮ್ಹಜ್ಯಾನ್ ತಾಂಕಾಂ ಮೋಲ್ ಬಾಂದುಂಕ್
ತಾಂತ್ಲಿ ಜಿಣ್ಯೆಕಥಾ, ಮೌಲ್ಯಾಂ ಸರ್ವಾಂನಿಂ ವಾಚುಂಕ್'
ತಿಳ್ಚೊ ಬೂಕ್ ಆತಾಂ ಅವಾಕ್ಕ್!
ಗುಜ್ರಿ ಆಂಗ್ಡಿಚೊ ಧನಿ ಕಿತ್ಲೊ ಬರೊ
ಮನ್ಶಾಪಣಾನ್ ತೊ ಖರೊ!
- ವನಿತಾ ಮಾರ್ಟಿಸ್, ಬಾರ್ಕೂರ್
संपादकीय:
गुज्री आंगडींत टण टण ढण ढण आनी मौन
बारकूरच्या वनिता मार्टिसाची "गुज्री आंगडीचो धनी" कविता पयले फावटीं वाचताना गुज्री आंगडींतली सदांची एक काणी तशें भोगता तरी, गुंडायेन वाचताना ही कविता समाजाच्या आर्थीक, सामाजीक आनी नैतीक व्यवस्थेक सवालां घालचें झळकता मात्र न्हय, कला आनी जिविताचेर विस्तार विचार उबजयता. ह्ये कवितेंतलो तिळचो बूक भुकेचीं आनी मनशा धर्माचीं सतां उगडता.
मनीस म्हळ्यार फकत शारीरीक न्हय. ताका कुडीचे गर्जे संगीं मतिची आनी आतम्याची गर्जयी आसा. पूण एक प्रायेस्त मांय "म्हजी भूक थांबूंक कितें तरी कर रे पुता" म्हण गुज्री आंगडीच्या धन्यालागीं विचारताना स्पश्ट जाताकी भुके मुकार मनशाकुळाक जाग्रूत करची कला वा तत्वज्ञान, कितेंच महत्वाचें न्हय जाता. पवित्र उत्राक दर्वड ना. भुकेल्ल्या मनशाच्या आतम्या दारालागीं तें शांतपणीं राकोन रावता. "मान आनी गौरवान" आंगडीच्या धन्याक कवी उबें रावयता. ही आसा बुधवंत कविची नीत! हो मान आनी गौरव आसा, पयलें, भुकेच्या वास्तवाक आनी उपरांत कलात्मक मोलांक. भुकेक दोनशांचो नोट धनी दिता तर आनी कलेक तशें जाणवायेक "जायना म्हज्यान मोल बांदूंक" म्हण धनी खालतो जाता. भुकेक आनी कलात्मक मोलांक जोकतो मान आनी गौरव दीवन आमची नागरीकता सांबाळूंक गर्ज आसचें खरें विधान हें. तेदनां मात्र तिळच्या बुकाच्या दोळ्यां हुजरीं, गुज्री आंगडीचो धनी व्हडलो आनी व्हरतो जाता. नातर धनी कितलोय "टण टण ढण ढण" करन नाटक करुंदी, इतीहासांत तो नागरीकता पिड्ड्यार केल्लो "खोटो" जावन उरता!
उंचल्या चिंतपाच्या कवी वनिता मार्टिसाक कविता कुळार मानान आनी गौरवान स्वागत करता!
-आंड्र्यू एल. डिकुन्हा
कविता:
गुज्री आंगडीचो धनी
रसत्या देगेच्या गुज्री आंगडींत
कलंब मांडल्लें तगड एक
वार्याच्या अवजडाक हालताना
चीर्र चीर्र टप टप करन गाणां गायताना
गुज्री डब्ब्या भितर निदोन आसल्लो बूक एक
हळवायेन तकली उकलन तिळूंक लागलो
आपल्या भोंवारींचे गुज्री सोभायेक पळेवंक लागलो.
गुज्री आंगडीचो धनी
वीज दिवे नातल्ले आंगडीचें शटर उकलन सरारां भितर रिगलो
सार्णिखुंटो घेवन थंय थंय झाडूंक लागलो
खोली माती कोयर आरावन उडोवन
मग्गांतलें उदक धर्णीर शिंपडावंक लागलो
थंयिंच मुल्यांत पडल्लो लोंकडाचो डब्बो
ताका तीळन पळेताना
धन्यान ताका वोडन हाडलें
उदक शिंपडायिल्ले धर्णीर बसयलें
आनी पळेतां पळेतां पर्मळीक अगरबत्ती ताचेर जळयली
पेंयट उकलन नागडें जाल्लें लोंकडाचें कदेल वोडन
खांदा वयलें बयरास ताचेर दोडन घालन,
भारीच गत्तान बसलो, गुज्री आंगडीचो धनी
शुरू जालो आतां व्यापार, व्यवहार!
लोंकाड, प्लास्टीक,
रट्टां सांगाताच ताचें कार्भार
एकलो सैकलार आयल्यार
दुसरो गूड्स रिक्षार
तिसर्याची ओटोरिक्षा चिर्डून भरल्ली
चोवत्याचे स्कूटीचेर
लांब रूंद चिलां उमकळतालीं
एकल्या फाटल्यान एकलो
भरून वोमतून दितालो
तुकून मोला खातीर चवकशी करतालो
रास रास सामान,
टण टण ढण ढण करन
राशींत ओट्राशें उडयतालो
तिळचो बूक मात्र
धन्याचो आवतार देखतालो
कार्भारपण ताचें पळेवन
सगळोच कालुबुलू जाल्लो
पिळीपिळी दोळे धांपीनासतां पळयतालो
वस्तुंचें मोल, लेक्काचार
मतिंतच आटयतालो
तर.... म्हजें मोल कितेंगाय......
आपणा इतल्याक चिंतालो
पळेतां पळेतां
आतां एक म्हातारी मांय
चलून थंयसर आयली
भरल्लें पोरनें चील उमकळोन
भितर सरली
’तुजें कितेंगे मांय?’ विचारी घडगड्या ताळ्यान
'हे थोडे बूक घेरे पुता
म्हजी भूक थांबूंक
कितें तरी कररे पुता'
जाप तिची सवकासायेची, पुरासाणेची
गुज्री आंगडीचो धनी सट्ट करन निट्ट उबो जालो
चील तिचें घेवन
बूक काडूंक लागलो
एक, दोन, तीन... वट्ट पांच बूक तिच्या पुताचे
आन्येक मूटभर न्यूस पेपरां तिच्या घर्काराचीं
पूत ,
बायल भुरग्यांसंगीं
लंडन आसा
घरकार,
अब्राहाम जाकोबा संगीं
सर्गार आसा
धनी आतां मौनी!!
ना कांय चवकशी
ना कार्भारपण
बूक पेपरां आपल्या हातीं घेतलीं
शीदा व्हरन,
तिळच्या बुकाच्या डब्ब्यांत दवरलीं
ना टण टण आवाज
ना चर्चा प्रतिक्रिया
दिलो ताणें तिका दोनशांचो एक नोट
मान गौरवान उबो रावोन नीट
'हे बूक गुज्री बूक न्हय मांय
ते हांवें बर्या वाचप्यांक पावोवंक जाय
जायना म्हज्यान तांकां मोल बांदुंक
तांतली जिण्येकथा, मौल्यां सर्वांनीं वाचूंक'
तिळचो बूक आतां अवाक्क!
गुज्री आंगडीचो धनी कितलो बरो
मनशापणान तो खरो!
- वनिता मार्टीस, बारकूर
गुज्री=रद्द (scrap)