ಸಂಪಾದಕೀಯ್:
ಆಶೆಚಿ ನಶಾ ನಾಸಾಕ್ ಕಾರಣ್ ಜಾತಾನಾ
ಆಶಾ ಕೊಣಾಕ್ ನಾ. ಸರ್‍ವಾಂಕ್ ಆಸ್ತಾ. ಪುಣ್ ಆಶೆಕ್ ಗಡ್ ಘಾಲಿನಾಸ್ತಾಂ, ಸದಾಂನೀತ್ ಖರ್‍ಶೆಂವ್ಚೊ ಮನೀಸ್ ವೆಗಿಂಚ್ ನಾಸಾಚೆ ದಾವ್ಲೆಂತ್ ಸಾಂಪ್ಡನಾಸ್ತಾಂ ರಾವನಾ. ಆಶೆಕ್ ಲಾಗೊನ್ ಕುಟಮ್ ಹೊಗ್ಡಾಂವ್ಚಿಂ, ಆಶೆಕ್ ಲಾಗೊನ್ ಜೀವ್ ಪಿಡ್ಡ್ಯಾರ್ ಕರ್‍ಚಿಂ, ಆಶೆಕ್ ಲಾಗೊನ್ ಆಸ್‌ಲ್ಲೆಂ ಆಡ್ವಾಕ್ ಘಾಲ್ಚಿಂ ಮನ್ಶಾಂ ಕಿತ್ಲಿಂ ನಾಂತ್? ಹಿ ಕವಿತಾಯ್ ತೆಂಚ್ ಸಾಂಗ್ತಾ ಆನಿ ನಿಮಾಣೆ ಆಶೆಚಿ ನಶಾ ನಾಸಾಕ್ ಆಪವ್ನ್ ವ್ಹರ್‍ಚೆವಿಶಿಂ ಚತ್ರಾಯ್ ದಿತಾ.
ಕವಿ ಡೊಲ್ಫಿ ಸಿಕ್ವೇರ, ಕುಪ್ಪೆಪದವು ಸಭಾರ್ ತೆಂಪಾ ಉಪ್ರಾಂತ್ ಕವಿತಾ ಕುಳಾರ್ ಸಜಂವ್ಕ್ ಆಯ್ಲಾ. ಅಂತರ್‌ಜಾಳ್ ನ್ಹಯ್ ಜಾಲ್ಯಾರ್‌ಯ್ ಪತ್ರಾಂ ಖಾತೀರ್ ಸರಾಗ್ ಬರವ್ನ್ ಆಸ್ಚೊ ಕವಿ ಕೊಂಕಣಿಚ್ಯಾ ಶೆತಾಂತ್ ಕಾಯಾಮ್ ಠಿಕಾಣೊ ಬಾಂದ್ಚೆವಿಶಿಂ ಆಮ್ಕಾಂ ದುಭಾವ್ ಉರೊಂಕ್ ನಾ. ತಾಚಿ ಹಿ ಆಶಾ ನಶೆಕ್ ಘುಂವ್ಲ್ಯಾರ್‌ಯ್ ಕೊಂಕಣಿಚ್ಯಾ ಬರ್‍ಯಾಕ್‌ಚ್ ಉಪ್ಕಾರೊಂದಿ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಶಾ
ಹಿ ಆಶಾ, ಹ್ಯೊ ಆಶಾ, ಕಾಳ್ಜಾಮನಾಕ್ ಪಿಶ್ಯಾರ್ ಘಾಲ್ಚ್ಯೊ ಆಶಾ
ವಾಟ್ ವಿಸ್ರಾವ್ನ್, ಪಾಟ್ ನಿಸ್ರಾವ್ನ್, ದಿಶಾ ಚುಕಂವ್ಚ್ಯೊ ಧಾರಾಳ್ ಆಶಾ
ಕೆನ್ನಾಂ ಕಶ್ಯೊ ಉಮಾಳ್ತಾತ್, ಕಿತ್ಯಾಕ್ ಕೊಣ್ಣಾ ಉಬಾಳ್ತಾತ್, ಭಾಷಾವಾರ್ ಆಶಾ
ಥೊಡ್ಯಾಂಕ್ ನಾಚಂವ್ಚ್ಯೊ, ಥೊಡ್ಯಾಂಕ್ ನಾಂಚ್ ಕರ್‍ಚ್ಯೊ ಥರಾಥರಾಂಚ್ಯೊ ಆಶಾ
ಸಂಸ್ರಾರ್ ಉಬ್ಚಿ, ಸಂಸ್ರಾಕ್ ಉಬಂವ್ಚಿ, ಮ್ಹಜಿ ಖಾಶಾ ಆಶಾ
ಜಿವಿತ್ ಚಾಕ್ಚಿ, ಸುಕ್ ಜೊಡ್ಚಿ, ಶೆಜ್ರಾಚಿ ಶಿಸ್ತೆಚಿ ಆಶಾ
ಯೆಮ್ಕೊಂಡ್ ಚೊರ್‍ಚಿ, ಲುಸಿಫೆರಾಕ್ ಫಾರ್‍ಚಿ, ಚೊರಾಚಿ ವಿಶಿಷ್ಟ್ ಆಶಾ
ದೆವಾಕ್ ದೆಖ್ಚಿ, ದಯಾ ಭೊಗ್ಚಿ, ನಿತಿವಂತಾಂಚಿ ನಿತಿಚಿ ಆಶಾ
ಮಾತಿಯೆಂತ್ ಖೆಳ್ಚಿ, ಮಾತಿಯೆಕ್ ಖೆಳಂವ್ಚಿ, ಭುರ್‍ಗ್ಯಾಂಚಿ ವಿಶೇಷ್ ಆಶಾ
ಉತ್ರಾಂ ಜೊಕ್ಚಿಂ, ಉತ್ರಾಂತ್ ತುಕ್ಚಿಂ, ಬಾಯ್ಲಾಂಚಿ ಭಾಯ್ಲಿ ಆಶಾ
ರಾತ್ ದೀಸ್ ಸಪ್ಣೆಂವ್ಚಿ, ಸಪ್ಣಾಂತ್‌ಯ್ ಖರ್‍ಶೆಂವ್ಚಿ, ದಾದ್ಲ್ಯಾಂಚಿ ಪಾಶಾಂವಿ ಆಶಾ
ಸರ್ಗಾಕ್ ಭುಕೆಂವ್ಚಿ ಸಾಸ್ಣಾಕ್ ಉಪ್ಯೆಂವ್ಚಿ ಧಾರ್ಮಿಕಾಂಚಿ ಧರ್ಮಾಚಿ ಆಶಾ
ಹಿ ಆಶಾ, ಹ್ಯೊ ಆಶಾ, ಗಡ್ ತಡ್ ಉತ್ರೊನ್ ವೆಚ್ಯೊ ಗಡೀಸ್ ಆಶಾ
ವೊರಾಂ ಲ್ಹಾರಾಂ ಲೆಕಿನಾಸ್ತಾಂ ಉಸ್ಕೆಂವ್ಚ್ಯೊ ಹಾಂಗಾ ಹಜಾರ್ ಆಶಾ
ತುಕಾ ಮ್ಹಾಕಾ ಆಮಾ ಸರ್‍ವಾಂಕ್ ಚಡ್ಚೆ ಪಯ್ಲೆಂ ಆಶೆಚಿ ನಶಾ
ಗರ್ಜೆ ಚತ್ರಾಯ್ ಘೆಂವ್ಕ್ ಉಲೊ, ಪಾವಂವ್ಚ್ಯಾ ಆದಿಂ ಆಮ್ಚ್ಯಾ ನಾಸಾ
-ಡೊಲ್ಫಿ ಸಿಕ್ವೇರ, ಕುಪ್ಪೆಪದವ್