ಸಂಪಾದಕೀಯ್:
ಕವಿತೆಚ್ಯಾ ಮೊಗಾಕ್ ಲಾಗೊನ್ ಅನ್ಭೋಗಾಚ್ಯಾ ಗಾಣ್ಯಾಂತ್ ಪಿಳುನ್ ಗೆಲ್ಲೊ ಕವಿ
ಮನೀಸ್ ಮ್ಹಳ್ಯಾರ್ ಬರ್‍ಯಾ ಆನಿ ವಾಯ್ಟಾಂಚೊ ದಾಳೊ. ತೊ ಏಕ್ ಸತ್ ಲಿಪಂವ್ಕ್ ಧಾ ಫಟಿ ಮಾರ್‍ತಾ ಆನಿ ಏಕ್ ಬರೆಂ ಕಾಮ್ ಕರುಂಕ್ ವೆಚೆ ವಾಟೆರ್, ತೆಂ ಕರ್‍ಚೆಖಾತೀರ್ ಜಾಯ್ತ್ಯಾಂಚ್ಯಾ ದೊಳ್ಯಾಂನಿ ದುಕಾಂ ಹಾಡಯ್ತಾ. ಮನ್ಶಾಚೆಂ ಜಿವಿತ್ ಘುಂವ್ಚ್ಯಾ ಸಂಸಾರಾಬರಿ. ಆಜ್ ಬರೆಂ, ಫಾಲ್ಯಾಂ ವಾಯ್ಟ್. ಆಜ್ ಸಾವೆಂ, ಫಾಲ್ಯಾಂ ಸಾರೆಂ. ಆಯ್ಚೊ ಸಂತೊಸ್ ಫಾಲ್ಯಾಂಯ್ ಆಸಜೆ ಮ್ಹಣ್ ನಾ ಆನಿ ಫಾಲ್ಯಾಂಚೆಂ ಫುಗಾಸಾಂವ್ ಪೊರ್‍ವಾಂಯ್ ಪೊಟ್ಲುಂಕ್ ಯೆಂವ್ಚಿ ಗ್ಯಾರಂಟಿ ನಾ.
ರೊನಾಲ್ಡ್ ಸುವಾರಿಸ್ ದುಸ್ರೆ ಪಾವ್ಟಿಂ ಕವಿತಾ ಕುಳಾರಾಕ್ ಯೆತಾನಾ ತಾಚೆ ಕವಿತೆಪಾಟ್ಲ್ಯಾನ್ ವಿಶೇಸ್ ಮ್ಹಿನತ್ ಕಾಡ್‌ಲ್ಲಿ ಝಳ್ಕತಾ, ತೊ ಆರ್ವಿಲ್ಯಾ ದಿಸಾಂನಿ ಕವಿತೆಚ್ಯಾ ಮೊಗಾಕ್ ಲಾಗೊನ್ ಅನ್ಭೋಗಾಚ್ಯಾ ಗಾಣ್ಯಾಂತ್ ಪಿಳುನ್ ಗೆಲ್ಲೊ ದಿಸ್ತಾ.
ಸೊಭಿತ್ ಕವಿತಾ, ಸೊಭಿತ್ ಉತ್ರಾಂ, ಸೊಭಿತ್ ಪ್ರಾಸ್ ಆನಿ ತ್ಯಾ ಪ್ರಾಸಾಂಕ್ ಲಾಗೊನ್ ಕಾನಾಂನಿ ಗಾಜ್ಚೆಂ ಸೊಭಿತ್ ಮನಾಪಸಂದೆಚೆಂ ಸಂಗೀತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗೋಲ್ ಗುಳೊ
ರಚ್ಲಾಯ್ ದೆವಾ ಭುಂಯ್ಚೊ ಹೊ ಗೋಲ್ ಗುಳೊ
ಸಂತೊಸ್ ಹಾಂಗಾಸರ್ ಸ್ವಾಧಿಕ್ ಕಳೊ
ದೂಖ್ ಭಿಜಯ್ತಾ ದೊಳೊ
ಮೋಗ್ ಖಾಲ್ತೊ ಆನಿ ಭೊಳೊ
ರಾಗ್ ಮಾರ್‍ತಾ ತಾಚೆರ್ ಖಿಳೊ
ಸತ್ ನಿತಳ್ ಝರಿಚೊ ಉಮಾಳೊ
ಫಟ್ ಖದ್ವಳ್ಯಾ ಉದ್ಕಾಚೊ ವ್ಹಾಳೊ
ನೀತ್ ಅಂತಸ್ಕರ್ನಾಕ್ ಜಾಗಂವ್ಚೊ ತಾಳೊ
ಅನೀತ್ ಖೊಟ್ಯಾಪಣಾಚೊ ತಿಳೊ
ಸರ್ವ್ ಬರ್‍ಯಾ ಆನಿ ವಾಯ್ಟಾಂಚೊ ಹೊ ದಾಳೊ
ಘೆವ್ನ್ ಚಲ್ತಾಂ ಹಾಂವ್ ಕಿರ್ಕೊಳೊ
-ರೊನಾಲ್ಡ್ ಸುವಾರಿಸ್