ಸಂಪಾದಕೀಯ್:
ಕವಿತಾ ಘೆವ್ನ್ ವೊವ್ಳಿಗ್ ದಿಂವ್ಚಿ ನವಿ ರಿವಾಜ್
ಲಗ್ನಾಚೆ ತಯಾರೆರ್ ಪಡ್ಲಾ ಆಮ್ಚೊ ವ್ಹರೆತ್. ಆಯ್ಚ್ಯಾ ಕಾಜಾರಾಂಚ್ಯಾ ನಾಂವಾನ್ ಜಾಂವ್ಚಿ ವೀದ್‌ವಾವ್ಳಿ ತಾಕಾ ಕಾಯಿಂಚ್ ಸೊಸನಾ, ತ್ಯಾದೆಕುನ್ ತೊ ಪರ್‍ತ್ಯಾನ್ ಪಾಟಿಂ ವೆತಾ ಆದ್ಲ್ಯಾ ರಿತಿ ರಿವಾಜಿಂಕ್. ಹಿ ಕವಿತಾ ಕೊಂಕಣಿ ಲೊಕಾಚ್ಯಾ ಕಾಜಾರಾಂಚ್ಯೊ ಆದ್ಲ್ಯೊ ರಿತಿ ರಿವಾಜಿ ಉಡಾಸಾಕ್ ಪಾಟಿಂ ಹಾಡ್ತಾಸ್ತಾನಾ ಕವಿತೆಂತ್ಲ್ಯಾ ನಾಯಕಾಚ್ಯಾ ಮನಾಂತ್ಲೊ ಆಮ್ಚೆ ಸಂಸ್ಕೃತೆಚೊ ಹುಸ್ಕೊ ಕಳಯ್ತಾ.
ಪ್ರೀತಮ್ ಕಿರೆಂ ನಾಂವಾನ್ ಬರಂವ್ಚೊ ಕವಿ ಪಯ್ಲ್ಯಾನ್ ಪಯ್ಲೊ ಕವಿತಾ ಕುಳಾರಾಕ್ ಪಾವ್ಲಾ. ಕಾಂಯ್ ವೀಸ್ ವರ್‍ಸಾಂ ಆದಿಂ 'ಉದೆವ್' ಪತ್ರಾಂತ್ ವಾವುರ್‍ತಾನಾ ತಾಚಿ ಮ್ಹಾಕಾ ಮುಲಾಕತ್ ಜಾಲ್ಲಿ. ಆತಾಂ ಸಭಾರ್ ತೆಂಪಾ ಉಪ್ರಾಂತ್ ತವಳ್ಚಿಚ್ ಹುಮೆದ್ ಘೆವ್ನ್ ತಾಚಿ ಭೆಟ್ ಜಾತಾನಾ, ಕೊಂಕಣಿಚ್ಯಾ ವಾವ್ರಾಂತ್ ವಾವ್ರಾಡ್ಯಾಂಚಿ ಕಮೀ ನಾ ಮ್ಹಣ್ ಮ್ಹಾಕಾ ಭೊಗ್ತಾ. ಫಕತ್ ವಾವ್ರ್ ಭೆಟಯ್ತಲ್ಯಾಂಕ್ ಪಾಟ್ ಥಾಪುಡ್ತಲ್ಯಾಂಚಿ, ಶಾಭಾಸ್ ಮ್ಹಣ್ತಲ್ಯಾಂಚಿ ಕಮೀ ಆಸಾ.
ಕವಿತಾ ಕುಳಾರಾ ದ್ವಾರಿಂ ಆಮಿ ತೆಂ ಉಣೆಪಣ್ ನಪಯಿಂಚ್ ಕರುಂಕ್ ಪೆಚಾಡುನ್ ಆಸಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವೊವ್ಳಿಗ್
ಮ್ಹಜೆಂ ತುಜೆಂ ಲಗನ್
ಮಾಡಿಯೆ ಹಿತ್ಲಾ ಸೊಭಾಣ್
ಇಂದಾ ತಾಳಿಯಾಂಚೆಂ ನ್ಹೆಸಣ್
ಸಗ್ಳ್ಯಾ ಗಾಂವ್ಚೆಂ ವೊರಾಣ್
ಉದ್ಕಾ ಝರಿಚೆಂ ಪೀವನ್
ಅಮೃತಾಚೆಂ ಬುಯಾಂವ್!
ಮುಕಾರ್ ಉಬೊ ಘರ್‍ಚೊ ಯೆಜ್ಮಾನ್
ಹಾತಿಂ ಪಾನ್‌ಪೊಡ್ ಕುರ್ಪೊಣ್
ಮಾನ್ ವಂದನ್ ಸರ್ವಾಂಕ್
ತುರ್ಬೆಂತಾಚ್ಯಾ ನಾದಾನ್
ತುಜೆಂ ಮ್ಹಜೆಂ ಲಗನ್
ಸೊಭಾಣ್‌ಚ್ ಸೊಭಾಣ್
ಭುರ್ಗಿಂ ಬಾಳಾಂ ಯೆತಲಿಂ
ಮಾಂಕ್ಡಾ ಉಡ್ಕ್ಯೊ ಮಾರ್‍ತಲಿಂ
ಧಾಕ್ಟುಲಿಂ ತಿಂ ಪಡ್ತಾನಾ
ವ್ಹಡ್ಲಿಂ ಪೊರಾಂ ಹಾಸ್ತಲಿಂ
ಮಾಟ್ವಾ ಆಂಗಣ್ ಸೊಭ್ತಲೆಂ
ತುಮ್ಚೆ ಬೊಬೆನ್!
ಯೆಯಾಬಾ, ಯೆಯಾಮಾ
ಭುರ್ಗ್ಯಾಂ ಪೊರಾಂನೊ
ಆಮ್ಚೆಂ ಲಗನ್ ಸೊಭಯಾ
ತುಮ್ಚೆ ಬೊಬೆನ್
ತರ್ನಿಂ ಸಾಳ್ಕಾಂ ಯೆತಲಿಂ
ಪಾಚ್ವಿ ಸಾಡಿ ನ್ಹೆಸೊನ್
ಉಬೊ ಶೆಂಡೊ ಮಾತ್ಯಾರ್
ಲಜ್ ಪಾಲ್ವಾನ್ ಧಾಂಪ್ತಲಿಂ
ಮಾಟ್ವಾ ಆಂಗಣ್ ಸೊಭ್ತಲೆಂ
ತುಮ್ಚ್ಯಾ ರಂಗೀನ್ ಪದಾಂನಿ
ಯೆಯಾಗೋ, ಯೆಯಾಗೆ
ರೀಟಾ, ಕಾತ್ರಿನ್, ಆಬೊಲಿನಾ
ಆಮ್ಚೆಂ ಲಗನ್ ಸೊಭಯಾ
ಚಿತ್ಳಾ ಮೊರಾ ನಾಚಾನ್
ಈಷ್ಟ್ ಮಂತ್ರ್ ಯೆತಲೆ
ಇನಾಮಾಂ ವೊಜಿಂ ಹಾಡ್ತಲೆ
ತೋಂಡ್ ಭರ್ ಶಿಳೊಣ್ಯಾಂನಿ
ಪೊಕ್ರಿ ಪದಾಂ ಗಾಯ್ತಲೆ
ಲಗ್ನಾ ವೇದಿ ಧಲ್ತಲಿ
ಕುಸಾಳಾಂ ದುಕ್ಚ್ಯಾ ಹಾಶಾಂನಿ
ಯೆಯಾರೆ, ಯೆಯಾರೆ
ಡಿಸ್ಕೊ, ಡ್ಯಾನ್ಸ್, ಮಾರುನ್
ಆಮ್ಚೆಂ ಲಗನ್ ಸೊಭಯಾ
ಆಪಾ ಲಿಪಾ ಖೆಳೊನ್
ವಿಗಾರ್ ವಾರ್ ಯೆತಲೊ
ವ್ಹಡ್ಲೊ ಶೆರ್ಮಾಂವ್ ಸಾಂಗ್ತಲೊ
ರೆಸ್ಪೆರಾಚ್ಯಾ ಘಾಂಟಿ ನಾದಾಕ್
ಸರ್ಗ್ ಸಂಸಾರ್ ಜಾಗ್ತಲೊ
ಆಂಜ್ ಭಡ್ವೆ ಗಾಯ್ತಾನಾ
ಲಗ್ನಾ ವೇದಿ ಧಲ್ತಲಿ
ಯೆಯಾ ತುಮಿ, ವ್ಹಡ್ಲ್ಯಾ ಸಾಯ್ಬಾನೊ
ಧವೊ ಧಗ್ಲೊ ನ್ಹೆಸೊನ್
ಆಮ್ಚೆಂ ಲಗನ್ ಸೊಭಯಾ
ವಾಯ್ನಾಕ್ ಬೆಸಾಂವ್ ಘಾಲುನ್!
-ಪ್ರೀತಮ್ ಕಿರೆಂ