ವಿಮಾನ್ ಆಯ್ಲೆಂ

ಸಂಪಾದಕೀಯ್:

ವಿಮಾನಾಚೆಂ ಯೆಣೆಂ ಗಲ್ಫಾಗಾರಾಂಚಿ ಭಿರಾಂತ್ ವಾಡಯ್ತಾ

ಆಮ್ಚೆ ಕವಿ ಕವಿತೆಖಾತೀರ್ ವಿಷಯ್ ನಾಸ್ತಾಂ ಚಡ್ಪಡ್ತಾನಾ, ಭೊಂವ್ತಣಿಚೊ ಏಕ್ ಹುನೊನಿ ವಿಷಯ್ ಫುಗತ್ ಘಾಲ್ನ್ ರುಚಿಚಿ ಪೊಳಿ ವಾಂಟುಂಕ್ ಭಾಯ್ರ್ ಸರ್‍ಲಾ ಕವಿ ಸಿಜ್ಯೆಸ್ ತಾಕೊಡೆ. ತಾಚೆ ಕಾನ್ ಉಗ್ತೆ, ತ್ಯಾ ಕಾನಾಂನಿ ವಿಮಾನಾಂಚೊ ಆವಾಜ್ ತಾಣೆ ರಿಗೊಂಕ್ ಸೊಡ್‌ಲ್ಲ್ಯಾನ್ ಅಸಲಿ ಏಕ್ ಕವಿತಾ ಭುಂಯ್ ಪಡ್ಲ್ಯಾ. ತಾಚೆ ದೊಳೆ ಉಗ್ತೆ, ತ್ಯಾ ದೊಳ್ಯಾಂನಿ ನವ್ಯಾ ವಿಮಾನ್ ಬಂದ್ರಾಚಿ ಕಾಮ್ಗಾರಿ ಪಳೆಲ್ಲ್ಯಾನ್ ಕೊಣ್ಣಾ ಯಾ ತೆ ಕಾಮ್ಗಾರಿವಿಶಿಂ ವಾಚ್‌ಲ್ಲ್ಯಾನ್ ಕೊಣ್ಣಾ ಹಿ ಕವಿತಾ ಜಲ್ಮಾಕ್ ಆಯ್ಲ್ಯಾ.

ಎಕಾ ವಿಮಾನಾಕ್ ಧರುನ್ ಗಾಂವ್ಚೆ ಥರಾವಳ್ ಸಮಸ್ಯೆ, ಗಲ್ಫಾಗಾರಾಂಚ್ಯೊ ಭಿರಾಂತಿ ಸಯ್ತ್ ಕವಿ ಭೋವ್‌ಚ್ ಮಾರ್ಮಿಕ್ ಥರಾನ್ ಹಾಂಗಾಸರ್ ಉಗ್ತಾಂವ್ಕ್ ಯಶಸ್ವಿ ಜಾಲಾ. ಕಾನ್, ದೊಳೆ, ನಾಕ್, ಜೀಬ್ ಕೊಣ್ ಕವಿ ಉಗ್ತ್ಯೊ ದವರ್‍ತಾ ತೊ ಅಸಲ್ಯಾ ಕವಿತೆಂಚೊ ರಾಯ್ ಜಾಂವ್ಕ್ ಚಡಿತ್ ವೇಳ್ ಲಾಗನಾ.

ಮಂಗ್ಳುರ್ ವಿಮಾನ್ ಬಂದ್ರಾಚಿ ಗಜಾಲ್ ಆಮ್ಚ್ಯಾ ಮನಾಂನಿ ಜಿವಿ ಜಿವಿ ಆಸ್ತಾನಾ ಸಿಜ್ಯೆಸ್ ತಾಕೊಡೆಚಿ ಹಿ ಕವಿತಾ ತುಮ್ಕಾಂ ವಿಶೇಸ್ ಬೋನಸ್ ಕಶಿ ಆಮಿ ಪರ್ಗಟ್ ಕೆಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ವಿಮಾನ್ ಆಯ್ಲೆಂ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ವಾಟ್ ಸೊಡಾ, ವಾಟ್ ಸೊಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ವಾಟೆ ವಯ್ಲೆ ಫಾತರ್ ಕಾಡಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಮಾಡಿಯೆವಯ್ಲಿಂ ಪೊಪ್ಳಾಂ ಕಾಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಮುಟ್ಟೆ ವೊಳಾವ್ನ್ ಬಿಯೊ ಹಾಡಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಗಾಂವ್ಚ್ಯಾ ಲೊಕಾಕ್ ಖಬರ್ ದಿಯಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಶೆತಾಂ ವಿಕುನ್ ಮಾತಿ ಖಾಯಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಜಾಗೆ ವಿಕುನ್ ಗಾಂವ್ ಸೊಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ದುಕಾಂ ಗಳವ್ನ್ ಗಳ್ಗಳ್ಯಾಂ ರಡಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ವ್ಹಡ್ಲಿಮಾಂಯ್ಕ್ ಸಾಂಗೊನ್ ಧಾಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಆಬಾಕ್ ಕದೆಲಾರ್ ಉಕಲ್ನ್ ಹಾಡಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಮಂತ್ರಿಕ್ ಆಪವ್ನ್ ಫೊಟೊ ಕಾಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಭೊಟಾಕ್ ಆಪವ್ನ್ ನಾರ್‍ಲ್ ಫೊಡಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಹೊಕ್ಲೆ-ನೊವ್ರ್ಯಾಕ್ ಖಬರ್ ದಿಯಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಹನಿಮೂನಾಕ್ ವ್ಹರುನ್ ಪಾಯಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ಬಾಯ್ಲೆ-ಭುರ್ಗ್ಯಾಂಕ್ ದಾಕಂವ್ಕ್ ವ್ಹರಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ಮಾಂವಾಕ್ ಆಪವ್ನ್ ಶೆಂಭರ್ ಮಾರಾ!

ವಿಮಾನ್ ಆಯ್ಲೆಂ, ವಿಮಾನ್ ಆಯ್ಲೆಂ
ವಿಗಾರ್ ಬಾಪಾಕ್ ಟಿಕೆಟ್ ಕಾಡಾ
ಅಳೆ ದೆಂವ್ಲೆಂ, ಅಳೆ ಧಾಂವ್ಲೆಂ
ದುಡು ಜಮಂವ್ಕ್ ಗಲ್ಫಾಕ್ ಧಾಡಾ!

-ಸಿಜ್ಯೆಸ್ ತಾಕೊಡೆ