ಸಂಪಾದಕೀಯ್:
ಸಾಕ್ರಿಖಡ್ಯಾ ಭೊಂವ್ತಿಂ ಪಾಸಾಯೊ ಮಾರ್‍ಚಿಂ ಚಲ್ಲಾಪಿಲ್ಲಿ ಹುರ್ನಾಂ
ಸಪ್ಣಾಂಚ್ಯಾ ಆವ್ರಾಕ್ ಸಾಂಪ್ಡೊನ್ ನಯೀಫ್ ರಸ್ತ್ಯಾಕ್ ಪಾವ್‌ಲ್ಲ್ಯಾ ಸೊಭಿತ್ ಮುಖಮಳಾಂನಿ ಆಕ್ರೇಕ್ ಕಸಲೊ ಸಂತೊಸ್ ದಿಪ್ಕಲಾ? ಕಾಂಯ್ ಸಮಾಧಾನ್ ತಾಂಕಾಂ ಲಾಭ್ಲಾಂ? ಹ್ಯಾ ಸಂತೊಸ್ ಮ್ಹಳ್ಳ್ಯಾ ಸಾಕ್ರಿಖಡ್ಯಾ ಭೊಂವ್ತಿಂ ತಿಂ ಕಿತ್ಲಿಂ ಪಿಸಾಂತುರ್ ಹುರ್ನಾಂ ಚಲ್ಲಾಪಿಲ್ಲಿ ಕಶಿಂ ಪಾಸಾಯೊ ಮಾರಿನಾಂತ್! ಗೊಡ್ಸೊ ಸಾಕ್ರಿಖಡೊ ಆಂಗ್ ಹಿಂವ್ಳಾವ್ನ್ ಜಿವಿತ್ ಸಾರುನ್ ಕಾಂಯ್ ಆಸ್ತಾ? ಖಡ್ಯಾಚೆ ಕಣ್ ಹ್ಯಾ ಹುರ್ನಾಂಚ್ಯಾ ಪಾಯಾಂಚೆ ದಾಂಬ್ಣೆಕ್ ಜರೊನ್ ಕಾಂಯ್ ವತಾತ್? ಮಾಗೀರ್ ಹೊ ಸಂತೊಸ್ ಮಾಪುಂಕ್ ಕೊಣ್ ಸಕತ್?
ದುಬಾಯ್ ಶೆರ್ ದಿಸಾಕ್ ಏಕ್, ರಾತಿಕ್ ಆನ್ಯೇಕ್‌ಚ್. ರಾತಿಂಚಿಂ ಆಜ್ಯಾಪಾಂ, ರಾತಿಚಿಂ ಆವ್ರಾಂ ಆನಿ ತ್ಯಾ ಆವ್ರಾಂನಿ ವ್ಹಾಳೊನ್ ವೆಚಿಂ ಜಿವಿತಾಂ ಸುಕ್ಷೀಮ್ ದೊಳ್ಯಾಂಕ್ ಮಾತ್ರ್ ದಿಸ್ತಾತ್. ಕವಿಂಚೆ ದೊಳೆ ಘುಗಿಚೆ ಆಸಜೆ ಪಡ್ತಾತ್ ಆನಿ ಆಮ್ಚೊ ಕವಿ ದಿನೇಶ್ ಕೊರೆಯಾ ಹಾಕಾ ಅಪವಾದ್ ನ್ಹಯ್. ತಾಚೆ ದಿಷ್ಟಿಚೆಂ ಮೋಲ್ ಹೆ ಕವಿತೆಂತ್ ಝಳ್ಕೆಕ್ ಯೆತಾ.
ದಿನೇಶ್ ಕೊರೆಯಾನ್ ಕವಿತಾ ಕುಳಾರ್ ಬಾಂಧ್‌ಲ್ಲ್ಯಾ ದಿಸಾಥಾವ್ನ್ ಹ್ಯಾ ಎಕಾ ಸುಶೆಗಾಚ್ಯಾ ಮಾಟ್ವಾಂತ್ ಸರಾಗ್ ವಿಶೆವ್ ಘೆತ್ಲಾ. ತ್ಯಾದೆಕುನ್ ತಾಚ್ಯೊ ಕವಿತಾ ಅಪ್ರೂಪಾನ್ ಭುಂಯ್ ಪಡ್ತಾತ್ ತರೀ ತ್ಯೊ ವೆಗ್ಳ್ಯೊ ದಿಸ್ತಾತ್. ವೆಗ್ಳ್ಯೊ ದೆಕುನ್ ಚ್ಯಾರ್ ಕವಿತಾಂ ಮಧೆಂ ಉಟೊನ್ ದಿಸ್ತಾತ್. ಸಾಂಗಾತಾ ಕವೀಯ್ ಉಟೊನ್ ದಿಸ್ತಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನಯೀಫ್ ರಸ್ತ್ಯಾಚ್ಯಾ ಗಲ್ಲ್ಯಾಂನಿ...
ನಯೀಫ್ ರಸ್ತ್ಯಾಚ್ಯಾ ಗಲ್ಲ್ಯಾಗಲ್ಲ್ಯಾಂನಿ
ತ್ಯಾ ಅಂಡರ್‌ಗ್ರೌಂಡ್ ಚರಂಡ್ಯಾಂನಿ
ದೊನೀ ದೊಳೆ ಉಗ್ಡೊನ್ ಪಳೆಯಾ...
ಸಭಾರಾಂಚಿಂ ಸಭಾರ್ ಸೊಭಿತ್ ಸಪ್ಣಾಂ
ಆವ್ರಾತಶಿಂ ವ್ಹಾಳೊನ್ ಆಸಾತ್
ರಗ್ತಾ ವಾಸಾನ್, ಧವ್ಶಾ ರಂಗಾನ್!
ರಾತಿಂಚ್ಯಾ ಬಾರಾ ವೊರಾಂಚ್ಯಾ
ಶಹರಾಚ್ಯಾ ಉಜ್ವಾಡಾಂತ್‌ಯೀ ಥೊಡೆ
ಸುಶಿಕ್ಷಿತ್ ಕಾಳಕೀ ಕೊನ್ಶೆ...
ಹ್ಯಾ ಕೊನ್ಶ್ಯಾಂನಿ ಥೊಡೊಸೊ ಕಸ್ತಾಳ್
ದಿಸನಾ-ತಿತ್ಲೋಯ್ ನಿತಳ್, ನಿಸ್ಕಳ್!
ಹಾಂಗಾಸರ್ ರಂಗಾಳ್ ಟಾಯ್, ಖಡಕ್ಕ್ ಇಸ್ತ್ರೆಚಿಂ
ಜೋರ್ಡಾನೊ ಶರ್ಟಾಂ, ರಿಂಕಲ್ ಫ್ರೀ ಜೀನ್ಸಾಂ
ಲೇಟೆಸ್ಟ್ ಫ್ಯಾಶನಾಚಿಂ ಸಲ್ವಾರ್ ಖಮೀಜಾಂ
ಮ್ಹಾರಗ್ ಮೊವಾಳ್ ಲೇಟೆಕ್ಸಾಂ
ಅಶಿಕ್ಪಿ, ಸುಶಿಕ್ಪಿ, ಜಾತ್-ಕಾತ್,
Nationalityಚೊ ಬೇಧ್-ಭಾವ್ ಸೊಡ್‌ಲ್ಲಿಂ
ಚಿಕ್ಸಾಂ-
ಭಾಯ್ರ್-ಭಿತರ್, ಭಾಯ್ರ್-ಭಿತರ್
ಯೆತಾತ್-ವತಾತ್, ಯೆತಾತ್-ವತಾತ್.
ದೀಸ್-ರಾತ್ ಅವಿರತ್
ವ್ಹಾಳ್ಚ್ಯಾ ವ್ಹಾಳ್ಯಾಂನಿ
ಸಪ್ಣಾಂ ಥೊಡಿಶಿಂ-
ಇಲ್ಲಿಶಿಂ ಪರ್ಗಾಂವಾಂತ್, ಥೊಡಿಶಿಂ ಘರಾಂತ್...
ತಿಂ ಹಾಂಗಾಚ್ಯಾ ರಂಗಾಳ್ ರಾತಿಂಚ್ಯಾ ಫೆಸ್ತಾ-ಸಾಂತೆಂತ್
ಕೊಣಾಚೆ ಮತಿಕ್ ಯೆತಾತ್?
ಫಕತ್ ಲೊಟಾ ಖೆಟಿಚೊ, ಲುಕ್ಕಾ-ಛುಪ್ಪಿಚೊ
ಆವ್ರ್ ಜಾವ್ನ್ ವ್ಹಾಳ್ತಾತ್!
ಆಸಾತ್ ಸಪ್ಣಾಂ ಹಜಾರ್ ತರೀ
ಹ್ಯಾಲೋಜನ್ ದಿವ್ಯಾಚ್ಯಾ
ಥೌಜಂಡ್ ವಾಟ್ಸಾಚ್ಯಾ ಉಜ್ವಾಡಾಕ್‌ಯ್ ಸಪ್ಣಾಂ ಸಾಂಪ್ಡನಾಂತ್,
ಸಮ್ಜನಾಂತ್.
ಕಸಲಿ ಸಕತ್ ಹಿ-
ಕಸಲ್ಯಾಯಿ ಮನ್ಶಾಚೊ ಎಕಾಂತ್ ತಪಸ್ ಮೊಡುನ್
ಊಂಚ್ ಶಿಖರಾಕ್ ಪಾವಂವ್ಚಿ?
ಕಸಲ್ಯಾಯೀ ಮುಖಮಳಾಂನಿ
ಸರ್ವ್ ಸೊಭಿತ್-
ಆಂಜ್‌ಭಡ್ವೊ ಮಾತ್
ಕಿತ್ಯಾಕ್ ದಿಸ್ತಾ?
ಸಗ್ಳ್ಯಾಂಚಿಂ ಸಪ್ಣಾಂ ಕಾಳಕಾಂತ್ ಧಾಂಪ್ಲ್ಯಾಂತ್;
ಕೊನ್ಶಾ ಲಿಪ್ಲ್ಯಾಂತ್!
ರಗ್ತಾಚೆ ಥೆಂಬೆಚ್-
ಕೆದ್ನಾಂ ಪೇಜ್ ನಾ ತರೀ ತೇಜ್ ಆವ್ರ್ ಜಾತಾತ್
ಥೊಡೊಸೊ ಘಾಮ್ ಮಿಸ್ಳೊನ್, ಘಮಾಸಾನ್ ನಂಯ್ ಜಾವ್ನ್
ವ್ಹಾಳ್ತಾತ್ ....
ಸವಾಯ್ ಜಾಲ್ಯಾಂತ್ ಉದ್ಕಾಂ,
ಸವಯೆರ್ ಪಡ್ಲ್ಯಾಂತ್ ನಾಕಾಂ!
ಹಾಂಗಾಸರ್ ಕಾಯ್ದೆ, ಕಾನುನಾಂ, ಪವಿತ್ರ್ ಪುಸ್ತಕಾಂ
ಸಗ್ಳಿಂ ಹ್ಯಾಚ್ ಆವ್ರಾಂತ್ ವ್ಹಾಳೊನ್ ವತಾತ್
ಸಾಂಗಾತಾ
ಝರಿಚ್ಯಾ ಉದ್ಕಾಂತ್ ಜಲ್ಮೊನ್ ಜಿಯೆಂವ್ಚ್ಯಾ
ಪಯ್ಶಿಲ್ಯಾ ಪಿಲ್ಯಾಂಚೀಯ್
ಫಾಲ್ಯಾಂಚಿಂ ಸಪ್ಣಾಂ
ವೇಳ್ ವಿಭಾಡಿನಾಸ್ತಾಂ
ಮಿನುಟಾಂನಿ
ಮುನಿಸಿಪಾಲಿಟಿಚ್ಯಾ ಪಾಯ್ಪಾಂನಿ
ನಪಂಯಿಂಚ್, ನಾಂಚ್ ಜಾತಾತ್!
- ದಿನೇಶ್ ಕೊರೆಯಾ, ಪೆರ್ನಾಲ್