ಸಂಪಾದಕೀಯ್:
ಉದ್ಕಾಬರಿ ಉತ್ರಾಂ, ಬಳಾಧಿಕ್ ಚಿತ್ರಾಂ
ಫುಲಾಂ ಕೊಣೆ ಪಳೆಂವ್ಕ್ ನಾಂತ್? ಪುಣ್ ಕಿತ್ಲ್ಯಾ ಜಣಾಂನಿ ಫುಲಾಂಚ್ಯಾ ಜಿವಿತಾಂತ್ ತಿಳುನ್ ಪಳೆಲಾಂ? ಕಿತ್ಲ್ಯಾ ಜಣಾಂನಿ ಫಕತ್ ಭೃಮರ್ ಜಾವ್ನ್ ಮಾತ್ರ್ ಫುಲಾಂಕ್ ದೆಖ್ಲಾಂ? ಫುಲಾಂ ಸೊಭಿತ್ ವ್ಹಯ್, ಫುಲಾಂ ಪರ್ಮಳಿಕ್ ವ್ಹಯ್. ಆಮಿ ಲೊಕಾಂನಿ ಆಮ್ಚ್ಯಾ ಸ್ವಾರ್ಥಾಕ್ ಸೊಡ್ಲ್ಯಾರ್ ಹೆರ್ ಶೆವೊಟಾನ್ ತಾಂಕಾಂ ಪಳೆಲಾಂ?
ಸಿರಿಲ್ ವಾಸ್ ಪಯ್ಲ್ಯಾನ್ ಪಯ್ಲೆಂ ಕವಿತಾ ಕುಳಾರಾಕ್ ಆಯ್ಲಾ ತರೀ, ತಾಚೆ ಕವಿತೆಂತ್ ಕವಿತಾ ಶೆತಾಂತ್ ಶಾಸ್ವಿತ್ ವಾಟ್ ಝರಯಿಲ್ಲ್ಯಾಂಚಿ ತಾಕತ್ ಝಳ್ಕೆಕ್ ಯೆತಾ. ಸಾದಿ ಉತ್ರಾಂ ತರೀ, ತಿಂ ಉದ್ಕಾಬರಿ ಸರಾಗ್ ವ್ಹಾಳ್ತಾತ್. ತಿಂ ಖಂಯ್ ಜಾಯ್, ಥಂಯ್ ಮಾತ್ರ್ ವೊಣ್ತಿಕ್ ಫಾತರ್ ದವರ್‌ಲ್ಲ್ಯಾಬರಿ ದವರ್‌ಲ್ಲಿಂ ದಿಸ್ತಾತ್. ಮಾಗೀರ್ ನಿಮಾಣ್ಯಾ ಕಡ್ವ್ಯಾಕ್ ಪಾವ್ತಾನಾ ವಾಪರ್‌ಲ್ಲಿಂ ಸಾವ್ಳಿರುಪಾಂ ಕವಿತೆಕ್ ವಿಶೇಸ್ ಸೊಭಾಯ್ ದಿತಾತ್. ಫುಲಾನ್, ಮನ್ಶಾ ಸಂಬಂಧಾಂಲಾಗಿಂ ಆಪ್ಣಾಕ್ ಸರ್ ಕರ್‍ಚೆಂ ಹಾಂಗಾಸರ್ ಭೋವ್‌ಚ್ ವಿಶೇಸ್ ಥರಾನ್ ಚಿತ್ರಾಯ್ಲಾಂ.
ಕವಿಚೆಂ ಯೆಣೆಂ ಕೊಂಕಣಿಚೆಂ ಕವಿತಾಶೆತ್ ಖಂಡಿತ್ ಬಳ್ವಂತ್ ಕರ್‍ತಲೆಂ ಮ್ಹಣ್ಚ್ಯಾಕ್ ಕುಸ್ಕುಟ್ ದುಭಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾತ್ಯೆಂತ್ಲಿಂ ಫುಲಾಂ
ಆಮಿ ಮಾತ್ಯೆಂತ್ ಜಲ್ಮಲ್ಲಿಂ ಫುಲಾಂ
ಪಾವ್ಸಾ-ಉದ್ಕಾನ್ ಆಮ್ಕಾಂ ಕಿತ್ಲೆಂ ಧುಲಾಂ
ಆಮ್ಚೆಂ ಆಪ್ಲೆಪಣ್ ಭೃಮರಾಂನಿ ವೆಲಾಂ
ಸಮಾಧಾನ್ ಆಮ್ಚೆಂ ಕೆದಳಾಚ್ ಗೆಲಾಂ
ಜಲ್ಮಲ್ಲ್ಯಾಂವ್ ಆಮಿ ಕೊಣೆಂಚ್ ಲೆಕಿನಾಸ್ತಾಂ
ವಾಡೊನ್ ಆಯ್ಲ್ಯಾಂವ್ ಆಮಿ ಲೆಕಾಕ್ ನಾಸ್ತಾಂ
ಸುಗಂಧ್ ಪರ್ಮಳಿಕ್ ಆಮ್ಕಾಂ ಮಾಖಿನಾಸ್ತಾಂ
ಮನ್ಶಾಂಕ್ ನಾ ತೃಪ್ತಿ ಆಮ್ಕಾಂ ವಿಕಿನಾಸ್ತಾಂ
ಮೊಗಾನ್ ಕೊಣೇಂಯ್ ಆಮ್ಕಾಂ ಲೆಕ್ಲೆಂ?
ವಾಟೆನ್ ವೆಚ್ಯಾನ್ ಆಮ್ಚೆರ್ ಥುಕ್ಲೆಂ
ಮನ್ ಸಕ್ಡಾಂಚೆಂ ಸೊಭಾಯೆನ್ ಜಿಕ್ಲೆಂ
ತರೀ ಆಮ್ಕಾಂ ಪರ್ಕ್ಯಾಕ್ ವಿಕ್ಲೆಂ
ರಾವೊಂಕ್ ದೀನಾಂತ್ ಆಮ್ಕಾಂ ಝಾಡಾರ್
ವಾಡೊನ್ ಯೆತಾಂ ಕಸ್ಲೊ ನಾ ಫುಡಾರ್
ಧರ್ಣಿರ್, ರುಕಾರ್, ಗುಡ್ಯಾರ್, ಮಾಡಾರ್
ಉಗ್ತೆಂ ಕೆಲ್ಯಾರ್ ತೋಂಡ್ ಪಾಟಿರ್ ಆಡಾರ್
ವಾಡಾವಳ್ ಆಮ್ಚಿ ದೊಳ್ಯಾಂಕ್ ತುಮ್ಚ್ಯಾ ತೊಪ್ತಾ?
ಗರ್ಮೆಂತ್ ತುಮ್ಚೆ ತಕ್ಲಿ ಆಮ್ಚಿ ವೆಗಿಂ ತಾಪ್ತಾ
ಆಬ್ಲೆಸಾಂತ್ ತುಮ್ಚ್ಯಾ ಸೊಭಾಯ್ ಆಮ್ಚಿ ಲಿಪ್ತಾ
ದೆಖ್ತಾಂ ತುಮ್ಕಾಂ ಜೀವ್ ಭಿಂಯಾನ್ ಕಾಂಪ್ತಾ
ಯೆತಾತ್ ಭೃಮರ್ ಆಮ್ಚೆಂ ಮ್ಹೊಂವ್ ಗಿಳುಂಕ್
ಉರ್ಡತಾತ್ ಸ್ತ್ರೀಯೊ-ಚಲಿಯೊ ಆಮ್ಕಾಂ ಮಾಳುಂಕ್
ಚಲೆ-ದಾದ್ಲೆ ಚಿಂತಾತ್ ಆಮ್ಕಾಂ ಪಿಳುಂಕ್
ಕೆದ್ನಾಂ ಶಿಕ್ತಾತ್ ಸೃಷ್ಟೆ ನಿಯಮ್ ಪಾಳುಂಕ್?
ವಾಡ್ಚೆ ವಾಲಿಕ್ ನಜೊ ಜಾಂವ್ಕ್ ಕಸ್ಲೆಂಚ್ ಬಾಧಕ್
ವಾಂಚೊನ್ ಉರೊಂಕ್ ವೊತ್ತಾತ್ ಆಮ್ಚ್ಯಾ ತಾಳ್ಯಾಕ್ ಉದಕ್
ಖೊಟಿ ದೀಷ್ಟ್, ಕ್ರೂರ್ ದಾವ್ಲ್ಯೊ, ಖಾಣ್ ಆಮಿ ಗಿದಾಕ್?
ಆಶೆನಾಂವ್ ತರೀ ಆಮಿ ತುಮ್ಚ್ಯಾ ದುಧಾಕ್
ರಾತ್ಚ್ಯಾ ಅಂಧ್ಕಾರಾಂತ್ ದೆಖ್ತಾಂವ್ ಅಂತ್ರಳಾಚಿಂ ತಾರಾಂ
ಚಿಂತಾಂವ್ ಹಾಸೊನ್-ಖೆಳೊನ್ ಆಸಾತ್ ದರ್ಯಾ ಲ್ಹಾರಾಂ
ಆಮ್ಚೆಂ ಆವ್ಕ್ ಕಿತ್ಲೆಂ ಮೆಜ್ತಾಂವ್ ದೀಸ್ ವೊರಾಂ
ನಾಂತ್ ವಾರೆಸ್ದಾರಾಂ ರಾವೊಂಕ್ ಆಮ್ಕಾಂ ಘರಾಂ
ಸೊಭಾಯ್ ಮಾತ್ಯೆಚಿ ಮಾತ್ಯೆಕ್ ವೆಚ್ಯಾ ಪಯ್ಲೆಂ
ನಶಿಬ್ ಆಮ್ಚೆಂ ತೆಂ ರಚ್ನಾರಾನ್ ಜರ್ ಚೊಯ್ಲೆಂ
ದುಖಾಂ ದೊಳ್ಯಾಂನಿ ಕಾಂಪ್ತಾ ತಾಳ್ಯಾಂನಿ ಗಾಯ್ಲೆಂ
ಗೀತ್ ಜಿವಿತಾಚೆಂ ಯೆತಾಂ ಆಪವ್ಣೆಂ ವಯ್ಲೆಂ
ಆಮ್ಚಿ ಗತ್ ಕಶಿ ಬಾಯ್ಲ್ ನಾಕಾ ಘೊವಾಕ್
ಜಲ್ಮೊನ್ ನಾ ಫಾಯ್ದೊ ಭಯ್ಣ್ ನಾಕಾ ಭಾವಾಕ್
ನಾ ಮೋಲ್ ಸಂಸ್ರಾಂತ್ ಕೋಮಲ್ ಆಮ್ಚ್ಯಾ ಜಿವಾಕ್
ಅಂತಿಮ್ ಆಶಾ ಆಮ್ಚಿ ದಿಯಾತ್ ಆಮ್ಕಾಂ ದೆವಾಕ್
-ಸಿರಿಲ್ ವಾಸ್